kon tu li toki

jan tu li pali e toki mute ni. ona wan li meli, ona ante li mije. tenpo suli la, ona tu li awen lon poka. taso tenpo pini pi sike suno wan la, meli li weka, li tawa ma sewi Aten [Arden], li kama lon kulupu pi meli sewi. ona li wile sona e ni: ona kin li wile ala wile kama meli sewi?

tenpo ale pi sike suno ni la, ona tu li toki kepeken lipu pi sitelen luka, li toki e sewi e nasin sona pi jan sona majuna e ijo ante mute a. sijelo la, ona tu li awen weka; taso pilin la, ona tu li kama poka.

lipu ni pi sitelen luka la, meli li kama sona toki pona. mute la, ona tu li toki pona lili lon lipu, li pana e toki musi pi toki pona.

toki musi ni anpa li pali kulupu pi ona tu, li toki e ijo suli pi ona tu, li toki e sike suno suli ni.

ma sewi Aten

mi sona e toki musi majuna pi ma sewi Aten.
taso, tenpo ni la, lon ma pi kasi suli la,
mi kute e kalama musi sewi pi telo tawa;
li pilin e kon suwi pi kasi kipisi;
li moku e kili ma, e pali pi luka mi;
li lukin e lipu sewi pi kasi suli;
luka mi li pilin e seli, e lon pona pi ijo ale.
sijelo en ma ni li tawa lon sike tenpo ona.
weka sina la, oko, luka, noka, nena mi
li toki mi. mi pana e ona tawa sina la,
sina ken pilin e sike pi kalama musi sewi Aten.
sina kin o pana e ko pi ma sewi sina.
mi tu li kama sona lon e musi ma ni.

toki pi lipu tawa mute

linja li lon luka
sama nasin waso—
alasa pi ma olin.

toki pona

nasa pona la,
toki lili suwi
ni li kama
toki suwi len
pi mi tu.

toki ni pi
kon len la,
mi toki e
ijo suwi ale
pi mi tu.

ma kasi la, mi lukin e jan tu pi ma Aten

mije en meli la,
tenpo poka a la,
ona tu li kama
  jan sewi.

ale li sin nasa:
linja lawa en lon
ona pi tenpo pini
  li weka.

jan pali li lili
e kasi li kipisi
e palisa ona tawa
  kama wawa.

jan sewi tu li
toki olin sin la,
kasi li kama lon
  kule kin.

tenpo pi kama lete

o kama e lipu
moli telo lon poki—
kiwen jelo pi kule pimeja.

seli loje

“ma sewi Aten li sama ni:
mi lon kasi pi seli loje;
toki sewi li sama seli tawa;
pali li seli, musi li seli,
olin pi meli sewi li seli.
taso pakala ala li lon a!
wawa ona la, sewi li awen
e ijo ale pi kama seli;
ale li seli li loje li
suno wawa li kama pini ala.”

ma tomo Paki la, mi lukin e sitelen suli
pi jan Mone, li kama sin e toki sina.
kasi kule li kama seli loje lon telo pimeja.

pilin weka

tenpo wan la
mi sona ala
e kalama tu
lili pi nimi sina.

kulupu jan la
sinpin sina suwi
li sama sinpin
pi jan ante ale.

nasa a—mi
ken ala sona
e wawa suli
pi lon pona sina.

tomo li pona
tawa sina la,
sijelo sina li
awen sama kon pona.

tenpo ni la,
weka la, kalama
pi nimi sina
li lanpan e pilin.

tenpo pi kalama ala

tenpo suno pi kalama ala
la, lipu sina li lon poka mi.
tenpo ante mute la, mi lukin.
ni la, lipu sina li supa ala.
selo ona li sike tawa sewi.
lipu sina li sama luka open
tawa lukin mi. sitelen ale
sina li sama kasi open lili.
ona li kama suli tawa suno.
tenpo ni la, mi lukin e lipu
la, pilin mi li kama suli
tawa sewi, tawa sina kin.
oko pi mi tu li awen tawa
sewi la, lipu sina li lon luka
mi la, weka sina li ike ala,
kalama ala li ike ala kin.

pali pi sitelen toki

pali pi sitelen toki la, mi alasa
weka e weka pi mi tu. mi
awen pona lon poka sina lon lipu.
sewi li pana e pona ni; ijo
ante ala li ken lon e sina.

tenpo suno sewi

tenpo suno sewi pi moku nanpa pini la
telo li weka tan noka li kama anpa
pi sike lili lon poki pi kiwen jelo,
mu, mu, mu. wawa pi telo lete li
lili ala lili tan pona pi poki sewi?
ken la telo li kama sike walo li
kama kule kasi li kama kule pi
pini suno, li kama sin e sona weka.

ijo ale li wile sike

telo li kama sike lili.
soweli kiki kin li ken
kama sike tan pakala kama.
kasi li kama suli la,
lawa ona li sike laso.

ijo ale li wile sike,
li wile suwi tawa luka,
li wile tawa anpa sike,
li wile lon insa olin
pi ijo ante, lon insa
pi olin sewi. sike la,
ona li wile ala e
ijo ante, li wile ala
wile, li pona lon taso.

sina sike, sama telo lili,
sama soweli, sama kasi wawa.
pakala o awen lon weka—
olin li jo e sina
lon poka sina ale a.

mi kute e sona pi jan sona Posino [Πλωτῖνος]

kon ale li wan la,
weka li ken ike ala.
sina pilin la, olin la,
mi a li pilin sama.

musi ma

ma ni li musi taso. jan li kama
lon supa musi, li utala, li olin kin,
li wile, li pilin suli, li weka sin.
taso ni ale li lon ala; mi musi taso.
jan lawa li pana e lipu tawa sina;
sina toki pi pakala ala e ona la,
pona; ala la, ike. lon li suli ala.
ni li toki pi jan majuna. sona nasa.
sina en mi kin li pilin ante ale:
ma ni li lon ala la, ijo ala
li ken pona li ken suli. taso awen
la, ni a li ken musi tawa sona:
musi ma ni la, mi seme? sina seme?

kiwen

kiwen majuna ni pi ma Elena la,
jan li kama lon li weka sin
tan ma suwi. taso ale ala la
ona li moli; tomo li ken pakala—
taso sewi en kon ona li awen.

  ☙☙☙

mi ken ala lukin e kiwen majuna pi ma Elena.
taso, kiwen ni pi telo suli lon luka mi la,
mi ken pilin e pakala, e sike, e awen ona.
mi tu li sama kiwen ni. weka ni li sama telo
la, kalama ala li sama kalama musi pi telo tawa:
tenpo la, ona li suli. tenpo ante la, ona li
suwi. ona li sike e selo pakala pi mi tu.
telo tawa kin li moli lon ma suwi ni. taso,
sewi li awen e kiwen ni, e mi tu kin.

  ☙☙☙

lon poka pi telo suli la,
kiwen pimeja suli en kasi telo
en ijo pakala pi ilo tawa
telo la, mi lukin e kiwen
pi laso loje. tenpo suli pini
la poki telo li kama pakala.
kiwen ni li awen lon telo;
tawa telo li sike e ona
li suwi e ona tawa luka.
suno li laso loje e ona.
mi kama lukin e ona la,
nimi sina li kama lon lawa,
meli suwi pi awen sewi o.
tenpo ni la, mi lon ma
weka la, kiwen sike kule li
lon luka sina, lon pilin mi,
li ken wan e mi tu—

kiwen en lipu en sona majuna
en toki sewi en toki musi
li sama linja wawa mute tan
mi tawa sina tawa mi sin,
li pali e len suwi pi
kule pona mute, li ken awen
lon tenpo ale tawa mi tu.

kon li lon anpa ale

ma ale ni li supa musi la,
mije ale en meli ale li jan
musi taso la, ni kin li lon:
tawa weka ale li kama lon kin.

toki pi mi tu la, mi weka
e pali musi, e len sinpin mi.
supa musi lipu li ken ala jo e
ma sike ni, e pona nasa ona.

kon sewi li awen lon anpa pi
musi ma, lon anpa pi toki musi,
li lon insa pi mi tu kin.
mi tu li awen alasa e lon
la, mi anpa olin tawa kon ni.

ma li musi la, mi sona ala.
taso, weka ni pi mi tu la,
toki sina la, sina lon—tawa mi.