waso Mumu li mu ala

tan jan Atelin

mute nimi: lili, LWAMMMLT

waso Mumu li waso nasa. ona li lili li jo e len waso pimeja sama waso ante. waso sin li kama tan sike kiwen mama la, ona li mu mute. taso waso wawa wan li toki e ni:
“toki, mama o! nimi mi li seme?”
… waso mama li toki e ni:
“mu! mu!”
ni la, ona li kama waso Mumu.

waso ale li kama suli la, waso ale ante li awen mu.
ni li ike tawa waso Mumu. waso ante li kama suli li tawa tan tomo ona. waso Mumu kin li kama suli la, ona li toki e ni tawa mama ona:
“mama o, mi wile tawa li wile toki. lon ni la, waso ale li mu taso tawa mi. mi tawa ma pi ijo toki!”
sama waso ante la, ona li tawa.

ona li tawa li kama lukin e waso sin. waso ni li jo e len loje li pona lukin tawa waso Mumu. waso Mumu li kama lon poka pi waso ante li toki.
“toki a, waso pona o!”
taso waso Mumu li toki la, waso loje li pilin monsuta li kama tawa sewi. ona li tawa la, ona li toki e ni:
“mu!”
taso waso Mumu li pilin ike ala. waso ante li ken ala toki la, ni li ijo sin ala.

ona li tawa kepeken tenpo lili li kama lukin e soweli.
soweli ni li lili li lon ma. ona li alasa e kili. waso li kama lon poka soweli li toki e ni tawa ona:
“toki a, soweli ma o! mi waso Mumu!”
… taso soweli li lukin e waso li toki e ni: “mu!”
waso li kama pilin ike lili. soweli kin li ken ala toki! ona li tawa li awen alasa e ijo toki.

lon kasi linja suli la, waso Mumu li kama lukin e akesi len. akesi li linja li jo ala e noka li lukin alasa e soweli lili. lon sewi la, waso li toki e ni:
“akesi o! o mu ala tawa mi!”
akesi li tawa sewi e sijelo ona li toki e ni:
“mu!”
waso la ni li monsuta.

waso Mumu li tawa kepeken tenpo mute. ona li lukin e waso mute e soweli mute e akesi mute. taso, waso Mumu li toki ala tawa ona tan sona ni:
waso ante en soweli en akesi li toki ala.
ijo seme li ken toki?
“n… ken la ijo toki li sona mute.”
tan pilin ni la, ona li alasa e tomo tan ni: ijo sona taso li ken pali e tomo!

pini pi tenpo suno la, ona li kama lukin e tomo pipi.
pipi li pali mute lon tomo ona lon kasi pi kule mute.
ona li lukin e lupa tomo li toki e ni:
“toki, pipi mute o! tomo sina li pona tawa mi! sina sona mute… sina ken toki anu seme?”
pipi ale li kama tan tomo ona li toki e ni:
“mu!”
kin la pipi li alasa utala e waso.
tan tomo pipi la, waso li tawa sewi, li tawa sewi, li tawa sewi…

sewi la waso Mumu li kama lukin e ma tomo suli.
ma li suli mute a. ona li lukin e tomo la, waso li pilin wawa li tawa ma. tomo li suli a li kiwen li nasa mute tawa waso. taso, ona li pilin pona tan ken pi ijo toki. lon ma la, ona li kama lukin e soweli nasa. soweli ni li jo e luka tu e noka tu li jo e len nasa.
waso li kama lon poka soweli li toki e ni:
“toki a, sowe–”
taso waso Mumu li ken ala pini e toki ona. soweli nasa li lukin e waso nasa toki. sinpin ona li kama walo. soweli li toki e ni:
“a!!!”
ona li tawa kepeken tenpo lili a li len tan lukin waso. waso li toki e ni:
“nasa a… soweli nasa li mu ala. soweli li a…

n… ken la kala li ken toki!”
ni la waso Mumu li awen alasa.