pipi pona
toki, jan Apeja o! tenpo pini la sina sitelen e ni : 「o lon e lipu musi sin! o alasa kulupu e musi sin tan jan ale! lipu musi pi pona wawa la mi pana e ona tawa lipu · ni li utala mi musi」 · pona! tawa utala sina pi toki musi la mi pini sitelen e lipu musi mi · mi pini e ona la o musi pona! lipu musi ni la mi toki tawa sina e musi ni : jan wan li pali e pali musi tan pilin nasa ona · musi ni li tawa mi tan pana pi kulupu mama open · kulupu mi li awen e musi ona ale · sina lukin e pali ni la sina olin e pali ni la o pana e ona tawa lipu sina pi musi suli! pona o tawa sina ·
~ jan pali
pipi pona
ma li wile olin e ni : sina pakala e sina sama · mi mute li lon kon pi sama ala · mi mute li lon kon pi ante ala · ona li sama ante · ona li ante sama · ale la ona li ala · ni li nasin · sina sona · nasin li tawa ma li tawa tenpo li tawa kulupu · ale la nasin li tawa jan · ale la nasin li ike · taso, jan li wile pilin e pilin pona tawa nasin · tan ni la jan li toki e powe ni : 「nasin ni li ike lili · kin la nasin ale ante li ike suli! sona pi ike ni li suli ala · jan ale li sona e ike lon ijo ante! nasin ni taso li ike lili · ike lili li sama pona lili · tenpo la pona lili li sama pona · pilin la pona li sama pona mute · a · sin li pona mute tan ni!」 nasin li ale · ona li lon moku sina · ona li lon len sina · ona li lon pali sina · ona li lon selo sina · sina ona · ale la nasin li ale · jan li alasa e nasin sin tan ni : sona ona li weka · ijo li sin anu majuna · tawa nasin la ijo ale li sama wan · a · jan li wawa lili tawa nasin · ona o alasa ala ·
nasin li moku e ken ale · nasin li esun e ken sama · nasin li ijo seme li ken seme? o lukin e sona ni : nasin li majuna ala li sin ala li tawa tenpo pi kon ala ·
nasin li tenpo pona li tenpo ike ·
nasin li sona suli li sona lili ·
nasin li pilin awen li pilin weka ·
nasin li suno tenpo li pimeja tenpo ·
nasin li jo mute li jo ala ·
nasin li wile suwi li wile apeja ·
nasin li tawa sewi li tawa seli ·
nasin pi jan ni li kama wawa li kama jaki la nasin li suli taso anu lili taso. nasin li sama ijo ante ala tawa ni. ona li nasa ala nasa? jan o seme tawa nasin?
taso jan ale ala li pilin sama · jan Pan li wile ante · kulupu mama ona li ike pilin tawa tenpo · jan sama ona li ike pilin tawa kon · jan Pan li wile pona · ona li ante e ijo pi nasin jan · pilin insa ona li ni : 「ante wan o kama lon」 · ante ni li seme? jan Pan li jan seme? o awen · jan Pan li jan lipu · lipu li pali ona · jan Pan li alasa e lipu · jan Pan li pana e lipu tawa tomo sona · jan ale li lukin e lipu wile lon tomo sona sama · jan ala o pana e mani tawa kepeken pi lipu ni · jan li mama li lawa e ni · ni li pali pi jan Pan · jan Pan li jan wawa ala kepeken ni · lipu taso li lon e pilin pona tawa ona · kulupu ona li ala · jan mama ona li moli · jan sama ona li weka li awen weka · soweli kin li suwi ala tawa ona · lipu taso li olin pi jan Pan · luka ona li sama ilo · luka li jo e lipu taso · lipu li wawa ona · jan Pan li sama jan ale kin · jan ale li wan taso lon tomo ona · jan ale li luka ala e jan ante · jan li olin e jan kepeken ilo kon taso · kulupu li kama weka · kulupu li nasa · sona li mani tawa jan ni · ilo li sewi ona · ni li nasin · taso pali pi tomo lipu li lili e mute pi jan pona tawa jan Pan · jan pona la nanpa li ala · mama taso li lon poka pi jan Pan · mama li ken suwi · tenpo la mi olin e mama mi · tenpo la mi wile moli e mama mi · mi ale li kepeken pilin mute tawa mama · jan Pan li sama jan ale kin · tenpo ona pi moli ala la mama wan pi jan Pan li sona ala e nasin ona : 「jan mute li nasa e insa ona kepeken telo anu moku · sina nasa e insa sina kepeken pali · kin la sina pali tawa mani ala!」 mama ni li musi ala · toki insa ona li suwi taso · kepeken tenpo suli la mama ni li wawa tan toki insa · ni li nasa ona li nasin ona : ona li jan lili la ona li sona e lili ona · mama pi jan Pan li jo ala e sona sin e kon ante e mani mute e jan pona · mama li sona e weka pi ijo ni la mama li pakala pilin · tenpo ale la mama li toki e pakala pilin ona · tawa ona la kulupu ale o ike taso o awen ike · kin la mama li wile toki e ike wile ni tawa jan ale lon poka ona · tenpo suno ni li ante ala · jan Pan li kute e toki jaki sama lon tomo mute ·
「sina ike sama, mama o · wile mi la wile sina la weka suli li lon · pali li pona mi · mani li ijo taso」 · mama li kute ala e jan Pan : 「jan lili ale li sama · sina pilin e pona tawa sina · sina la tenpo li tenpo pi pona wile · a a a! pona wile li tan mama sina taso! mi mute li ken e wile tawa sina · lawa sina li awen open · pilin sina li awen open kin · sina sona ala e mute pona anu mute ike · sina la ijo ale li suli taso tan ni : ijo ale li sin tawa sina · a!」 mama li toki ala lon tenpo suli · mama li kepeken tenpo pi toki ala tawa wawa · insa mama li lape tan pini ni · taso toki ala li pini : 「o ante · jan sama sina li pali e ijo musi · sina o alasa musi kin」 · oko pi jan Pan li kama suli · 「jan Lan li pakala li pakala li pakala li pakala! ona li sitelen taso e sitelen pilin e sitelen ike · sina wile weka e moku tan insa sina la o oko e ona! mi o sama ona lon tenpo ala!」 ike la pilin li ike tawa mama li ike tawa jan Pan kin · nasin toki li wile e wile wan tawa jan · jan li alasa e lawa pi jan kute · jan li toki pona la jan kute li kama anpa · jan li toki ike la jan kute li open e utala toki anu utala luka · jan Pan li toki ike · 「jan Pan o! mi lon e sina tan seme? sina sona ala sona e mani weka mi e tenpo weka mi? ona ale o tawa sina pini · taso sina awen wile kama ike tawa mi! o pini e uta! o pini e toki! sina olin ala olin e mi! a! oko mi o pana ala pana e telo lawa? sina o pilin e apeja · o ike ala tawa mama sina! kin la sina toki nasa · ike seme li tawa jan sama sina? sina tu li pali sama · taso jan Lan li jo e mani tan pali · sina jo ala」 · 「mi jo e wawa, mama o! a! jan Lan li mi ala · pali ona li powe · ona li sitelen e ijo · mi alasa e sitelen · ijo ni tu li ijo ante! kin la mi alasa e lipu · lipu li jo e sitelen mute · jan Lan li pali e lipu la sitelen wan li lon」 · ona li awen · jan tu li utala kepeken nimi li utala kepeken pilin · utala luka la ni li pona · utala kiwen la ni li pona suli · taso utala ala la ni li pona ala · a · o pilin ala e pilin ike tawa jan ni · nasin li jaki tawa ona · nasin li wawa li wawa tawa ike · nasin taso li lawa e ken tawa jan ale · taso nasin li open lon tenpo seme? nasin li open kepeken seme? nasin li open tan seme? kulupu wan li sona pini e alasa ni sona : ona li jan majuna · tenpo li ala e ijo mute · a · tenpo li ken ala anpa e lawa insa · jan li kama e sona lon ma ale · mute pi jan majuna li lili lon nasin · taso ona li awen sona e open pi nasin ni · tenpo pi jan lili la jan Pan o kute e ni tan mama mama majuna :
sitelen Lasina
“tenpo weka la ale li ante. kon li jaki ala. moku mute li ken. telo li laso sewi. tenpo weka li pona. a. ijo pona li awen ala. pakala wawa li kama li sin. sin ni li ala e linja moli e linja lon. tan ni la ijo moli en ijo lon li lon poka. ike mute li open tan sin ni. sin ni li open e tenpo ni: nasin li lon. tenpo ni la kon moli li awen. kon moli li tan ma moli . jan ala li ken lukin e ona kepeken oko. taso kon moli li ken lukin e jan. ona li alasa luka e jan. kon moli li luka e jan la seli suli li lon. kin la telo anpa li sin. ona li tawa anpa tan sewi. tenpo pini li ante tawa telo. telo pi tenpo sama li laso . ona li pona e sijelo. ona li pona e kasi. ona li ko e len. ona li musi tawa selo. taso telo li kama sin . tenpo n li nasa. sewi li pana e telo nasa tawa ma. telo anpa li nasa li sin tan ni. sin li nasa ike. telo li jelo. telo li wawa . telo li weka e tenpo tan selo. jan li lon telo anpa sin la jan li kama majuna kepeken tenpo ala. telo li majuna e jan ale e ijo ale . pakala ale li sama ni ala. telo sin ike li pakala sin. pakala ni li sama ijo ala. telo sin la kon moli la linja pakala la kulupu li ale en kulupu jan ale en kulupu pona ale li pini. ma tomo li jo ala e jan. jan li tawa ma anpa. jan ala li tawa lon noka. mute moku li lili. toki li kama nasa. moku li kama nasa. pipi taso pi pona ala li moku tawa jan. olin li kama nasa. soweli ale li moli. pilin pakala li tawa ijo ale li tawa nasin ale. pilin pakala ni li nasin.”
pilin nanpa wan la nasin li pakala e jan · pilin nanpa tu la weka moku li pakala e jan · linja moli nasin li seli e kasi ale e tomo soweli ale · pona ale li kama seli · taso tenpo pimeja pi suno ala la mun kin o weka ala weka? ala! pona li awen lon ike ken ale · wile jan li sama · ike li ken wawa · moku li ken jaki tawa uta · kulupu li ken weka tawa jan · taso pali li awen · pali o awen · jan Pan o awen kin · 「mama o pini e toki utala sina! mi kama e sina tawa utala ala · mi kama e sina tawa ni : mi pali e ijo tawa pona kulupu」 · tenpo suli li kama li weka · jan ala o toki lon toki sama · mama pi jan Pan li suli e uta lawa ona · mama la ona li kepeken lawa ona tawa pilin taso · lawa ona li kute e ijo lon tenpo lili · toki pi jan Pan li sama nasa tawa mama · insa kute o tawa nasin pilin taso · pilin o, wawa sina li tan seme? pilin o, sina sona awen lon ike pi lawa jan · tenpo la jan li pilin e ni : pilin li ona · taso jan en pilin jan li ijo tu · jan ale li kepeken pilin · o toki ala e nasa ni : 「pilin li weka tan lawa mi」 · toki ni li sona pakala · sina nasa tan sona pakala tawa pilin sina · jan li ken ala sona e insa kepeken pona la ona li alasa sama e pilin e sona e sewi e olin · insa li ni ala · insa li kon taso · taso jan pi mute ala li kepeken sona ni · mama pi jan Pan li kepeken ala sona ni : 「sina toki powe · kulupu ala li lon」 · jan Pan li sike e oko · 「kulupu li jan · mi tu li ken kulupu · nimi 「kulupu」 li suli ala · pali mi li suli · tenpo sike mute la mi wile kama e ante wan tawa nasin · tenpo ni la mi pini e ante wan ni」 ·
「musi, jan Pan o · ante ni li tawa ijo seme?」
「ona li ante pi nasin moku · mi sin e moku jan · mi la pipi pi nasin moku li ike tawa uta · taso pipi sin mi li suwi」 · 「a a a a! o apeja e sina sama · ni li ken ala · sina sona ala kepeken ilo · sona sina li lukin lipu taso · jan ala li sona suwi e pipi lon nasin ni」 sinpin mama li walo · taso sinpin pi jan Pan li awen sama · jan Pan li sona e nimi wile ale · 「ale li pona · pilin sina li wawa ala · sina kama olin e jaki uta tan pipi · ni la pipi suwi ale li tawa mi · pona! sina ken tawa weka」 ·
tenpo li tawa ijo ale · tenpo pi nasin moku sin li lon · tenpo pi toki utala li lon · jan sama sina la tenpo pi pilin ike li lon · tenpo telo li lon · tenpo linja li lon · tenpo pi tawa mama li lon kin · jan ale o sona e tenpo ona · sona ala la tenpo li sona e sina · ni li nasin · ni li sama jan ale kin · pali jan li ante ala lon tenpo · mama kin li pali sama tenpo ale · toki li pini la mama li anpa e jan Pan kepeken nimi jaki · mama li tawa tomo moku tan ken lukin pi pipi sin · tomo moku li jo taso e linja kiwen e pipi sin ala · jan Pan li luka e linja kiwen · kepeken tenpo ala la jan Pan li len e lawa mama kepeken linja · linja li weka e kon tan insa mama · sijelo li jo ala e kon · kon ala la mama en sijelo mama li tawa supa anpa ·
tenpo li tawa mama ale · tenpo pi lape ike li lon · tenpo pi alasa moli ken li lon · tenpo pi ike pi jan lili li lon · tenpo pi tawa ma li lon kin · jan ale o sona e tenpo ona · jan Pan li tawa e mama tawa sinpin tomo · ona tu li lon tomo ala li lon ma · moli li open tawa mama · anpa lawa ona li loje lon selo · oko ona li open ala · mama li sona e ni : pini li kama · sewi la telo anpa sin li kama kin · uta pi jan Pan li musi nasa e mu wawa a · ona li mu nasa · ona li mu kama · telo anpa sin li tawa jan ni tu · telo li len e selo · selo li lon telo la selo li kama majuna sama utala · tenpo sike ale li tawa weka tan jan sama pakala · kon jan li open moli sama apeja · selo li kama ko · sijelo pi ken lon li uta taso · 「mi ante e ijo wan, mama o! a! a! o oko e nasin moku sin! ona li pipi jan!」 pini tenpo li tawa ijo ale · 「ona li pipi jan!」
jan pali o! toki! mi wile e ni: tenpo suno sina li suwi. mi lukin e lipu sina. tenpo pimeja wan la, oko mi li alasa e nimi ona ali. tenpo pimeja sin la, lawa mi li sona insa e kon ona. sina o sona e ni: jan mute li pana e pali tawa kulupu pali mi. kulupu pali ni li kulupu e pali musi. pali musi li pona taso li wawa taso. pona ike ni li awen: kulupu mi li ken e pali pi mute lili. mi mute li ken ala e pali musi pi jan wan la, jan li ike ala. ni taso li lon: pali ona li ike. ali jan la, jan ali li ike lon tenpo!
sina pona tan ni: sina pini e pali. taso, mi jo e pilin tawa pali sina. pali ni li pona taso ala. o sona e ni lon tenpo ali: pali ni li ken kama pona. ike la, mi ken ala pana e pali ni tawa kulupu pali. kulupu pali li wawa e pali pi mute lili. sina wile e pali sina lon lipu pi kulupu pali la, pali sina o pona mute o pona wawa. ni la, mi alasa e ante wile ken tawa pali sina. ken wile ni li suli. o lukin e ante wile. lukin li pini la, o ante e pali sina. (nasin ante la, o ante ala e pali sina. ona li pali sina li pali mi ala! taso, o awen sona e ni: pali ni li ante ala la, jan ala o wile lukin e ona.)
ni li ante wile ken:
-
o lili e nimi namako. sina kepeken e nimi mute pi pu ala lon pali sina. nimi li pu ala la, jan ali ala li sona e pali sina. ni li ike. jan ali o ken sona e pali. lon la, nimi namako ni pi pali sina li ku lili. taso, jan ali ala li lukin e lipu ku. kin la, jan ali ala li sona e lipu ku. kin la, lipu ku li nasin pi jan pi mute lili. ona li lawa ala e pona pi lawa toki. nimi li ku la, nimi o tawa pali musi tan seme? nimi “ewe” en nimi “samu” li ku lili. jan ala li kepeken e nimi ni! ni la, jan o kepeken e nimi sina pi ku lili tan seme? nasin pi kulupu pali mi la, pali musi o wawa. wawa li tan ni: jan li sona e pali. ken la, sina awen wile kepeken e nimi namako. ni li pilin sina la, o alasa e sona ni: mi ken ala ken kepeken e nimi pu pi kon sama? pona la, o ante e nimi pi wile ala sama ni:
- nimi “apeja” o tawa nimi “pilin ike.”
- nimi “powe” o tawa nimi “lon ala.”
- nimi “majuna” o tawa nimi “sin ala.”
-
nasin sitelen sina li nasa lili. linja nimi pi pali sina li lon poka pi sitelen sitelen nasa. tan seme la, sina o kepeken e sitelen lili “·” anu sitelen lili “「」”? jan pi mute mute li kepeken ala kepeken e sitelen lili ni? kepeken ala la, mi pilin e ni: nasin sitelen sina o sama nasin pi jan ante. nasin sina li sama ona la, jan mute o pilin pona tawa pali sina! nasa li pona ala! sina en nasin sina o nasa ala. nasa ala la, sina en nasin sina en pali sina li pona. pona la, linja nimi o sama ni:
- mi wile e ni: sina kepeken e nimi “olin.”
- o kepeken ala e nimi “ale.” nimi “ale” li ike tawa mi. ante la, o kepeken e nimi “ali” taso.
- nasa la, sina kepeken e sitelen Lasina e sitelen pona kin. o ni ala. nasin sitelen wan o tawa lipu musi! nasin sitelen o wan taso! kepeken pi nasin sitelen tu li pana e pilin jaki. kin la, jan ala li sona lukin e sitelen pona. lipu sina o nasa ala. tawa ni la, o kepeken taso e sitelen Lasina.
- mi sona ala e kon pi pali sina. lukin mi nanpa wan la, pali sina li toki e wile moku. wile moku ni li moku pipi. taso, jan ala li wile moku e pipi. jan ala li moku e ni! ni la, pali sina li toki e ijo ante. ante ni li seme? lukin mi nanpa tu la, mi alasa e kon ni. ike la, mi ken ala alasa e kon wile. ken la, kon pi lipu sina li lon. awen la, mi sona ala e ona. mi jan pi sona mute. mi sona ala la, jan ala li ken sona. ni li ike tawa sina! taso, ni li ken ante. mi pana e ante pi mute lili tawa pali sina. ante ni li pona e nasa namako e ike pi wile ala. mi sitelen e pali sina sin lon anpa lipu. mi sitelen e ijo sin mi sama ni. ijo pi sin ala li li sama. mi weka e sitelen sina la, ona li
sama ni.
ni li wile ante ali. jan ala li ken sitelen e ijo pona anu ijo musi. taso, jan ali li ken alasa sitelen e ijo ni. o pona. o lukin pona, jan pali o!
~ jan Apeja
pipi pona (sin)
ma li wile olin e ni : sina pakala e sina. sama · mi mute li lon kon pisama ala · mi mute li lon kon pi ante ala · ona li sama ante · ona li ante sama · ali la ona li ala · ni li nasin. sina sona. nasin li tawa ma li tawa tenpo li tawa kulupu. ali la nasin li tawa jan. ale la nasin li ike · taso, jan li wile pilin e pilin pona tawa nasin · tan ni la jan li toki e lon ala ni: “nasin ni li ike lili.” kin la nasin ale ante li ike suli! sona pi ike ni li suli ala · jan ale li sona e ike lon ijo ante! nasin ni taso li ike lili · ike lili li sama pona lili · tenpo la pona lili li sama pona · pilin la pona li sama pona mute · a · sin li pona mute tan ni!」 nasin li ali. ona li lon moku sina · ona li lon len sina · ona li lon pali sina · ona li lon selo sina. sina ona. ali la nasin li ali. jan li alasa e nasin sin tan ni: sona ona li weka. ijo li sin anu sin ala. tawa nasin la ijo ali li sama wan. a. jan li wawa lili tawa nasin · ona o alasa ala · nasin li moku li esun e ken ali. · nasin li esun e ken sama · nasin li ijo seme li ken seme? o lukin e sona ni: nasin li sin ala ala li sin ala li tawa tenpo pi kon ala.
nasin li tenpo pona li tenpo ike ·
nasin li sona suli li sona lili ·
nasin li pilin awen li pilin weka ·
nasin li suno tenpo li pimeja tenpo ·
nasin li jo mute li jo ala ·
nasin li wile suwi li wile powe ·
nasin li tawa sewi li tawa seli ·
nasin pi jan ni li kama wawa li kama jaki la nasin li suli taso anu lili taso. nasin li sama ijo ante ala tawa ni. ona li nasa ala nasa? jan o seme tawa nasin?
taso jan ale ala li pilin sama · tenpo ali la nasin li pona mute. jan mute li lon nasin sama. taso o kama sona e sona pi jan wan. nimi ona li jan Pan. jan Pan li wile ante pali pona. pali pona ona li suli e kon. a! jan ali o pali pona e pona. ni li nasin tawa ali! jan la pali taso o suli. ijo ali ante o lili. jan Pan li sama. jan Pan la kulupu mama ona li ike pilin tawa tenpo sama. jan sama ona li ike pilin tawa kon. jan Pan li wile pona. ona li ante e ijo pi nasin jan. pilin insa ona li ni: “ante wan o kama lon.” ante ni li seme? jan Pan li jan seme? o awen. jan Pan li jan lipu. lipu li pali ona. jan Pan li alasa e lipu. jan Pan li pana e lipu tawa tomo sona. jan ali li lukin e lipu wile lon tomo sona sama. jan ala o pana e mani tawa kepeken pi lipu ni · jan Pan li mama li lawa e ni. ni li pali pi jan Pan. jan Pan li jan wawa ala kepeken ni. lipu taso li lon e pilin pona tawa ona. kulupu ona li lon ala. jan mama ona li moli · jan sama ona li weka li awen weka · soweli kin li suwi ala tawa ona · lipu taso li olin pi jan Pan. luka ona li sama ilo · luka li jo e lipu taso · lipu li wawa ona. jan Pan li sama jan ali kin. jan ali li wan. taso lon tomo ona · jan ale li luka ala e jan ante · jan li olin e jan kepeken ilo kon taso · kulupu li kama weka · kulupu li nasa · sona li mani tawa jan ni · ilo li sewi ona · ni li nasin. taso pali pi tomo lipu li lili e mute pi jan pona tawa jan Pan. jan pona la nanpa li ala lili. mama taso li lon poka pi jan Pan. mama li ken suwi. tenpo la mi ali li olin e mama pi mi ali. tenpo la mi wile moli e mama mi · mi ali li kepeken pilin mute suwi tawa mama. jan Pan li sama jan ali kin. tenpo ona pi moli ala la mama wan pi jan Pan li sona ala e nasin ona: “jan mute li nasa e insa ona kepeken telo anu moku. taso sina nasa e insa sina kepeken pali.” kin la sina pali tawa mani ala!」 mama ni li musi ala. toki insa ona li suwi taso.
kepeken tenpo suli la mama ni li wawa tan toki insa. ni li nasa ona li nasin ona: ona li jan lili la ona li sona e lili ona. mama pi jan Pan li jo ala e sona sin e kon ante e mani mute e jan pona · mama li sona e weka pi ijo ni la mama li pakala pilin · tenpo ali la mama li toki e pakala pilin pilin pakala ona. tawa ona la kulupu ali o ike pona taso o awen ike pona. kin la mama li wile toki e ike wile pona ni tawa jan ali lon poka ona. tenpo suno ni li ante ala. jan Pan li kute e toki jaki suwi sama lon tomo mute. jan Pan li olin e kute ni. jan Pan li jan sona. jan sona li sona e ni: mama ona li wawa mute tawa lawa li wawa mute tawa insa. tan ni la jan Pan li kute mute e toki tan mama ona. ni li lon tenpo suno ni kin.
“sina ike sama sona mute, mama o · wile mi la wile sina la weka suli ala li lon. pali li pona mi. kin la pali li pona sina.” mani li ijo taso」 · mama li kute ala e jan Pan: “jan lili ali li sama li pona. sina pilin e pona tawa sina. sina la tenpo li tenpo pi pona wile. a a a! pona wile li tan mama sina taso! mi mute li ken e wile tawa sina. lawa sina li awen open. pilin sina li awen open kin. sina sona ala e mute pona anu mute ike. sina la ijo ali li suli taso tan ni: ijo ali li sin tawa sina. a!” mama li toki ala lon tenpo suli. mama li kepeken tenpo pi toki ala tawa wawa. insa mama li lape tan pini ni. taso toki ala li pini: “o ante ala! jan sama sina li pali e ijo musi. sina kin o alasa musi kin. oko pi jan Pan li kama suli · 「jan Lan li pakala li pakala li pakala li pakala! ona li sitelen taso e sitelen pilin e sitelen ike · sina wile weka e moku tan insa sina la o oko e ona! mi o sama ona lon tenpo ala!」 ike la pilin li ike tawa mama li ike tawa jan Pan kin · nasin toki li wile e wile wan tawa jan · jan li alasa e lawa pi jan kute · jan li toki pona la jan kute li kama anpa · jan li toki ike la jan kute li open e utala toki anu utala luka · jan Pan li toki ike · jan Pan o! mi lon e sina tan seme? sina sona ala sona e mani weka mi e tenpo weka mi? ona ale o tawa sina pini · taso sina awen wile kama ike tawa mi! o pini e uta! o pini e toki! sina olin ala olin e mi! a! oko mi o pana ala pana e telo lawa anu seme? sina o pilin ala e pilin ike. o ike ala tawa mama sina! o ike ala tawa jan ali! kin la sina o toki nasa ala. ike seme li tawa jan sama sina? ona li ike ala a. sina tu li pali sama.” taso jan Lan li jo e mani tan pali. sina jo ala」 · jan Pan li pilin pona tan toki ni. jan Pan li jan lili pona. jan Pan kin li toki. “mi jo e wawa, mama o! a! jan Lan li mi ala · pali ona li lon ala. ona li sitelen e ijo · mi alasa e sitelen · ijo ni tu li ijo ante! kin la mi alasa e lipu. lipu li jo e sitelen mute.” jan Lan li pali e lipu la sitelen wan li lon」 · ona tu li awen. jan tu li utala kepeken nimi li utala kepeken pilin · utala luka la ni li pona · utala kiwen la ni li pona suli · taso utala ala la ni li pona ala · a. o pilin ala e pilin ike tawa jan ni. nasin li jaki tawa ona. nasin li wawa li wawa tawa ike. nasin taso li lawa e ken tawa jan ali. taso nasin li open lon tenpo seme? nasin li open kepeken seme? nasin li open tan seme? o kama sona! ona li musi li pona! kulupu wan li sona pini e alasa ni sona: ona li jan sin ala. tenpo li ala e ijo mute. a. tenpo li ken ala anpa e lawa insa. jan li kama e sona lon ma ali. mute pi jan sin ala li lili lon nasin. taso ona li awen sona e open pi nasin ni. tenpo pi jan lili la jan Pan o kute e ni tan mama mama sin ala:
“tenpo weka la ali li ante. kon li jaki ala. moku mute li ken. telo li laso sewi. tenpo weka li pona. a. ijo pona li awen ala. pakala wawa li kama li sin. sin ni li ala e linja moli e linja lon. tan tenpo weka ni. la ijo moli en ijo lon li lon poka. ike mute li open weka tan sin ni. sin ni li open e tenpo ni: nasin li lon. tenpo ni la kon moli li awen. kon moli li tan ma moli. jan ala li ken lukin e ona kepeken oko. taso kon moli. li ken lukin e jan. ona li alasa luka e jan. kon moli li luka e jan la seli suli li lon. kin la telo anpa li sin. ona li tawa anpa tan sewi. tenpo pini li ante tawa telo. telo pi tenpo sama li laso. ona li pona e sijelo. ona li pona e kasi. ona kasi li ko e len. ona li musi tawa selo. taso telo li kama sin. tenpo ni li nasa. sewi li pana e telo nasa tawa ma. telo anpa li nasa li sin tan ni. sin li nasa ike. telo li jelo. telo li wawa. telo li weka e tenpo tan selo. jan li lon telo anpa sin la jan li kama sin ala kepeken tenpo ala. telo li sin ala. e jan ale e ijo ale. pakala ale li sama ni ala. telo sin ike li pakala sin. pakala ni li sama ijo ala. telo sin la kon moli olin li tawa jan ali la linja pakala la kulupu lawa ali en kulupu jan ali en kulupu pona ali li pini pona. ma tomo li jo ala e jan. jan li tawa ma anpa. jan ala li tawa lon noka. mute moku li lili. toki li kama. nasa. moku li kama nasa. pipi taso pi pona ala li moku tawa jan. olin li kama nasa. soweli ali li moli. pilin pona pakala li tawa ijo ali li pilin pona tawa nasin ali. pilin pakala pona ni li nasin.”
pilin nanpa wan la nasin li pakala e jan · pilin nanpa tu la weka moku li pakala e jan · linja moli nasin li seli e kasi ale e tomo soweli ale · pona ale li kama seli · taso tenpo pimeja pi suno ala la mun kin o weka ala weka? ala! pona li awen lon ike ken ale · wile jan li sama · ike li ken wawa · moku li ken jaki tawa uta · kulupu li ken weka tawa jan · taso pali li awen · pali o awen · jan Pan o awen kin · 「mama o pini e toki utala sina! mi kama e sina tawa utala ala · mi kama e sina tawa ni : mi pali e ijo tawa pona kulupu」 · tenpo suli li kama li weka · jan ala o toki lon toki sama · mama pi jan Pan li suli e uta lawa ona · mama la ona li kepeken lawa ona tawa pilin taso · lawa ona li kute e ijo lon tenpo lili · toki pi jan Pan li sama nasa tawa mama · insa kute o tawa nasin pilin taso · pilin o, wawa sina li tan seme? pilin o, sina sona awen lon ike pi lawa jan · tenpo la jan li pilin e ni : pilin li ona · taso jan en pilin jan li ijo tu · jan ale li kepeken pilin · o toki ala e nasa ni : 「pilin li weka tan lawa mi」 · toki ni li sona pakala · sina nasa tan sona pakala tawa pilin sina · jan li ken ala sona e insa kepeken pona la ona li alasa sama e pilin e sona e sewi e olin · insa li ni ala · insa li kon taso · taso jan pi mute ala li kepeken sona ni · mama pi jan Pan li kepeken ala sona. ni : 「sina toki powe · kulupu ala li lon」
· jan Pan li sike e oko olin e mama e kulupu. 「kulupu li jan · mi tu li ken kulupu · nimi 「kulupu」 li suli ala · pali mi li suli · tenpo sike mute la mi wile kama e ante wan tawa nasin · tenpo ni la mi pini e ante wan ni」 ·
“sina musi, jan Pan o.” ante ni li tawa ijo seme?」
「ona li ante pi nasin moku · mi sin e moku jan · mi la pipi pi nasin moku li ike tawa uta · taso pipi sin mi li suwi」 ·
“a a a a! o pilin ike e sina sama · tawa jan ala. ni li ken ala. sina sona ala kepeken ilo ike. o sina! sina pona. sina pona tawa mi. sina pona tawa jan olin. sina o wile ala ante e insa sina e kon sina. jan ala o alasa ante e sina e nasin sina. jan li wile ante e sina la ona li olin ala e pona sina insa. kin la jan ni pi wile ante li olin ala e kon suwi lon jan. sona sina li lukin lipu taso · jan ala li sona suwi e pipi lon nasin ni」 sinpin mama li walo · taso sinpin pi jan Pan li awen sama · jan Pan li sona e nimi wile ale · 「ale li pona · pilin sina li wawa ala · sina kama olin e jaki uta tan pipi · ni la pipi suwi ale li tawa mi · pona! sina ken tawa weka. sina ken tawa awen kin. sina ken pali e wile sina ale.”
tenpo li tawa ijo ale · tenpo pi nasin moku sin li lon · tenpo pi toki utala li lon · jan sama sina la tenpo pi pilin ike li lon · tenpo telo li lon · tenpo linja li lon · tenpo pi tawa mama li lon kin · jan ale o sona e tenpo ona · sona ala la tenpo li sona e sina · ni li nasin · ni li sama jan ale kin · pali jan li ante ala lon tenpo · mama kin li pali sama tenpo ale · toki li pini la mama li anpa e jan Pan. kepeken nimi jaki · mama li tawa tomo moku tan ken lukin pi pipi sin · tomo moku li jo taso e linja kiwen e pipi sin ala · jan Pan li luka e linja kiwen · kepeken tenpo ala la jan Pan li len e lawa mama kepeken linja · linja li weka e kon tan insa mama · sijelo li jo ala e kon · kon ala la mama en sijelo mama li tawa supa anpa · kasi kule pona e soweli alasa e olin kulupu. ike li ken. ni li awen. taso pona li ken kin. ni li nasin tawa jan Pan.
tenpo li tawa mama ali. tenpo pi lape ike li lon · tenpo pi alasa moli ken li lon · tenpo pi ike pi jan lili li lon · tenpo pi tawa ma li lon kin · jan ale o sona e tenpo ona · jan Pan li tawa e mama tawa sinpin tomo. ona tu li lon tomo ala li lon ma · moli li open tawa mama · anpa lawa ona li loje lon selo · oko ona li open ala · mama li sona e ni : pini li kama · sewi la telo anpa sin li kama kin · uta pi jan Pan li musi nasa e mu wawa a · ona li mu nasa · ona li mu kama · telo anpa sin li tawa jan ni tu · telo li len e selo · selo li lon telo la selo li kama majuna sama utala · tenpo sike ale li tawa weka tan jan sama pakala · kon jan li open moli sama apeja · selo li kama ko · sijelo pi ken lon li uta taso · 「mi ante e ijo wan, mama o! a! a! o oko e nasin moku sin! ona li pipi jan!」 pini tenpo li tawa ijo ale · 「ona li pipi jan!」 ona li lon ma la jan Pan en mama li luka suwi e ona ante. ni li pona suli li pona mute a! ni o nasin open tawa jan: jan ali o olin e ona. soweli pi jan Pan li telo e selo pi jan mama. kasi li poki e jan tu kepeken luka laso ona. sewi laso li telo lili e ona kin. ni li pona nanpa wan. o awen e pona ni tan pali pona. o awen e pona ni tan mama pi kulupu mama. o awen e pona ni tan mani musi mute! o awen e ni tan pilin insa wile. o sama pona pi jan ali. o sama jan ali. o ante tawa nasin jaki. o awen suwi taso. o suwi tawa jan lawa kin. ona li pini pona li pini ali. o lon.