kulupu pi toki pona o!

tenpo pali lipu li sin!

pali seme li wile?

o pali e ijo toki musi o pana e ona tawa mi lon tenpo wile.

ijo musi mi o seme?

suli la nasin tu li lon!

sama la
lipu o musi o kepeken toki pona taso o kepeken toki nimi taso.

ante la
lipu lili la mute nimi li wile lili tawa TWA/tu wan ale (ale ale ale).
lipu suli la mute nimi li wile suli tawa LA/luka ale (ale ale ale ale ale).

sina o pana e pali sina taso. o pana ala e pali pi jan ante. lipu suli la sina ken pali kulupu e lipu lon poka pi jan ante.

mi o toki seme lon ijo musi?

o toki e ijo pona pi wile sina! o toki e ma nasa mun pi lon ala, e kijetesantakalu pi wawa seli, e tomo lipu pi sona ale e ijo sin wawa musi tan lawa sina tan pilin sina! taso o ike ala. o sewi ala e nasin ike. o toki wawa ala e unpa e pakala sijelo. kin la, o musi. ijo sina o pona ala tawa lipu Wikipesija. o pana sona taso ala. o toki wawa ala e nasin nanpa sin pi toki pona.

o lukin e utala ni pi tenpo pini: utala pi lipu suli pi toki lili. pali sina o sama.

tenpo seme la mi wile pana e pali?

tenpo mun kama nanpa tu. lon sike #MAMTT/mute ale mute tu wan lon tenpo mun #LT/luka tu lon tenpo suno #LLL/luka luka luka.

o sona kepeken nasin nanpa pi sitelen Alapi 2024-07-15

mi wile pana e pali lon seme?

o pana e ijo sina tawa mi (jan Lakuse) kepeken ilo Siko (@raacz106) anu kepeken ilo lipu (tokipona.sasalin@gmail.com).

o pana e sona. o pana

utala li seme?

pana pali li pini la ale li kama lukin e ijo ale li kama toki e pilin ona. mi kama sona e ni: lipu suli seme en lipu lili seme li pona nanpa wan tawa kulupu?

ni la, o pana ala e pali sina tawa jan mute o toki ala e insa pi pali sina tawa jan mute. tenpo lukin la ale o sona ala e ni: jan seme li pali e ijo.

tenpo lukin li pini la sina ken toki e ale!

mi wile sona e ijo ante seme?

sina pana e ijo tawa mi la, sina ken e ni: nasin CC-BY-SA-4.0 li lawa e esun pi pali sina. ni li ike tawa sina la o pana ala!

sina pana e pali li kama wile ante e ona la sina ken pana sin e ona tawa mi!

utala pi lipu suli la sina ken pana e lipu mute! utala pi lipu musi lili la o pana e toki wan taso.

o sona e ni: mi kama awen e lipu sina lon ilo ni la jan ale li ken lukin e ona. ni li ike tawa sina la o pana ala!

ken pali mi li wawa mute ala. sina ken pana e pona seme tawa mi?

ken sina li lili la mi (pi jan Lakuse) li ken pana e pona kepeken nasin tu wan.

#W) ken sina pi toki pona li lili la o sona e ni: mi ken lukin e lipu sina. mi lukin la ken toki e ni: nasin sina pi toki pona li pona ala pona. mi ken toki e pakala sona e pakala nasin.

#T) ken la ken sina pali li lili lon nasin ni: a! sina wile pali, taso sina weka e pali lon tenpo mute. sina weka e sona ni: pali li lon. sina weka e sona ni: sina wile pali e lipu. mi ken pana e pona ni: mi toki e wile pali lon tenpo mute tawa sina. sina wile e pona ni la o toki tawa mi!

#TW) ken la ken sina pi musi lipu li lili. ken la sina ken toki pona wawa li wile pali e lipu. taso sina sona ala a e ni: lipu o toki e seme. sina wile la mi en sina li ken toki e ijo musi ken a!