lipu pi soweli Lulu

tan jan Non

mute nimi: lili, LWAM

tenpo pini la soweli lili Lulu li lon.
ona li pilin pona a li pilin wawa a!
lukin ona la soweli ale li pilin pona kin.
kin la jan ale li pona tawa soweli Lulu.

pilin sina la ni li ken ala, anu seme?
ni li lon.
soweli Lulu li jo e olin mute mute a.
ona li olin e ale.

tenpo suno wan la soweli lili Lulu li wile e kili.
ni la ona li tawa ma kasi.
ma kasi li ma pi soweli mute.
nasin la soweli Lulu li lukin e soweli mute.

soweli wawa li lukin e soweli Lulu li toki e ni: “soweli Lulu o,
suno pona! sina pilin seme?”
soweli Lulu li toki: “mi pilin pona! suno ni la sina lukin wawa mute!”
soweli wawa li pana e sinpin pona. :)

soweli suli li lukin e soweli Lulu li toki e ni: “soweli Lulu o, sina tawa ma kasi tan seme?”
soweli Lulu li toki: “mi wile e kili! tenpo suno sina o pona!”
soweli suli li pana e sinpin pona. :)

waso pi pona lukin li lukin e soweli Lulu li toki e ni: “soweli Lulu o, sina pona ala pona?”
soweli Lulu li toki: “mi pona a! sina pona mute lukin!”
waso li pana e sinpin pona. :)

soweli walo li lukin e soweli Lulu li toki ala.
soweli Lulu li toki: “soweli walo o, sina pilin ala pilin pona?”
soweli walo li toki ala li tawa.

soweli Lulu li sona ala e pilin ni.
tenpo ale la soweli ale li toki tawa soweli Lulu.
taso, pilin ike lili ni li wawa ala tawa soweli Lulu.
soweli Lulu li pilin e ni: ken la soweli walo li pilin ike lon sijelo
ona. anu la kute ona li pona ala.

soweli Lulu li awen tawa li kama lon poka kasi kili.
kasi kili li suli, li sin ala.
tenpo suli mute la kasi kili li awen lon ma ni.
taso ike la, kasi kili li tawa anpa.
ni li tenpo ike a!
soweli Lulu li lon anpa ona!

pona la sijelo pi soweli Lulu li pakala ala li pona.
taso, kasi la soweli Lulu ken ala tawa.
ni li ike, soweli Lulu li ken ala weka.

soweli Lulu li awen. ken la jan li kama li tawa sewi e kasi.
tenpo lili la soweli mute li kama! soweli suli en soweli wawa en waso pi pona lukin li kama. kulupu li tawa sewi e kasi kili li pona e soweli Lulu. soweli Lulu li toki e ni: “sina pona a! sina ale li lon ala la mi ken ala tawa lon tenpo ale.”
kulupu li toki e ni: “mi mute li ken pona e sina la mi mute li kama! sina jan pona mi!”
soweli Lulu li toki: “seme la sina ale li sona e ni: mi lon anpa kasi, li wile e sina?”
kulupu li toki: “soweli walo li lukin e sina, li tawa mi mute, li toki.”
“soweli walo la sina pilin pona. ona li lon ala la mi mute li sona ala li kama ala.”

soweli Lulu li tawa tomo pi soweli walo li pana e kili tawa ona.
soweli Lulu li toki e ni: “sina pona a.”
soweli walo: “mi ike ala tawa sina, anu seme?”
soweli Lulu: “sina pona tawa mi! sina la mi pilin pona!”
soweli walo: “taso, tenpo pini la mi toki ala tawa sina.”
soweli Lulu: “tan seme?”
soweli walo: “ken toki mi li ike, mi ken ala toki wawa.”
soweli Lulu li kama sona e ni. ona tu li moku e kili li pilin pona.

jan pi toki mute ala li lon.
ken la ona li ken ala toki pona.
ona li ike ala. sina ike ala tawa ona.