meli tu pi lawa ante

tenpo pi weka mute la mije wan li lawa e ma. ona en meli ona li sin e meli lili tu.

lawa mije li ike mute: wile jan li suli ala. mani ale li tawa ona. ken musi li lili a.

ona li ike tawa jan pi ma ona. ona li ni tawa meli ona kin: meli suli ona li weka tan ona li tawa ma ante. taso meli lili tu ona li ken ala ni. mije ni li ike mute tawa meli tu ona li ike sama tawa tu.

tenpo sike mute la mije li awen lawa. taso suno wan la ona li ike pilin mute. ona li poka tawa moli ona. ona li toki e ni: ｢o tu e ma mi. meli tu lili li ken lawa e ona. meli pi sin nanpa wan o lawa e poka Sin. meli pi majuna nanpa wan o lawa e poka Majuna.｣

la ona li moli.

jan ona li musi mute pilin: lawa ike ona li kama moli a! taso ona li monsuta pilin lili tan ni: meli pi lawa sin li pona ala pona? ona li sona ala.

lon suno pi kama lawa ona la ona tu li toki e wile ona pi ma ona.

meli Sin li toki e ni: ｢awen ale mi la mama mi li ike. ona li utala e mi li toki ike tawa mi li taso e mi. mi sona e ike pilin sina la mi wile e ni: jan ale o ken pilin ala e ike ni. mi wile pana e pona pilin tawa ale a!｣

taso meli Majuna li pilin ante: ｢awen ali mi la mama mije mi li ike a! sina toki e powe la sina ken lukin e kule selo mi e wile misikeke pi sijelo mi e sike peto mi lon pimeja ali lon tomo mi. mi sona e ike pilin li toki e ni: jan ali o pilin sama. mi pilin e ni la jan ante ali o pilin sama a!｣

jan lon poka Sin li ｢pona a｣ li ｢epiku｣ li ｢wawa｣: lawa ona li suwi a!

jan lon poka Majuna li ｢ike a｣ li ｢seme a?!｣ li ｢o ala a!｣: lawa ona li jaki a!

meli Sin li pona tawa jan ona. ona li sin e tomo suli pi jan pi tomo ala. ona li pana e mani mute ona tawa ma. tomo sona en sona jan li kama suli. jan li lukin ike la ona li toki tawa ona.

meli Majuna li ike tawa jan ona. ona li sin e tomo suli pi jan pi pakala lawa. ona li lanpan e mani mute tan ma ona. tomo sona en sona jan li kama lili.

suno wan la meli Majuna li lukin e ma Sin li lukin e olin jan tawa lawa ona. ona li wile e ni li jo ala e ni. tan seme a?! ken la jan ona li pakala: ona o lanpan e jan tan meli Sin a! la ona li open e utala suli.

meli Sin li toki e ni: ｢jan o: meli Majuna li open utala e mi. sina ken li wile la o kama tawa mi. sina ken kama tawa kulupu utala mi la mi mute li ken awen e ma. sina ken ala anu sina wile ala la mi mute li lukin sin e poki jan pi awen mute.｣

meli Majuna li toki e ni: ｢jan o: mi utala e meli Sin. mije li jo e ken utala suli: mije ali o kama lon kulupu utala mi. meli li ken lukin e jan kili sina.｣

utala li open. tenpo ale la jan pi poka Sin li sona e ike pi poka Majuna. taso tenpo ni taso la jan pi poka Majuna li ken sona e pona pi poka Sin. jan Sin li wile awen e ma ona la jan Majuna li wile ala utala e ona.

jan Majuna mute li lukin pini utala. ona li kama tawa ma Sin kepeken ala wile utala kepeken ala ken utala. meli lawa li pana e olin ona tawa jan pakala. jan li ni ala la mute li tawa poki lili pi jan pi pakala lawa. jan Majuna pi mute ala li moli tan poka Sin: mute moli Majuna li lili tawa mute moli Sin.

meli Majuna li utala pilin mute a: tan seme la jan ona li weka a?! ona li weka tan ma ona li tawa meli Sin kepeken nasin len. ona tu li lon sewi pi nena suli la jan ale li ken lukin e ona.

meli Sin li toki e ni: ｢mi wile ala utala e sina a! sina sona e pakala pi pana tan mama mi. sina wile pana e pilin sama tawa jan ante tan seme?!｣

meli Majuna li tawa e palisa utala ona: ｢sona ali mi li pakala a! tan seme la mi o ante?!｣

｢sina ken pini e sike a!｣ meli Sin li weka tan utala palisa li sewi e sinpin awen ona: ｢sina ken kama pilin e pona pilin sin a!｣

｢mi ken ala a!｣ meli Majuna li utala e sinpin awen li kepeken e wawa pi mute pi kama lili: ｢o lukin. mi ike. mi ken ala pona. mi wile ala ijo peto: mi wile ijo wawa. mi wile ken lawa e ali. sina ken ala weka e peto mi a! sina ken ala-｣ ona li pini toki.

meli Sin li luka e meli Majuna li tawa ona. ona tu li jo e tenpo lili wan. la tenpo nanpa wan la meli Majuna li pilin e olin: ona li peto mute tan lukin ona.

｢tan seme? mi ike mute. sina pona ni tan seme?｣

｢mi sona e pilin sina. tenpo la mi wile ike tawa ijo ale sama ike pi ijo ale tawa mi. taso mi pilin e ni kin: pilin ni li ike. mi wile ala pana e ona tawa jan ante. mi wile ala pana e pilin ni tawa sina.｣

meli Majuna li weka e palisa utala ona li luka e meli Sin. ona tu li wan lon tenpo lili.

tenpo kama la utala li pini. meli Sin li kama lawa e ma tu li wan e ona tu tawa poka wan: poka Jan.

meli Majuna li awen lon tomo pi meli Sin. ona li lawa ala: ona li wile ala la jan li wile ala e lawa ona. taso ona li lukin kama pona kepeken pona pi meli Sin.

tenpo kama pi weka mute mute la meli Sin li moli. meli Majuna li ken lukin lawa: taso ona li ni ala. jan li taso e jan wan pi pona nanpa wan la jan ni li kama lawa. jan mute li ike pilin tawa meli Majuna. pilin ona li lon li suli. taso meli Majuna li kama pona la ona li moli la jan mute tan poka Majuna li tawa moli ona li peto.