akesi li moku e suno

nasin lipu

• lipu wan: jan pali
• lipu tu: sona pi jan Kepen
• lipu wan tu: tawa suli
• lipu tu tu: utala pi akesi sewi
• lipu luka: pini

jan Kepen li lukin e sewi. akesi linja suli li lon. akesi li lukin e suno. jan Kepen li sona e ni: akesi ni li ken moku e suno.

lipu wan : jan pali

jan Wanto li pali e ilo utala kepeken kiwen. ona li pakala e kiwen seli. tomo ona li seli.

ilo utala ona li pona. jan pi ma ale li pilin sama. jan Wanto li jan pi pali pona. taso, ona li pilin ante. pilin pi jan Wanto la, ilo ona li pona suli ala. jan Wanto li sona e nasin mute. ona li wile e ni : pali ona li kama wawa.

lupa tomo li kalama. jan ante li lon.

- toki ?

jan Wanto li lukin e lupa.

- mi lon. o kama.

jan li kama lon poka ona. jan Wanto li awen.

- sina wile e ilo seme ? mi ken pali e ilo utala sin.

jan li lukin e kiwen lon tomo seli.

- ilo pi wile mi li ken utala e akesi suli. ilo ni li ken utala e akesi linja sewi.

- n. sina wile utala e akesi.

jan li lukin e jan pali.

- lon. ona li ike. mi wile moli e ona.

jan Wanto li sona. jan mute li wile e ni.

- a… jan ale pi wile ni li moli.

jan li pilin ike ala.

- mi sona. taso, mi sama ala. mi kama moli e akesi ni.

jan Wanto li pakala e kiwen seli kepeken ilo ona. kalama suli li lon.

- o pana e ilo utala tawa mi. sina ken pali e ilo pi wile mi. mi sona e ni.

jan pali li toki ala.

- sina pilin ike tan wile mi anu seme? mi o esun e ilo sina.

jan Wanto li mu.

- mi ken. taso, wile mi li ante. o tawa. mi wile ala toki.

jan li tawa ala. ona li supa lon poki.

- mi tawa ala. mi awen. sina o pali e ilo utala mi.

tenpo li tawa. jan Wanto li pali. jan ante li toki ala. ona li weka e len ona. ona li lukin. ilo utala mute li lon. ilo ni li pona. taso, jan li wile ala e ilo ni.

ona li kalama uta. jan Wanto li lukin.

- nimi sina li seme ?

- sina wile ala wile kute e toki mi ?

jan Wanto li mu li toki ala. jan li musi.

- mi jan Kepen.

lipu tu : sona pi jan Kepen

jan Kepen li toki e ale tawa jan Wanto.

- akesi sewi suli li akesi Sumeku. tenpo pini la, ona li weka. jan mute li pilin e ni : ona li moli. tenpo pini lili la, jan ala li sona e ona. taso, ona li moli ala. akesi ni li lape taso. tomo ona li nena Latala. nena ni li ken pakala e ma suli kepeken seli pi insa ma.

jan Wanto li telo e ilo utala sin. kin la, ona li toki e ni :

- taso, akesi ni li lon ma. jan mute li wile utala e ona.

- tenpo ni la, akesi li lape ala. akesi ni li wile moku. tenpo pini la, ona li moku e wawa nasa ale. tenpo ni la, wawa nasa li lili. tan ni la, jan ala li ken kepeken e wawa nasa. wawa nasa li lon ala la, akesi li wile moku e ijo ante. ona li wile moku e suno.

jan Wanto li pilin insa e lawa ona. ona li mu.

- sona ni li pona. taso, sina ken ala moli e akesi ni. ona li suli mute. ijo ala li suli sama.

jan Kepen li musi.

- mi ken a. mi sona e kalama.

jan Wanto li pilin nasa. ona li musi tan toki pi jan Kepen.

- kalama a ?! sina ken ala moli e akesi sewi kepeken kalama ! sina nasa !

taso, jan Kepen li nasa ala.

- kalama ni li ken moli e akesi. taso, mi wile e ilo utala sina kin.

- sina wile e ilo utala mi tan seme ? sina kepeken e uta sina la, utala li nasa li ike. kin la, ilo mi li ken ala moli e akesi.

jan Wanto li mu. ona la, jan Kepen li nasa suli li ike.

jan Kepen li pana e lipu tawa jan Wanto.

- o lukin e ni.

lipu li sin ala. ona li suli, kin. lipu ni li « toki pi tenpo pini ». jan Wanto li lukin insa. jan Kepen li alasa e sitelen.

- ni. ni li palisa utala pi akesi sewi. o pali e ni.

jan Wanto li toki insa pi lawa ona. ona li lukin e ilo. ni li palisa utala. ona li pona suli. ilo ni li kepeken wawa nasa. jan pali li sona ala e ni : ona li ken ala ken pali e ilo sama ?

lipu wan tu : tawa suli

tenpo li tawa la, jan Wanto li pini e palisa utala. ona li pona. jan Wanto en jan Kepen li pilin sama. taso, jan Wanto li sona e ni : palisa utala ni li ken ala kepeken wawa nasa. ni la, jan Kepen li ken ala moli e akesi Sumeku.

- ilo ni li pona la, ilo ale mi li ike. taso, mi sona ala e wawa nasa. mi lukin e lipu. mi pali e ilo ni kepeken nasin sama. taso, wawa nasa li lon ala. sina utala e akesi la, sina moli. o tawa ala.

jan Kepen li jo e ilo lon luka ona.

- ni li pona. mi wile utala e akesi. mi ken pakala e ona. mi sona e ni. mi pilin e ni.

jan Kepen li lukin e poki ona.

- mi tawa. sina jan pali pona. o pali. ilo ona li wawa.

jan Wanto li jo e poki kin.

- mi wile pali ala. mi tawa. mi tawa lon poka sina. sina utala e akesi la, mi wile lukin.

jan Kepen li pilin pona li musi.

- a a a, ni li pona tawa mi. sina lon poka mi la, mi ken alasa e akesi !

nena Latala li lon poka ala. ma li suli. jan Wanto en jan Kepen li tawa lon nasin kepeken tenpo suli. taso, ona li pilin pona. ona li tawa lon ma ale. tenpo lili la, ona li kepeken soweli. tenpo mute la, ona li kepeken noka ona. jan li moku li lape lon tomo lape. tenpo li tawa la, jan Wanto li pilin e ni : jan Kepen li ike li nasa ala. ona li jan pona li jan sona. jan tu li toki mute.

tenpo pimeja la, jan Kepen li toki e ni :

- tenpo kama lili la, mi lon poka pi nena Latala.

jan Kepen li pilin insa pi lawa ona.

- mi pilin pona. suno li lon sewi.

jan Wanto li lukin e sewi. suno li anpa. mun li kama. kule mute li lon. akesi suli li lon sewi, kin.

- akesi ni li pona tawa lukin mi. ma li jo ala e wawa nasa. taso, ijo nasa li lon. ken la, akesi li moku ala e ale.

- nn. lon.

jan Kepen li toki ala. ona li supa. jan Wanto li lukin.

- tomo li lon ala. sina wile awen lon poka nasin anu seme ?

- ni li pona ala pona tawa sina ?

jan Wanto li supa. jan tu li lape.

lipu tu tu : utala pi akesi sewi

ma la, kon li lete. taso, kon li seli lon poka nena. jan Kepen en jan Wanto li tawa lon nena. jan Kepen li weka e len ona tan seli.

sewi nena li suli. tomo sin ala li lon. jan ala li lon. sinpin pi tomo ni li kiwen walo. tomo li sike. tomo ni li tomo pi akesi Sumeku. jan Wanto li pilin monsuta. jan Kepen li pilin monsuta kin. taso, ona li wile pilin wawa.

- o tawa. akesi li lon.

jan Wanto li tawa monsi pi jan Kepen.

akesi li lukin e jan. ona li mu.

jan Wanto li toki e ni lon insa pi lawa ona : « ale li pona, ale li pona… » taso, ona li pilin e ni : « ale li ike a ! » jan Kepen li luka e luka pi jan pali.

- ale li pona. mi ken utala e ona.

akesi li tawa. ona li awen lon poka pi tomo ona.

jan Kepen li luka e palisa utala li tawa lon poka akesi. jan Wanto li awen lon poka pi kiwen suli.

akesi li mu. ona li utala kepeken luka ona. akesi li pakala ala e jan.

jan Kepen li kalama. jan Wanto li sona e toki ni. ni li kalama pi lipu « toki pi tenpo pini ». toki sama li lon palisa utala.

akesi li pakala e jan Kepen. ona li anpa. taso, ona li awen toki. jan Wanto li tawa lon poka jan Kepen. jan Wanto li jo e palisa utala pi jan Kepen.

- mi awen e sina. o kalama !

akesi li wile moli e jan tu. ona li open e uta ona. jan Wanto li pana e palisa utala lon insa uta. seli mute li tawa lon jan Kepen. taso, ona li pini toki. jan Wanto li jo e jan Kepen lon monsi ona. seli li pimeja e len ona lili. taso, ona li pakala ala.

akesi li mu. ona li pakala tan palisa utala. kin la, monsi ona li weka. noka ona li weka. luka ona li weka. akesi li mu mute. lawa ona li weka sama ko. akesi Sumeku li moli.

jan Wanto li pona e pakala pi jan Kepen. jan Kepen li musi.

- sina toki e ni : mi nasa. taso, sina utala e akesi la, sina nasa kin !

jan Wanto li mu.

- ala ! sina moli e ona. mi awen e sina taso.

lukin pi jan Kepen li telo. jan Wanto li pilin ike.

- a ! sina pilin ike tan pakala sina anu seme a !?

jan Kepen li musi lili.

- ala a ! mi pilin pona. tenpo pini lili la, mi pilin e ni : mi kama moli. taso, sina awen e mi. ni la, mi moli ala. sina wawa li pona.

jan Wanto li lukin e tomo.

- akesi li weka tan seme ?

jan Kepen li lukin e palisa utala.

- kalama li wawa nasa. mi ken kepeken e wawa nasa lili kepeken palisa utala taso.

lipu luka : pini

jan Kepen en jan Wanto li tawa lon tomo pi jan Wanto. jan Kepen li toki e moli pi akesi sewi tawa jan ale. taso, jan ala li kute e toki ona. jan lili taso li pilin pona tawa toki ni. jan Kepen li sitelen e lipu. jan lili ale li pilin pona tawa ona. palisa utala li lon sinpin esun pi jan Wanto. jan mute li wile e ilo utala sin tan ni.

tenpo pini la, akesi Sumeku li moli. taso, jan ala li sona tan seme. tenpo sike ale la, jan ale li musi tan weka pi akesi ni.

pini