mi wile sona e tenpo. mi lukin e ilo mi pi sona tenpo.
a ilo mi pi sona tenpo ala. ilo li sin la mi wile pana e sona tenpo open tawa ona.
pona la mi lon open tenpo. ijo tenpo li wile ala e mi. taso ijo li ken kama wile e mi. mi wile pana e sona tenpo tawa ilo mi.

ilo tenpo suli li ken pana pona. ona li lon tomo esun kulupu.
mi kama lon ona. ona li tomo pona li ken e jan mute lon insa e jan mute lon poka kin. taso mi lon open tenpo taso la jan li mute ala.
mi open e lupa lon sinpin tomo. mi tawa insa la lupa li kama sinpin lon monsi mi. jan tu taso li lon li

O ALASA E MANI
KEN LI KEN
SINA PANA E MANI WAN LA MI KEN PANA E MANI TU

a ilo pi wile mani li lon poka. ona li ike tawa mi. mani li kama weka a lon ona.
mi awen tawa insa. mi tawa lon poka pi jan moku. ona li moku e ijo pona pi open tenpo. mi kama lon jan esun.

"esun o pona. mi wile lon ilo tenpo. ona o pana e sona tenpo."
"a o tawa poki. ilo li lon insa."

mi kama lon poki. mi open e poki. ilo li lon insa.

MU MU MU
MI ILO TENPO
SINA WILE E SEME

"ilo suli o. ni li ilo lili. ona li sama sina. taso ona li lili. ona li sin la ona li sona ala e tenpo. o pana e tenpo tawa ona."

PANA

mi lukin e ilo mi. ona li sona e tenpo. pona.

"sina ilo pona."

ona li toki ala.

"ilo o toki."

ona li awen toki ala. ni li nasin ala nasin ona? mi sona ala. mi awen lili. taso ala li ante. mi open e tawa.

"awen la esun o pona."
"tenpo o pona."

mi tawa lon poka pi jan moku. a. jan pi moku ala. ona li kama pana ala e moku tawa uta. lon la ona li tawa ala li tawa e ala. a. lawa ona li tawa anpa a li kama lon ijo moku. oko ona li open ala.

"a. mu. jan esun o mu tawa jan pi nasin sijelo. ona o kama."
"ike a. mi ni."

mi en jan tomo li supa pona e jan anpa. ni la jan pi len sinpin li tawa insa.

"esun o pana e mani."

ona li jo e len lon sinpin e ilo ike lon luka.

"sina pana ala e mani la mi pakala e sina."
"mi lon open tenpo taso. esun li mute ala la mani li mute ala."
"o toki ala o pana taso. sina pana ala la mi moli e sina."

jan esun li tawa poki mani li kama e mani tan poki.

"sina ike ni tan seme?"

jan len li toki ala li tawa weka.

"ni la mi sona ala kama e pona."

ike li awen kama suli lon tenpo anu seme? jan ante li tawa insa. pona la ona li jan pi nasin sijelo.

"ona li anpa tan ijo seme li moku e seme li anpa lon tenpo pi suli seme li mu ala mu lon anpa li tawa ala tawa nasa lon tenpo pi anpa ala li kepeken ala kepeken ilo sijelo li toki ala toki e ijo pi pilin ike?"
"a. mi sona ala."
"ona li kama ala sewi li moku nasa e kon. mi en ona o tawa tomo mi."

mi en jan nasin li jo pona e jan anpa li tawa e ona tawa ilo pi nasin tawa.

"mi o kepeken tenpo lili a."

ona li tawa weka lon ilo ona kepeken wawa. jan esun pi mani ala li kama lon poka mi.

"tenpo nasa a."
"a. sina jo ala e mani. ni li ike."
"jan ante li kama li esun la mani li kama. ona li kama ala la ni taso li ike."
"a suno pona en seli pona li lon. ona li kama."
"pona."

mi open sin e tawa. ijo li awen wile ala e mi la mi wile tawa seme? a ma kasi li ken suwi.
mi awen tawa la kasi li kama mute. kasi li mute pona la mi kama kute e kalama suli a. kalama li tan weka. ona li seme? ijo li pakala ala pakala? taso kalama li weka la ijo li pakala la ijo pakala li suli a.
mi ken ala sona. mi lon ma kasi pona taso.
ijo nasa mute li lon tenpo. mi ken ala ante e ona.
mi lukin e kasi suli wawa. anpa kasi la ma li laso pona li ko pona. mi pana e mi lon noka kasi li lukin e sewi.
mi len e oko.
mi kama lape.

PANA

mi lukin e ilo mi. ona li sona e tenpo. taso ni li sin ala.
seme? seme li lon?
mi lon poka pi ilo tenpo suli. tan seme?
tenpo poka la mi lon ma kasi. mi awen ala awen lape?
mi awen wile sona e nasa ni. taso kalama li kama lon monsi mi.
mi kama lukin. lon supa moku la jan li moku ala li kama anpa. supa poka li jo e ijo moku ona.

"pakala a. jan esun o mu tawa jan pi nasin sijelo. ona o kama."
"ike a. mi ni."

ni li sama tenpo ante. nasa seme li lon a? jan tomo li kama lon poka mi la mi en ona li supa pona e jan anpa. mi kama kute e toki lon monsi mi.

"esun o pana e mani."

a jan ni.

"sina pana ala e mani la mi pakala e sina."
"mi lon open tenpo taso. esun li mute ala la mani li mute ala."
"o toki ala o pana taso. sina pana ala la mi moli e sina."

jan esun li tawa poki mani li kama e mani tan poki.

"sina ike ni tan seme?"

jan len li toki ala li tawa weka.

"ni li sama tenpo ante a."

jan tomo li lukin e mi.

"seme? ni li sin a tawa mi. tenpo ala la jan li kama weka ni e mani mi."

nasa suli. pilin la mi awen a lon lape. mi luka pi utala lili e selo mi. lape ala li kama pini. ale li awen lon. mi sona ala. jan ante li tawa insa li jan pi nasin sijelo li kama lukin e jan anpa.

"ona li anpa tan ijo seme li moku e seme li anpa lon tenpo pi suli seme li mu ala mu lon anpa li tawa ala tawa nasa lon tenpo pi anpa ala li kepeken ala kepeken ilo sijelo li toki ala toki e ijo pi pilin ike?"
"a. mi sona pona ala. ijo moku ona li lon supa. ona li kama anpa lon tenpo poka. jan li mu tawa sina la ona li kama anpa. mu en tawa li lon ala. ijo ante la mi sona ala."
"ona li kama ala sewi li moku nasa e kon. mi en ona o tawa tomo mi."

mi en jan nasin li jo pona e jan anpa li tawa e ona tawa ilo pi nasin tawa.

"mi o kepeken tenpo lili a."
"a mi kin li wile kama."

ona en mi li kama lon ilo li kama tawa.

"mi o kepeken tenpo lili a."

ona li wawa e tawa ilo. mi awen tawa la kalama suli li kama. kalama li tan ala weka li tan poka. a lon nasin la sinpin la ko mute li lon kon.

"mi kama ken ala tawa lon ni. mi o tawa jan pi sijelo pakala. sina o lukin e ijo nasin."

ona li tawa monsi tawa jan pi sijelo pakala. mi tawa sinpin tawa ko kon. mi weka tan ilo la mi lukin e open pi ko kon. jan tu li lon poka pi kiwen pakala mute.

"aaaaaaa. pakala suli. tan seme la sina pakala e tomo mi? mi jo e mani tawa sina."

a. mi sona e kalama pi jan ni. jan ni li weka e mani tan tomo esun a.

"mani li lili ike. ni la tomo ni li tomo sina ala li tomo mi. ona li weka la mi ken pali e tomo suli pona lon ma ona."

jan ante wan li jo e len mani li pilin ala e pilin ike pi jan ante.

"toki. kute la sina pakala e tomo. ko mute li lon kon tan ni anu seme?"
"a ken. sina wile sona tan seme?"
"ko li lon nasin tawa la ilo nasin li ken ala tawa."
"ni la o awen. ko li kama anpa la ona li weka tan kon."
"taso jan pi sijelo pakala li lon ilo. ona li wile tawa tomo pi nasin sijelo."
"a mi ken ala ante e ni. ko li ko. kon li kon."

mi sona ala e pona. jan ni li ike a. taso mi ken ante e ala.

PANA

aaaaaa. sin sin. mi lon poka pi ilo tenpo suli tan seme a?

"ilo o."

ilo li toki ala. a lon. ni li sama tenpo ante. pakala. mi tawa monsi. mi kama lon poka pi jan moku. lukin la moku li pona tawa ona. lukin la ike ala li lon. taso ale li sama tenpo ante la mi sona e ike kama.

"toki. sina pilin seme?"
"a moku li pona. mi pilin. mi. a. mi."

ona li pini e toki e tawa kin. tenpo lili la lawa ona li tawa anpa li kama lon ijo moku.

"a o kama e jan pi nasin sijelo. o mu tawa ona a."

jan pi tomo esun li ni kepeken ilo mu. ni la ona li kama lon poka mi la mi tu li supa pona e jan anpa. sama tenpo ante la kalama li kama lon monsi mi.

"esun o pana e mani."

mi lukin e jan pi ilo ike.

"o kute. sina ken ala jo e mute pi wile sina. jan pi lawa tomo li wile e mani mute."
"o toki ala. mi ken moli e sina kepeken ilo. esun o pana a e mani."
"taso ona li toki pona."

jan pi tomo esun li tawa supa ona li kama open e poki mani li kama e mani.

"mi lon open tenpo taso. esun li lili la mani li lili. ni li mani ale."

jan ilo li jo e mani la ona li tawa weka.

"sina o. sina toki e ijo pi tomo ona tan seme?"
"jan ona pi lawa tomo li wile e mani mute. mani lili la jan ni li pakala e tomo."
"a seme?"

taso jan ante li kama li toki.

"ona li anpa tan ijo seme li moku e seme li anpa lon tenpo pi suli seme li mu ala mu lon anpa li tawa ala tawa nasa lon tenpo pi anpa ala li kepeken ala kepeken ilo sijelo li toki ala toki e ijo pi pilin ike?"
"mi sona ala e ale. ona li kama anpa lon tenpo poka taso. ona li lon tenpo moku. ijo moku ona li lon supa poka. ona li pilin pona lon tenpo moku li toki e pilin ni. taso ni la ona li kama pini e toki e tawa li anpa taso. mi sona ala e ijo ante."

jan li lukin pona e sijelo pi jan ante.

"ona li kama ala sewi li moku nasa e kon. mi en ona o tawa tomo mi."
"sina kama ala lon tomo sina la seme li kama?"
"moli."

mi tu wan li tawa e jan anpa la jan pi nasin sijelo li kama ken open e tawa. ike la mi sona e kama pi tenpo poka. mi ken ala ante e kama kin. jan pi ilo moli li jo e mani lili taso. tomo li kama pakala. ko mute li kama lon nasin. jan anpa li ken ala tawa tomo pi nasin sijelo li kama moli. ike.

"jan tomo o. seme la mi ken jo e mani mute?"

ona li lukin pi nasin nasa e mi.

"a sina wile pali la mani pona li ken. ona li mute suli ala. taso mun li sin la sina kama jo e mani pi pilin pona."

ni li ken pona. taso tenpo mi li lili. mi ken ala tawa tenpo pi mun sin. nasin mani ante o lon. taso mi sona ala e ona. mi awen alasa e ken la tenpo lili la ilo poka li kama toki.

O ALASA E MANI
KEN LI KEN
SINA PANA E MANI WAN LA MI KEN PANA E MANI TU

a. ilo ni li nasin mani ike. mani li kama weka. taso ale li kama sin la ala li awen weka. mani mi li awen ala weka. mi tawa ilo.

O ALASA E KULE PI KEN MANI
SINA PANA PONA E KULE LA MI SULI E MANI SINA
OPEN LA O PANA E MANI SINA

mi jo e mani wan taso. mi pana tawa ilo.

MANI MANI MANI
O TOKI E KULE WILE

mi pana e loje. ilo li tawa wawa nasa e sike kule. laso li kama.

MANI MANI MANI IKE
MANI SINA LI AWEN LON MI

pakala.

O MUSI SIN O MUSI SIN
O PANA E MANI SINA

a taso mi ken ala. weka la kalama suli li kama. a tomo li kama pakala.

"a kalama ni li seme? ijo suli li pakala anu seme?"
"ni li sama ijo pi toki mi. jan pi lawa tomo li pakala e tomo."
"a nasa."
"mi wile kepeken ilo mani ni. taso mi jo e mani ala."
"mi kin li jo e mani ala. sina sona. jan ike li kama li weka e mani mi ale."
"weka a. sama ilo ni."
"o musi mani ni ala. tenpo mute la ona li weka e mani. tenpo pi mute ala la ona li pana e mani. nasin ni la mani sina li kama weka taso."
"sina sona pona."

taso nasin ante li lon ala. mi awen alasa e ken lon ilo mani. taso ona li awen wile e mani mi taso li.

PANA

a sin tenpo. mi lukin ala e ilo tenpo suli. mi tawa ilo mani.

"jan esun o mu tawa jan pi nasin sijelo. pakala sijelo li kama."

mi kama lon ilo mani.

"seme?"

jan li lukin pi nasin nasa e mi. taso ona li kepeken ilo toki li mu tawa jan nasin.

O ALASA E KULE PI KEN MANI
SINA PANA PONA E

mi pana e mani.

MANI MANI MANI
O TOKI E

mi pana e laso. ilo li tawa a e sike kule. laso li kama.

MANI MANI MANI PONA
MI MUTE E MANI SINA

uta ilo li open li pana e mani tu tawa mi.

O MUSI SIN O MUSI SIN

monsi la jan li kama moku ala li anpa e lawa tawa supa moku.

O PANA E MANI SINA

jan pi tomo esun li tawa ona.

"a ike li lon ala lon?"

ona li luka e jan anpa la jan ni li tawa ala.

"o sona. jan pi nasin sijelo li kama a."

mi pana e mani tu tawa ilo.

MANI MANI MANI

jan tomo li supa pona e jan anpa. mi pana e loje. ilo li tawa e sike la pimeja li kama.

MANI MANI MANI IKE
MANI SINA LI AWEN LON MI

jan ante li kama lon tomo esun.

O MUSI SIN O MUSI SIN

jan ni li jo e len lon sinpin e ilo ike lon luka.

O PANA E MANI SINA

"esun o pana e. seme? esun o pana e mani a."
"o kute. ilo ni li moku e mani mi. sama la jan sina pi lawa tomo li moku e mani sina."
"o toki ala. sina sona ala. sina sona ala a? esun li pana ala e mani tawa mi la pakala suli li kama."

ona li tawa a e ilo ike ona. jan esun li tawa supa esun li kama e mani tan poki mani.

"o sona o sona. mi lon open tenpo taso. esun mute ala li lon la mani li mute ala. ni li mani ale."

jan pi ilo ike li jo e mani la ona li tawa weka.

"ike."
"ike a."
"mani li kama weka tan mi tu."
"o musi mani ni ala. mani sina li kama weka taso."

jan ante li kama li lukin e jan anpa li tawa ona.

"ona li anpa tan ijo seme li?"
"mi sona ala e ijo open pi anpa ona. taso ona li pilin pona lon moku ona lon tenpo wan li kama pini e tawa e ale lon tenpo ante. ni li lon tenpo poka. moku ona li lon supa moku. sina wile e jan ni lon tomo sina."

jan li lukin pona e sijelo pi jan anpa.

"wile. ona li kama ala sewi li moku nasa e kon. o kama o tawa e ona."

ona en mi li kama e jan anpa lon ilo pi nasin tawa. jan nasin li tawa weka kepeken ilo. jan esun pi mani ala li kama lon poka mi.

"tenpo nasa a."
"mi tu li jo e mani ala."
"a taso jan ante li kama li esun la mani li kama. ona li kama ala la ni taso li ike."
"seme la ona li kama ala?"
"tenpo li ike la ona li wile ala kama. pakala li lon nasin tawa la ona li ken ala kama."
"a."

weka la kalama li kama.

"kalama ni li seme?"
"a. pakala tomo. ni li ike e ken pi nasin tawa."
"ike esun."

sin la mi lukin e ilo musi mani.

"taso ilo ni li jo e mani mute anu seme?"
"jo. taso o kepeken ala ona. sina sona e ike mani ona."
"sona. taso sina ken ala ken open a e ilo?"
"a a a wile. taso mi ken ala. jan ilo taso li ken. mi jan ilo ala. jan ilo li kama lon pakala taso. ilo ni li pakala ala."
"a."

mi lukin e poki suli.

"ilo tenpo sina li pakala li kama toki ala."
"a sina pakala ala pakala e ona?"

jan li tawa poki suli pi ilo tenpo suli.

"ala a li lon ona. ona li pakala suli a. seme la?"

PANA

mi tan poka poki ala tawa poka poki. sin sike.

"jan esun o mu tawa jan pi nasin sijelo. pakala li kama."
"seme?"
"o ni. kin la ilo tenpo li pakala a. o mu tawa jan ilo kin."

jan pi tomo esun li lukin pi nasin nasa e mi. taso ona li kama kepeken ilo toki. mi pana e mani tawa ilo mani.

MANI MANI MANI

mi pana e laso.

MANI MANI MANI PONA

mi kama jo e mani tu la mi pana e mani tu.

MANI MANI MANI

mi pana e pimeja.

MANI MANI MANI PONA

lon monsi la jan moku li kama jan anpa. mi pana e walo. sike kule la laso li kama.

MANI MANI MANI IKE
MANI SINA LI AWEN LON MI

a laso en pimeja en laso. monsi la jan pi wile mani li lawa e jan esun tawa poki mani kepeken ilo ike ona.

"mi lon open tenpo taso. esun li mute ala la mani li mute ala."
"o toki ala o pana taso. sina pana ala la mi moli e sina."

jan li jo e mani la ona li weka. jan pi nasin sijelo li kama la mi toki.

"sina wile e jan ni lon tomo sina. ona li tawa ala sewi li moku nasa e kon. o kama. mi tu o tawa e ona."

jan pi nasin sijelo en jan anpa en ilo pi nasin tawa li weka la mi wile sona tan jan pi tomo ni.

"jan ilo li kama lon tenpo seme?"
"mi sona ala. ona li kama ala toki tawa mi lon ilo. taso ona li jan ilo. jan ilo li pilin pona lon open tenpo ala. mi lon open tenpo la ona li ken awen lape."
"a. ni la mi wile toki tawa ona. nasin seme la mi ken tawa tomo ona?"

luka pi jan esun li pana e sona nasin tawa mi.

"pona."

mi tawa la mi alasa e tomo pi jan ilo.
mi kepeken nasin luka pi jan esun la tawa mi li pona. mi kama lon tomo pi wile mi.
weka la kalama pi pakala tomo li kama.
mi wile tawa insa tomo. taso sinpin ale la mi kama ala ken open e lupa.
mi awen tawa lon selo tomo la sinpin mute la mi kama ken lukin e insa tomo. lon ni a. jan li lape lon insa tomo.
jan ni li jan ilo. mi luka kalama e sinpin.

"jan o. jan o. o pini e lape."

taso kalama ala li pini e lape. ike a. kalama li tawa ala tawa insa? ike la tenpo li kama li la.

PANA

a lon.

"o mu tawa jan pi nasin sijelo. pakala li kama la ona o kama."
"taso."

mi kute ala. mi tawa ilo mani. tenpo ante la mi kepeken nasin pi pona ala. mi pana e mani wan.

MANI MANI MANI

mi pana e laso.

MANI MANI MANI PONA

mi jo e mani tu la mi pana e mani tu e pimeja.

MANI MANI MANI PONA

mi jo e mani tu tu la mi pana e mani tu tu e laso.

MANI MANI MANI PONA

mi jo e mani luka tu wan la mi pana e mani wan taso e loje. a sike kule li pana e jelo.

MANI MANI MANI IKE

monsi mi la kalama pi tawa anpa li kama. mi pana e mani wan e loje. sike kule li pana e walo.

MANI MANI MANI IKE

sama la mi pana e mani wan e loje. sike li pana e jelo.

MANI MANI MANI IKE

sama kin la mi pana. loje li kama.

MANI MANI MANI PONA

a pona. kepeken mani wan la mi pana e walo. laso li kama.

MANI MANI MANI IKE

mani wan la mi pana e walo. jelo li kama.

MANI MANI MANI IKE

mi pana sama. jelo li kama.

MANI MANI MANI IKE

pana sama. pimeja li kama.

MANI MANI MANI IKE

pana sama. taso ilo li pana e loje.

MANI MANI MANI IKE

ni la pana mi li sama. walo li lon ilo.

MANI MANI MANI PONA

a mi pana e jelo. pimeja li kama lon sike kule pi ilo mani.

MANI MANI MANI IKE

pini mani. mani mi li ala la mi kama ken ala pana. taso mi kama sona pona. kule li laso li pimeja li laso li jelo li walo li jelo li loje li laso li jelo li jelo li pimeja li loje li walo li pimeja. mi kama kute sin e ijo pi monsi mi.

"o toki ala o pana taso. sina pana ala la mi moli e sina."

poka mi la jan en mani li tawa weka. mi sona e lili pi mani ni. taso mi ken ala pana lon sike tenpo ni. mi awen lili la ilo li kama lon poka tomo. mi toki tawa jan pi ilo ni.

"jan pi nasin sijelo o. insa la jan li kama anpa. lukin la ni li tan ijo ala. ona li kama ala sewi li moku nasa e kon. ona o tawa tomo sina."
"sona pona."

mi en ona li tawa insa. mi en ona en jan anpa li tawa ilo. mi wan li tawa insa tomo.

"jan esun o. mi wile toki tawa jan ilo."
"a ilo sina li pakala anu seme?"
"a sama ni."
"o awen. mi ken mu tawa ona kepeken ilo mi."
"sona mi la ona li lape a."
"a ken. ni li nasin tenpo ona."
"mi wile tawa ona. taso tomo ona la mi ken ala lon insa."
"ni la o awen tawa tenpo pi lape ona ala."
"a wile. taso mi ken ala awen la nasin ante seme li ken?"
"a. sina toki nasa. taso sina wile tawa insa tomo la nasin ante tu li lon. nasin nanpa wan la sina ken pakala e ijo tomo."
"mi wile ala ni."
"pona. nasin nanpa tu la jan pi lawa tomo li ken open e lupa lon tomo ale."
"a ni li nasa."
"ona li lawa e tomo."

a taso jan lawa li lon weka la mi ken ala ken tawa ona? tenpo li ken lili. mi open e tawa. mi tawa. mi tawa. mi awen tawa. wawa mi li kama lili. mi pini e tawa. jan lawa li awen weka. mi open sin e tawa. mi tawa. mi tawa. mi.

PANA

sin sin sin. a mi sona.

"jan esun o mu tawa jan pi nasin sijelo. pakala sijelo li kama lon tenpo poka. mi sona e nasa pi toki mi. taso pona la o ni."

ona li ni. mi tawa ilo mani. mi pana e mani.

MANI MANI MANI
O TOKI E KULE WILE

laso. mani tu.
pimeja. mani tu tu.
laso. mani luka tu wan.
jelo. mani luka luka luka wan.
walo. mani mute luka luka tu.
jelo. mani mute mute mute tu tu.
loje. mani ale mute luka tu wan.
laso. mani ale ale mute mute luka luka luka wan.
jelo. mani luka ale luka luka tu.
jelo. mani luka luka ale mute tu tu.
pimeja. mani mute ale mute mute mute mute luka luka luka wan.
loje. mani mute mute mute mute wan ale mute mute mute mute luka luka tu.
walo. mani wan ale mute mute mute tu wan ale mute mute mute mute tu tu.
pimeja. mani tu wan ale mute luka tu ale mute mute mute luka tu wan.

O MUSI SIN O MUSI SIN

taso mi wile ala. mi jo e mani pi mute pona. jan moku li kama moku ala li kama anpa. mi en jan esun li tawa ona li supa pona e ona. mi tawa open tomo la lupa li open lon tomo. jan pi len sinpin li lukin e mi li kama e ilo ike li wile toki. taso mi kama open kin e toki.

"mi jo e mani pi mute suli. mi wile esun. mi pana e mani la sina kama e mi tawa jan pi lawa tomo."
"a. seme? sina."
"o kepeken ala tenpo. o kepeken tenpo ala."
"o kama o kama. ilo mi li lon poka."

mi tu li lon ilo lili pi nasin tawa. tenpo tawa li pini la mi lon tomo lon poka pi jan lawa.

"sina pana ala e mani tawa mi la mi weka e tomo ni. mi ken pali e tomo suli lon ma ona. tomo suli li kama e mani suli."
"o awen. mi jo e mani wile. sina pi mani mute o pana."

mi pana e mani tawa jan pi lawa tomo.

"a. mani ni li ken mute pona."
"sina wile ala e mute ni? taso sina ken jo e mani ni. mi wile e ijo wan taso. o open e tomo pi jan ilo a. mi en sina o tawa a."
"a mani. a tawa."

tawa li wile e tenpo lili. lon sinpin mi la ilo pi jan nasin li kama. lon monsi mi la ilo nasin pi suli tomo li tawa li wile tawa esun. mi kama lon tomo pi jan lape la jan lawa li kama e kiwen. ona li open e lupa lon sinpin tomo kepeken kiwen ni. mi tawa insa la mi tawa jan ilo lape.

"o pini e lape."
"seme seme seme? seme la sina lon tomo mi?"
"ilo tenpo sina li pakala la mi lon."
"a mi lon tenpo seme?"

mi lukin e ilo lili mi. pakala. tenpo li kama pini lon poka. mi lukin e poka ale. seme li ken e pona? a. sinpin tomo wan la mi ken lukin e ma pi poka tomo. taso ona li sinpin taso ala. kon li tawa la lupa li open lon sinpin. mi ken.

PANA

kepeken ona. mi sona e nasin.

"jan pi tomo esun o. mi sona e ijo nasa. pakala sijelo li lon tenpo poka. o mu tawa jan pi nasin sijelo. ona o kama kepeken tenpo lili."

ona li kepeken ilo toki la mi kama kepeken ilo mani. mi pali pi mani mute la jan moku li kama ken ala moku li anpa. mi tawa ona la mi en jan tomo li supa pona e ona. mi tawa open tomo la lupa li open. mi pana e mani ale tawa lupa.

"o jo e mani ni ale. taso o pana ala e ale tawa jan pi lawa tomo. ona li wile ala e mani pi mute ni? mani awen la o pona e jan poka sina."
"a seme? mi. mi. mi ni."

jan pi jo mani li tawa la mi kin li kama tawa.

"mi ken lukin e jan nasin. jan anpa li wile lon tomo pi nasin sijelo. esun sina o pona."

mi wile kepeken tenpo lili. mi kama lon tomo pi jan lape. mi alasa e sinpin lukin pona wan. a ona. mi luka lili e sinpin wan la lupa li open lon ona. mi kama tawa insa.

"jan ilo o pini e lape. tenpo li ike. tenpo li pakala."
"seme seme seme? seme la sina lon tomo mi?"
"ilo tenpo suli sina li pakala a. sama la tenpo a li pakala."
"a. nasa. seme? nasa. mi o lukin e ilo tenpo."
"pona. o kama. tenpo li lili."

mi tu li tawa a. tenpo poka la mi lon tomo esun.

"sina kama sin a. a jan ilo kin."

mi kama lon poki pi ilo tenpo. ona li awen open. ilo tenpo li pali ala.

"a seme la ona li kama pakala?"
"sina jan ilo. mi kepeken ona la ona li kama pali ala. kin la ale li kama sin lon tenpo pi suli ala. tenpo li sama sike nasa. taso ale li kama sin la mi wan taso li sona e sin."

jan ilo li lukin e mi.

"nasin seme la sina kepeken ona? o toki e ale."
"mi wile pana e sona tenpo tawa ilo tenpo lili mi. mi tawa poki ni. mi open e poki. ilo li toki tawa mi li wile sona e wile mi. mi toki e wile. ilo suli li pana tawa ilo lili mi. ni li ale. pini pali la ale li kama sin a."
"a. sina toki e seme tawa ilo?"
"ilo suli o pana e tenpo tawa ilo lili."
"a.
a a a.
a a a a a a a."
"seme?"
"sina pana ala e sona tenpo tawa ilo sina. sina pana e tenpo a tawa ilo sina."
"a seme?"
"tan ni la ilo suli li pali ala. ona li pana e ale tawa ilo lili."
"taso
tan seme la tenpo li sike?"
"ilo sina li lili taso. ona li ken ala jo e ale pi ilo suli. ni la tenpo li lili."
"sina ken ala ken pona e tenpo?"
"ken. ilo lili o. ni li ilo suli. ona li sama sina. taso ona li suli. ona li pana e ale tawa sina la ona li jo ala e tenpo. o pana e tenpo tawa ona."

JO

MU MU MU
MI ILO TENPO

"jan ilo o. tenpo li sike ala sike sin? seme la mi ken sona?"

lon ni la lupa li open lon sinpin tomo. mi lukin e ilo nasin pi suli mute lon monsi lupa. lon insa lupa la soweli luka luka li kama li tawa jan pi tomo esun. soweli wan li toki.

"jan pi tomo ni o. mi wile e telo."

jan esun li pali la pilin mi li ante pona.

"a ni li sama ala tenpo ante. sike li pini."
"pona. mi o weka e ken pi ike ni. mi o pana e sona tenpo kin tawa ilo lili sina."
"pona."
"ilo tenpo o pana e sona tenpo tawa jan ni."
"a seme?"

PANA