mije pi utala toki

tan jan Ke Tami

mute nimi: suli lili, LLWAMMLLTT

tenpo wan la, mije li wile tawa esun. ona li kama jo e len lawa ona la, ona li tawa tan tomo ona. open la, ale li pona. kasi li suwi, li lon poka nasin. waso li mu pona. kon li seli pona.

tenpo sama la, mije ante li kama tan esun. jaki lili li kama lon ilo lukin ona. ni la, ona li weka e ilo tan sinpin ona, li wile weka pona e jaki tan ilo. lon tenpo ni la, ona li ken ala lukin. ona li ken ala lukin e mije kama pi len lawa. mije pi ilo lukin li tawa mije pi len lawa. mije pi len lawa li tawa mije pi ilo lukin. mije wan li sijelo e mije ante.

- 「aaaaaa」 - 「a! seme a?」
- 「sina pakala e mi!」 - 「sina utala e mi!」
- 「sina pakala e mi tan seme?」 - 「sina utala e mi tan seme?」
- 「ala. sina ike e mi!」 - 「ala a! sina a ike e mi!」
- 「sina ike!」 - 「sina ike mute!」

kalama ale ni la, jan ante li kama, li lukin e tan kalama. kalama utala ni li sin li musi. mije tu li awen toki pi kalama utala:

- 「sina ike e tenpo suno pona mi!」 - 「sina jaki e pona ale lon tenpo ale!」

kalama awen ni la, jan mute li kama li kama lukin. kulupu lukin li kama suli.

- 「mije pi ilo lukin o! sina sona ala kepeken nasin pona!」 - 「mije pi len lawa o! mu waso suwi li pini la mu li pini tan pali sina!」

utala pi mije tu li awen lon ale pi tenpo suno, li pini ala. jan lukin mute li tawa weka. jan lukin ante li awen.

pini pi tenpo suno la, mije li ken ala awen lon noka ona. ni la, kulupu lukin li kama e supa monsi, e supa moku. jan wan li pana e moku tawa supa la, jan ale li kama moku.

- 「moku sina o utala e uta sina! o pana e namako tawa mi.」 - mije li pana e namako tawa mije ante - 「namako o ike e insa sina!」

moku li pini la, jan li wile lape. taso mije li lape ala, li tawa ala tomo ona. ona tu li awen lukin e ona tu kepeken pilin ike.

- 「mi ken awen lape ala.」
- 「ala a! sina kama lape lon tenpo. mi a li kama ala lape.」

ni la kulupu lukin li pali e supa lape, li tawa lape. mije utala li awen lon supa monsi, li awen lukin.

tenpo pi suno sin la, jan li pini e lape, li lukin e supa moku. lawa mije li lon supa. mije li lape.

tenpo suno ni la, suno li wawa mute, li seli. tan ni la, jan li pali e supa lon sewi. ni li len e suno li pimeja pona e jan ale. kalama pi pali ni li weka e lape tan mije.

- 「a, kalama ni li ken kama tan mije ante taso. ona li wile ike e mi.」
- 「a, pakala! mije ante li kalama ike, li pini e lape mi tan seme?」

mije tu li pilin ike sin tawa mije tu la, ona li mu ike tawa ona. kulupu poka li awen pali la, mije li mu. kulupu pali li pini e pali pi supa sewi la, mije li mu. kulupu li kama lukin e mije lon tenpo sin la, mije li mu. mije li mu, li mu, li mu, li mu! mu ike ona li awen la, ni li ike e kalama ona.

pini la, kalama ona li kama pakala, li kama weka.. tenpo ni la, ona li ken ala mu, li ken ala toki. ona tu li ken awen taso, li ken lukin taso e ona tu. pilin ike li lon sinpin mije.

kulupu li lukin e ni ale. pilin pona li lon sinpin pi jan kulupu. jan lukin li sona e nasin pi mije ni tu. taso mije li sona ala lon tenpo ni.

ale pi tenpo suno la, mije li kama ala ken toki.

pini pi tenpo suno la, jan ale li tawa lape. tenpo pimeja ni la, kon li kama ante. open pi tenpo suno sin la, kon li kama tawa, li kama tawa mute, li kama tawa wawa! ni la, kulupu li pali e sinpin lon poka ale.

pali ni li pini ala e lape mije. taso kon li awen kama wawa la, kon li mu, li kama mu wawa a! mu ni li weka e lape tan mije.

- 「aaaaaaaaaaa! mu sina li ike, li pini e lape mi!」
- 「ala a! mu li tan sina. sina pini ike e lape mi!」

kulupu li kama pini e pali, li kama lukin sin.

- 「sina mu lon tenpo suno pini a! mu sina li wawa. sina wawa, anu seme?」
- 「sina mu sama! mi wawa la, sina kin li wawa!」
- 「pilin sina la, sina suli. pilin sina la, mi lili.」
- 「mi pilin suli, anu seme? ala a! sina pilin suli!」
- 「seme a?! mi pilin suli, anu seme? mi pilin suli tan seme?」
- 「tan mi.」
- 「sina suli e pilin mi, anu seme? ni li ken ala. mama mi li ken suli e pilin mi. jan sama li ken suli e pilin mi. kulupu mi li ken… aa…」

toki ni la, mije li pini e toki, li lukin. ona li lukin e poka ona. ona li kama sona e poka ona.

supa moku li lon. supa monsi li lon. supa lape li lon. poka pi ale ni la, sinpin li lon, li awen e ale insa. sewi sinpin la, supa kin li awen e ale insa. suli la, jan mute li lon insa. jan li lukin e mije tu kepeken pilin pona.

- 「a.」

jan mute ni li kulupu pona.

- 「a.」

mije ante kin li lukin e ni ale.

- 「a.」

jan li kulupu la, supa li lon la, sinpin en supa sewi li awen e ale la… ni li tomo!

- 「ni li tomo.」 - 「ni li tomo.」
- 「mi tu li lon tomo la…」 - 「… mi lon kulupu.」
- 「sina lon kulupu mi」 - 「sina kin a.」
- 「ni la, sina suli e pilin mi.」 - 「sina suli mute e pilin mi a.」
- 「ala a! sina suli mute mute e pilin a!」
- 「ala a! sina pana e olin tawa mi!」
- 「ala! sina olin mute e mi a!」
- 「a! olin mi li suli la, olin sina li suli mute a!」
- 「sina olin suli e mi la, o uta e uta mi!」
- 「o kama tawa mi!」

ni la, mije olin sin li uta lon tomo sin lon poka pi kulupu sin. jan kulupu ale li pilin pona tan ni. sona ona pi tenpo pini li sama sona ona pi tenpo ni: utala li ken wawa, taso olin li ken wawa mute.