nasin nasa pi jan Mupa

jan Mupa li pini lape. ona li lukin e poka ale ona li pilin pona tan ni: tenpo suno ni la, ona o pali ala. tenpo suno pini la, ona li pali mute la, ona li kama jo e mani namako pi mute pona.

suno li lukin e jan Mupa li suno e lili pi tomo ona. jan Mupa li mu lape.

ona li kama weka pi supa lape ona li pilin e kon suwi kepeken nena sinpin ona.

ona li open e lupa ona la, ona li lukin e jan sama ona. ona tu li open toki.

— toki a, jan Mupa o! tan seme la, sina lape lon tenpo suli a?

— jan Kawe o, tenpo ale la, sina pilin ike e mi! sina sama pipi! sina ken ala weka mi!

— seme a… tenpo suno ni la, sina wile ike e ijo ale tan seme?

— o pini, jan Kawe o.

— oke…

jan Kawe li tawa tomo ante. ona li ken pali e moku lon tomo ni. ona li open pali e pan. pan ni li suwi lili e ale pi kon tomo.

waso li kama lon supa pi lupa lukin. ona li alasa lanpan e pan ni, li lanpan e pan.

— pakala a tawa sina!

waso li mu musi li tawa sewi kepeken lupa lukin. jan Kawe li pilin ike la, jan Mupa kin li mu musi.

— jan Kawe o, ni li pona tan ni: sina pali moku ike lon tenpo ale! a a a!

— sina toki e ni; taso, lon la, sina olin e moku mi, nasa o.

jan Kawe li kama open ala e lupa lukin. ona li alasa ni kepeken wawa ale ona la, lupa lukin li pakala. ni la, lupa lukin li ken ala kama open ala.

— ike a! mi o seme?

jan Kawe li kalama suli li pilin ike tan pakala ni. ona li weka e seli pi ilo moku ona. seli li kama lili la, kule wawa ona li kama weka.

ona li toki.

— o kama, jan Mupa o!

jan Mupa li kama sin. ona li wile ala pona e jan Kawe tan ni: ona li pakala e ijo ale lon tenpo ale. taso, jan Mupa li pona ala e jan Kawe la, ona Kawe li kama open mu suli. ni la, jan ale lon ma ni li tawa poka pi tomo ni. jan Mupa li wile ala weka e lape pi jan ale la, ona li toki.

— sina pakala e seme lon tenpo ni?

— o lukin e lupa lukin. mi ken ala open ala e ona!

— a…

jan Mupa li kon wawa tan ni: jan Kawe li pakala wawa e lupa lukin. ona Mupa li toki.

— ale li pona… mi kama lon tenpo sin.

lipu nanpa tu

esun

jan Mupa li kama jo e moku lili e poki telo e ilo pi mute lili. ona li pana e ijo ni tawa poki. jan Mupa li kama jo e poki li pana e ona poki lon monsi pi ona Mupa.

jan Mupa li tawa weka pi tomo ona li alasa e tomo pi jan Sojun. jan ni li pana esun e ilo pi pona pakala.

jan Mupa li tawa lon nasin. nasin ni li lon ma kasi. ma kasi la, kasi suli li lon. kasi suli la, soweli mute en waso mute li tawa li pilin pona. suno li suno suwi eona ale. kin la, kasi li moku e suno.

tenpo poka pini la, lipu kasi li open moli li kama loje li tawa ma. ni la, jan Mupa li lukin e ni: lipu kasi loje li tawa musi lon kon.

lipu kasi loje li tawa anpa li kama lon lawa waso. waso li tawa sewi la, lipu kasi li tawa kin lon lawa ona. ni li musi li suwi tawa lukin la, jan Mupa li mu musi.

jan Mupa li awen tawa lon nasin kiwen lon poka pi linja telo. ona li kama open ala e lukin ona li kute e mu telo. ona li pilin e pona ale li open e lukin ona. ni la, ona li tawa.

suno li seli e ma e kon. noka pi jan Mupa li kama lon ma la, mu kiwen li lon. ona li awen pona lon monsi ona e poki ona li awen tawa.

jan Mupa li kama lon tomo esun pi jan Sojun.

— toki a, jan Sojun o.

— tenpo ni la, ona li pakala e seme?

— a, ona li pakala e lupa lukin pi tomo mi.

— taso, tenpo esun ni la, ona li ni lon tenpo tu wan!

tenpo suno ale la, pakala sin li lon. jan mute la, ni li ken ike; taso, jan Mupa la, ni li sama tenpo ale.

jan Sojun li lukin monsi li kama jo e lupa lukin sin.

— sina wile e ni la, o pana e mani luka tu tawa mi.

jan Mupa li lukin e poki pi len noka ona li jo e mani kepeken luka. ona li pana e mani tawa jan Sojun la, jan Sojun li lon poki e mani. jan Mupa li kama jo e lupa lukin li kama tawa weka; taso, jan Sojun li wile toki pi ijo nasa tawa ona.

— a! kin la, mi wile toki e ni tawa sina: mi kama jo e kiwen nasa lon tenpo poka pini. pilin mi la, ona li tan tenpo weka a! sina esun mute lon tomo esun mi la, mi wile pana e kiwen ni tawa sina. pilin mi la, ona li ken pona tawa sina.

— n, mi sona ala e ni: mi wile ala wile e kiwen.

— o jo!

— n, oke.

jan Mupa li kama jo e kiwen kepeken luka ona li tawa weka pi tomo esun.

lipu nanpa tu wan

toki

jan Mupa li tawa tomo ona kepeken nasin. ona li kama lon tomo ona la, ona li kama lukin e ni: suno li tawa anpa la, mun li tawa sewi. ni la, ona o lape lon tenpo poka.

jan Kawe li lape lon tenpo ni. ni la, jan Mupa o kalama lili tan ni: ona li wile ala pini e lape pi jan Kawe.

jan Mupa li tawa tomo pi supa lape ona kepeken tenpo suli. ona li kama lon tomo ni la, ona li kute e mu lili tan kiwen. jan Mupa li pini tawa li awen li lukin e kiwen. kiwen li open suno laso suwi.

jan Mupa li pilin monsuta lili; taso, ona li awen jo e kiwen kepeken luka. luka ona li tawa lili tan pilin monsuta. kiwen la, sitelen suno li kama lon. kiwen li alasa toki tawa jan Mupa.

— toki.

linja li kama sama palisa lon luka pi jan Mupa. jan Mupa li tawa poki jaki e kiwen kepeken wawa suli li tawa tomo lape ona. ona li len e ale sijelo ona kepeken len pi supa lape. ona li awen lon ni li tawa ala. ona li kon mute li ken ala pini; taso, tenpo lili la, ona li kama lape.

sitelen lape la, jan Mupa li awen pilin monsuta tan kiwen; taso, pilin ni li kama weka lon tenpo.

lipu nanpa tu tu

toki kiwen

jan Mupa li pini lape. suno li suno e len pi supa lape ona. len pi supa lape ona li selo e ona.

jan Mupa li tawa weka e len pi supa lape ona. jan Mupa li kute e mu len tan kiwen ni: ona li lon poki jaki ona. ni la, jan Mupa li kama lon luka e kiwen. kiwen li toki.

— o ken toki e mi! o pilin monsuta ala!

jan Mupa li open toki wawa.

— o pini!

kiwen li kama suno pi kule ante lon tenpo lili.

— mi wile ala ike e sina. mi wile e ni: sina lon ma Jaletu e mi.

— seme? ma Jaletu li seme a?

— ma Jaletu li ma tomo mi. tenpo pini la, ijo ale li pilin pona lon ma ni; taso, akesi Kuko li kama lawa e ma li ike e ijo ale. kasi li kama seli. waso li pini mu. kiwen li pini suno.

— ike a!

— ni la, mi tawa weka kepeken lupa usawi. mi kama lon ma kasi nasa la, mi lukin e sina li pilin e ni: ken la, sina ken pona e ike lon ma ni.

— n… taso, tan seme la, mi o tawa ma ni? tan seme la, jan ante ala li tawa ma ni li pona e ike pi ma ni?

— mi anu e sina.

— taso, mi jan meso. tan se-

— sina wawa. sina jo e ilo la, sina ken pona e pakala ale! kin la, sina ken tawa wawa. sona sina li suno e lawa pi jan ale. sijelo sina li ken pakala e ike ale! sina ken weka e pimeja lon ma ni kepeken suno.

— nasin seme la, mi ken pona e sina? mi lon ma mi lon tenpo ale pi lon mi. mi sona ala toki tawa ijo lon ma sina. ma sina la, mi sona e ijo ala!

— sina o sona namako ala. o kama!

— ala!

jan Mupa li pini toki e nimi “ala” la, kiwen li lon sewi e ona Mupa. ni la, jan Mupa li kama lape kepeken tenpo lili. ona li pini lape li lon ma kasi.

kiwen li toki.

— o kama lon lupa usawi!

jan Mupa li lukin e ona la, lukin ona li kama suno. ona li pilin pona a. uta ona li open a. ona li toki wawa.

— mi kama!

jan Mupa li kama jo e kiwen kepeken luka ona. jan Mupa en kiwen li kama lon lupa usawi.

lipu nanpa luka

ma Jaletu

lukin pi jan Mupa la, kule ale li tawa ale. ona li tawa lon lupa kule kepeken tenpo lili.

kiwen li toki e ni tawa jan Mupa:

— ni li ma mi. o tawa kulupu kasi.

jan Mupa li tawa kulupu kasi kepeken nasin ma. sewi li laso a. suno li suno suwi e kasi ale li seli lili e linja lawa pi jan Mupa. ona li awen jo e kiwen kepeken luka ona; taso, luka ona li kama wawa ala tan suli kiwen. ni la, jan Mupa li lon poki e kiwen li tawa monsi ona e poki.

jan Mupa li awen tawa lon nasin; taso, ona li kama lukin e waso. waso ni li lon kiwen suli li mu suwi; taso, nasa la, waso ni li mu ala. lon la, ona li toki kepeken nimi!

mi olin e sina;

taso, olin sina li lon ala.

mi alasa e sina;

taso, sina lon weka.

jan Mupa li pilin seli suwi lili tan kalama ni. ona li kama lon poka pi waso ni la, waso li open toki kepeken tenpo lili.

— toki a! sina kute ala kute e kalama mi? sina kute la, ona li pona ala pona tawa sina? ona li pona tawa sina la, sina pilin ala pilin e ni: ona li ken pona tawa meli? mi pakala. sina wile ala wile kute e kalama sin?

jan Mupa li pilin nasa tan ni: waso ni li toki mute.

— a, mi pakala! mi waso Lulu! nimi sina li seme?

— mi jan Mupa. n, nasin seme la, sina toki? lukin la, sina waso taso.

— nasa o, ale li toki lon ni! n, sina tan ala tan ma ni?

— tan ala.

kiwen li pana e toki tawa lawa pi jan Mupa kepeken usawi.

— o toki e ni tawa ona: “nasin seme la, mi ken alasa e akesi Kuko?”

jan Mupa li pilin nasa tan ni; taso, ona li kute li toki.

— nasin seme la, mi ken alasa e akesi Kuko?

— a! sina wile sona e nasin la, o kute e kalama kin!

— seme?

— mi kalama musi la, o alasa e kon! ni la, mi pana e nasin tawa sina!

— n, oke.

waso Lulu li kama jo e ilo kalama lili ona li open luka e linja ilo.

mi tawa wawa

li lon ma wan.

mi ken lon linja ni:

sewi li tan.

mi ken kule ale

li kule ala

kin la, mi lon e kala

ni la, mi seme?

jan Mupa li toki mute kepeken lawa li alasa e ona pona. ona li kama sona a.

— a! sina telo a!

waso Lulu li mu musi a li open toki.

— namako! namako a! oke! pona! pona a! o tawa lon nasin pi tawa mi!

lipu nanpa luka wan

nasin mu

jan Mupa en waso Lulu li tawa. kiwen li lon poki pi jan Mupa. kasi li len e suno la, lete lili li lon. ni la, jan Mupa li pilin pona. waso Lulu li mu suwi.

tawa la, sin la, waso Lulu li kama jo e ilo kalama lili ona li open luka e linja ilo.

ma li nasin e jan.

suno li nasin e kasi.

kasi li kama e pan.

jan li kama e musi.

nasin o, mi wile tawa.

o lawa e noka mi.

sijelo mi li wawa

la o awen nasin e ona ali.

waso Lulu li pini la, ona li awen mu waso e kalama musi ni. ni ale li pilin suwi e jan Mupa.

jan Mupa en waso Lulu li awen tawa lon nasin la, jan Mupa li kama lukin e ni: kasi ale pi ma ni li pona wawa tawa lukin. nasin li kama pini lon tenpo kama lili.

waso Lulu li toki e ni tawa jan Mupa:

— a! jan Mupa o! o lukin! o lukin e kasi ni! kule li

wawa! kule li suno e lukin mi! ni la, sina pilin seme?

— waso o… mi wile ala awen tawa! nasin li pini ala anu seme?

— taso… taso, jan Mupa o! o pilin ike ala! nasin li kama pini lon tenpo lili a! sina ken awen tawa! o awen tawa!

— n…

— n seme? lawa sina la, sina pilin seme? o toki! o toki tawa mi!

— wawa pi tawa sina li weka e wawa pi tawa mi! sina toki lon tenpo ale la, lawa mi li pilin pakala! sina ike ala; taso, mi kama pilin ike…

— seme? mi toki mute ala! mi toki lili taso! tenpo seme la, mi toki mute… mi toki lili lon tenpo ale, anu seme? toki mi li awen lili lon tenpo ale! mi kama lon la, mi toki lili. tenpo ni la, mi awen toki lili, anu seme a?

— o pini a!

— oke… mi pini toki.

waso Lulu li kama pilin ike li pini toki a.

jan Mupa la, kalama musi pi waso Lulu li pona a tawa kute; taso, waso Lulu li toki mute lon tenpo ale la, ona Mupa li wile ala kute e toki pi ona Lulu.

kiwen li kama tawa wawa lon poki. ni la, jan Mupa li open e poki ona li kama jo e kiwen kepeken luka. kiwen li toki tawa ona.

— jan Mupa o, sina toki ike tawa waso Lulu. sina o pilin pona e ona! waso ni li lon ala la, sina sona ala e nasin. sona ni li lon ala la, sina ken ala tawa ma pi akesi Kuko!

— sina toki lon…

jan Mupa li pana e kiwen tawa poki lon monsi ona.

jan Mupa li alasa lukin e waso Lulu; taso, waso Lulu li lon ala! jan Mupa li kama pilin ike suli. ona li kute e kalama lon monsi ona.

pona li alasa lon.

ike li kama kepeken wawa.

pimeja li moku e kon.

ike li moku e lawa.

jan Mupa li pini e kalama musi pi waso Lulu li kama jo e ona kepeken luka. ona li luka lili e lawa ona li open toki.

— waso o, mi wile toki e ni: mi wile ala ni lon tenpo pini: sina pilin ike. mi sona e ni: mi pakala suli. mi wile pilin pona e sina. nasin seme la, mi ken ni?

waso Lulu li lukin e jan Mupa li toki.

— ale li pona. sina ike ala tawa mi.

tenpo lili la, kalama ala li lon. waso Lulu li lukin e jan Mupa li kalama musi suwi tawa ona.

jan ale li pakala.

ike li ken lon wile ala.

waso Lulu li kalama la, ona li kama lape lon luka pi jan Mupa. suno li tawa anpa. mun li tawa sewi. jan Mupa li lape kin.

lipu nanpa luka tu

pini nasin

suno li kama tawa sewi la, jan Mupa li pini lape. ona li lukin e luka ona li sona e ni: waso Lulu li lon ala. jan Mupa li tawa sewi li lukin e ni: waso Lulu li alasa moku e pipi linja ma.

waso Lulu li mu suwi li kalama musi lili. waso Lulu li lukin e jan Mupa li open toki.

— a, sina pini lape! sina wile ala wile awen tawa lon nasin?

— wile!

ona tu li awen tawa lon nasin li kama lon poka pini. tawa la, jan Mupa li kalama musi lon poka pi waso Lulu. ona tu li musi mute li toki pi tenpo pini. ni la, jan Mupa li kama sona mute pi ma Jaletu.

— o lukin, jan Mupa o! tomo suli li lon weka!

— a, lon a!

tomo suli weka li tomo suli pi akesi Kuko. tomo ni la, akesi Kuko li lawa e ma Jaletu.

nasin li pini la, ona tu li kama lon poka pi sinpin pi tomo suli. ni la, waso Lulu li open kalama musi tawa jan Mupa kepeken ilo kalama lili ona.

tenpo open la,

mi ale li open tawa;

taso, pilin ni li lon lawa:

pini li lon ala!

noka li awen wawa.

sijelo li awen tawa.

nasin li awen lawa,

la pini weka

li kama, li kama.

jan Mupa li toki tawa waso Lulu.

— sina waso pona a. ken la, mi ken toki tawa sina lon tenpo weka kama.

— ken. o awen pona, nasa o!

telo li kama tan lukin pi jan Mupa. ona tu li pilin ike; taso, ona tu li kama sona e ni: ona tu o tawa ma wile.

waso Lulu li mu musi lili li tawa sewi weka.

lipu nanpa luka tu wan

tomo akesi

jan Mupa li kama jo e kiwen lon luka ona li toki tawa ona.

— mi en sina li taso. mi tu o kama lon tomo ni; taso, jan utala li lon poka pi sinpin pi tomo suli. ni la, mi tu o seme?

kiwen li suno pi kule mute. ona li kama suno laso la, ona li toki.

— a! mi sona! o tawa ala. o awen.

jan Mupa li awen. kiwen li suno e jan Mupa la, jan Mupa li kama sama jan utala tawa lukin. kiwen li open toki tawa jan Mupa.

— ni la, sina ken tawa insa pi tomo suli tan ni: jan utala li pilin e ni: sina kin li jan utala.

jan Mupa li tawa lupa open pi tomo suli li tawa insa. ona li tawa sewi kepeken leko. ona li tawa sewi la, ona li open e lupa tomo. lupa li kama open la, jan Mupa li ken lukin e akesi Kuko.

lukin la, akesi Kuko li suli a. ni li pilin monsuta e jan Mupa.

jan Mupa li toki.

— toki!

akesi Kuko li pilin e jan Mupa kepeken nena sinpin.

ni la, ona li sona e ni: ni li jan utala ala! ni la, ona li kama pilin ike wawa li open toki.

— sina seme, ike o?

— mi jan utala! mi wile toki e ijo suli tawa sina!

— sina jan utala ala. sina jan ike! o tawa weka!

akesi Kuko li open pana wawa e seli tan uta ona. jan Mupa li tawa weka seli li awen lon tomo. akesi Kuko li awen pana wawa e seli.

jan Mupa li alasa kama jo e ilo tan poki ona; taso, seli pi akesi Kuko li pakala seli e poki. jan Mupa li kepeken poki tawa ni: seli li pakala seli ala e ona Mupa.

akesi Kuko li awen pana e seli tan uta ona. ona li pana e seli tawa noka pi jan Mupa. jan Mupa li tawa sewi la, seli li pakala ala e ona.

seli li awen pana. tenpo ni la, ona li pana tawa lawa pi jan Mupa. jan Mupa li tawa anpa la, sin la, seli li pakala ala e ona.

jan Mupa li tawa kepeken tenpo lili li tawa weka seli. taso, akesi Kuko li pini ala pana e seli; taso, pona la, kiwen li toki tawa lawa pi jan Mupa kepeken usawi.

— o lon sinpin sina e mi o awen!

— tan seme? mi ni la, mi moli!

— sina moli ala!

jan Mupa li lon sinpin ona e kiwen li tawa ala. akesi Kuko li pana wawa suli mute a e seli tan uta ona. jan Mupa li pilin monusta mute; taso, kiwen li open suno loje li tawa akesi Kuko e seli. akesi Kuko li kama pimeja tan seli wawa la, kon pimeja li len e tomo. kon pimeja li weka la, jan Mupa li lukin e ni: akesi Kuko li kama akesi lili pi suli luka.

akesi Kuko li mu lili li tawa weka kepeken tenpo lili. kalama ala li lon. jan Mupa li mu musi a. kiwen li toki tawa jan Mupa.

— sina pona a! tenpo ni la, ale pi ma Jaletu li ken awen pona! sina ken tawa ma sina.

kiwen li lon e lupa usawi. jan Mupa li lukin e kiwen li pilin e ni: ona Mupa li pali suli. ni li pilin pona e jan Mupa. kiwen li suno jelo. pilin pi jan Mupa la, ni la, kiwen li pilin pona.

jan Mupa li pini lukin e kiwen li open lukin e lupa usawi. kule suwi lupa la, jan Mupa li open tawa lupa.

ona li lon insa lupa la, kule ale li len e lukin ona. jan Mupa li kama lape tan tawa. ale li kama pimeja li kama kalama ala.

lipu nanpa luka tu tu

tomo pona

toki li lon.

— jan Mupa o! sina pini ala pini lape?

ni la, jan Mupa li pilin nasa; taso, ona li sona e ni: kalama ni li kama tan jan Kawe. ona li lon supa lape ona!

jan Mupa li toki ala. ona li open e lukin ona li tawa weka pi supa lape ona.

ona li alasa e kiwen ona; taso, kiwen li lon ala. ona li pilin ike tan ni. ona li alasa e kiwen lon poki ale pi tomo ona.

jan Mupa li tawa weka pi tomo ona kepeken tenpo lili. len ona ale li pakala lili li pimeja lili li jaki lili. sinpin ona la, linja pakala lili tu li lon.

jan Mupa li tawa lon nasin tawa ni: ona li ken kama lon tomo esun pi jan Sojun. suno li suno e lukin ona la, ona Mupa li kama open ala e lukin lon tenpo lili kepeken tenpo lili.

kasi li awen tawa suwi. waso li awen mu suwi. ijo ale li awen sama tenpo pini; taso, kiwen nasa pi jan Mupa li lon ala. jan Mupa li sona ala e tan.

jan Mupa li kama lon tomo pi jan Sojun la, jan Sojun li toki.

— toki a! ona li pakala e seme lon tenpo ni?

— ona li pakala ala e ijo. mi kama tan ni: kiwen nasa sina li toki! ona li toki sama jan li tawa ma nasa ante “Jaletu” e mi. ma ni la, ijo mute nasa li lon: waso li toki li kalama musi li tawa e mi tawa tomo pi akesi Kuko. akesi Kuko li akesi ike li ike e ma Jaletu lon tenpo pini la, pona li pini lon. mi lili e ona kepeken kiwen nasa ni a! kiwen li seli e akesi la akesi li kama lili li kama wawa ala. ni la, sin la, mi kama lon ma ni. ni ale la, sina sona ala sona e ni: kiwen li lon seme? mi sona ala e ni. mi kepeken lupa usawi la, ona likama lon ala!

— jan Mupa o, pona a! sina toki pi ma ni la, mi pilin e ni: ona li musi a! mi sona ala e ni: kiwen li lon seme. tenpo pini la, mi pilin e ni: sama tenpo ale la, jan Kawe li pakala e ijo; taso, tenpo ni la, mi wile sona namako e ijo pi ma Jaluju!

— o toki ala e ma Jaluju. ona li ma Jaletu! a a a.

— pakala! mi suli la, wawa sona mi li kama lili.

— mi wile pana e sona namako; taso, mi o tawa.

jan Mupa li tawa tomo ona. ona li awen sona ala e ni: kiwen li lon seme. ona li kama pilin nasa lili la, lawa ona li kama sona e toki pi jan ante anu ijo ante. ni li tan ni: sin la, kiwen li pana e toki tawa lawa ona kepeken usawi! ona kiwen li open toki.

— o alasa ala e mi. sina pali mute la, o lape o kama wawa namako. mi lon ma Jaletu li pilin e pona ona. o awen pona a!

jan Mupa li kute e toki ni la, ona kin li open toki.

— sina kiwen pi pona mute. sona sina en usawi sina li namako wawa a. o awen pona kin!

lipu nanpa pini

lupa lukin

jan Kawe li kama. jan Mupa li lukin e ona la, ona li open toki.

— toki a, jan Kawe o!

— sina seme lon tenpo suli? sina tawa weka pi tomo ni lon tenpo pini a!

— ni li suli ala. mi o pona e lupa lukin!

— taso, o lukin, jan Mupa o! mi pona e lupa lukin kepeken ilo sina!

— pona a! o alasa kama open ala e ona.

jan Kawe li alasa kama open ala e lupa lukin kepeken wawa a; taso, lupa lukin li kama pakala li kalama ike.

jan Mupa li kalama suli.

— pakala!