jan sitelen pi toki pona o!
tenpo pali li lon!
pali seme li wile?
o sitelen e ijo musi o pana e ona tawa mi lon tenpo wile.
ijo musi mi o seme?
suli la nasin tu li lon!
- nasin nanpa wan li toki musi lili
- nasin nanpa tu li lipu musi suli
sama la
toki musi lili en lipu musi suli o musi o kepeken toki pona taso o kepeken toki nimi taso.
ante la
toki musi lili la mute nimi li wile lili tawa TWA/tu wan ale (ale ale ale).
lipu musi suli la mute nimi li wile suli tawa LA/luka ale (ale ale ale ale ale).
sina o pana e pali sina taso. o pana ala e pali pi jan ante.
mi o toki seme lon ijo musi?
o toki e ijo pona pi wile sina! o toki e ma nasa mun pi lon ala, e kijetesantakalu pi wawa seli, e tomo lipu pi sona ale e ijo sin wawa musi tan lawa sina tan pilin sina! taso o ike ala. o sewi ala e nasin ike. o toki wawa ala e unpa e pakala sijelo. kin la, o musi. ijo sina o pona ala tawa lipu Wikipesija. o pana sona taso ala. o toki wawa ala e nasin nanpa sin pi toki pona.
o lukin e utala ni pi tenpo pini: utala pi lipu lili musi en utala pi toki musi. pali sina o sama.
tenpo seme la mi wile pana e pali?
lon sike #MAMTW/mute ale mute tu wan lon tenpo mun #LT/luka tu lon tenpo suno #LLL/luka luka luka.
o sona kepeken nasin nanpa pi sitelen Alapi
2023-07-15
mi wile pana e pali lon seme?
o pana e ijo sina tawa mi (jan Lakuse) kepeken ilo Siko (raacz106) anu kepeken ilo lipu (tokipona.sasalin@gmail.com).
o pana e sona. o pana
- e nimi sina pi toki pona
- e nimi sina pi ilo Siko
- e nimi pi pali sina
- e sona ni: ijo sina li tawa utala pi lipu suli anu utala pi toki lili
utala li seme?
pana pali li pini la ale li kama lukin e ijo ale li kama toki e pilin ona. mi kama sona e ni: lipu suli seme en toki lili seme li pona nanpa wan tawa kulupu?
ni la, o pana ala e pali sina tawa jan mute o toki ala e insa pi pali sina tawa jan mute. tenpo lukin la ale o sona ala e ni: jan seme li pali e ijo.
tenpo lukin li pini la sina ken toki e ale!
mi wile sona e ijo ante seme?
sina pana e ijo tawa mi la, sina ken e ni: nasin CC-BY-SA-4.0 li lawa e esun pi pali sina. ni li ike tawa sina la o pana ala!
sina pana e pali li kama wile ante e ona la sina ken pana sin e ona tawa mi!
utala pi lipu suli la sina ken pana e lipu mute! utala pi toki musi lili la o pana e toki wan taso.
o sona e ni: mi kama awen e pali sitelen sina lon ilo ni la jan ale li ken lukin e ona. ni li ike tawa sina la o pana ala!