pipi lili

mi wile toki tawa sina. mi wile toki e pipi lili wan. o lukin:

pipi lili li lon kulupu suli pipi.

telo li kama li tawa wawa li weka e tomo pipi.

pipi ale pi kulupu ni li kama weka.

tenpo ni la pipi lili li taso.

pipi lili li wile lon kulupu li alasa e ona.

tenpo mute la ona li tawa lon ma kasi. ona li alasa e pipi taso ona li lukin e kasi mute e telo mute e pipi ala. ona li toki ni: ‘pipi o! sina lon ala lon?’

waso pimeja suli li kute li toki: ‘sina lon la, pipi li lon, pipi lili o!’

pipi li toki: ‘mi alasa e pipi pi mi ala a! kulupu mi li weka. mi alasa e ona.’ waso li toki: ‘ni la, mi ken ala pana e sona wile tawa sina. o alasa pona, pipi lili o!’ waso li tawa luka li weka lon sewi.

waso suli li toki suwi tawa pipi lili. waso pona a!

pipi lili li lukin e waso lili mute. waso ni li lon poka pi kasi suwi mute. ona li moku e telo kasi suwi sama pipi.

pipi li toki insa: ‘waso ni li sama pipi! ken la ona li ken pana e sona wile tawa mi’

pipi li kama lon poka waso li toki: ‘waso lili o! mi alasa e kulupu pipi! sina lukin ala lukin e kulupu mi?’

waso wan li toki: ‘pipi li lon ala ni. telo suwi ni li telo suwi mi! o weka! sina weka ala la mi pakala e sina kepeken uta palisa mi!’

pipi li sona e ni: waso lili li toki lon. ni la, ona li tawa weka. pipi lili li lukin e soweli suli. soweli ni li lape lon suno seli. ona li taso sama pipi lili.

pipi li toki insa: ‘soweli li taso sama mi. uta ona li palisa ala li ken ala pakala e pipi! ni la mi o toki tawa ona’

pipi li kama lon poka soweli li toki: ‘soweli o! mi alasa e kulupu pipi! sina lukin ala lukin e kulupu mi?’

soweli li toki: ‘pipi mute ike li lon a! ona li pakala e selo mi li wile moku e telo sijelo mi. o weka! sina weka ala la mi pakala e sina kepeken linja monsi mi!’

pipi li sona e ni: soweli suli li toki lon. ni la, ona li tawa weka.

pipi lili li lukin e akesi laso. akesi ni li tawa lon telo li mu pona. ona li sama ala pipi.

pipi li toki insa: ‘akesi ni li sona pona e telo. telo li tawa e kulupu mi. ken la akesi li sona e ni: kulupu mi li lon seme? mi o alasa e sona ni!’

pipi li kama lon poka telo li toki: ‘akesi o! mi alasa e kulupu pipi! sina lukin ala lukin e kulupu mi?’

akesi li toki: ‘pipi mute suwi li lon a! mi lukin ala e kulupu sina, taso sina moku pona tawa mi. o kama! sina kama ala la mi alasa e sina kepeken linja uta wawa mi!’

pipi li sona e ni: akesi laso li toki lon. ni la, ona li tawa weka.

waso lili en soweli en akesi li toki ike tawa pipi lili. ona o seme lon tenpo ni?

pipi lili li pilin ike suli li toki pilin: ‘kulupu mi li weka a! mi taso. mi ken ala ante e ni. mi o seme?’

waso pimeja suli li kute e ona li kama sin li toki: ‘pipi lili o! seme li kama e pilin ike sina?’

pipi li toki: ‘tenpo suli a la mi alasa e kulupu pipi mi, taso mi sona ala e ni: ona li lon seme? tenpo ni la mi lukin e pipi wan la mi pilin pona. taso pipi ala a li lon!’

waso li toki: ‘n… mi kin li lukin ala e pipi ante lon tenpo ni, taso mi sona e ni: tenpo kama poka la pipi wan li lon ma wan. mi ken pana e sona ni tawa sina: ona li lon ma seme?’

pipi li pilin pona wawa li toki: ‘o pana! mi wile sona!’

waso li toki: ‘o kama lon insa pi uta mi! sina kama ala la mi ken ala pana e sina tawa ma pipi.’

pilin pipi li wawa a la ona li toki insa ala. ona li tawa li kama lon insa pi uta waso.

ken la, sina sona e ijo kama. pipi li lili li wawa ala. waso li suli li sona. o lukin:

pipi li lon uta waso la, waso li moku e ona.

ona li mu musi: ‘a a a!’

mu ona li wawa!

ona li toki: ‘pipi lili o, mi toki lon! mi sona e ma pipi! pipi li sina! ma pipi li lon insa mi a!’

waso ike a!