jan pi sona mi en jan pona ona

tan jan Ontoli

mute nimi: lili, LAMLLL

mi sona e jan. tomo ona la, jan ni taso li lape, li musi, li pali. jan ante ala li lon tomo ona. taso la, tenpo suno ale la, ona li pana moku tawa jan tu. tenpo suno ale la, jan pona li kama tawa tomo jan, li moku. jan pona li pona e jan. kin la, jan sona mi li pona tawa jan pona.

jan pona li sona pona. tenpo moku ale la, jan sona mi en jan pona ona li toki. jan sona mi li toki pi wile kama sona. jan pona li pana e sona tawa ona.

tenpo kama la, jan sona mi li kama ike. ona li toki e ni: “a! ali li ike! mi ike li monsuta li pakala!” ona li wile wawa lon poka pi jan pona. ni la, ona li awen pana moku tawa jan tu. ni la, jan pona li awen kama li awen pana pona.

tenpo ike ni la, jan li pilin e ni: “tenpo moku li pona tawa mi tan ni: jan pona li lon poka mi.” jan sona mi li moku e moku tawa sijelo, taso ona li moku kin e sona tawa lawa.

tenpo li kama li weka la, jan li kama pona. lawa ona li pini toki ike. ale li lukin pona sin tawa jan. ona li toki e ni: “mi pona. ni la, jan pona li weka la, mi ken awen. mi wile ala e ona. a, ona li musi, taso ona li suli ala tawa mi.”

jan li toki e ni la, ona li pali moku tawa jan wan. jan pona li kama ala li toki ala tawa jan sona mi.

tenpo suno kama la, sama tenpo pini la, jan li pali moku tawa jan tu sin. ni la, jan pona li kama sin, li toki ala e tenpo suno pini. ona li toki sama pi tenpo ale.

tenpo kama la, jan li open e ni: ona li pali moku tawa wan. tenpo open la, ona li pali tawa wan lon tenpo pi mute lili, taso tenpo li kama li weka la, ni li kama lon tenpo mute. ni la, jan pona li kama tawa tomo jan lon tenpo pi mute lili.

tenpo wan la, jan pona li kama ala lon tenpo mute mute. jan sona mi li sona ala e ni: “seme la jan pona mi li kama ala tawa mi?” ona li tan, taso ona li sona ala e ni.

ona li open toki e ni: “seme la jan pona li lon ala? ken la mi pini musi e ona. ona li wile ala lon poka mi. ken la ona li moli. mi ken ala lon poki sina lon tenpo kama ale. ken la ona li lon ala, li powe. tenpo pini la, mi wile wawa e jan pona. ken la, ni la lawa mi pali e ona tawa mi.”

jan sona mi li toki e ni la, jan pona li lukin, li kute, li pilin pakala. ona li lukin li wile e ni: jan sona mi li pali moku tawa jan tu. taso jan li pali ala e ni. jan pona li awen wile moku li awen wile li awen wile lon paki pi jan sona mi.