pakala mani

tenpo li tawa.
mi tawa lon nasin
la ale li sama lon ma.
mun anu suno
la palisa kasi
li weka e kule tan ma.
kasi li sewi
li lipu e sewi
la mi sona ala e tenpo.

pimeja taso
li nasa e lukin.
mi lukin e tawa lon ale.
ma li ko taso
li alasa moku
e noka e sijelo ale.
ma la jan taso
li mi pi ma weka.
mi weka tan nasin lon pimeja.

nasin li weka!
mi wawa e noka
la noka li utala anpa.
kiwen li pana
e noka e ale
tan ma tawa kon tawa anpa.
anpa la telo
li wawa li tawa
e mi sama kala lon nasin.

telo en lete
li moku e mi
sama kala lon pimeja kasi.
lawa en luka
li awen lon kon
la mi luka e linja tan kasi.
luka en linja
li sewi e mi
tawa ma la mi lukin lon telo.

mi kama lukin
lon pimeja telo
e ijo e kule e jelo.
ijo la selo
li suno e telo
lon linja pi sitelen jelo.
ijo o mani
o kiwen tan nena
o pona e kulupu mi.

kulupu mi
li jo ala e mute
li wile e moku e mani.
ona li jo
e ma lili a taso
e tomo e soweli mani.
soweli la
mani ante li ala
la ona li weka tan kulupu.

taso ni jelo
li esun e mute
e moku e mani e ma.
jelo la telo
li lili a taso.
mi alasa anpa tan ma.
kepeken linja
la mi kama tawa.
mi telo e noka mi taso.

luka wan taso
li awen e linja
li awen lon sewi e sijelo.
luka wan ante
li kama lon telo
li pilin lon telo e sijelo.
ona li kiwen
li pana e jelo
li kama lon poki tan luka.

taso mi lukin
e kiwen wan ala
e kulupu suli lon anpa!
luka li pilin
la telo li suli
la linja li pakala anpa.
telo li kama
lon uta lon ale.
mi pilin e pimeja taso.

“sina lape
ala lape?”
mi kute e kalama toki.
mi kama lukin
e loje e pimeja.
“jan o kama toki!”
sewi la loje
en mun li lon utala.
“seme li ma sina?”

mi kama lukin
lon anpa lon sinpin
e jan pi len pimeja suli.
len li lon lawa
la luka li tawa
li telo e palisa suli.
mi en jan toki
li tawa lon supa
lon telo pi pakala mi.

jan la mi toki:
“a, seme li kama?
mi kama lon seme tan telo?”
“supa ni
li tomo mi.
mi jan pi nasin telo.
telo la
mi alasa
e moku sin e jan.”

“mi jan taso
pi ma ni.
ma sina li ma seme?”
“mi tan ma weka
pi kulupu lili.
jan kulupu sina li seme?”
ni la jan nasa
li kalama ala
li weka e sinpin tan mi.

ona li lukin
lon poka ma telo
lon insa pi pimeja kasi.
ijo li pana
e walo e jelo
tan monsi pi palisa kasi.
ijo li mute
li kiwen tan tomo
tan tenpo pi kulupu ona.

“kulupu
pi mama mi
li pali e ma tomo.
wawa ma
li pakala
li kama kiwen tomo.
kiwen ni
li kule a
e ma e kulupu.”

“kule jelo
sama suno
li lon sewi tomo.
walo wawa
li lon nasin
li lon sinpin tomo.
len en ale
pi jan ale
li lon mute kule.”

“soweli
pi mute wawa
li lon ma li mani.
pana jan
la poki moku
li tan kiwen mani.
kasi ma
en pan li suwi
tawa soweli.”

“tenpo ni
la soweli
en kulupu li moli.
tomo ma
li pakala
lon ma lon telo moli.”
“sina ken ala
ken toki e pakala?
seme li pini e tenpo?”

sama jan moli
la ona li pana
e mu tawa telo lon anpa.
supa li weka
tan kasi tan kule
la ona li toki e anpa.
“jan li ike
tawa ma
la ma li ike sama.”

telo li nena
tan ijo lon anpa
la supa li awen lon kiwen.
mi la len poki
li utala seli
tan mani pi sijelo kiwen.
nena li anpa
la sijelo suli
li kama lon sewi tan telo.

sijelo kala
li suli li sewi
li weka e sewi e suno.
kala la selo
li kulupu kiwen
li pana e sitelen suno.
kala en mani
la kule li sama.
mi pilin e suno lon sijelo.

mi lukin ala
e jan pi len pimeja.
nasa la len li lon supa.
kala la suno
li toki e sitelen.
nimi li suno e supa.
ni la mi kute
e kule e pimeja.
suno li seme e mi?

kiwen la suno
li kalama lukin
e toki lon pilin lon insa:

kala li kama
li open e uta
pi palisa utala mute.
mi wile weka
la uta li kama
la ale li pimeja mute.
uta li pini
la poki mi taso
li suno lon pimeja kala.

palisa nasa
li tawa lon uta
li tawa e sijelo mi.
kiwen o wawa
o kama tan poki
o pona e pakala mi.
luka la kiwen
li pakala lupa
e kiwen pi sijelo palisa.

nasin li open
lon palisa lupa
la mani li pakala tu.
wan li lon luka
la telo li weka
e sijelo sin nanpa tu.
kala li weka
la mi tawa suno.
mi lukin e kasi e nasin.

tenpo li tawa
la kulupu pona
en mi li ken esun e ma.
mani li lili
la lili li wawa
li pakala ala e ma.
lili li suli
lon kepeken pona
la mani li pona e tenpo.