tenpo pini weka

tan jan Akeso

mute nimi: lili, LWAMMMMLLLTW

o lukin tawa tenpo pini weka. tenpo ni la, sina lon ala. nena suli li lon ala. ale lon ma ni li lon ala. ma taso li sona e tenpo ni. taso, ona li kama ante mute. o sona e toki ni!

ma. ma ale li sama. lupa li lon ala, nena li lon ala. ma ale li supa, li sama.

kasi. kasi ale li sama. ona ale li lili, li laso, li linja. taso, lukin la, ona li sama palisa. linja ni li tawa ala. noka ona li lon ma. sewi ona li tawa sewi. ona li tawa poka ala. ona li sike ala. kasi ale li sama.

kon. kon ale li sama. ona li tawa ala, li jo e telo lili. taso, telo ni li awen lon sewi, li tawa ala anpa. kon walo li lon ala. sewi ale li laso. kon ale li sama.

ale li sama. taso, ijo wan li ante. ni li soweli. soweli ale li wan. soweli wan taso li lon. taso, wan li mute.

soweli li sona e ni: ale li sama. taso, ni li ike tawa soweli. soweli li wile e ijo ante. ala li pali, ala li pona. ni la, soweli li pilin ike.

sewi li ken kama pimeja. taso, tenpo ale la, ni li sama. suno li tawa anpa, li pana e loje sama. kama suno li sama tawa anpa suno. ale li sama.

soweli li mu e ni: ante o, kama! taso, ante li kama ala.

tenpo pona la, soweli li kama jo e sona pona. ona li ken kama e ante! taso, soweli li wile kama e ante la, ona li kepeken tenpo mute. ni li pona, tan ona li jo e tenpo mute. ona li moli ala. ona li wile pali e ijo. ona li ken ni.

soweli li ken moku e kasi, li ken tawa e ma. ona li ken ala pali e ante, taso ni li ike ala. soweli li moku, li moku, li moku. kasi li kama ante. kin la, kasi ale li sama palisa. soweli li tawa lon ona. ona li kama sama ala. ona li tawa poka lili. ona li sike lili.

soweli li tawa e ma. ni li pali e lupa, e nena. ni tu li lili. taso, tenpo suli la, nena ni en lupa ni li kama suli. tenpo li tawa, li tawa, li tawa. soweli li moku, li tawa, li tawa e ma, li moku, li tawa, li tawa e ma…

soweli li sona ala e ni: pali ni li ante e kon. ante ni li lili. taso, lon tenpo suli la, ona li kama suli. tenpo pini la, kon lon ma wan li sama kon lon ma ante. taso, ni li kama lon ala. kon li kama tawa.

soweli li pali e nena, li kama pilin e kon tawa. ni li nasa mute mute tawa ona. kon li tawa tan seme?? kon li ken tawa?? ona li sona e ni: nasin la, ni li tan ona. taso, ona li sona ala e ni: nasin ni li seme? taso, ona li awen pali.

kon walo li kama lon sewi. soweli li awen pali. suno li tawa anpa kepeken nasin ante. soweli li awen pali. soweli li pini. ona li lukin e sewi…

ale li kama ante! ona li ante e ale! ale li pona. taso, kon walo sewi li kama pimeja…

telo li tawa anpa lon tenpo nanpa open. telo li kama lon ma. ma li sona ala e telo. telo li sona ala e ma. ona li kama lon lupa ale, li kama lon ma ale, li kama telo suli, li kama linja telo, li kama ma telo. telo li kama! soweli li pilin pona. ante li kama.

taso, telo li kama lon soweli. ni li ante e ona, li mute e ona. soweli wan li kama soweli mute. ni li pona tawa soweli. soweli wan li ken mu tawa soweli ante, li ken sona e soweli ante, li ken lon poka pi soweli ante.

ni la, tenpo ale kama la, ale li kama ante li kama ante, li kama ante. sama li lon ala. sama li ken ala kama lon tenpo sin. ante li awen.