taso
taso.
mi taso. ala li lon poka mi. ala li ken pona e mi. kalama wawa li utala e kute. lukin li ike. mi lukin e sewi. pimeja. mi lukin e anpa. pimeja. telo.
telo…
telo li suli. telo li tawa wawa. telo li moku e mi. mi tawa wawa. telo li utala e mi. telo li moku e mi. kalama li pini. kon li weka. mi tawa anpa. telo li luka e selo ale mi. mi lukin e anpa. pimeja. kon li weka tan sijelo. mi wile e kon. kon li weka la, mi moli.
moli…
mi moli. wawa li weka. pilin li weka. mi moli… ike. ike a! IKE A! mi wile ala moli. mi wile lon. mi sona e lon taso. mi sona ala e moli. mi wile ala sona e moli. mi wile lon! moli li ike. o moli ala e mi. mi wile ala moli. MI WILE ALA MOLI A. moli… wawa lili la mi tawa sewi.
kon…
mi moku e kon. tenpo lili la, mi pilin pona. pilin pona li pini. kalama wawa li lon. telo wawa li kama tan sewi. telo li mute. telo li ike e selo mi. lukin li ike. pimeja…
walo.
ale li walo. kalama suli li moli e kalama ante. lukin li pakala. kute li pakala. seme…? pimeja. ale li pimeja sin. kalama wawa li kama sin. walo. kalama. pimeja. awen. walo. kalama. pimeja. ike… wawa li weka. mi sona ala e poka mi. telo li ale. pimeja li ale. mi tawa anpa…
kiwen.
mi luka e kiwen. mi ken ala lukin, taso mi luka wawa e kiwen. mi tawa sewi. mi awen lon kiwen. kiwen li supa. selo ni… selo kiwen li sama kasi. a…
lape…
pini la, mi ken lape. telo li ike e selo. ni li suli ala. kalama li ike e kute. ni li suli ala. walo li ike e lukin. ni li suli ala. mi ken lape. kalama li awen… pimeja li awen… ale li awen… mi moli ala… kiwen li awen e mi. mi lape.
mi pilin pona. lon ike la, mi kama pilin pona.
mi lape.
supa.
mi lon supa. kalama en telo li weka. mi lukin e sewi. laso. mi lukin e anpa. jelo. walo. mi luka e anpa. ko. anpa li ko. mi kama jo e lili anpa. lili li weka li tawa anpa. ko li tan sike lili lili mute mute. ko li suwi tawa selo. a… mi awen lon anpa. telo li lon noka mi, taso telo ni li utala ala.
ale li pona. mi moli ala. a… mi lape…
suno.
mi awen lon ko. suno li awen. laso li awen. sike lili lili ale li awen. mi awen.
seli…
suno li sike walo suli lon sewi. suno li seli. mi wile ala seli… mi wile len tan suno. mi pini e awen. mi tawa e luka, e luka ante, e noka, e noka ante… pona a. tawa li pona e sijelo. mi lukin e poka ale mi.
kasi.
kasi li lon sinpin mi. kule li laso wawa. kasi li mute, li suli. mi tawa kasi. suno li seli ala e anpa kasi. pona. kon li lete suwi. mi lukin e sinpin pi ma kasi. telo suli. mi kama tan telo suli. pakala… mi sona ala e ma ni. ken la ike li lon ma ni. ken la… seme?
moku…
sijelo li mu. mi wile moku. moku… mi lukin e ale poka. kasi. laso. seme la mi ken jo e moku? sona mi la… moku li suwi tawa lukin; kule moku li nasa. taso ma ni la, ale li kule sama, li sama tawa lukin… ken la kasi. mi ken ala ken moku e kasi? mi jo e kasi lili; mi lukin e kasi… ike. mi wile ala moku e kasi. a… moku seme li lon ma kasi? ken la soweli. soweli li ken pona. sama la soweli li ken ike. soweli li ken moli e mi. mi o alasa ala e soweli… ken la waso. waso li utala ala e jan. taso waso li lon sewi. mi ken ala lon sewi. mi o alasa ala e waso… ken la kala. kala li lon anpa. taso kala li tawa mute. kala li lon la, mi tawa kala la, kala li weka kepeken tenpo lili a! mi alasa e kala la mi wile e ilo. mi o alasa ala e kala… moku o tawa ala, o lon anpa. ken la…
kili.
ken la kili. kili li pona. kili li kama tan kasi; kasi mute li lon ma ni. ni la, kili mute li lon ma ni. pona! mi lukin pona e kasi ale, taso kili li lon ala. sijelo li mu. moku… mi tawa insa pi ma kasi. mi awen alasa. kili li ken kule ale. mi alasa e kule pi laso ala. mi tawa la mi lukin e ale. laso… laso… laso…
laso…
ike a! ale li laso. mi sona pona ala e kasi. mi awen alasa. mi awen tawa. suno li tawa lon sewi. sewi li kama loje. sijelo li mu. moku… wawa li weka. tawa li lili a. noka li pilin ike. insa mi li pakala. moku… ken la ale li pini. mi moli. mi moli a. ale li pini. mi ken ala awen tawa. ale li laso. ike a… mi tawa anpa. ike… ale li laso. mi kama pini e lukin, taso…
loje.
mi lukin e ijo lili lili a. ijo loje. mi pini e awen. mi tawa loje. sike. ijo li sike li taso. mi jo e sike loje. ni li kili… mi ken ala ken moku e ni? sijelo li mu wawa. a… mi moku e kili. moku, moku moku… kili li weka. a… kili mute o lon poka. mi alasa. mi kama lukin e kulupu kili. mi moku e kili ale. a…
sijelo li pilin pona. mi tawa anpa. lukin li pini. lawa li lape. ale li pona. mi lape.
nasa…
mi pilin nasa… lawa li ken ala pona. noka li tawa pona ala. lukin li pona ala. mi awen lon anpa la, mi tawa sewi… li kama anpa sin. seme li ni e mi? mi lukin e luka. pilin la luka li lon ma ante pi mi ala. kili. a… kili li ni e mi. mi sona ala e kili loje ni. pakala… mi ken ala awen sama ni. mi tawa sewi, li luka e kasi suli. kasi li awen e mi. mi awen. mi pini luka e kasi. noka li awen. mi anpa ala. mi awen. mi tawa. tawa li ike, taso mi anpa ala. mi awen tawa.
ike…
mi pilin ike a. sijelo li pakala. mi sona ala e ma. mi jo ala e ijo. mi jo ala e moku. mi wile pini e ike. mi wile pini e taso. insa pi ma kasi la, kon li ike. mi wile tawa ma pi kon pona. poka telo la, kon li pona… mi tawa. suno li tawa. mi awen tawa. mi kama lon…
… nena.
nena la, mi ken lukin e ale ma. mi lukin e kasi ale; kasi li lon anpa. mi lukin e telo suli; telo li lon poka ale ma. ma li lili. mi ken ala lukin e ma ante. jan ala li lon ma ni. mi taso.
taso…
suno li len. sewi li loje. suno li weka la, ale li pimeja. taso mun suli li suno lili. mun lili mute li kule e sewi. kon li pona…
suwi.
suwi a.
ike li lon ala. ale li pona.
pona.
mi pilin pona. mi pini e lape la, mi awen lon nena. suno li kama sin. waso li lon sewi. pilin nasa li weka. lape li pona e ale mi. mi tawa. sin la mi wile moku. a, moku… mi tawa anpa la mi kama lukin e ijo nasa.
jelo.
nena en anpa la, ijo jelo li lon insa. ijo li suli, li kama tan kasi. mi kama jo e ijo. ijo li palisa. kili a! mi sona e kili ni. mi ken moku e kili. a… pilin li jaki tawa uta, taso sijelo li kama pona a. mi jo e kili sin. moku. a! kili mute li lon. kasi mute lon ma li pana e kili jelo. mi moku e kili sin. pona a! mi jo e moku mute. wile moku li weka la mi awen.
a…
mi jo e ale wile. mi o seme? mi tawa poka telo. mi lukin e telo. ale li telo. taso ijo ala li lon telo. seme la, mi kama lon ma ni?
tomo.
mi kama lon tomo. tomo li tawa. tomo li lon selo telo. tomo li suli. jan mute li lon tomo. tomo li tan kulupu jan.
pakala.
tomo li pakala… telo li utala wawa. tomo li anpa. jan ale li tawa telo. jan li moli ala moli? mi awen e monsi lon anpa. mi toki.
sewi…
sewi o… o pona e mi, e jan ale lon tomo. a…
sin la mi wile moku. mi tawa.
kalama.
mi kute e kalama suli. mi lukin e sewi. pimeja. telo. lili la, telo li kama tan sewi. tenpo li tawa la, telo li kama wawa. ike. mi wile len. mi tawa li alasa e lupa. telo li ike e selo mi. wawa. telo li kalama wawa. mi lukin e kasi suli. mi len lon anpa kasi. telo li awen utala e mi, taso mi ken awen. kasi li lili e telo. poka la, kasi li pakala tan wawa telo.
mi awen.
lete.
ale li lete… lete li kama e jaki lon sijelo mi. mi pilin ike. mi lukin e ma. telo sewi li weka. anpa li kama ko pimeja. jaki li lon anpa. kasi mute li anpa. pipi li kulupu li tawa sike lon sewi. utala li lon insa mi. jaki… mi tawa. ale ma li pakala… mi tawa nena. kili jelo lili li awen. mi moku. kasi li awen la kule kasi li wawa. mi tawa anpa. mi lukin e telo suli. lete…
seme?
mi o seme? nanpa wan la, mi wile pini e lete. mi wile pali e seli. mi sona pona ala ni. ken la mi seli e ale. tenpo pini la, mi lukin e sitelen lon lipu… sitelen la, mije li pali e seli kepeken palisa lon sike kiwen. sitelen la, meli li seli e kala. kala… mi wile moku e kala. mi wile seli.
wile.
wile li wawa e mi. mi alasa e kiwen lili. mi jo e kiwen la mi kulupu e kiwen lon anpa sama sike. insa sike la mi pana e kasi. palisa kasi mute li lon. mi jo e palisa suli e palisa lili. mi pana e palisa suli tawa sike. mi awen e palisa lili lon palisa suli. mi jo e palisa lili, li tawa wawa e palisa. palisa tawa li luka e palisa suli la seli o lon. mi tawa, li tawa, li tawa…
tawa…
suno li tawa, li weka. mun li lon. mi awen tawa e palisa… ni li wile e wawa a! mi wawa ala. moku… mi tawa nena. tawa la, mi lukin e ma. ijo mute li lon anpa. kasi, palisa, linja, kili, kiwen… kili? sike laso li lon anpa. mi jo e sike. kule li ante lili tawa kasi ante. sike li kiwen, taso selo li sama kili tawa luka. ken la, mi sona e ijo ni… mi tu e sike. telo walo li lon insa. kili a! mi moku e telo. wawa li kama lon mi.
wawa!
mi jo e kili laso mute, li tawa poka telo. mi awen alasa pali e seli. mi tawa e palisa. mun li lawa e sewi. mi awen tawa. tawa…
suno.
tenpo lili a la, suno lili li lon. suno li weka… mi awen tawa e palisa. mi ken ni… mi ken pali e seli… suno sin. mi awen tawa. suno sin. suno li awen.
loje li lon pimeja.
seli.
mi pini e lape la, suno li suli lon sewi laso. seli li awen. seli… mi pali e seli a. mi moku e kili. mi awen lon poka seli lon tenpo mute. mi pilin pona. mi pilin wawa. mi lukin e telo. kala… mi wile moku e kala. mi jo e linja kasi mute tan anpa la mi pali e ilo. ilo li len suli; mi pana e len tawa telo la len li poki e kala. mi pali e ilo kepeken tenpo mute… pini la mi tawa telo, li alasa e kala. mi kama lukin e kulupu kala. mi pana e ilo… li jo sin e ilo… mi tawa ma. mi awen e ilo, li lukin e insa.
kala.
kala mute. mi jo e kala kepeken palisa. mi moli e kala… mi pana e kala tawa seli. seli li pimeja e selo kala. kule li suwi. mi moku e kala. a… pona. kala li utala tawa uta. moku ante li ken pona e kala, taso mi jo ala e moku wile. kala li awen pona tawa mi. mute ante moku li pona tawa sijelo. mi seli e kala sin. mi moku e kala. a… pona. mi wile ala moku la, mi awen lon seli. kon lili suwi li luka e mi. mi lukin e sewi. a…
pimeja…
sewi li pimeja, taso mun li lon ala. tenpo kama la, telo li kama tan sewi. mi sona. ma ni la telo li wawa. ale li pakala… mi wile ala ni. mi wile ala telo. mi wile ala lete. mi wile len. taso kasi li len ike. mi wile pali e len pona. ken la, mi ken pali e tomo… tomo li wawa li len. tomo la ijo pi mi ala li ken ala lon insa. mi lukin e anpa. mi ken pali e tomo tan palisa tan kasi. a, pilin ike li pona ala e kama. mi sona e utala kama. mi kulupu e palisa tan anpa. mi alasa e ma pona tawa tomo.
ma…
ma seme li pona? ma ni la nena li lon insa. mi tawa anpa nena. telo wawa li kama tan sewi la, telo li tawa anpa li pakala e ale. ma anpa la tomo li pakala. mi tawa nena. ma nena la telo li weka. taso nena la kasi suli li lon ala. ala li lili e wawa telo. ala la mi ken awen e tomo. ma nena la tomo li pakala. mi tawa ale ma… anpa en nena la, mi tawa insa. kasi suli li lon, taso ma insa li sewi a tawa anpa, li poka tawa nena. ni la, telo li tawa lon anpa la wawa telo li lili. kasi li lon la mi ken awen e tomo. tomo li lon sinpin kasi wawa la kasi li awen e tomo. ma insa li pona.
pali.
mi kama pali. pali la, mi ante e ijo kepeken wawa. mi wawa lili. taso mi awen pali. lili en ala la, lili li pona… mi pana e palisa tawa anpa. mi kulupu e palisa. palisa li supa li awen lon sewi palisa ante, sama sinpin. taso sinpin li pakala. a… mi alasa kepeken nasin ante. pakala. palisa ale li anpa. mi alasa sinpin sin e palisa. pakala. mi alasa mute kepeken nasin mute.
pakala…
mi lape lili. mi lukin e sewi. pimeja li wawa… mi ken ala lape. mi ken ala anpa. a… mi pana e palisa. mi pana e palisa ante lon poka. palisa tu la, sewi la mi pana e palisa lon insa… anpa la mi pana e palisa lon poka. palisa sin en palisa poka la sewi la mi pana e palisa lon insa. mi awen pali ni. sinpin li anpa ala. pona… pini la, tomo li lili li sike. sike la palisa li awen e palisa lon sewi. mi pana e kasi tawa selo. lupa li lon… kalama wawa. telo. mi tawa insa. tomo li awen ala awen? pali li pona ala pona? telo wawa li kama. tenpo li tawa.
taso tomo li awen.
tenpo.
tenpo pi mute seme la mi lon ma lili ni? mi sona ala. ma ante la, jan li kepeken nanpa. jan li nanpa e mute tenpo. jan li toki e「tenpo nanpa ale ale ale ale ale ale ale ale ale ale ale ale ale ale ale ale ale ale ale ale mute mute mute mute tu tu la…」toki suli a! kulupu jan la nanpa li ale. mi nanpa. tenpo li nanpa. mani li nanpa. suno li nanpa. mi nanpa ala e suno. mi wile ala. kulupu la nanpa mi li wile tawa jan ante taso. jan ante ala li lon ma ni. mi taso.
taso.
mi tawa. mi lukin e kasi. kasi li suli li laso wawa. kasi lili li kule ante li suwi. pipi kule li lon kasi lili. mi lukin e kiwen. akesi lili li lape lon kiwen suli. suno li walo e kiwen. mi lukin e telo. suli. supa. ala li utala e telo. telo li awen e ma. ale li kama kepeken telo. ale li weka kepeken telo. mi kama tan telo. mi tawa nena. mi lukin e ale. taso la, mi lukin e suno mute e mun mute. mi lukin e tomo. tomo nanpa wan li pakala lili la, mi pali e tomo sin. tomo li pona. tomo li awen lon ike mute. suno ale la mi moku e kala e kili. mi tawa li lape, li lukin e telo e mun. taso. jan ala li lon. jan ala li tawa li lape li lukin lon poka mi. a… nasa. mi pilin pona. tenpo mute la mi pilin pona. ma jan la, mi pilin ala pilin sama? ala… jan la mi tawa ala. mi pali. mi lukin ala e kasi e mun. mi pilin pona ala… li pilin ike ala. nasa. ma ni la pilin ale li wawa. mi pilin pona li pilin ike. pona en ike li lon. seme li kama e pona e ike? … ken la…
… mi.
mi. ma li pana e ijo la, mi pana e pona anu ike. ike la, mi o alasa e pona. pona la, ike li kama lon pini. pona li kama li weka. ike li kama li weka. ala li awen. mi taso li ken awen. mi ken kama e pona tan ike. a… sona suli. mi lape. suno li suwi. mi lukin e sewi… laso. ale li laso. ma jan la laso li lili. mi lukin e laso sewi. mi lukin e laso kasi. mi lukin e laso telo. mi lukin e…
… jan.
seme? ijo li lon telo. ijo pimeja. tomo. jan taso li pali e tomo. tomo li tawa. tomo li tawa ma. jan li lon. seme a? mi o seme? mi o len ala len? len…? mi wile len tan seme? ken la jan li ike. ken la… mi wile ala tawa. ma ni li pona. ma mi. mi jo e moku e tomo. jan ala li ike e ma. jan ala li pakala e ma. jan… li ike. jan li pakala. jan li moku e ma. jan li moli e ma. jan ala li lon ma mi. jan ala… mi taso.
taso.
taso…
… noka li tawa ala. mi wile awen. mi wile lukin e tomo. mi ken ala len. tan seme la, mi wile tawa? mi wile toki tawa jan ante. mi wile lon poka jan. tan seme? mi wile lape li wile tawa li wile lukin lon poka jan. tan seme? mi wile pana. ale la, mi jan… mi ijo ante ala. mi jan. mi pali sama jan. mi wile jan. mi wile ala taso. jan li ken ike, sama ma ni. ma li pana e ike mute. ma la kili ike en telo ike li lon. ma li utala a e mi. taso… sama la ma li pana e pona mute. a, ma li ante e mi… jan li sama ma. jan li ken pona. jan li ken kulupu tawa pona. jan li ike li pakala, li pona li pali. jan li utala li olin, li jaki li suwi, li moli li mama, li kalama li kute li sitelen li lukin li esun li jo li pana li tawa li kama li pilin li lape li musi… li ante. a, mi jan… mi wile pana. mi wile… mi wile moku e pan. mi moku e kili e kala taso. mi wile moku e ijo mute. mi wile olin. mi wile sitelen. mi wile toki. mi wile pona. mi wile pini e taso.
taso li pana e pona tawa mi. mi wile pana e pona ni.
mi lukin e kasi e kili e kiwen e telo. tawa pona… wawa la mi tawa poka telo. mi lukin e tomo tawa. mi sewi e luka tu. mi toki:
「o!」