kasi lili li suli

tan jan Ke Tami

mute nimi: lili, LTWALLLW

kasi mute a li lon ma kasi. kasi li ken kule mute, li ken kule lili. kasi li ken suli, li ken suli mute, li ken lili kin. kasi li ken kasi pi tenpo suli, li ken kasi pi tenpo lili, li ken kasi pi suli tenpo, li ken kasi pi lili tenpo. tenpo wan la, kasi sin li kama tan ma. tenpo ni la, ona li lili mute, li wan taso. kasi lili li kama sona e poka ona, li kama sona e kasi ante lon ma ni. kasi ante li suli, li tawa sewi, li kiwen lon selo, li jo e lipu laso mute lon sewi. ni li wawa a tawa kasi sin. ona li pilin e ni: “kasi poka ale li suli mute. mi o kama suli sama kasi ni ale.”

tenpo suno mute li kama, li pini. pona la, kasi lili li kama suli lili. taso awen la, suli pi kasi ante li mute wawa, li anpa mute e suli pi kasi lili. ni li ike ala tawa kasi pi suli lili. ona li sona e nasin kasi. “kasi ante li suli la, suli ni li wile e tenpo mute. mi lon tenpo lili taso. ona ale li suli la, mi o sama ona. ni la mi awen tenpo.”

tenpo li tawa la, sewi li kama nasa. kule sewi li kama weka. telo li kama tan sewi, li kama lon ma lon kasi ale. telo li tawa lon selo kasi, li tawa anpa ma la, noka kasi li kama moku e telo. telo li pini la, kule li sin lon sewi. suno a li suno e ma e kasi, li wawa e lipu. ni ale la, kasi poka li kama wawa, li suli e lipu laso ona. taso kasi lili li sama ala. telo li pona e ona. taso ona li kama ala suli mute. lipu ala li lon sewi ona. ni li nasa tawa kasi ni. “suno li wawa e kasi ante. kasi ante ale li wawa la, suno o wawa e mi kin. tan seme la, ni ala li kama?”

tenpo li awen tawa. kasi li kama ala suli sewi, li kama ala sama kasi poka. kasi lili li awen. taso ona li ante lili taso. ona li kama pilin ike li kama pilin anpa a. “mi ken ala kama suli tan seme? mi ken ala kama sama kasi ante tan seme? kasi ante li suli. mi lili. ni la mi kasi ike, anu seme? mi wan taso. pona ala li kama tawa mi.”

taso tenpo ni la toki li kama tawa kasi: “toki, kasi o.” sin ni li sin nasa a tawa kasi. ona li sona ala e mama pi toki ni. “a. toki. a. sina seme?” toki li kama sin: “mi kasi pi suli sewi. mi kasi pi suli tenpo. mi lon poka sina.” a! ni li kasi wawa suli! “kasi suli o! mi kasi lili. sina kasi suli. mi sama ala sina a. mi kasi ala kasi ike?” toki sin pi kasi ante li kama: “ala a. sina kasi pona. a, sona mi la, sina kin li kasi suli.” ni li pona lili e pilin kasi. taso namako ike li awen lon pilin ona. “sina pona e pilin mi. taso mi suli tawa sina la sijelo mi li lili tawa sijelo suli sina. mi sama ala sina. sina o! sina kasi suli a! mi wan taso. pona ala li ken lon mi.”

toki kama li toki pi pilin musi: “kasi sin o, sina kama ken toki tawa mi kepeken nasin seme? sina sona ala sona e ni?” a ni li ijo sin tawa kasi pi pilin anpa. “mi sona ala. o toki e sona!” ni la kasi sona li pana e sona. “telo li kama tawa ma la mi moku e telo kepeken noka mi. sina kin li ni.” - “mi sona e ni. ni li nasin pi kasi ale lon ma ni. noka mi li lon insa ma la ona li ken moku e telo tan insa ma.” - “pona. a, o sona: lon la, mi en sina li sama ala. suli mi li suli sina ala. taso sina suli. tenpo suno pini mute la, sijelo li kama suli.” - “ni li ken ala lon. sina tawa sewi a! mi awen lon ma anpa.” - “sina sona pona a. taso sijelo sina li suli. sijelo mi li tawa sewi. sijelo sina li tawa anpa. noka sina li suli mute. noka sina li kama suli la, ona li kama lon noka mi. mi en sina li ken toki tan ni.” ni li wawa pona e pilin kasi. ona kin li suli a! ona li… “mi ken toki tawa sina la, mi wan taso ala! mi en sina li tu a.” - “noka sina li kama suli la, sina ken kama toki tawa kasi poka ante kin.”

ni la kasi pi suli anpa en kasi mute pi suli sewi li kama kulupu pona.