jan usawi

tan jan Kepe

mute nimi: suli lili, LLWAMTT

o sona e ken ike lon lipu ni

tenpo pi lon ala la, kulupu jan li lon ma lili Akepa. kulupu ni li kulupu lili, li ken ala pali e usawi.

tenpo la, jan Kasona pi kulupu ni li isipin lon lawa ona, li isipin e ni: jan usawi li pali e ijo nasa kepeken seme? jan ale li ken ala ken sona e usawi ni? mi ken ala ken sona e usawi ni? la jan Kasona li tawa jan Upasi. ona li jan usawi suli pi kulupu ante.

mama pi jan Kasona li toki e ni: “jan Kasona, o toki e ni: sina tawa seme?”
jan Kasona li toki e ni: “mi tawa kulupu Paje, la mi kama sona e ijo.”
“sina kama sona e ijo seme? o toki pona tawa mi.”
“…mi.. kama sona e ijo taso, mi lukin e jan pi kulupu ante.”
“mi mama sina la o toki pona tawa mi. sina wile pali e seme. sina kama sona e seme?? sina o toki ala pi sama pi jan sama sina.”
“…mi wile kama sona e usawi”
“sina wile e seme?? sina nasa anu seme?? o kama tawa mi, o kama!”
la jan Kasona li tawa mama ona.
“jan lili mi o, kute e toki ni. usawi li pali ike. ijo ale li ken kama tan usawi. jan ala li sona e ijo ni. ken la, sina ken.. ken moli a!”
“mama, o toki ala e ni. o sona e ni: mi tawa jan Upasi, li toki tawa ona, ni li moli ala! o pilin monsuta ala. mi sona e pali mi, e jan ni.”

sinpin pi mama pi jan Kasona li pakala, taso ona li toki utala ala. “sina wile la, o pali e ni. mi sona ala e sina.”

sinpin pi jan Kasona li pona mute! ona li weka tan tomo ona, li weka tan ma ona. nasin pi ma Paje li suli, taso ona li wile pali e ni.

ona li kama jo e telo e moku lili tan tomo ona. moku ni li moku pi mama ona. ona li moku e ni la ona li lukin insa e mama ona. moku ni li pona tawa ona tan ni.

tenpo kama suli la, ona li kama lon ma Paje, li tawa tomo pi jan Upasi. jan Upasi li jan pona la jan Kasona li toki e ni tawa mama ona, taso jan Kasona li sona ala e jan ni. ken la, ona li nasa. taso, ona li kama lon ma ni tan ijo, la ona li pali e ijo ni.

“jan Upasi o!”
jan ala li toki.
“jan Upasi o!”
jan ala li toki.
“jan Upa-“
lupa tomo li open
jan majuna pi sijelo suli li lon. lukin la, jan ni li ken pakala e jan Kasona kepeken tenpo lili.
“t-toki, mi jan Kasona”
“toki. o jo.”
jan Upasi li pana e mani mute tawa jan Kasona.
“ni li seme?”
“ni li mani pi moli .. a, sina jan ante”
“a. moli seme? mi… mi wile sona e usawi. o pana sona tawa mi.” “…a a a, sina wile sona e usawi? taso, sina lili mute”
“mi ken sona. o pana sona tawa mi, mi wile mute!”
“a a a, mi ken lukin e ni. mi majuna mute taso mi ken pana sona tawa sina. o tawa insa”
jan Upasi li sona ala e jan ni, la ona li toki e ni:
“taso, mi lukin ala e sina. sina tan kulupu seme?”
“mi tan kulupu Akepa. mi sona e sina, la mi kama lon ma ni”
“kulupu Akepa a? ma ni la ma Akepa li weka mute!”
“lon..”
“..”
“o pana sona.”
“mi pana, mi pana.”
jan Upasi li weka, li lanpan e ijo. lukin la, ona li lipu.
jan Kasona li lukin suli e ijo ni.
“o lukin e ni. ni li lipu usawi. mi toki e usawi tawa sina, o kute. usawi li ijo sona. jan usawi li pali e ijo, la ijo li kama, la jan ni li sitelen e pali ona lon lipu.”
“..seme?”
“o lukin. tenpo la, mi wile moku, taso mi jo ala e moku. mi isipin. mi isipin e ni: pali moku li sama e pana kili lon seli. la, mi isipin e moku pi wile mi, la mi pana e kili lon seli usawi, la moku ni li kama tan seli usawi. la mi sitelen e ni lon lipu mi. o lukin e lipu, o pali e ijo sina!”
“..mi alasa pali…”
jan Kasona li lanpan e lipu pi jan Upasi
“mi lukin e ni: sina wile pali sama waso la o isipin e waso, o tawa sama waso e luka sina.”
jan Kasona li kama tawa e luka ona. tenpo kama lili la, ona li tawa sewi. ona li toki e ni: “jan Upasi o lukin! mi waso! mi waso!”
“pona. sina waso.”
“MI KEN PALI SAMA WASO! O LUKIN!”
“mi awen lukin.”
“MI WASO!”
“o pini.”
“a! a! mi tawa anpa! o awen e waso mi!”
jan Kasona li tawa ma anpa, li pakala e sijelo ona.
“mi… mi pali e usawi anu seme a?”
“sina pali. sina pali pona.”
“mi wile pali e ijo mute! mi ken… mi ken kama e ken ala moli! ala, tenpo ni la mi ken ala moli!”
“o pini. o isipin ala e ijo ni. o ike ala.”
“SINA KEN ALA PALI E IJO TAN MI! SINA PANA SONA E USAWI TAN MI LA SINA NASA MUTE! A, mi lukin e lipu ni a! mi lukin e ni: sina wile moli ala la o isipin e jan sewi, o toki tu e ni: mi jan sewi. mi ken ala moli. o toki luka e ni. o toki luka luka e ni.”

lukin la jan Kasona li nasa. jan Upasi li pali e nasa tawa jan Kasona anu seme? anu la, jan Kasona li nasa tan usawi ona sama?

jan Kasona li pali e toki sewi ona, taso nanpa luka tu tu la, ona li toki e ni: “mi jan sewi. mi ken moli”. ona li pakala. tenpo ni la, jan Kasona li moli kepeken tenpo ala. sijelo ona li anpa lon ma. ona li pana e telo loje tan ale sijelo ona. ona li ken ala lukin, li ken ala kute. ona li moli.

jan Upasi li pilin musi. ona li lukin e lipu ona, li lukin e ni: “sina wile moli e jan la: o pana sona e usawi tawa ona.” ona li sitelen e nimi “pona” lon poka pi sitelen ni. ona li toki e ni: “ni li usawi. ni li usawi.”

jan Upasi li lanpan e sijelo moli pi jan Kasona, li pali e ijo tawa ona, taso mi ken ala lukin tan sijelo pi jan Upasi. tenpo ni la, jan Upasi li lili lukin, li majuna ala.