mi en waso Kaka en monsuta pi ma kasi

tan jan Pensa

mute nimi: suli mute, MMMMTTAT

open la, lipu ni li kepeken nimi ‘lanpan’ lon tenpo mute. kulupu li toki e ni: nimi lanpan li ike. ni la, jan pali li pali sin li weka e nimi lanpan ale tan lipu. sina wile lukin e lipu kepeken nimi lanpan la o tawa ni: mi en waso Kaka en monsuta pi ma kasi en nimi lanpan

kipisi lipu:

mi lon ma kasi

jan Ensi li lon ma tomo

mi lon tomo

jan Ensi li lon ma kasi

mi lon monsuta

jan Ensi li lon nasin

mi lon ma nasa

mi lon ma kasi

suno li lon sewi. mi lukin e sewi laso suli, e kasi suli mute, e kasi kule pi pona lukin lon noka mi. mi toki e ni: “ma kasi la tenpo suno ni li pona a! sina pilin sama anu seme, waso Kaka o?”

waso Kaka li lon poka pi lawa mi li mu suwi. nasin ni la ona li toki e ni: “mi kin li pilin pona.”

waso Kaka li waso pona mi. ken sona ona li wawa. ona li ken sona e toki mi. taso ona li ken ala toki li ken mu taso. waso Kaka li waso pimeja walo. sijelo ona li walo. lawa en luka en noka li pimeja. ona li pona lukin tawa mi.

waso Kaka li tawa tan mi, li tawa lon kon, lon sewi pi kasi ale. ni la mi lukin e kasi kule lon noka mi. kule mute li lon. kasi walo en kasi loje en kasi jelo li lon. mi kama jo e kasi jelo lon luka mi. tenpo lili la mi lukin e pona lukin ona lon insa luka mi. mi moku e ona. lon la mi wile ala pakala e ijo pi pona lukin, taso mama mi li toki e ni: mi moku e kasi jelo ni la ni li pona tawa sijelo mi. mama li wile e ni: mi tawa ma kasi la mi o moku e kasi jelo tu.

mi moku e kasi jelo nanpa tu la mi kute e mu pi waso Kaka lon weka. ona li wile kama e mi tawa ona. mi tawa kalama mu. “mi kama a, waso Kaka o!”

mi tawa lili la mi lukin e ni: waso Kaka li lon kasi li moku e kili lili mute. mi toki pi pilin pona. “pona a! sina kama lukin e kasi kili!” mi tawa kasi, mi kama jo e kili lili wan. ona li loje mute li suwi lukin. mi pana e ona tawa insa uta mi la, a! ona li suwi mute li pona a! mi open e poki mi, mi kama jo e kili mute kepeken luka, mi pana e ona mute tawa poki mi. mi wile e ona ale.

waso Kaka li moku e kili sama wile ona. wile moku ona li pini la, ona li kama jo e kili kepeken uta ona, li pana e kili tawa poki mi. ona li kama jo e kili tan sewi kasi, lon weka mi. luka mi li luka waso ala. mi ken kama jo e kili tan anpa kasi taso. kili mute mute li lon poki mi la mi pini e lupa poki. mi luka suwi e lawa pi waso Kaka. “sina pona mute, waso suwi o! mi olin e sina!” waso Kaka li mu lili suwi. nasin ni la ona li toki e ni: “mi olin e sina kin.”

tenpo suli la mi awen lon sewi nena. suno li seli pona e sijelo mi. mi moku lili e kili tan poki mi. mi kute e kalama pi ma kasi, e mu waso, e kalama pi lipu kasi.

tenpo ni la mi lukin e ni: waso Kaka li lon weka li kama tawa mi. ijo li lon uta ona li suno lili. waso Kaka li kama tan sewi tawa poka mi. linja li lon uta ona. anpa linja la kiwen sike jelo li lon.

“wa! pona lukin a! mi ken ala ken lukin?” mi open e luka mi la waso Kaka li pana e kiwen tawa insa luka mi. tenpo pini ale la mi lukin ala e ijo sama kiwen ni. sitelen lili mute li lon selo ona li pona lukin a. mi tawa e ona lon suno la ona li pana e suno lili. “ni li seme a?”

waso Kaka li mu pi sona ala.

“ona li tan seme?”

waso Kaka li lukin tawa ma weka, li lukin tawa anpa li utala e ma anpa kepeken noka wan.

“a. ona li lon anpa, lon ma weka ni, anu seme?”

waso Kaka li mu pona. toki mi li lon.

“kiwen ante pi pona lukin ni li lon ma ni, anu seme?”

mu ike. toki mi li lon ala.

mi toki pi pilin ike lili. “a… ike a. kiwen pona ante li lon la mi wile alasa e ona.”

mi lukin sin e kiwen, mi tawa lili e ona. suno lili li tawa musi lon selo kiwen. ni li pona tawa waso Kaka. ona li lukin wawa e kiwen.

tenpo ni la mi kama lukin e ni: suno sewi li tawa anpa. tenpo kama poka la tenpo pimeja li lon. mi sewi e sijelo mi tan supa ma. mi lukin tawa waso Kaka. “o kama. mi o tawa tomo.”

waso Kaka li mu pona.

mi pana e kiwen nasa tawa insa pi poki kili mi. mi pini e poki la mi open e tawa.

mi tawa lon ma kasi, tan sewi nena tawa tomo. mi tawa kepeken noka. waso Kaka li lon sewi mi li tawa kepeken luka waso. sewi li kama loje lon suno anpa. ale li kama pimeja lon insa pi ma kasi.

ni la mi kama lukin e nena nasa lon weka lili. mi ken ala lukin pona e ona tan pimeja. mi toki tawa sewi mi, tawa waso Kaka. “o awen! mi lukin e ijo nasa.”

mi tawa nena nasa la waso Kaka li kama tan sewi tawa poka mi. nena nasa li loje li walo. “ni li seme?” mi tawa poka nena. mi lukin pona… “a, mi sona! ona li sijelo pi soweli moli.” taso ijo li nasa.

“nnn… seme li ken moli e soweli ni?” sijelo moli ni li suli mute a. mi sona e ni: soweli alasa li lon ma kasi li moli e soweli lili e waso li moku e ona. taso soweli alasa pi ma kasi li wawa ala, li ken ala a moli e soweli suli ni.

mi lukin pona e sijelo. sijelo ni la selo soweli ale li weka. mi ken lukin e kiwen walo mute. ni li sama sijelo moli pi sin ala. taso insa li pimeja ala, li loje wawa, li pana ala e kon jaki. telo loje sin mute li lon poka sijelo.

sijelo ni li sin, li kama moli lon tenpo poka a.

soweli li moku e soweli ante la ona li wile moku e insa taso li moku e selo mute ala. ijo seme li moku e selo ale? pilin mi la ijo ni li soweli ala, li waso ala, li ijo ante. ona li nasa, li wawa, li ken moli e soweli pi suli mute… li ken moli e mi.

mi pilin monsuta lili. mi tawa weka, tan sijelo moli, tawa waso Kaka. “mi wile tawa tomo a.”

taso mi open e tawa mi la mi kute e ijo lon kasi weka. mi ken ala lukin e ona tan ni: tenpo pimeja li kama. mi awen, mi alasa lukin e tan kalama lon pimeja.

ni la mu wawa li kama, li wawa mute a! mi pana e kalama wawa pi pilin monsuta. tenpo pini ale la mi kute ala e kalama pi wawa ni!

mi tawa weka tan mu wawa kepeken wawa ale mi. waso Kaka li tawa lon sinpin mi. kalama noka nasa li lon monsi.

mu wawa sin li kama. ona li pana e pilin ike tawa kute mi.

waso Kaka li mu tawa mi, li tawa poka. ona li lukin e ijo li wile e ni: mi tawa ona. mi ni la mi lukin e ni: waso Kaka li tawa insa pi lupa suli.

mi kin li tawa insa lupa. mi lili e sijelo mi, mi pini e lukin, mi kalama ala a, mi awen…

mi kute e kalama pi lipu kasi e kalama noka. kalama li lon poka, li kama lili, li tawa weka. taso mi awen awen, mi awen pini e lukin mi.

mi kute ala e ijo lon tenpo suli la mi open e lukin. mi tawa lili e lawa mi tan lupa. mi lukin e pimeja pi ma kasi, mi toki tawa waso Kaka kepeken kalama lili lili a. “ona li weka anu seme?”

waso Kaka li tawa tan lupa, li tawa kon. ona li lukin e ma poka ale la ona li kama tawa mi, li mu pona. mi ken kama tan lupa.

mi kama tan lupa la mi tawa wawa, tawa tomo, tawa mama.

mi o toki e ale ni tawa mama. mama o sona e ni: monsuta li lon ma kasi.

jan Ensi li lon ma tomo

tenpo suno sin li kama open. jan Ensi li tawa tan supa lape, li len e sijelo, li tawa tan tomo ona tawa esun. ona li wile e moku sin pona. poka nasin la tomo mute li lon, taso tomo ale ala li pona. ma tomo Nelamu li ma tomo sin. jan li awen pali mute e tomo. tenpo kama poka la, jan pali li pini e moku pi open suno la, pali tomo li kama open sin lon ni.

ma esun la kon pi moku pona mute li lon. kili en moku kala en moku soweli en ijo ante mute li lon. tomo wan la jan li pana e moku pan sike lon sinpin tomo. jan Ensi li tawa ni.

“suno pona, jan pan o! ni li moku pan sin, anu seme?”

“lon! ona li tan poki seli lon tenpo lili taso a!”

jan Ensi li insa e kon pan. ona li pona pilin a. wile moku ona li kama wawa. jan Ensi li kama jo e moku pan tu lon luka ona. moku li seli lili e luka.

“mi wile e ni.” jan Ensi li pana e mani tawa jan pali pi moku pan.

“sina pona a.” jan pan li insa e mani lon poki ona. jan Ensi li moku lili e pan ona la jan pan li toki. “sina kute ala kute e toki sin?”

“kute ala.”

jan Ensi li wile ala kute tan ni: toki sin li pona mute ala tawa ona. taso ona o kute e jan pan. ni li nasin pona.

“jan mute li toki e ni: jan li lukin e monsuta lon ma kasi suli!”

“a. musi.” jan Ensi li awen moku.

“tenpo ni la, mama sina li awen lon la ni li pona mute. mi sona e ni: ona li lon la ona li tawa ma kasi li weka e monsuta ni.”

“ken.”

mama pi jan Ensi li jan alasa wawa. jan ale pi ma tomo Nelamu li sona e ona. taso ona li lon ala. ona li kama moli lon tenpo lete pini. ona li wawa ala tan jaki sijelo la lete wawa li kama li ike a e sijelo mama.

jan Ensi li anpa e lawa ona tawa jan pan. “sina pona tan moku pona ni. mi tawa.”

“tawa pona!” jan pan li tawa insa tomo ona, li kama jo e pan ante tan tomo, li pana e ona lon sinpin tomo.

jan Ensi li tawa tomo. ona li lon nasin la ona li kute e toki pi jan tawa. jan mute li toki e monsuta pi ma kasi.

jan Ensi li kama lon tomo ona. ona li kama insa la ona li toki wawa e ni: “o! jan Patan o!” jan Patan en jan Ensi li tan mama sama, li awen lon tomo sama. “o kama lape ala! moku pan pona li lon!”

jan Ensi li tawa supa moku. jan Patan li mu lili li tawa lili lon supa lape.

“jan Patan o kama! suno li lon sewi a!”

jan Patan li toki kepeken kalama lili. “mi kama, mi kama a.”

jan Ensi li pana e moku sin tawa supa moku. jan Patan li kama. nasin pi linja lawa ona li nasa tan lape. jan Patan li awen lon poka supa, li kama moku e pan.

jan Ensi li moku e pan lili ona li toki e ni: “jan ale pi ma tomo li toki e ni: monsuta li lon ma kasi suli. ni li nasa anu seme? monsuta li lon ala ma ni.”

“ona li lon a.”

“seme?”

“mi lon ma kasi la monsuta li lon.”

“sina lukin e ona anu seme?”

“mi lukin ala e ona. taso jan Apo li lukin e ona. toki ona la monsuta li suli, li lukin e ona kepeken lukin jelo.”

jan Patan en jan Apo li tawa ma kasi suli lon tenpo suno pini.

jan Ensi li mu musi lili. “jan Apo li toki e ijo nasa lon tenpo ale. soweli suli pi palisa lawa li lon ma kasi. ken la jan Apo li lukin e soweli ni taso.”

lawa pi jan Patan li tawa poka wan li tawa poka ante. “ni li ken ala. mi kute e mu ona e kalama noka ona. soweli pi palisa lawa li pana ala e kalama ni.”

jan Ensi li wile ala awen toki e monsuta, li open e toki ante. “tenpo mun sin li lon. o pana e sitelen.”

“n?”

“o pana e sitelen pi mama mi. sina jo e ona lon ale pi tenpo mun pini. tenpo mun ni la mi o jo e ona.”

“a…” jan Patan li lukin e weka. “mi… jo ala e ona.”

“seme a?!”

jan Patan li toki kepeken kalama lili taso. “pilin mi la ona li kama weka tan mi lon ma kasi.” ona li lukin anpa tawa supa moku, li moku ala. pilin ike li lon sinpin ona.

mama wan pi jan Ensi pi jan Patan li kama moli lon tenpo pini weka. sinpin pi mama ni li kama weka tan sona pi jan Ensi tan ni: jan Ensi li jo ala e sitelen pi lawa ona. sitelen pi mama ante li weka la sinpin pi mama ni kin li kama weka tan sona lon tenpo kama. jan Ensi li wile ala a e ni.

jan Ensi li tawa sewi tan supa moku. “mi tawa ma kasi suli.”

“a?” jan Patan li lukin wawa e ona. “tan seme a?”

“mi alasa e sitelen mama.”

“taso monsuta li lon! ma kasi li pona ala lon tenpo ni.”

ni li pona ala tawa jan Ensi: toki monsuta li kama open sin. ona li pana wawa e kon tan uta. “monsuta li lon ala a. taso, ona li lon li wile pakala e mi e jan ante la, mi ken utala e ona kepeken ni.” jan Ensi li kama jo e ilo alasa ona tan supa ilo, li pana e ona tawa lukin pi jan Patan. “o toki ala e monsuta, o toki e ni: sitelen mama li kama weka lon seme?”

mi lon tomo

mi lon tomo, lon supa lape mi. waso Kaka li lon supa ona. ona li pona e lipu waso lon selo ona, li weka e jaki tan lipu kepeken uta. mi en waso Kaka taso li lon tomo. mama li alasa lon ma kasi lon tenpo ni.

tenpo pimeja pini la mi lape ike tan ni: sitelen monsuta li lon insa lawa mi. awen la ijo monsuta mute li lon lawa mi.

mi wile weka e pilin ike ni tan lawa mi. mi o pali e ijo ante. taso mi o pali e seme? mi wile ala musi kepeken ilo musi mi. ken la mi o moku e ijo. mi moku ala e ijo lon tenpo suno ni. mi ken moku e kili suwi tan poki mi.

“a!” tenpo ni la sona weka li kama sin lon lawa mi, li weka e pilin ike ale. “kiwen nasa kin li lon poki a!”

mi tawa tan supa, tawa poki mi. mi open e poki la mi kama jo e kiwen tan insa.

suno li kama tan lupa tawa insa tomo. mi tawa suno ni tan ni: mi wile lukin pona e kiwen sike ni. jaki lili li lon selo kiwen. ken la jaki ni li telo kili. mi luka e kiwen, mi alasa weka e jaki. mi weka e luka mi la jaki li weka. “wa! pona a!” sin la kiwen sike jelo li kama pona lukin wawa li pana e suno lili. waso Kaka kin li pini e pali ona li lukin e kiwen pi pana suno.

tenpo suli la mi lukin e kiwen, e sitelen pona pi selo ona, e pana suno ona. waso Kaka li kama tan supa ona li lukin e kiwen lon poka mi.

mi lukin e kiwen la wile sona mute li kama lon insa mi. “waso Kaka o. kiwen ni li seme? ona li tan seme? nasin seme la ona li kama lon?”

waso Kaka li mu pi sona ala.

“nnn…” mi alasa e sona ken. “a, ken la kiwen ni li ken pana e wawa nasa! mi kepeken ona la, ken la mi ken tawa lon kon sama sina. ken la mi ken suli e kasi, sama soweli Usa lon toki musi pi ma Wesu.”

mi pini e lukin mi, mi luka wawa e kiwen, mi pilin wawa e wile mi. “mi o tawa sama waso!”

mi open e lukin la mi awen lon anpa.

“waso Kaka o kama jelo!”

pimeja en walo li awen lon waso Kaka li kama ala jelo.

mi alasa pali e ijo ante. mi kama e kili wan tan poki mi, mi tawa tan tomo. mi pali e lupa lili lon insa ma, mi insa e kili, mi pana e ma lon lupa. ma li len e kili la mi kama e poki telo tan insa tomo, mi pana e telo tawa kili. ni la mi luka wawa e kiwen, mi toki wawa e ni: “kasi o kama suli!”

…

taso ijo ala li kama.

ken la mi kepeken toki nasa la wawa nasa li kama.

“waso Kaka o lukin e mi.” mi moku e kon, mi toki wawa.

“mu mi, mu mi, ma mi mu!”

mi lukin e waso Kaka. “ijo li nasa kama anu seme?”

waso Kaka li mu pi pilin ike.

mi alasa sin.

“kijetesantakalu!”

waso Kaka li mu ike sin.

“pi ku, pu ko, pi pi poki ku!”

…

“wu wo ji ti!”

…

“nnn…” mi toki pi pilin ike. “pilin mi la wawa nasa li lon ala kiwen ni.”

mi lukin pona e kiwen nasa. “ona li pana ala e wawa nasa la ona li kiwen seme? … ken la ona li sike mama waso. mi awen lon tenpo suli la ken la kiwen li kama open li pana e waso lili sin. sina pilin seme, waso Kaka o?”

waso Kaka li mu ike. pilin ona la kiwen ni li ken ala sike waso.

“ona li tan waso ala la, ken la akesi li lon insa.”

waso Kaka li mu pi sona ken.

“ona li ken kili kin. mi pana e ona lon insa ma, mi pana e telo la, ken la kasi nasa li kama tan ma lon tenpo kama.”

taso kiwen ni li pona mute tawa mi. mi wile ala pana e ona tawa ma lon tenpo ni. mi ken pali e ni lon tenpo ante.

tenpo suli la mi toki insa e ni: kiwen ni li ken ijo ante seme? taso ni la mama li kama lon lupa tomo.

“kama pona, mama o! tawa sina li pona ala pona?”

waso Kaka li pana e mu pona tawa mama.

mama li kama lon insa tomo. “toki, tu pona o.” mi lukin e pilin ike lili lon sinpin mama. mama li lukin e lukin mi. “toki sina li lon. monsuta li lon ma kasi a. mi lukin e monsuta.”

“a…” pilin ike en wile sona li kama lon insa mi. “mi lukin ala e ona. mi kute taso e monsuta… monsuta li seme tawa lukin?”

“ona li nasa mute a. palisa suli li lon sinpin ona. selo ona kin li nasa, li sama ala selo soweli. waso en akesi en kala en pipi kin li sama ala ona…” pilin ike li kama sin lon lukin mama. “monsuta ni li sin lon ma kasi ni. mi lukin ala e ijo ni lon tenpo ante.”

“monsuta li lukin e sina kin anu seme?”

“ala. sona mi la ona li lukin ala li kute ala e mi. mi len e sijelo mi kepeken kasi, mi pana ala e kalama.”

“monsuta li pali e seme? sina pali e seme lon ona?”

“open la mi kute e mu wawa lon weka. mi pilin e ni: ken la mu ni li sama mu pi toki sina. mi wile lukin e ijo mu ni. mi tawa ona la mi lili e kalama noka mi. ni la mi lukin e monsuta. ona li moli e soweli.”

“ike a…” mi toki ala lon tenpo lili tan sona wawa ni. “ona li moli e soweli kepeken uta anu seme?”

“ona li kepeken ala uta, li kepeken ala luka kipisi kin. ona li mu wawa taso. ona li mu taso la soweli li tawa anpa li moli.”

“wa…” monsuta ni li ken moli e ijo kepeken kalama taso a! sona ni li kama e pilin monsuta lon mi. “mama o.”

“seme?”

“monsuta ni li ken ala moli e mi lon ni, anu seme?”

mama li lukin tawa weka li toki ala lon tenpo lili. “mi sona ala a… ken la ona li ken kama tan ma kasi tawa tomo mi.”

pilin monsuta li kama wawa lon insa mi. “ike a…”

mama li toki ala lon tenpo suli, li open sin e toki. “mi ale o tawa weka. ma ni li pona ala. ken ike li kama suli tan monsuta ni.”

“a… mi tawa seme?”

“mi ale o tawa tan ma kasi ni, tawa ma weka. mi ken pali e tomo sin lon ma sin. ken la…” mama li mu lili pi pilin ike. taso wawa li kama sin lon insa lukin ona. “ni li nasin pona a. mi o tawa lon tenpo ni. o poki e ijo sina.”

mi wile ala tawa ma ante, taso mi wile ala e ni kin: monsuta li moli e mi, e mama, e waso Kaka. mi o pali sama toki mama.

mi open e poki mi. mi en waso Kaka li pana e kiwen pona e ilo musi mi tawa insa poki. ale ni la mi toki ala, mi kalama ala. mama li pana e ijo mute tawa poki ona. pali ni li pini la mi lukin e insa tomo lon tenpo wan. mi en mama en waso Kaka li tawa tan tomo.

tomo mi li lon poka pi ma kasi, li lon poka pi ma nena. tenpo pini la mama li toki e ni: nena ma suli ni li sama selo, li awen e tomo mi. tan ni la mama li pali e tomo lon ma ni. tenpo suli la nena ma ni li pona tawa mi. taso tenpo ni la ona li ike a tan ni: nasin li lon ala ma nena. waso Kaka li ken tawa lon kon lon sewi nena, taso mi ken ala tawa lon ma nena. mi ale li wile weka tan tomo mi la, nasin wan taso li lon. nasin ni li tawa insa pi ma kasi… li tawa ma monsuta.

mi en mama li tawa lon ma kasi. mi alasa pana ala e kalama suli, e kalama lili kin. waso Kaka li tawa lon kon sewi, li lukin e weka. ma anpa la mi en mama li lukin e sinpin, e poka, e monsi lon tenpo ale. kalama li lon la mi en mama li awen li lukin e tan kalama. tenpo suli la mi ale li tawa sama ni.

tenpo ni la kalama nasa li kama tan sinpin, tan ijo weka. mi lukin e lukin mama. ona kin li sona ala e ni: kalama ni li seme.

mama li toki kepeken kalama lili. “o awen lon ni. mi taso li tawa. mi wile kama sona e ni: nasin sinpin li pona ala pona? ale li pona la mi kama e sina.”

mama li tawa la mi awen lukin e mama. ona li kama weka lon monsi kasi la mi anpa e sijelo mi lon ma. mi lukin e poka mi e monsi mi. ni la waso Kaka li kama tan sewi tawa poka mi. ona li sona e ni: mi wile ala wan taso.

mi lon anpa, mi kute pona, mi kalama ala.

mi awen.

jan Ensi li lon ma kasi

jan Ensi li tawa lon ma kasi suli. ona li kute e mu waso lon luka kasi. ona li kute e tawa soweli lon poka. taso jan Ensi li alasa ala e waso e soweli. ona li alasa e sitelen mama.

tenpo ni la ona li kute e kalama telo. ni li pona. tenpo suno pini la jan Patan en jan Apo li awen lon poka pi nasin telo. ken suli la sitelen mama li kama tan poki pi jan Patan lon ma awen ni.

jan Ensi li kama lukin e sitelen pi noka jan lon insa ma. tenpo pini la jan Patan li lon ni. jan Ensi li tawa nasin sama la ona li kama lukin e ko pimeja pi seli pini lon poka telo. ni li ma awen a! jan Patan en jan Apo li pali e seli lon ko pimeja ni.

jan Ensi li lukin e ijo ale lon ma awen, lon poka pi ma awen kin. ona li lukin lon ma, lon anpa kasi, lon telo tawa, lon ale. sitelen noka mute li lon, taso sitelen mama li lon ala.

jan Ensi li pilin ike lili. taso ona li awen pilin pi ken pona. jan Patan li toki e ma ante. sitelen mama li ken lon ma ante ni. taso tenpo ni la jan Ensi o awen lon ma ni. ona li kama pilin lili e wawa ala, e wile moku. ona li awen lon ma awen ni la, ona li ken lape lili e sijelo ona, li ken seli e moku.

jan Ensi li alasa e kiwen kasi pona tan ma poka, li pana e kiwen ni lon ma awen, li kama e soweli lili tan poki ona.

tenpo poka la jan Ensi li kama lukin e soweli ni li alasa e ona kepeken ilo alasa. moku ante kin li lon poki pi jan Ensi. moku ni li ken awen pona lon tenpo suli. taso moku sin li pona. jan Ensi li ken la, ona li alasa e ijo sin li moku e ni.

jan Ensi li telo e soweli lili lon telo tawa, li alasa weka e jaki. soweli li pona lukin la jan Ensi li tawa ma awen, li anpa e monsi ona, li lape e noka ona. ona li kama jo e ilo kipisi lon luka, li weka e lawa soweli, e linja monsi, e selo, e insa jaki. moku pona taso li awen la ona li pana e namako.

jan Ensi li pana e kiwen kasi lon ko pimeja pi jan Patan, li open e seli sin kepeken ilo seli. seli li kama pona la ona li awen e sijelo soweli lon sewi seli kepeken palisa.

ona li awen, li lukin e moku pi kama seli, li lape e sijelo. tenpo ale la ilo alasa li lon poka ona. ijo ike li kama la jan Ensi li ken utala kepeken ilo ni. taso ijo ala li kama. tenpo awen pona taso li lon.

moku soweli li pona la jan Ensi li weka e ona tan seli, li moku.

moku li pini la jan Ensi li pini e seli, li pana e ijo ona ale tawa insa poki, li kama jo e ilo alasa tan supa awen, li open sin e tawa ona. toki pi jan Patan la, ma awen ante ona li lon ma kasi ni. ale li pona la sitelen mama li lon ma awen wan.

tenpo tawa la jan Ensi li kama lukin e soweli suli lon weka lili.

soweli ni li seme? jan Ensi li wile sona, taso ona li ken ala lukin pona e ona lon ni. jan Ensi li sewi e ilo alasa tawa sinpin ona, li tawa soweli nasa ni. ona li tawa soweli, taso awen la ona li sona ala e ni: soweli ni li seme?

jan Ensi li awen tawa soweli, li alasa pana ala e kalama. taso ona li pakala. kiwen kasi lili li kama pakala lon anpa noka pi jan Ensi, li pana e kalama. tenpo ni la soweli li lukin e jan Ensi.

ona li lukin e jan Ensi kepeken lukin suli jelo.

ona li soweli ala. ona li monsuta. ona li suli li wawa lukin. poka monsuta la waso pimeja walo li lon.

jan Ensi li pilin monsuta, li jo wawa e ilo alasa lon luka ona, li tawa ala. ona li toki insa e ni:

“monsuta li tawa mi la mi utala.”

mi lon monsuta

mi lukin e monsuta. monsuta li lukin e mi. mi awen anpa lon ma. mi tawa ala tan pilin monsuta wawa. waso Kaka kin li tawa ala li lukin taso. mi o pali e seme a?

mi en monsuta li awen lukin li awen tawa ala.

palisa nasa suli li lon luka monsuta, sama toki pi mama mi. pini palisa la lupa sike lili li lon. mi pilin sama ni: monsuta taso ala li lukin e mi. palisa ona kin li lukin e mi kepeken lupa pimeja lili ni.

mi o alasa tawa weka anu seme? taso monsuta ni li utala ala kepeken uta, kepeken luka wawa. mi tawa la ona li ken moli e mi kepeken mu wawa anu seme?

mi en monsuta li awen lukin li awen tawa ala.

mama li lon seme? ona li ken utala e monsuta ni anu seme?

mi awen lukin e monsuta…

la…

mi lukin pona e lukin monsuta. lukin ona li open wawa, li sama sike. taso ni li tan ala pilin pi wile utala, anu seme? ona li wile utala e mi la ona li utala ala lon tenpo suli tan seme? pilin monsuta mi li kama lili. mi kama ken kepeken wawa sona mi.

a! mi sona e nasin lukin ni. tenpo mute la mi lukin e nasin lukin ni lon soweli ante. ni li lukin pi pilin monsuta!

ona li pilin monsuta tan mi! mi monsuta tawa ona!

mi weka e lukin mi tan ona, mi lukin e ijo ante. kalama lili lili la mi toki. “waso Kaka o lukin ala e ona. ona li pilin monsuta. mi lukin ala e ona la, ken la ni li weka e pilin monsuta ona.”

kalama lili la waso Kaka li mu pona, li lukin tawa poka ante.

mi tawa lili lili kepeken wawa lili, kepeken tenpo suli. nasin ni la, kepeken tenpo suli suli la, mi sewi e sijelo mi. mi weka e luka mi tan ma. mi kama awen lon noka tu taso, sama soweli pi palisa nasa. mi ni la ona li ken lukin e poki mi lon monsi mi. ni kin li sama soweli nasa. sijelo mi en sijelo ona li sama lili taso. taso mi sama ona la, ken la ona li pilin monsuta ala.

mi lukin e soweli nasa lon tenpo lili taso. lukin la, pilin monsuta li kama lili lon lukin ona. kin la, palisa ona li kama anpa li lukin ala e mi. pilin mi la ni li ijo pona.

mi awen. mi wile e ni: soweli pi palisa nasa li tawa weka. ona li tawa ala la…

kalama wawa a! mi lukin e tan kalama. mama li lon poka pi kasi suli li alasa anpa e kasi.

tenpo wan lili la soweli li lukin e mama li sewi e palisa ona, li pana e mu wawa.

mi lukin e mama.

a… pona a. mama li kama ala moli.

mama li tawa e kasi suli kepeken wawa mute. kasi li kama pakala, li tawa anpa, tawa soweli nasa.

soweli li pilin monsuta lukin li alasa tawa weka tan kasi kama. kasi suli li kama anpa li kalama wawa. tenpo sama la soweli li mu wawa. mu ni li mu utala ala, li mu pi pilin ike. noka ona li lon anpa pi palisa kasi suli.

mama li tawa mi li toki wawa. “o kama! mi o weka tan monsuta ni!”

mi en waso Kaka li tawa mama. taso mi awen. mi tawa monsi, tawa soweli nasa.

mama li toki sin. “o kama a!”

mi kama ala. “mi… mi wile pana e pali pona tawa soweli ni. mi wile weka e palisa kasi.”

“o toki musi ala! sina o weka lon tenpo ni a!”

“toki mi li musi ala. mi wile weka e kasi.”

“ona li monsuta li ken pakala e sina, li ken moli e sina a!”

mi lukin e lukin mama. “ken la ona li monsuta. mi sona ala e ni. taso mi sona e ni a: ona li wile ala moli e mi. ona li pilin monsuta taso.”

mama li lukin e lukin mi, li toki ala. pilin mi la ona li sona ala e ni: ona o pali e seme. taso pilin monsuta li awen lon lukin ona.

mi toki. “tenpo ale la sina toki e ni: mi lukin e soweli pakala e waso pakala la mi o pona tawa ona. sina pana e nasin ni tawa mi. o lukin e soweli ni a.”

mama li lukin.

“soweli ni li pakala, anu seme? ona li pilin pakala li pilin monsuta. mi pali ala la ona li ken kama moli. mi pilin ike tan ni. mi wile pana e pona tawa ona.”

mi tawa soweli.

mama li awen li lukin taso e mi.

mi kama lon poka pi soweli nasa la ona li lukin e mi li pilin monsuta lili. mi toki suwi tawa ona. “o moli ala e mi kepeken mu sina. mi wile pona taso tawa sina.” mi sona ala e ni: ona li sona e toki mi anu seme. taso toki ni li ken ala ike li ken pona taso.

mi pana e wawa mi tawa palisa kasi kepeken luka. palisa li tawa lili taso li kama ala weka. soweli li mu pi pilin ike. mi pana e wawa ale mi. kasi li tawa lili.

ni la kasi li kama sewi. mi pali ala e ni. mi lukin e poka. mama li lon pini palisa li sewi e ona kepeken luka wawa. mi weka e soweli tan anpa palisa. ona li weka la palisa kasi suli li kama anpa sin li kalama wawa.

soweli nasa li alasa kama sewi, taso ona li ken ala. noka ona li pakala. ona li alasa e palisa kasi lili tan ma. kepeken palisa ni la ona li sewi e sijelo kepeken wawa mute ona. soweli li lukin e mama, e mi. ona li anpa e lawa ona tawa mi, li mu nasa. lawa ona li kama sewi sin la soweli li open e tawa li kepeken palisa kasi sama noka. ona li tawa weka tan mi, kepeken tenpo suli, kepeken wawa mute.

mi lukin tawa mama. “ona li ken ala tawa pona. mi wile pana e wawa mi.”

mama li lukin e soweli. “mi sona.”

mi tawa poka pi soweli nasa. noka en luka mi li lon ma. monsi mi li sama supa. soweli li lukin e mi li awen. mi toki. “o kepeken wawa mi.” open la ona li sona ala e wile mi, taso ona li kama sona. ona li pana e luka wan ona lon sewi mi. poka sijelo ona li kama lon poka sijelo mi. luka ante ona li kepeken palisa kasi. nasin ni la ona li ken tawa pi pona lili.

mi toki tawa mama, tawa waso Kaka. “mi tawa! o kama!”

mi ale li tawa.

jan Ensi li lon nasin

jan Ensi li tawa lon poka monsuta li kepeken wawa monsuta lon tawa. monsuta ante li tawa lon monsi li lukin e jan Ensi lon tenpo ale.

monsuta poka li lukin pona e ni: jan Ensi li wile tawa seme? nasin sinpin li kama nasin tu la monsuta li lukin e jan Ensi. jan Ensi li tawa e lawa ona tawa nasin wan la, monsuta li tawa nasin ni.

awen la jan Ensi li wile alasa e sitelen pi mama ona, taso ona li sona e ni: ni li ken ala. noka pakala li ken ala e pali ni. tenpo ni la jan Ensi li tawa tomo, li tawa jan Patan. ma tomo Nelamu li awen lon weka a. taso jan Ensi o awen tawa taso.

jan Ensi li lukin e monsuta. ona li nasa tawa jan Ensi. ona li sama lili jan, li sama lili soweli kin. selo ona li jo e linja mute, sama soweli. luka ona li sama luka jan. taso palisa luka ona li lili lukin lon luka suli ni.

monsuta li ken tawa kepeken noka tu. taso luka kin li ken kama noka. tenpo ni la monsuta suli li tawa kepeken nasin pi noka tu tu, sama monsuta lili poka.

jan Ensi li toki insa e ijo ni: ante suli monsuta li tan seme? ken la monsuta lili li meli pi monsuta suli. ken la monsuta suli li mama. jan Ensi li sona ala. taso ona li sona a e ni: monsuta suli li wile awen e monsuta lili.

ijo nasa ante li lon. monsuta li jo e poki. poki ni li lon sijelo ala, li ilo. selo poki la kasi linja mute li lon li kama selo wan sama len. sewi poki la supa li lon, li pini e lupa poki. poki li awen lon sijelo monsuta kepeken linja kasi. monsuta ni li weka e poki ni tan jan anu seme? taso nasin pali pi poki ni li nasa a. jan Ensi li lukin ala e poki sama lon jan. ken la… monsuta ni li pali e poki ni, anu seme?

ni li lon la ni li nasa. taso, pilin pi jan Ensi la ni li ken. ken sona pi monsuta ni li wawa, li sama ala soweli. jan Ensi li sona ala e ni: ken sona li wawa sama jan anu seme. taso mu nasa ona li sama nasin toki a. ken la monsuta ni li sama jan.

ona ale li awen tawa lon ma kasi.

jan Ensi li kama pilin pi wawa ala tan tawa suli. noka pakala ona li awen pilin ike mute, taso noka pona en luka kin li pilin ike lili tan pali mute.

tenpo ni la ona li kama lukin e kasi moli lon poka nasin. kasi lili laso pi kiwen ala li lon sewi pi kasi moli kiwen. pilin pi jan Ensi la supa laso ni li ken supa pona.

jan Ensi li weka e luka ona tan monsuta lili li toki e ni: “o awen. mi wile lape lili.” ona li tawa supa kasi kepeken tenpo suli. monsuta tu li awen li lukin e jan Ensi kepeken lukin pi sona ala. taso jan Ensi li anpa e monsi ona lon sewi kasi la ona li sona. monsuta suli li anpa e sijelo lon poka nasin li pana e kon mute tan uta. sijelo ona li lape, taso sinpin ona li lape ala li awen lukin pona e jan Ensi.

poka la kasi kule mute li lon. monsuta lili li tawa ni li kama jo e kasi kule. ona li tawa poka pi jan Ensi li anpa e monsi lon ni. waso pimeja walo li kama anpa tan luka kasi li anpa e sijelo ona lon sewi pi monsuta lili, lon poka lawa. lukin la monsuta ni li pona mute tawa waso.

monsuta lili li pana e kasi jelo tawa jan Ensi.

“a, sina wile pana tawa mi, anu seme?” jan Ensi li kama jo e kasi tan luka monsuta li anpa e lawa ona tawa monsuta. “sina pona.” jan Ensi li lukin e kasi jelo sama ni: kasi li pona lukin tawa ona. lon la kasi kule li pona mute ala tawa jan Ensi, taso ona li wile ala ike tawa jan pana… tawa monsuta pana.

monsuta li mu lili pi pilin ike. lukin la ona li wile e ijo ante. ona li weka e kasi jelo tan luka pi jan Ensi li moku e kasi wan. ni la ona li pana sin e kasi.

“a, mi sona. mi o moku e kasi ni, anu seme?” jan Ensi li kama jo sin e kasi jelo li lukin e ona. ken la kasi ni li moku tawa monsuta. ken la ona li kasi misikeke. tenpo pini weka la mama pi jan Ensi li pana e sona pi kasi misikeke, taso tenpo ni la sona ni li weka tan lawa pi jan Ensi. ona li sona ala e ni: kasi kule ni li misikeke anu seme? ona li awen lon tenpo lili… li moku e kasi. kasi li jaki lili tawa uta ona. taso lukin la monsuta lili li pilin pona tan ni: jan Ensi li sona e wile ona.

ni la monsuta lili li kama e poki tan monsi ona li open e poki. kili lili mute li lon insa poki. monsuta li kama jo e kili kepeken luka tu, li pana e luka wan tawa jan Ensi. ni li pona a tawa jan Ensi. kili li ken weka e pilin jaki pi kasi jelo tan insa uta. jan Ensi li anpa sin e lawa tawa monsuta lili. “sina pona a.” ona li kama jo e kili mute tan luka monsuta li moku e ona.

monsuta lili li pana e kili tawa waso ona kin. waso li moku e kili. monsuta lili li mu e ijo tawa monsuta suli. monsuta suli li mu e kalama lili li awen lon poka nasin. pilin pi jan Ensi la monsuta suli li wile ala moku e kili. ni la monsuta lili li moku e kili, li mu pi pilin pona. jan Ensi li sona e ni: kili ni li pona tawa monsuta lili.

jan Ensi li awen moku e kili la ona li lukin e ni: ijo li suno lili lon insa pi poki monsuta. ona li lukin pona e ijo ni. ona li kiwen sike jelo.

a!

jan Ensi li sona a e ijo ni! ni li poki pi sitelen mama a! insa pi kiwen sike ni la sitelen mama pi jan Ensi pi jan Patan li lon!

jan Ensi li mu musi lili. ale pi tenpo suno ni la jan Ensi li alasa e ijo ni lon ma, lon kasi, lon telo… taso sitelen mama li lon ala ni ale. ona li lon monsuta ni. ni li musi tawa jan Ensi.

jan Ensi li wile jo e kiwen sike, li tawa e luka ona tawa kiwen, taso tenpo ni la waso li kama tan sewi monsuta li utala e luka pi jan Ensi kepeken noka kipisi, li mu mute, li tawa mute e luka waso!

jan Ensi li weka wawa e luka ona tan waso.

ni la monsuta lili li lukin e waso, li lukin e jan Ensi, li lukin e insa poki.

ona li pini e poki ona kepeken wawa mute, li weka e poki tan jan Ensi, li len e poki kepeken sijelo ona.

monsuta suli li lukin e ni la ona li kama tawa jan Ensi li wile utala.

jan Ensi li pilin monsuta, li pini e lukin li sewi e luka ona lon sinpin sijelo… taso utala li kama ala. jan Ensi li open e lukin la monsuta lili li lon sinpin li weka e monsuta suli, li awen e jan Ensi.

monsuta tu li mu e… — ala a — ona li toki e ijo. monsuta lili li pana e poki lili ona tawa insa poki suli pi monsuta suli. ni la monsuta suli li tawa weka tan jan Ensi, li wile ala utala.

jan Ensi li pana e kon uta li alasa weka e pilin monsuta, li toki lili e ni: “ale li pona.”

monsuta lili li kama lon poka pi jan Ensi.

tenpo suli la jan Ensi li awen lon supa, li lape e sijelo, li kama wawa sin.

jan Ensi li kama pilin wawa lili la ona li sewi e sijelo kepeken palisa, li tawa nasin. monsuta lili li kama lon poka la jan Ensi li awen e luka wan lon sewi monsuta li kepeken wawa ona. waso li kama lon poka ante pi monsuta lili. monsuta suli li tawa lon monsi pi ona ale, li awen lukin e jan Ensi.

tenpo lili la jan Ensi li lukin e poki pi monsuta suli, li lukin sin e nasin lon sinpin. sitelen mama pi jan Ensi li lon insa pi poki ni. ona li awen wile e sitelen mama, taso ona li wile ala alasa weka e ona tan monsuta lili. monsuta ni li pali pona mute tawa jan Ensi. jan Ensi li wile ala pana e pilin ike tawa ona.

lon la, jan Ensi li wile ala e ni kin: monsuta suli li moli e jan Ensi.

mi lon ma nasa

suno li lon sewi. kasi suli mute ala li lon nasin sinpin. mi kama tan ma kasi tawa ma sin. nena laso mute li lon ma. musi a. mi lukin ala e ijo sama lon tenpo pini.

soweli nasa li awen wile tawa. ni la mi kin li awen tawa lon poka ona.

mi open e toki. “mama o. waso Kaka o. sina sona ala sona e ni: soweli ni li wile e kiwen jelo mi tan seme?”

toki mama li kama tan monsi. “mi sona ala.”

waso Kaka kin li pana e mu pi sona ala.

mama li toki. “sina kama jo e kiwen ni lon tenpo seme?”

“waso Kaka li kama lukin e ona lon tenpo suno pini, li pana tawa mi.”

waso Kaka li mu pona sama ni: ona li pali e ijo pona.

mama li toki. “monsuta kin li kama lon tenpo suno pini, anu seme?”

“a, ni li lon a!”

“ken la kiwen nasa ni li tan monsuta.”

“n… ni li ken.”

mi toki insa mute e ijo ken. kiwen li tan soweli nasa la ona li seme tawa ona? ona li ilo anu moku anu seme? a! ken la kiwen li sike mama! soweli lili ona li lon insa kiwen la kiwen li suli mute tawa soweli nasa. ni li lon la ona li wile wawa a e kiwen.

ni la ijo sin li weka e toki insa mi. mi kama lukin e ma nasa lon weka. leko suli mute li lon ma. leko ni li seme? a! mi lukin e ni: soweli nasa mute li lon poka leko. soweli li tawa tan insa leko. soweli ante li tawa insa leko. leko ni li tomo ona anu seme?

ma leko li kama weka ala la soweli nasa li kama lukin e mi, li kama tan ma leko tawa mi. ona li jo e palisa nasa, sama palisa nasa pi soweli poka. lupa lili pi palisa nasa ale li lukin e mi e mama.

soweli poka li alasa tawa sinpin mi kepeken tawa wawa, li mu ike pi pilin pakala. ona li kepeken noka pakala a! ona li wile kepeken noka pakala tan seme?

soweli poka li lon sinpin mi la ona li toki wawa tawa soweli nasa ante. soweli ale li awen. soweli pi sinpin mi li awen toki la soweli ale li anpa e palisa nasa ona.

tenpo ni la mi sona e ni: soweli pona li awen e mi, li pini e utala pi soweli nasa ante. soweli ni li soweli pona a!

soweli tu li tawa soweli pona, li pana e wawa lon poka ona, sama nasin mi.

soweli nasa ante li lon li pana e pona tawa soweli pona la, mi ken weka. ale li ken kama pona lon tenpo kama.

taso ijo suli wan li awen.

mi tawa mama. mi open e poki ona, e poki mi. tan poki la mi kama jo e kiwen jelo pi pona lukin. mi lukin pona e pona lukin ona, e sitelen lili ona, e tawa musi suno lon selo ona. mi lukin e waso Kaka. “pilin mi la kiwen ni li suli mute tawa soweli nasa ni. mi ken ala ken pana e kiwen tawa ona?”

waso Kaka li lukin e kiwen li lukin e soweli pona. waso li lukin sin e mi li mu pona.

mi tawa tan mama, tan waso Kaka, tawa soweli pona. mi pana e luka mi tawa ona, mi open e luka sama supa. soweli pona li lukin e kiwen lon sewi pi luka mi. luka ona li tawa luka mi, li awen lili, li kama jo e kiwen. ona li anpa e lawa ona tawa mi, li mu pona. lawa ona li kama sewi sin la mi ken lukin e pilin pona wawa lon insa pi lukin ona. telo lili li kama tan lukin.

ni la soweli li pali e ijo nasa. a! ona li open e kiwen a! mi ken ala lawa e wile sona mi. mi wile a sona e ni: seme li lon insa kiwen? soweli lili li lon insa anu seme? mi kama lon poka pi soweli nasa pona, mi lukin e kiwen. insa la sitelen li lon. sitelen ni li lawa taso pi soweli nasa. nasa a. musi a!

luka pi soweli pona li jo wawa e kiwen, li tawa lili, li weka e sitelen tan kiwen. soweli pona li pini sin e kiwen, li pana e ona tawa mi.

a!!

ona li wile pana e kiwen pona tawa mi a!

mi jo e kiwen, mi lukin wawa e ona. mi pilin pona mute a! mi wile toki e pilin pona ni tawa soweli pona! mi tawa musi. mi mu pi pilin pona. taso soweli li lukin nasa e mi. ona li sona ala e wile toki mi.

a! mi sona e nasin.

mi anpa e lawa mi tawa ona, sama nasin pi soweli nasa. mi anpa wawa e lawa lon tenpo wan, lon tenpo tu, lon tenpo mute. soweli pona li mu pi pilin musi. pilin mi la ona li sona e wile toki mi.

tenpo ni la mama li toki tawa mi. “o kama! mi ale o tawa tomo.”

mi tawa mama, mi toki. “a, mi ale li tawa ala ma weka, li pali ala e tomo sin, anu seme?”

“lon a.”

“ni li tan seme?”

“tenpo ni la mi sona e ni: monsuta li lon ala ma kasi.”

mi mu pi pilin pona! “pona a! waso Kaka o! mi tawa tomo!”

waso Kaka li mu pi pilin pona.

tenpo wan la mi lukin sin e ma pi tomo nasa, e soweli pona. soweli li lukin e mi li tawa e luka ona. mi sona ala e kon pi tawa luka ni, taso pilin mi la ona li ijo pona. mi kin li tawa e luka mi, sama soweli pona. ni la mi en mama en waso Kaka li tawa lon nasin li tawa ma kasi, li tawa tomo.

tenpo suno ni li nasa a. ijo ike mute en ijo nasa mute li kama. taso, pini la, tenpo suno ni li pona wawa a tawa mi.