AAA-mute

tan jan Alesa

mute nimi: suli lili, LLAMMLTT

ni li lipu “AAA-mute” tan kulupu “awen, awen, awen”.

suli: suli Juki

alasa awen a: o awen e AAA-mute lon poki leko. poki o kiwen o suli. o pali e kiwen lon tomo pi jan ala. o weka e jan ale tan ma pi tomo ni, sama ni: jan ala o ken lukin e tomo. jan wan taso o kama tawa tomo lon open pi tenpo mun ale. jan ni o jan pi sona mute. ona o kama lon insa poki o toki tawa AAA-mute kepeken tenpo lili. toki li pini la ona o weka tan tomo tan ma ni. jan li lukin sin e ona la jan o weka e sona pi AAA-mute tan ona kepeken misikeke. ni la ona o toki ala e toki pi AAA-mute tawa jan ante.

sona: AAA-mute li ijo ni: ona li sama lili jan tawa lukin. suli ona li sama suli pi jan mute. kule pi selo ona li laso. kin la, selo ona li suno e laso. luka tu en noka tu li lon ona. sinpin pi lawa ona la uta taso li lon. lawa ona la len lawa laso li lon. sijelo ona la len jelo suli li lon. len ni li len e luka ona. ona li sitelen e “toki pona” kepeken sitelen pona lon len ni. kin la, len laso li lon anpa pi lawa ona. len ni li awen e ona tan lete.

jan li wile toki e ijo pi AAA-mute la ona li toki pona taso. kin la, jan li lon poka ona la ona li toki pona taso. jan ala li sona e nasin pi ken ni, li ken toki e toki ante lon wawa ni. jan li toki tawa AAA-mute la ona li weka sona e toki pi toki pona ala li kama sona li kama toki sama ni: “toki pona li pona mute! jan ale o kama sona e toki pona!”. AAA-mute li toki e sona wawa sama ni tawa ona la ona li ken ala toki ala e sona wawa ni. jan ale li kute e sona wawa ni la jan ale li weka sona e toki ante. ni li ike mute. ni la jan ala o kute e toki pi AAA-mute.

tenpo ale la AAA-mute li alasa weka tan awen. taso, ona li toki mute tawa jan la wawa pi alasa ona li lili taso. ona li toki ala tawa jan lon tenpo suli la wawa li kama suli. poki ala li ken awen e ona lon tenpo ni. ni la o pana e jan pi sona mute tawa ona tan wile toki. jan li sona mute la toki pi ona tu li ken pona li ken jo e sona li ken pona e AAA-mute lon tenpo suli. taso, o awen sona e ni: jan li pini toki tawa AAA-mute la ona li kama nasa li alasa pana e sona wawa tawa jan ale. ni la, ona li pini toki la jan o weka e sona tan ona.

kulupu ni li kama sona e AAA-mute tan ni: jan li pana sona e kulupu “ma pona” lon ilo Siko. AAA-mute li jan wan lon “ma pona”. ni la jan mute li kama toki e pona pi toki pona lon kulupu ni. AAA-mute li kepeken ilo li lon ala poka pi jan ante la wawa pi AAA-mute li lili taso. AAA-mute li weka tan kulupu “ma pona” la ijo ni li kama lon: jan mute li pali e ma tomo sin lon ma Mewika. nimi ona li “ma tomo pona”. lon ona la jan ale li lon wawa pi sona wawa, li toki e toki pona taso, li weka sona e toki ante ale, li alasa toki pona taso e jan ante ale. kulupu ni li kama lon ma ni, li weka e sona wawa tan lawa pi jan ale, li kama awen e AAA-mute.

lipu toki

ni li lipu pi toki ni: jan sona Ulu li toki tawa jan tan “ma tomo pona”. sona wawa li len. jan sona Ulu li toki pona taso tan ala wawa nasa, tan ni taso: jan ante li weka sona e toki ante.

jan sona Ulu: toki. sina pilin seme?

jan ante: mi pilin pona. sina wile kama sona e seme?

jan sona Ulu: o awen, awen. mi tu o open lon ijo lili. nimi sina li seme?

jan ante: mi jan ████████.

jan sona Ulu: pona. mi jan Ulu. sina tan ma seme?

jan ante: mi tan ma tomo pona.

jan sona Ulu: a, taso, ma tomo pona li sin. sin ala la sina tan ma seme?

jan ante: mi tan ma tomo pona taso.

jan sona Ulu: n. tan seme la sina kama tawa ma tomo pona?

jan ante: mi kama sona e toki pona la kon █████ li wile e tawa mi.

jan sona Ulu: sina kama sona e toki pona tan seme, tan tenpo seme?

jan ante: tan ███ ██████ ███ ███ █████ ██ ███ ████ █ ██████ ███.

jan sona Ulu: sina toki e ni tan seme? “toki pona li ███ ████ █ ██████ ███”

jan ante: tan pona ona. toki pona li toki pona anu seme? ni li nimi ona. kon li pana e sona ni tawa mi.

jan sona Ulu: lon, toki pona li pona. taso, kon li seme?

jan ante: kon █████ li kon pi toki pona. sina wile sona e ona la mi ken pana sona tawa sina. mu jan ale l–

(ilo lukin en ilo kute li pakala lon tenpo suli. ona li kama sin la ni li lon: jan sona Ulu li lape, taso jan ante li awen toki tawa ona)

jan ante: –na e toki pona taso sina pana ala e sona tan seme a jan mute li kama sona e toki pona la mi ale li ken pona e toki mi li ken utala ala li ken pali e ma pona pi kama sona pona sina pana ala e sona pi toki pona tan SEME sina wile ala e ni sina wile e ante anu seme seme li wile sina sina sona e KIJETESANTAKALU taso sina pana ala e sona ni tawa jan ale ona li PUWA MUTE sina wile ala pana e sona kijetesantakalu tan SE–

tenpo ni la jan ante li kama anpa li lape tan telo ala tan moku ala.

*lipu li kepeken nasin musi tan lipu ni pi toki Inli (o sona e ken ike: monsuta, moli, jaki). sina wile sona wawa e toki ni la sina ken lukin e lipu pi toki Inli kin.