utala pi musi mu #MAMTW/#L/#LLLW
mun Kekan San li wile e ijo musi sin pi toki pona. ijo li sama ni: ona li lukin e ijo musi la mu li kama lon sijelo tan pilin pi musi mute. ni la ona li kama e utala tawa ni lon ma pona pi toki pona lon ilo Siko.
mun Kekan San la ijo ale musi li ken pona tawa utala. sina ken ante toki e ijo musi tan toki ante. kin sina ken pali e ijo musi sin.
tawa pana utala la
- jan luka tu li pali e ijo sin.
- jan tu li ante toki e musi pi toki Inli.
utala la sina ken pali e ijo ale pi wile sina. sina ken pali e sitelen tawa, e lipu, e sitelen pi tawa ala, e kalama musi, e toki kalama, e ijo ale ken!
tawa pana utala la
- jan luka li pana e sitelen tawa.
- sitelen tawa la jan wan li kepeken nasin pi luka pona. (luka pona li toki luka pi toki pona li sama mute li ante mute)
- jan tu tu li pana e sitelen pi tawa ala.
- sitelen pi tawa ala la jan tu wan li kepeken nasin ni: sitelen la leko mute li lon. leko wan li sama tenpo wan. kepeken leko mute la sina ken sitelen e ni: seme li kama lon insa tenpo. ken la leko nanpa wan la kili li lon. leko nanpa tu la jan li lon. leko nanpa tu wan la pakala li lon kili tan uta jan. leko tu wan la sina ken sona e ni: jan li uta e kili.
tenpo pana li pini la kulupu li kama toki e pilin ona tawa ijo musi ale. ijo seme li kama e mu musi pi mute nanpa wan?
musi seme li pona nanpa wan?
#W ‘lape pona - jan Kesi en jan Atumo’ tan jan Sa
jan Sa li pali e sitelen tawa li pana tawa ilo Jutu. nimi li ‘lape pona! - jan Kesi en jan Atumo.’ jan Sate en jan Kekan San en kule epiku Atawan li pali poka.
musi seme li pona nanpa tu?
#T ‘hi kijetesanta!’ tan jan punki
jan punki li pali e sitelen pi musi mute! nimi li ‘hi kijetesanta!’
musi seme li pona nanpa tu wan?
#TW ‘ilo pi nanpa’ tan musi Kita
musi Kita li pali e sitelen tawa li pana tawa ilo Seka. nimi sitelen li ‘ilo pi nanpa’
#TW ‘esun pi jan suli ike Pi’ tan mun Kekan San tan jan Tepo
mun Kekan San en jan Tepo li pali e sitelen tawa li pana tawa ilo Jutu. nimi sitelen li ‘esun pi jan suli ike Pi’
musi ante seme li lon?
‘lipu pi akesi olin’ tan jan Eli
‘mu musi suwi’ tan jan Kiwisin
‘Le Kijetesantakalu, lon Mani’ tan kijetesantakalu Nasan
