toki musi lili

alasa musi pini

tan kapesi Pake

tenpo pini la mi lukin e
toki pona li wile mute
kama sona e ona. taso, pali li pana
e nasa nasin mute ike.

ilo wawa

tan jan Sepulon

pimeja li lon sinpin pi jan utala ale, li len e ma ko. kalama ala li lon. jan utala ni li sama kiwen laso: ona li tawa ala, li awen. jan ante ala li lukin e ona. waso en pipi en soweli li kalama ala. ma ale li lape lon pimeja pi pilin musi ala.

jan lawa pi jan utala ni li tawa e luka. jan ale li anpa, li pana e luka lon kute ona. tenpo pi lili nasa la, pimeja li tawa. suno wawa li lon, li kama suli. soweli en waso li tawa wawa weka. kalama pi pakala ma li kama. jan ale li pilin e ni: “ken la, jan lawa mi li pana e moli tawa mi ale!”

tenpo ante la, jan ala li pali e ilo moli wawa sama ni. taso jan ala li kama moli. ilo ni li pakala wawa lon ma tomo pi jan ala. ma tomo ni li jo e jan lon tenpo ala. ijo sama jan lon tomo pi wawa ala en kasi kule taso li lon.

jan lawa li tawa sin e luka ona. jan utala ale li tawa ma tomo moli. taso moli lili li lon. ilo pakala sin ni li pakala ala e ijo. ona li pana e moli taso. tomo li awen. taso kasi ale li moli.

en la, jan utala ale li sona e ni: ijo lili ante li kama moli lon tenpo ni; pilin pona tawa tenpo kama li moli. nasin tawa olin pi jan ale li kama moli. tenpo kama li moli. tenpo pini lili la, suno nasa li kama. tenpo ni la, pimeja taso li awen.

jan Pilipu Kalasi (Philip Glass)

tan jan Mimakenta

jan Pilipu Kalasi li pali e kalama musi pi epiku mute
mi olin e kalama musi pi jan Pilipu Kalasi

ken la jan

tan jan Uwe (Russ Sharek)

󱤘󱤡 󱤑󱥝󱤧 󱤖󱤑󱥒󱤧 󱤖󱤑󱥔󱤧 󱤖󱤑󱥅


o lukin kepeken sitelen Lasina

ken la
jan sin li
kama jan poka li
kama jan pona li
kama jan olin.

linja mije

tan kulupu kala

linja lawa li ijo nasa. ona li ken toki e mute li ken toki e lon sina. taso ona li ken toki e powe.

linja mi li toki e powe. ona li suli la jan ante li kepeken nimi meli tawa mi. ni li ike mute tan ni:

mi meli ala. mi mije tonsi. ma mi la linja suli li meli lukin. taso linja lili li mije lukin. mi wile mije lukin. mi o jo e linja lili tan ni.

mi tawa esun pi ante linja. jan li tawa mi. luka ona li seli. ona li kepeken telo kepeken kon kepeken ilo kiwen. ona li weka li pakala li lili e linja mi. pini la ona li luka tawa jasima. “ni li pona ala pona tawa sina?”

jasima li lupa e uta mi. mi mije lukin. mi mi lukin.

luka waso pi nena taso

tan jan Lakuse

mi lukin e waso pona tu
lon ma kasi lon poka pi
tomo lape mi la
pimeja walo
laso waso
jelo laso
ni ale
la

mi lukin e waso pona tu
mije en meli la waso
tu li wile lon poka pi
ona olin sama la
sama kiwen la
mi tawa ala
lukin taso
o weka
ala

mi lukin e waso pona tu
ona li lukin weka tan
mi suli monsuta la
utala lili li kama
ilo sitelen mi
li wile ala
sitelen
e

mi lukin e waso pona tu
lon la nimi ‘waso’ li
nimi pona ala tan
ni: waso ni li kx
lon sewi mute
luka ona li k
ala pana e
sijelo la
mi ken
alasa
pona
kin

mi lukin e waso pona tu
waso pona suwi tu o
mi sama sina lon
nasin ni: jan li
wile alasa e
mi la mi
anpa a
tawa
ona
sina
o anpa
e mi jan.
tan seme
la sina tawa
lon tenpo ale a
o lukin alasa e mi
o lukin anpa a e ijo
pi suli mute la ken la
sewi li lukin li pilin pona
sina ken sama waso ante ale

lon n taso ala

tan jan Pontu

open la, ijo li kama.
pini la, ijo li weka.
insa la, ijo li lon.

ijo ale li kama, li lon, li weka,
li open, li pini.
tan ni la, pilin nasa li kama.

mi pilin e nasa!
mi kute e pilin!
mi alasa sona!
mi weka e kute!
mi lukin e ante!
mi musi tan weka!
mi weka tan pilin!
mi nasa! mi nasa
e pilin, e sona
e musi, e kon,
e suli, e pona
e ale! mi lon!

lape li kama,
li weka e utala insa.

pini lape la, nasa li awen.
taso, nasa li ante.
ale li ante.
kon li tawa e lipu, e palisa kasi.
kalama pona li lon.
suno li open,
taso lete li awen.

jan ale li awen lape.
mi taso li lukin,
li kute, li pilin
e ante wawa.

sona li kama sin tawa mi
pilin li kama kin sama ni:

mi wile lon n taso ala.
mi wile lon a!

mu namako

tan ijo tan anpa nanpa (Itan)

tenpo nasa nasa la soweli li kama pana tawa mi e sona pi kulupu soweli ona! ona li lon kulupu suli! ona li musi lon tenpo ale! musi ona li musi utala.

utala li ni: o mu. soweli seme li ken mu pi pona nanpa wan? ni li suli lon kulupu. soweli pi mu pona li soweli pona. tenpo ale la soweli ale li alasa pona e mu ona li alasa mu sama soweli poka.

nasin ante wan kin la soweli li soweli pona lon kulupu ni. ken la soweli nasa wan li toki tawa soweli ante e ni: “mu sina li ike li sama ala mu pi mi ale.” ni li ike e pilin pi soweli mu. taso tenpo ni mute la soweli ante ante li kute e ni la ona li pona e pilin pi soweli mu kepeken toki ni: “mu sina li pona! o weka e toki pi soweli nasa. kepeken tenpo la sina ken kama ken mu sama mi ale!” mu pona en toki pona ni kin la soweli li soweli pona.

mu pi soweli mute li sama mu pi soweli poka ona li pona. taso soweli la tenpo suno wan la ona li pakala suli nasa lon nasin mu ona la mu namako li kama li sama ni: ona li namako kute tawa sona pi soweli poka ale. ni li kama la soweli poka ale li kute e mu namako li wile kama sona e nasin mu tan soweli mu. ni la soweli pi mu pakala li kama soweli pi pona nanpa wan lon kulupu tan pakala ona!

tenpo nasa nasa la mi lukin e nasin ni pi ante wawa lon tenpo mute. ona li musi tawa mi. sina o kama sona e seme tan ni? mi sona ala. taso awen la ale li pona.

mu wawa

tan jan Puloku

monsuta li kama. jan li wile tawa
jan li ken ala mu wawa. mu wawa la monsuta li ken alasa e jan.
jan li pilin monsuta… ona li pilin e monsuta.
monsuta li mu wawa. taso jan li ken ala mu wawa.
sijelo moli li lon ma.
tan seme la jan li kama tawa monsuta?
ona li seme?
moli li kama tawa ona.
jan li mu wawa.
monsuta li lukin e jan
jan li awen. jan li tawa ala.
ona li mu wawa.
ona li moku e jan
ona li moku e ale
jan li kama monsuta.
jan li monsuta.

nasin mun

tan jan inwin

suno li weka· sinpin li pimeja·
monsuta mute li moku e sona·
supa la sijelo li seme e noka
e luka e lawa· len li lon ala·
lete li kama· lape li wawa·

☽ ~ ~ ~
telo la lawa lon lape li awen·
kulupu kala li toki e jaki·
kute la kala li kalama ike
e pakala pini lon pali ale·

taso oko lon insa li open e tawa·
kalama kala li kama lili·
tomo telo li tawa poka·
sewi mun li lon sinpin li lawa·

sewi mun li mu wawa e ni·
‹o kute o kama lon kulupu tawa·
telo mun li tan e wawa
la jan li ken pona e pilin e lawa›·

tomo telo la tenpo li ala·
oko li insa e utala kule
e mama mun e moli sike·
ko li kule lon kulupu suno·

tomo telo la tawa li suli·
mute li kama· mute li weka·
kulupu tawa li kalama musi·
nasin mun la nasa li wawa
li pana lon pilin e pona sama·

sewi mun la ‹monsuta o weka·
kulupu pona o pake e sike·
tawa pini o pona e lawa›·
sin la sijelo sina li telo·
~ ~ ~ ☾

kalama waso li kama tan lupa·
suno li seli e sijelo lete·
lape li pini· pakala li weka·
sike monsuta li suli ala·

pimeja

tan kili potato_9898

pimeja li lon.
pimeja li ike.

tenpo pimeja la kon li lete
kon li lete e mi
mi lete la mi ike

tenpo pimeja la pipi mute li lon
ona la mi moku
ona li uta e mi li pakala e selo mi

tenpo pimeja la mi wile suli lape taso
mi wile pali li wile musi. taso mi ken ala

tenpo pimeja la pimeja li len e ijo ale
mi kute e kalama la mi sona ala e tan kalama
tenpo pimeja la mi sona ala e lon ijo

mi ike pilin tan pimeja.

n…

mi lukin e sina.
pimeja li ike ala tawa sina.

kon lete li pona tawa sina
lete la sina ken moku e moku seli li ken kepeken len seli.

pipi li pona tawa sina
sina lukin e pipi la ona li kule li suwi
sina wile e sona ona

kin, len pimeja li pona tawa sina.
pimeja li len e ijo la sina wile alasa e ijo len
sina sona ala e ijo ale li pona pilin

tenpo pimeja ni la sina toki e ni:
„o kama! o musi!”
„mi en sina o alasa e soweli lon kasi pimeja!”
„ni li musi a!”

mi wile ala alasa lon pimeja
taso mi kama

mi en sina li tawa ma kasi li lukin lon pimeja

ala li lon.

mi en sina li awen lukin lon pimeja

ala li lon.

mi en sina li kute e kalama tawa lili

„n… ken la soweli li tawa lon pimeja?”

mi toki insa e ni:
ken la ala li lon pimeja

taso, mi en sina li awe-

„kijetesantakalu a!!”

kijetesantakalu li kama tan kasi.

ona li lukin e mi e sina

ona li mu lili

ona li weka

„suwi a…”
„pimeja li pona!”

n…

ken la, pimeja li ike ala

pipi li wile pakala

tan jan Keri

toki! mi pipi. jan mute li pakala e mi kepeken palisa pi utala pipi. ona li sona ala e ni: mi wile e ni! ni li pona mute tawa mi! jan li pona mute tawa mi. pipi ante li wile ala e ni. ona li pilin e ni: jan mute li ike mute tawa pipi ante. pipi ante li pilin monsuta tan jan. pipi ante li tawa kepeken luka waso ona la ona li lukin e jan. mi awen li wile pakala la mi lukin e jan. mi tawa kon lon poka sinpin lawa jan. mi pali e ni la jan li pilin utala mute. jan jo e palisa pi utala pipi. jan li wile pakala e mi. ona li moli e mi. mi wile pilin e pakala. mi wile ala moli. tenpo sin la mi tawa kon lon jan kepeken luka waso mi. pipi ante li lukin e mi.

ona li toki e ni tawa mi: pipi ni o weka e jan! ona li wile moli e sina!!

mi toki e ni tawa ona: mi sona ale. mi wile pakala tan jan. mi moli ala.

tenpo ni la jan li utala e monsi mi kepeken palisa pi utala pipi. ni li pilin pona. mi wile ala pilin e pakala sin. mi tawa kon li weka e jan. mi tawa kepeken tenpo lili. tenpo sin la jan li alasa pakala e mi. jan li pali ala. jan li pilin ike tan ni. mi tawa kon tawa tomo mi.

sina lon e ma

tan kala suno/waso laso Alisanosaka, pi kulupu telo mun (kutemu)

ijo lili, o lukin e sina
sina lape mute li moli lili.
sina alasa len e sina
mi awen lukin e sina.
pakala lili mute li lon selo sina.

ijo lili ni li wile sona,
sona sina li weka anu seme?
tenpo pini la,
sina lukin e telo sewi.
telo sewi li tawa anpa lon tomo tawa.
sina alasa sona e ni:
pini la seme li nanpa wan.

mi sona e sina.
sina ijo sewi li ijo anpa.
sina lon ma nanpa wan,
sina pini ala.
pali ale sina la,
nasin sin li kama lon.
sina pakala e pilin pi jan mute la,
ijo sin li kama weka.

sina sewi li ike.
sina kalama li pana e pilin ike,
sina kalama li pana e pilin monsuta.

ijo lili li lape.
o anpa e sina lon ma
tenpo kama la,
ma li wile lape e sina,
o kute e ma.
sina kute ala kute e ona?
ma li kon.
ma li len sina,
kasi li tomo e lawa sina.
ma li tomo e sina lon sijelo ona.
o lape, o lape suwi
ma sin li awen.

sitelen tawa lon

tan jan Poli

jan musi li pali e sitelen tawa.

ona li pali e sitelen tawa ni kepeken luka tu ona taso.

sitelen tawa ona li lon mute tawa lukin jan.

tenpo wan la, jan li alasa e sona ni tan ona:

sitelen sina li lon mute lukin.

sina kepeken ala kepeken ilo sitelen lukin?

jan pi pali sitelen li sewi e poka uta ona, li toki e ni:

ala a.

taso mi pali e sitelen tawa lon sama kepeken ona!

sona la

tan asali

sona lipu la lon
ali nimi li ken e insa
ona. oko lon lipu
li pana e sona sin.

ni la, sina toki.
kasi lon uta sina li
lon insa sina taso.
nimi la ken ala ken kute?

suli la pilin kute
li ken ala lon lipu.
sona lawa li
lon pana pi telo sewi.
ni li kama, ni li tawa.
sona pona li awen ala.

tenpo li lili

tan jan Jasun

ona li wawa li lawa li tawa
ali la ona li ken awen ala
ona li mute li suli li lon
li kama e moli
li weka e kon
tenpo
li lili
e musi e mi
e ken pali ali pi jan pali ni
tenpo li moku e tenpo mi sona
mi wile e tenpo tan wile mi pona