mi lukin e mi lon insa oko ona

~ tenpo la jan li olin e ijo sama jan olin / tenpo mute la jan ni li jo kin e insa lawa ante ~

kipisi nanpa wan

o kon tawa insa, tan insa.
  nanpa wan.
  nanpa tu.
ale… ale mi…
mi ale… mi…
mi seme?

kalama lili pi pilin pakala li lon.
kalama ni li kama ala tan mi.
ona mije li ken ala awen e pilin ni…

ona…?

…

kule… seli… ijo… ona.

mi tu li lon insa pi tomo lili lape ona.
ona li awen lon poka mi, lon anpa tomo.
mi awen lon supa pi sitelen nimi ona.

mi kama sona e ni:
  sijelo mi en sijelo ona li ante mute.
ona li jo e luka e noka.
sijelo mi li sike, li jo ala e palisa insa.
ante mute a.

taso ona li wile mute e mi.

mi ken ala kalama uta.
mi jo ala e uta.
mi ken pona e ona kepeken nasin seme…?

a… mi en ona li ante, taso mi en ona li jo e ijo sama wan.
mi tu li ken toki sama pi insa lawa.
tenpo pini la, lon ni li ante.
  mi wan ala.
  mi ale.

taso tenpo ni la mi wan.
ona li kipisi e mi tan ale.
ona li sona ala e pali ona.
pali ni li lon tan ni:
  ona li wile mute mute mute e mi.

mi lon ni!
pona a, mi lon ni!

mi alasa.
“seme…”

ona… jan Talo li sewi e lawa ona.

mi alasa mute.
“seme… li ike… tawa sina?”

jan Talo li tawa e lawa ona tawa poka.
tenpo mute la ona li pilin, li toki ala.
ona li sona ala e tan pi lon mi.
taso, ona li pilin wan ike…
jan Talo li telo oko sin, li toki kepeken kalama lili.
“mi kama jan suli… jan ale li wile e ni: mi pali e pali pi jan suli. mi alasa li alasa, taso mi ken ala. mi sona ala e tan. jan ante ale li pilin ike tawa ni. mi alasa…”

ona li toki la sona pi tenpo pini li kama lon sona mi.
jan Talo li pali e mi kepeken pilin lawa ona, la ona li ken pana e insa lawa tawa mi.
ona li lili la ona li kama jo e sijelo mi.
tenpo li tawa la jan pona ale ona li weka.

mi sona pona e ni:
“mi o weka ala.”

ona li telo oko mute, taso tenpo ni la pilin ona li kama pona lili.

a!
mi kama sona!

sijelo mi li poki pi kasi tomo!

kipisi nanpa tu

tenpo la mi ken sona lon tenpo mute.
tenpo ante la ni li lon tenpo lili.

jan Talo li toki e ni tawa mi:
  “ike mi a, mi weka sona e ni: mi o pilin e sina…”

taso ni li ike ala tawa mi.
tenpo pi sona ala la mi pilin ala.
tenpo ni li lon ala tawa mi! mi toki e ni tawa ona, li pona e pilin ona.
tenpo li tawa.

tenpo suno ni, la sewi li walo pimeja, li jo e ko kon sewi lon ale.
telo sewi li tawa anpa mute mute mute.
jan Talo li lukin tawa leko lukin.
seme li pilin nasa tawa mi lon ona.
ike ala, taso nasa mute.
ona kin li sona ala e tan.

ni li pilin sama ni:
  ale li jo e pilin pi wawa nasa.

linja seli pi ko kon sewi li tawa anpa lon ma selo pi tomo ala.
kalama pakala sewi li kalama mute mute.

jan Talo li open e leko lukin, li tawa e lawa e sinpin tawa insa pi telo sewi.
lukin la ona li pilin pona mute.
ona li lukin e seme lon ma pi tomo ala?
lon supa mi la mi ken ala lukin e ni.
pilin nasa li suli li suli.
ken la mi sona e pilin ni tan tenpo ona pi weka mute mute…

jan Talo li lili, la tenpo la ona li pilin e sama.
e nasa mute, e nasa pi wawa nasa. ma ale li pona lukin li jo e olin lon pilin nasa ni.
ale li wan, sama tenpo pini mi.

n, ona li pana e sitelen tawa mi lon insa lawa.

nnn…

ma li pona lukin kin.
kasi kule li lon anpa pi leko lukin.
ma pi kasi laso lili li lon.
ma suli pi kasi suli li lon pini pi ma pi kasi lili.
telo sewi li anpa lon ale.
pona lukin kin a.
wawa nasa kin a.

jan Talo li lukin tawa mi li uta pona suli.
ona li toki e ni:
  “sina lon. sina lon kin a!”

mi pilin musi, li toki e ni:
  “sina sona ala e ni anu seme?”

ona li kalama musi mute la ona li toki e ni:
  “mi ken sona e ni kepeken nasin seme? sina poki kasi a! tenpo pini la mi pilin e ni: sina ijo musi pi lawa mi!”

tenpo ni la mi tu li kalama musi.

tenpo kama la ona li toki e ni:
  “mi pilin e nasa ni lon tenpo lili lili. tenpo kama la mi weka ala weka sona e lon sina?”

mi pilin mute pi insa lawa.
mute, mute, mute…
tenpo la jan Talo en mi li lukin e sitelen tawa musi.
jan Talo li olin e jan mije wan pi sitelen tawa.
mi sona a!
mi alasa pali e “sijelo” sama mije ni lon insa pi sijelo poki mi, lon insa pi lawa ona.
ona li ken ala weka sona e ni!

jan Talo li kon lili kiwen.

mi open e oko sin mi.
mi toki e ni:
  “sina pilin pona ala pona tawa ni?”

ona li tawa mute e lawa ona tawa sewi en anpa.
selo sinpin ona li kama loje.

ona li ken ala toki ante tan ni:
  “suwi a…”

mi jo e sona pona!

kipisi nanpa tu wan

mi wile e ni:
  tenpo kama tan tenpo nasa li pona kin.

taso, jan Talo li suli mute la pilin ona li ike li ike.

jan ale li pilin e ni:
  jan suli li pali suli taso.

jan Talo li kama sona e ni:
  ona li ken ala pali suli.

ona li sona ala e tan.
ona li alasa, la ona li pilin taso e ijo pake insa lawa ona, e pilin monsuta, e pilin pi wawa ike mute.
tenpo li tawa, li tawa, la ona li weka tan tomo lon tenpo lili lili, li toki tawa jan ante lon tenpo lili lili.
tenpo ni la ona li awen mute insa tomo lape ona.

ona li poka mi, kin.
taso mi wile ala e tan ni.

mi wile e ni:
  jan Talo, jan olin mi o pilin pona, o pilin sama suno!

mi ken ala pali e mute.
mi jo ala e luka.
taso, ken la mi ken open e insa lawa ona tawa ni, lon tenpo mute.
mi ken alasa.
mi open sama ni:
  mi tawa e sitelen lon insa lawa mi tawa ona.
sitelen ni li insa ma pi kasi suli.
tenpo ni la jan Talo li ken ala tawa kepeken sijelo ona.
ken la ona li ken open kepeken insa lawa ona?

ona li pilin mute.
mute…
ona li toki e ni:
  “mi wile…”
ona li insa sitelen ni lon poka mi.
mi jo e sijelo sama pi jan sitelen.
ona li uta pona tawa mi, li lanpan e luka mi.

mi toki e ni:
  “sina wile ala wile tawa poka mi?”

ona li awen… li uta e uta mi.
mi uta pona kin tawa ona.
luka ona li kiwen e luka mi.
  “wile…!”

kipisi nanpa tu tu

sitelen pi insa lawa li open taso.

mi wile e mute tawa jan Talo.
taso mi ken ala tawa…
mi alasa e ni:
  “sina wile ala wile jo e mi lon ma pi kasi suli? lon ma pi tomo ala?”

ona li lukin e mi kepeken pilin monsuta, li toki e ni:
  “sina poki kiwen pi ko ma a. mi weka jo e sina la sina ken pakala!”

n, ni li pilin pona ala.
seme ante li lon?

tenpo suno ale la jan Talo li pilin mute pi wan ike.
mi suli, taso mi wan taso.
mi wile kama jo e insa lawa mute.
mi toki e ni:
  “mi wile lukin e lipu pi toki musi. mi tu li ken ala ken? sina ken ala ken kalama e lipu tawa mi?”
ona li uta pona, li kama jo e lipu musi, li monsi poka mi.
ona li toki kepeken kalama suwi.

nimi mute mute li tawa.
a!
jan wan pi lipu ni li kama jo e linja namako len pi anpa lawa.
namako ni li wawa nasa kin.

mi pini e toki ona li toki e ni:
  “ni a! sina ken ala ken kipisi lili lili e selo mi, li ken ala ken jo e ona lon insa pi poki len? mi ken tawa sama sina! sijelo suli mi kin li lon tomo li pakala ala!”

tenpo lili la jan Talo li pilin.

a, mi jo e wile toki pi mute ike, li weka sona e ni:
  ona li ante e insa lawa ona la ona li wile e tenpo.

mi awen.

uta pona ona li kama suli mute mute.
ona li toki e ni lon tenpo nanpa tu:
  “wile…!”

kipisi nanpa luka

“sina wile ala wile toki tawa ona?”

jan Talo li tawa mute e lawa ona tawa poka tawa poka.
ona li toki e ni tawa mi:
  “monsuta mute a… ken la lon tenpo kama. tenpo ni ala.”

jan Talo li toki e ni lon tenpo suno ale. taso ni li ike ala.

ona li tawa lon linja tawa ma.
kasi suli mute li lon poka pi mi tu.
kipisi pi sijelo mi li insa pi poki len lili, lon linja len pi anpa lawa.
tenpo ale la jan Talo li luka kiwen e len mi.
mi jo ala e pilin selo, la ni li pilin ike ala tawa mi.

ona li toki e ni:
  “mi toki tawa jan ante la ken la ona li pilin e ni: mi nasa ike…”

mi toki e ni:
  “ma ale li jo e jan pi mute mute mute… jan sama sina li lon kin.”

ni li pana e pilin pona tawa jan Talo.   “tenpo kama wan la…”

tawa mi…
ale pi jan Talo li pona tawa mi.
ona li ante la mi lon ala!
mi olin lon, li olin e jan Talo.

seme li ken ike?

~ poki Pokusi

pini