ni li nasin

tan palisa jelo Natan

mute nimi: suli mute mute a, MMLLALLLT

open la mu suli li lon. ni li weka e lape mi. mi weka tan supa lape li len kepeken len jelo mi. ale poka li walo walo la jelo ni li namako. ken la tenpo suno ni li ken ante li kama namako tawa mi.
kama moku li lon. ni li kama e mi tawa tomo moku.
jan mute li lon. tomo moku la mi en jan ante mute li kama.
jan suli li lon. jan suli li jan Make li jan pona tawa ale lon. ona li kama toki. “jan pona ale o, suno li sin. tenpo li sin. sama tenpo ale la mi toki e pona lon pi mi ale. mi ale li kama tawa kulupu pona li awen pona lon kulupu pona. mi ale li pona. ni li nasin”
jan ante ale kin li kama toki. “ni li nasin.”

pini pi toki ni la jan ale li open moku. moku li palisa jelo li pan poki pi insa soweli.
pini moku la jan li awen li musi lon toki. mi kama toki tawa jan poka pi sona mi e lape mi e lape ona e pona pi suno pini e pona pi suno lon.
pini pi toki musi la pali li open. pona la pali li lon kulupu pona tawa mi. mi weka e jaki tan supa tan tomo li awen e pona kulupu. ni li nasin.
pini pali la moku li lon sin. jan mute li lon sin. jan suli li lon sin li toki. “jan pona ale o, suno li lon. tenpo li awen. o sona e pona lon e ike pi lon ala. moku pona li lon kama. taso suli la mi ale o lukin tawa lon pi pona awen ala. ni o nanpa wan.”

mi ale li weka tan tomo moku li tawa selo ma pi kulupu pona. sinpin suli pi kule ala la jan li ken lukin e ma weka e ma pi pona weka. kulupu jan li lon ante pi sinpin lukin ni. mi lukin e jan ni la selo ona li sama jan utala. jan suli li open toki. “o lukin e jan lon weka. sama ala ona la pona la mi ale li lon kulupu pona. lon weka li sama ni: jan li ken ala pilin pona. jan li ken ala sona e nasin lon. jan li ken ala ona. jan li kama sona e nasin ona kepeken kulupu pona. ni li nasin”
pini pi toki ni la jan ante ale kin li kama toki. “ni li nasin.”
pini pi tenpo lukin ni la jan ale li tawa sin tomo moku li moku.

pini moku la pali mi li open sin. tenpo open suno la mi weka e jaki tan tomo tan ma insa pi kulupu pona. tenpo pi pini moku la mi tawa ma selo li weka e jaki. selo la sinpin li tu e ma tawa kulupu pona tawa ma weka. ona li kiwen linja lon len la mi ken lukin e weka walo lon weka. nasa a tawa lukin.
taso wan ante li lon. mi pana e ilo mi pi weka jaki tawa anpa li tawa poka selo li wile lukin pona. mi lukin. jan li lon! ale lon la ona li kule wawa suli. linja lawa ona li loje. len ona li laso kasi. sike lili pimeja pi mute lili li lon linja lon sinpin pi len ona. ona li awen lukin e mi la ni li nasa ike lili tawa pilin. taso mi lukin e ona la mi lukin ala e jan utala. selo la ona li pona pilin. taso mi kama lukin pona e ona la ona li open tawa weka. wan la ona li lukin sin e mi, li open sin e tawa weka. tenpo lili la ona li weka tawa ma pi ken lukin mi ala. ni la mi awen e pali mi pi weka jaki.

pini pali la jan li kama kulupu. pona ona la jan suli li nasin e jan ale tawa kulupu olin pi jan tu tu. ni la pona li ken lon. kulupu mi la jan pona Senisi en jan pona Kineka en jan pona Linlesi li lon.

jan pona Linlesi li kama toki tawa mi. “a, suno ni li ike tawa mi. jan pona mi o sona e pona pi sina taso lon awen sina lon kulupu pona. mi o weka tan kulupu pona lon pali mi a la jan ma li lon. jan ma li ni: ona li sona ala e pona sewi pi kulupu pona li awen lon nasin ike ona. mi alasa pona tawa ona kepeken pana sona pi kulupu pona. taso jan li utala, li ike, li toki ike e pona lon. ona li toki ike e mi tan lon mi pi kulupu pona. jan suli li toki e ni: jan ma li lon ala kulupu pona la ona li ken ala sona pona e ike lon li ken ala kama pona. jan ma li ike a.”
mi kama wile kama toki e jan ma pi lukin mi. tenpo lukin pi ma weka la mi sona e ike ken pi ijo ni. taso mi alasa toki. “a, taso mi lukin e jan wan pi kulupu pona ala lon pali mi pi suno ni. ona li-”
jan pona Linlesi li toki. “a! ona li utala seme tawa sina?”
jan pona Kineka li toki. “a? jan ni li alasa pakala e sinpin pi kulupu pona, anu seme a?”
jan pona Senisi li toki. “nasa a! jan li toki utala suli tawa sina, anu seme?”
jan tu wan ni li lukin e mi li wile sona a. taso lon la jan pi lukin mi li utala ala. mi kama toki. “a. jan ni li utala ala li toki utala ala li pakala ala e mi. taso la ona li lukin e mi li kalama ala.”
jan pona Linlesi li toki. “a mi sona e lon. ni la jan ni li alasa len e utala ona. ona li wile pakala. taso sina kama lukin a li weka e wile pakala ona. pona a.”
ken la ni li lon. taso mi lukin e ona la mi toki insa ala e jan utala. mi toki. “a.. ken. lon. toki sina li lon.”

jan ante li toki e ike pi lon ona. jan pona Senisi li toki e jan lawa ike ona. jan lawa ona li weka e ona tan pali tan toki pi kulupu pona. jan pona Kineka li toki e pona pi jan poka ona. lon la jan poka li pilin ike tawa kulupu pona. taso jan poka li wile ala weka tan jan pona Kineka tan toki pi kulupu pona la jan pona Kineka li pilin e ni: ona li ken alasa kama e jan poka ni tawa kulupu pona.
pini toki la tenpo lape li lon. ale lon pi kulupu pona li walo la lape li kama e weka lili tan ni lon pimeja.

open la mu suli li lon. ni li weka e lape mi. mi weka tan supa lape li len kepeken len jelo mi. ale poka li walo. len li jelo sama tenpo ale.
kama moku li lon. ni li kama e mi tawa tomo moku.
jan mute li lon. tomo moku la mi en jan ante mute li kama.
jan suli li lon. ona li kama toki. “jan pona ale o, suno li sin. tenpo li sin. mi o toki e pona lon pi mi ale. mi ale li kama tawa kulupu pona li awen pona lon kulupu pona. mi ale li pona. ken la jan lon selo li alasa ike.” mi toki insa e ni: a, jan Make li kama sona e jan ma pi lukin mi tan suno pini. “taso mi ale li awen. ni li nasin.”
jan ante ale kin li kama toki. “ni li nasin.”

pini pi toki ni la jan ale li open moku. moku li palisa jelo li pan poki pi insa soweli.
pini moku la jan li awen li musi lon toki. mi toki lili tawa jan poka.
pini pi toki musi la pali li open. mi tawa tomo mute li weka e jaki tan ma.
pini pali la moku li lon sin. jan mute li lon sin. jan suli li lon sin li toki. “jan pona ale o, suno li lon. tenpo li awen. o sona e pona lon e ike pi lon ala. moku pona li lon kama. taso suli la mi ale o lukin tawa lon pi pona awen ala. ni o nanpa wan.”

mi ale li weka tan tomo moku li tawa selo ma pi kulupu pona. sinpin lukin li lon. jan pi selo utala li lon ante pi sinpin lukin ni. jan suli li open toki. “o lukin e jan lon weka. sama ala ona la pona la mi ale li lon kulupu pona. lon weka li sama ni: jan li ken ala pilin pona. jan li ken ala sona e nasin lon. jan li ken ala ona. jan li kama sona e nasin ona kepeken kulupu pona. ni li nasin.” ona li toki la mi lukin wawa tawa jan ale lon weka. lukin en lukin la mi lukin ala e len laso.
pini pi toki ni la jan ante ale kin li kama toki. “ni li nasin.”
pini pi tenpo lukin ni la jan ale li tawa sin tomo moku li moku.

pini moku la pali mi li open sin. mi tawa selo ma pi kulupu pona li weka e jaki tan ijo lon ni. mi pali li pali. tenpo la mi lukin e ma lon weka. tenpo suli la mi lukin ala e jan. taso kama la mi kama lukin. ma lili pi kasi ala li lon poka ante pi sinpin kulupu. ma lili ni la supa kasi li lon sama ni: tenpo pini weka la jan li pakala e kasi suli li awen e anpa ona. supa ni la jan pi len laso li awen li lukin e mi. mi lukin e luka ona li lukin ala e ilo pi pakala sinpin. mi lukin e sinpin pi kulupu pona li lukin ala e pakala lon sinpin tan jan ni. ona li lon taso. ona li utala ala. mi pana e ilo mi pi weka jaki lon poka pi sinpin tomo li tawa sinpin selo.

mi kama toki. “a. jan, o. sina lon ni tan seme?”
ona li weka tan awen lon supa kasi li toki. “a mi lon li lukin e ma tomo ni. ona li walo wawa a! mi lukin e ona ale la mi sona e ni: awen walo pi ma ni li pali suli. jaki lili li kama tawa ona la ona li kama kule ike. nasa a tawa lukin. mi awen lon supa ni la mi ken lukin pona e sina e jan ante pali. ken la tawa lukin mi la sina ale li ken sama pipi lili pali a a.”
mi toki. “lon. mi awen e walo wawa ni pi kulupu pona. jan suli li toki e ni: pali pi weka jaki li suli mute tawa kulupu pona. awen pi weka jaki li toki e weka pi ike ale lon kulupu pona. ni li nasin.”
jan ma li toki. “a.. pona. pona tawa sina li pona tawa mi. taso sina toki e kulupu pona seme e jan suli seme?”
mi toki. “mi toki e kulupu pona a. mi toki e jan suli Make a. sina sona ala e ona, anu seme? jan suli li toki e ni: jan ale pi sona ala la sona lon li lon. sona lon li toki e wile kama tawa kulupu pona.”
jan ma li awen sin lon supa kasi li toki. “a.. mi sona.”

pipi lili lon supa kasi li kama tawa luka ona la ona li luka e pipi ni tawa weka. ona li kama toki. “ante la mi wile sona e ijo. tenpo suli la mi lukin e ni: sina pali li weka e jaki lon ma ni. taso tenpo pi pali ala la sina seme?”
mi toki insa lili li kama toki. “a mi pali ala la mi toki tawa jan pona pi kulupu pona li kute e sona pona pi jan suli.”
jan ma li toki. “taso musi la sina pali e seme? sina musi supa utala, anu seme? sina tawa musi, anu seme? sina musi sike, anu seme? ni ale li ijo musi.”
ale la mi musi ala kepeken ijo sama ni. mi pali. mi lon kulupu pona. taso lon mi li musi a. mi toki. “ni ale li musi ken. taso musi pi pona suli li ni: jan li lon kulupu pona li lon poka pi jan pona. ni li pona suli li ijo suli tawa ale.” jan ma li open toki la mi lukin e ilo tenpo li kama sona e ni: mi o pini pali o kama sin tawa kulupu. kin la mu suli pi pini pali li kama. ni la mi toki. “a mi tawa, jan ma o. tenpo pali li pini.”
jan ma li toki. “o pona a. suno kama la mi lon ni sama.”

mi kama weka tan ma selo li poki e ilo mi pi weka jaki li tawa. pini pali la jan li kama kulupu tawa jan pi kulupu olin ona.

jan pona Senisi li kama toki e ijo suli lon pali ona pi suno ni. “ijo namako a li kama tawa mi! mi toki mute e ike pi jan lawa pali mi lon tenpo pini. jan ante li lukin e ijo len ona li kama sona e ni: ona li weka e mani tan kulupu esun. ni la jan lawa esun li kama li toki e ni: o weka a! len pona pi jan ni li weka. ike taso ona li kama ijo sona tawa jan ante a. jan ike li weka!”
jan pona Linlesi li kama toki lili. “a lon, jan ike li jan ma la ona li jan ike a.”
jan pona Senisi li awen toki. “namako ante la jan lawa pali sin li suwi mute! ona li open pali lon suno kama. taso suno ni la ona li kama li toki tawa jan pali ale sama mi li pana e pan suwi li pana e pilin pona tawa ma pali.”
jan pona Kineka li open toki. “a, jan pona Senisi o, sina sona e toki pi jan Make. jan ma li lon ala kulupu pona la ona li ken ala sona pona e ike lon li ken ala kama pona. ante la jan Make li toki e ni: jan ale pi sona ala la sona lon li lon. ni tu li sama sona suli ni: jan pi pona ala la pona li ken tan jan suli Make tan kulupu pona. kulupu pona la jan pi sona ala li sona e wile pona pi kulupu pona. sama la kulupu pona la jan pi pona ala li ken pona. taso ni li pona ona ala. jan pali ike sina en jan pali suwi sina la o awen sona e ni: pona taso li tan ona ala li tan pona sama kulupu pona sama jan Make.”
jan pona Senisi li toki. “a, lon. toki sina li lon, jan pona o.”

jan pona Linlesi li kama toki li wile ante e ijo toki la ona li toki tawa mi. “seme a li lon sina?”
mi toki. “ijo li awen pona tawa mi sama tenpo mute. taso.. jan ma pi len laso li lon sin. ona li alasa ala pakala li lon lukin taso. mi toki e ijo pi jan suli tawa ona. suwi ona en pona ona li suli la ona li kute.” jan Kineka li kute e ni la ona li lukin tawa mi kepeken nasin pi pilin ike lon. ona li kama open toki. taso mi nanpa wan li awen toki. “a taso mi toki pi pakala lili. pona selo ona en suwi selo ona li pona tawa mi. taso ona li pona ala li suwi ala. jan suli la toki ni li lon.” lukin la jan Kineka li pini ala pilin ike lili tan toki ni.

jan Kineka li kama toki tawa mi. “a, jan pona mi o a, mi tu li sona. jan Make li toki e ni: taso la pona jan pi kulupu pona li pona tawa pona jan pi kulupu pona. toki ni la mi ale o awen sona e ni: mi mute pi kulupu pona li lon poka la ni li kama e pona. mi mute li ken toki tawa jan pi kulupu pona ala e ijo lon tenpo e pona pi kulupu pona. taso wile pona tawa sina la mi wile toki e ni: o pini toki tawa jan ma sina pi len laso. mi wile ala e ike ona tawa sina.”
mi kute li toki lili. “a, pona.” ni li nasa tawa mi: jan ma ni li suwi la mi o toki ala tawa ona. taso suwi sama jan ni pi len laso li lon ala jan mute pi kulupu pona. jan ni li lon ala kulupu pona la ken la ona li pona suli ala. taso ona li suwi li pona a. toki insa la ni taso li lon mi: mi sona ala a..

toki ante la jan pona Linlesi en jan pona Kineka li toki e pona lon e ike lon. taso ijo sin suli li lon ala tawa ona.
mi toki insa e ni: mi wile sona e pona lon jan ma. ken la mi ken pali sama jan pona Kineka li ken alasa kama e jan ma tawa kulupu pona.

pini toki la tenpo lape li lon. sin la mi ken lon weka tan walo lon li ken pimeja lape.

open la mu suli li lon. ni li weka e lape mi. mi weka tan supa lape li len kepeken len jelo mi. ale poka li walo. len li jelo sama tenpo ale. toki insa mi la mi awen sona ala e ni: len ante pi jelo ala li lon ala lon kulupu? len laso li lon ala lon kulupu?
jan mute li lon. tomo moku la mi en jan ante mute li kama.
jan suli li lon. ona li kama toki. “jan pona ale o, suno li sin. tenpo li sin. sama tenpo ale la mi toki e pona lon pi mi ale. mi ale li kama tawa kulupu pona li awen pona lon kulupu pona. mi ale li pona. ni li nasin”
mi ala la jan ante ale kin li kama toki. “ni li nasin.”

pini pi toki ni la jan ale li open moku. moku li palisa jelo li pan poki pi insa soweli.
pini moku la jan li awen li musi lon toki. mi kama tawa jan pona ante. pali sama mi la jan ni li weka e jaki tan ma.
pini pi toki musi la pali li open. mi toki e wile tawa jan ante ni pi weka jaki. “a jan pona o, ni li pona ala pona tawa sina: esun la mi weka e jaki tan selo pi kulupu pona la sina weka e jaki tan insa pi kulupu pona.”
jan ante li toki. “ni li pona. o pona a!”

mi tawa ma selo li open weka e jaki. lon pali ni la mi tawa li alasa e jan pi len laso. mi lukin mute la ona li lon! ona li toki. “toki a! sina awen pona, anu seme? tenpo ni la mi kama e leko musi a. sinpin luka wan pi kule ante li lon. sina ken tawa e sinpin li ken nasa e kule. sina wile musi, anu seme a?”
mi lukin e leko lili lon luka ona. leko la walo en pimeja en laso kasi en laso telo en loje en jelo li lon li lon nasa. mi toki. “musi a. mi wile a.”

jan pi len laso li lukin tawa sewi pi sinpin selo li toki. “o lukin a! ona li kama.” kepeken luka la ona li sewi e leko la leko li tawa poka ante pi sinpin selo li kama tawa mi. ona li kama anpa tawa mi la mi alasa luka e ona. taso mi pakala. ona li tawa ma li kama pakala. supa lili kule li kama weka tan leko. mi lukin e jan pi len laso li kama toki. “a… mi pakala. mi wile ala ike.. pakala tawa ijo sina. a-”
ona li toki. “a, ale li pona. o pana sin e lipu kule tawa leko. ale li pona. ona li pakala lili taso li pakala pakala ala.” ni la mi kama e leko tawa luka mi li pana e lipu kule lili lon lupa leko. ona li kama sin lon leko li pona sin a la mi pilin pona.

mi en jan ni li musi leko li toki lon tenpo pi suli lili. mi tu li awen toki la tenpo li weka la mi kama sona e ni: mi o weka lon tenpo poka. taso mi awen sona ala e nimi ona ni la mi toki. “nimi sina li seme a? mi awen sona ala a.”
ona li kama toki. “a, mi jan Melan.”
mi toki. “pona a, jan Melan o. sina suwi tawa mi. jan pi kulupu pona ala la taso la mi sona e jan utala e ike lon tenpo mute. jan utala li lon weka la mi sona e ike ona taso.”
jan Melan li toki. “pona.” mi lukin e sinpin lawa ona la mi pilin e ni: ona li wile toki e ijo ante li len e ijo pi wile toki.

mi toki sin. “taso sina sama ala tawa jan utala. sina pona.”
jan Melan li lukin e anpa. tenpo lili la kalama toki li ala. taso ona li kama toki. “a, lili la sina weka ala weka tan kulupu pona lon tenpo ale? jan mute pi pilin pona mi li… pali sama jan utala pi toki sina. ona li alasa toki pona e ike la jan li kute ala la ona li toki ike. taso, taso sama toki sina la mi sona e ni: sina ante li pona li kute.”

mi toki insa e jan Kineka, e jan pona Linlesi, e jan pona Senisi, e jan ante. ona ale li wan pi pona awen li wan pi kulupu pona. taso tenpo la ijo li ante. tenpo la ona li toki ike li toki jaki e lon pi jan ante. taso jan ante li ike la ona o ken toki e ike ni, anu seme?
jan pona Melan li ike ala. ni taso la mi sona pona. ni la mi toki. “a. mi weka ala lon tenpo suli. taso sina kama wile e mi. mi wile. mi wile a. sona weka li namako. ken la ona li ike. taso sina ike ala la mi sona e ni: ken la ona li ken pona.” mi lukin e jan pona Melan la ona li lukin e weka. ken la ona li pilin nasa tawa toki pi pona lon ona. mu suli li toki e ni tawa mi: tenpo pali li kama pini. mi awen toki. “tenpo suno kama la mi kama tawa ma ni li pakala e sinpin selo li weka. sina ken ala ken lon?”
jan pona Melan li toki. “ken a!” ona li toki e ni la mi weka. tenpo pali li pini a. taso la mi o awen tawa weka kama.

pini pali la moku li lon sin. jan mute li lon sin. lawa Make li lon sin li toki. “jan pona ale o, suno li lon. tenpo li awen.” mi toki insa e ni: ken la tenpo li awen. taso mi tenpo ala. mi weka. “o sona e pona lon e ike pi lon ala. moku pona li lon kama. taso suli la mi ale o lukin tawa lon pi pona awen ala. ni o nanpa wan.”

mi ale li weka tan tomo moku li tawa selo ma kulupu. sinpin suli pi kule ala la jan li ken lukin e ma weka e ma pi awen taso ala. kulupu jan li lon ante pi sinpin lukin ni. mi lukin e jan ni la selo ona li sama jan utala sama tenpo ale. taso jan utala kin li jan li ike ale taso ala. jan li jan. lawa Make li open toki. “o lukin e jan lon weka. sama ala ona la pona la mi ale li lon kulupu pona. lon weka li sama ni: jan li ken ala pilin pona. jan li ken ala sona e nasin lon. jan li ken ala ona. jan li kama sona e nasin ona kepeken kulupu pona. ni li nasin”
mi ala la jan ante ale kin li kama toki. “ni li nasin.”
pini pi tenpo lukin ni la jan ale li tawa sin tomo moku li moku.

pini moku la pali mi li open sin. tenpo open suno la mi weka e jaki tan tomo tan ma selo kulupu la mi kama weka e jaki tan ma insa kulupu. wawa pilin mi tan jan pona Melan la mi pali wawa li pini kepeken tenpo lili. ni la mi tawa musi nasa lon pini pi weka jaki. kama la mi weka a! ni li nasa a li wawa a tawa mi. nasin li seme lon weka?

pini pali li kama. mi kama weka tan ma tomo li poki e ilo mi pi weka jaki li tawa. pini pali la mi kama kulupu.
suno ni la jan Linlesi li open e toki. “aaa jan pi nasa ike li lon tomo pali mi. toki ona la ona li lon kulupu pona sama mi ale lon tenpo pini li kama weka a tan ona! ona li kepeken ike ona li alasa len e pona suli pi kulupu pona kepeken ike ni. jan ni li toki e ni: a jan pi kulupu ‘pona’ li pali pakala tawa mi. ken la ni li lon. taso jan suli li toki e ni: ike jan li ike ala e pona pi kulupu pona. sama jan kasi la kulupu pona li alasa kama e kili pona. kili ike li lon la sina toki ala e ni: jan kasi li ike ale li ike wawa li ike taso!”
jan Kineka kin li toki. “lon. jan li wile kama pona la ona o weka e pilin ike ona tawa kulupu pona. ni la ona li kama pilin pona. kin la jan suli Make li toki e ni: jan pi pona awen li awen. jan pi toki sina li toki ike sama ni la sina ken sona e ni: tenpo ala a la ona li jan pona pi kulupu pona. ona li jan ike len li kama ala wan pi kulupu pona.”
lukin la jan Linlesi en jan Senisi li pilin pona tawa toki ni.

mi wile ante e ijo toki la mi kama toki. “namako ante li lon mi pi suno ni. tawa jan pona poka la mi esun e pali mi li weka e jaki tan selo pi kulupu pona lon tenpo open. tenpo open la ma li seli ala li suwi tawa mi. ken la mi wile awen ni.”
jan Senisi li kama toki. “pona a! mi sona e ni: moku nanpa tu li pini la ma li ken kama seli ike a. sina wile kama weka e jaki tan selo lon tenpo open la pona la o wile sona, jan pona mi o.”
toki ante la jan Kineka li toki e jan lawa suwi ona. jan Senisi li pilin lape la ona li wile ala toki mute li wile weka tawa tenpo lape.

pini toki la tenpo lape li lon. taso lape li kama ala. lape mi li ken ala. wawa mute en toki ike pi jan olin la mi ken ala kama lape sama wile mi. ken la mi ken ala weka tan kulupu ni lon lape mi. taso mi ken weka lon suno kama. mi wile weka a.

open la mu suli li lon. ni li weka e lape mi. mi weka tan supa lape li len kepeken len jelo mi. ale poka li walo walo la jelo ni li namako. taso ona li namako taso ala. mi wile weka a. ni li namako pi suli taso.

kama moku li lon. taso ni li kama ala e mi tawa tomo moku. mi tawa wawa ma selo. jan Kineka li toki. “a, sina tawa seme a? tenpo moku li lon, jan pona mi o, tenpo la jan li toki e, ike ken sina. jan ma sina pi len laso la jan li pilin e ni: ken la sina kama kama nasa tan ona. ni li lon, anu seme? sina tawa seme?”
toki pi jan Kineka li nasa pilin lili e mi. taso mi awen tawa li toki. “a ale li pona a! ijo mi li lon ma selo la mi o kama e ona. mi ken tawa wawa li ken awen kama moku lon tenpo pona. o pona, o pona!” jan Kineka li alasa toki tawa mi. taso mi weka wawa. mi wile weka a.

mi kama tawa ma lon pi jan pona Melan. ona li lon. mi pakala e linja kiwen pi sinpin selo. linja mute li lon len. mi alasa kama e lupa pi ken tawa la jan pona Melan li toki. “toki a! sina kama ala e ijo sina kin, anu seme? ken la moku en ante li pona.”
awen pali lupa la mi toki. “kama ala.” pali wawa ante pi mute lili la lupa li lon. mi tawa lupa li kama lon ante pi sinpin selo a. mi kama toki. “mi lon a! a, ma pi kiwen walo ala li ko a a. nasa.”
jan pona Melan li toki. “o kama! mi wile kama e sina tawa ma tomo pi kasi taso ala.”

jan pona Melan li kama tawa la mi toki e ni. “a, ni li nasin, anu seme?”
jan pona Melan li toki. “a, ala. wile tawa sina li seme? nasin ale li ken weka e mi tu tan kasi ni.”
mi toki. “a, mi sona ala. taso nanpa wan la wile mi li lape taso. a a.” ni la mi kama tawa ma li kama supa li open lape. mi sona ala e nasin. taso pini lape la mi ken alasa.