jan Posepomamuka#52208 o,

tan jan Lakuse

mute nimi: suli lili, LLTWAMMML

LIPU NI LI SONA LEN PI KULUPU_NASIN.
SINA WAWA ALA LON KULUPU_NASIN LA,
LIPU NI LI TAWA ALA LUKIN SINA.

tenpo sike #mute-wan-ale-mute-tu
lon tenpo mun Laso_Jelo
lon tenpo suno #luka-luka-wan

tan tomo #luka-ale-wan
lon nasin Pipi_Moli_Kala
lon ma tomo Lape_Lili
lon ma Sona

tawa tomo #luka-ale-mute-tu-ale-luka-tu-wan
lon nasin Mani_Mute_Kalama
lon ma tomo Selo_Pona
lon ma Pona

jan Posepomamuka#52208 o,

n. sina jan pona, anu seme?

sina lon ma Pona li lon ma tomo Selo_Pona li lon nasin Mani_Mute_Kalama. ni la sina jan pona, anu seme? lawa pi kulupu_nasin li pilin e ni: pona sina li wawa mute. ni la kulupu_nasin li pana tawa sina e tomo lon ma ni lon ma tomo ni lon nasin ni. ni la jan ale pi kulupu_nasin ni li ken sona e pona sina. sina pona, jan Posepomamuka#52208 o. sina ken ala jan ike.

sina jan pona. sina jan pona. sina jan pona.

ni la o pana tawa wile mi. mi wile e ijo. mi sona e ni: sina ken pana e ijo ni tawa mi. sina jan pona la sina kama pana. sina wile pana. sina ken ala pana ala.

taso #wan la mi wile pana e sona mute tawa sina. mi wile toki pona e wile mi.

mi jan Solalipimoka#501. sina sin tawa kulupu_nasin la sina sona pi pona ala e nasin nimi. taso mi ken pana e sona tawa sina pi sona lili.

mi jan

• So(na): nimi #wan li toki e wawa jan. mi jan wawa pi alasa sona. mi jo e ilo pona la mi ken sona e ale. mi ken sona e nanpa ale e nimi ale e ijo ale. kulupu_nasin li sona e wawa mi li pana tawa mi e ilo ale. ni la mi ken sona e ale. ni la mi sona e ale sina, jan Posepomamuka#52208 o. mi sona e ni: len sina pi supa lape la sitelen lili pi kasi loje li lon. mi sona e ni: tenpo-suno-tu weka la jan li pana e pan suwi jelo tawa sina. taso sina pilin ala e wile moku li moku ala e pan li pana e ona tawa poki jaki. ken suli la sina pilin e ni: jan ala li lukin. taso mi ken lukin. mi sona e ale. sina telo e poki moku kepeken ko ala pi weka jaki lon tenpo li pana e ko pi uta sina tawa nasin pi ma tomo lon tenpo li unpa e sina kepeken luka lon tenpo la mi sona e tenpo ale ni. sina ken ala weka e lukin mi e kute mi e sona mi e mi.

pi

• La(pe)_Li(li): nimi #tu li toki e ijo pana. kulupu_nasin li pana e Selo_Pona sin tawa sina. tenpo weka la sina lon ala kulupu_nasin li jo e kulupu ala e ma ala e pona ala. nimi sina li Mewi. mi sona e ni kin: tenpo weka la, linja sina li pimeja. selo sina li walo. sina kama lon kulupu_nasin la sina weka e nimi e selo li kama jan Posepomamuka#52208 pi linja laso kasi pi selo laso telo. sina wile weka e jan Mewi pi linja pimeja pi selo walo la sina kama lon kulupu_nasin. sina lukin e ni lon lipu nasa:

  「kulupu_nasin li kulupu wawa sona lon anpa telo li ken pali nasa wawa. sina alasa e ijo pi ken ala la o tawa kulupu_nasin. sina wile weka tan jan ale la o tawa kulupu_nasin. sina wile tawa kulupu_nasin la o weka e kon o moku e telo. ni li nasin pona.」

  la kulupu_nasin li pana e ijo pi ken ala, e Selo_Pona tawa sina. mi la kulupu_nasin li pana e Lape_Lili. lape li ike e ken mi pi alasa sona la mi kama weka e lape ale mi. tenpo ni la sijelo mi li wile ala e lape. mi wawa mute. mi ken lukin e sina lon tenpo ale li ken sona e pilin ale sina. pilin sina li tawa tan pana pi telo loje la mi kute. mi kute e pilin sina lon tenpo ale, lon tenpo poka, lon tenpo ni.

pi

• Pi(pi)_Mo(li)_Ka(la): nimi #tu-wan li toki e pali wile. kulupu_nasin li pana e pali pi suli mute tawa mi. kulupu_nasin li wile ala e ni: jan ante li sona e ijo pi pali mi. taso lon la, jan Posepomamuka#52208 o, sina lili. sina jo ala e jan poka. jan ala li wile kute e sina. sina sama pipi. ni la, kulupu_nasin li ken e ni: mi ken toki e pali mi tawa sina. sina toki e ni tawa jan ante la ni li suli ala sama ni: pipi li mu la jan ala li kute.

  pipi lili li lon telo. sina ken ala lukin e ona. sina kepeken ilo lukin pi wawa ale la sina awen ken ala lukin e pipi. pipi li kon. taso pipi li lon li ike mute.

  mi wile toki wawa e pali ike pipi.

kulupu_nasin li kulupu lon ma la, ken suli la pipi li ike ala tawa kulupu_nasin. taso kulupu_nasin li lon ala ma li lon telo. jan ale li lon telo li moku e telo sama kon. ni la telo li lon ale. ni la pipi li lon ale.

telo la pipi li tawa lon tenpo ale li ken ala pini e tawa. tawa pipi li sama tawa kala. taso sina ken ala poki e pipi tan ni: pipi li kon pi sijelo ala. taso awen la pipi li lon li tawa. pipi mute li kulupu li tawa lon nasin sama. kulupu pipi suli li tawa la tawa li wawa mute. ni li kama la sina ken lukin e ni: telo li tawa kepeken tenpo lili li sama ala telo poka.

pipi li tawa wawa la telo kin li tawa wawa sama nasin telo. suli la, ike tu li kama tan tawa ni pipi:

• #wan la jan li moku e pipi mute la pipi mute li kama lon telo loje sijelo pi jan ni. kulupu pipi li tawa la telo loje li kama tawa kepeken tenpo lili. ni li ken kama e pilin lape e pilin nasa ike. pipi mute a li lon la jan li ken moli tan ni: telo loje li kama tawa kepeken tenpo lili a la pilin li ken ala tawa e loje kepeken nasin pona. tenpo lon la jan mute li ken ala pali pona tan ni: pipi li lon sijelo ona. ni li ike a e pali pi kulupu_nasin. kin la mute pipi li awen kama suli. mute pipi li suli mute la, mi pilin e ni: jan ale li kama moli.
• #tu la pipi mute mute li tawa lon ale telo la telo li kama seli. lon tenpo open la kama seli pi telo kulupu li lili taso. taso pipi li unpa li kama mute suli la telo li kama seli mute. telo li seli mute la kala en jan en kasi li ken ala awen lon telo. ijo moli taso li ken lon telo pi seli mute. pipi li awen la kulupu_nasin li ken ala awen lon tenpo kama.

taso nasin pona li lon. pipi li unpa la pipi li kepeken tenpo suli. kin la, pipi li mute lili lon tenpo ni. tenpo suli la mi alasa e ni: kepeken nasin seme la mi ken weka e ken unpa pipi? mi pilin e ni: mi ken weka e ken unpa la mi ken weka e ken ike.

ni la, jan Posepomamuka#52208 o, mi kama sona e sina. sijelo sina li nasa pona. mi lukin e ni lon sijelo sina: pipi mute li lon. taso telo loje sina li tawa kepeken tenpo nasa ala. pipi li ken ala nasa e telo loje sina. telo loje sina li pona. lon la, jan Posepomamuka luka-wan-ale-ale ante li lon. taso telo pi sina taso li pona. sina… wan.

mi wile e WEKA sina, jan Posepomamuka#52208 o. sina pana e WEKA sina tawa mi la mi ken pali e ni: tenpo kama la, jan li moli ala tan pipi. telo li kama ala seli tan pipi. kulupu_nasin li awen pona. o WEKA e WEKA sina lon WEKA.

sina jan pona, anu seme?

jan Solalipimoka#501