jan Ka li jan musi pi pana sitelen. ona li pana e sitelen tawa ilo pi jan mute. sitelen la, ijo mute li ken kama. jan Ka li pana e sona pi pali moku. ona li pali e pan suwi kepeken kili pi ma kili ona. pan suwi ni li tawa jan pona ona: jan Lu en jan Ki. moku li pali e kulupu pona.

jan Ka li pana e sitelen musi kin. ona li sona wawa e musi ilo la, ona li kama jo e nanpa pona suli lon ona. utala musi li ken ike, taso jan Ka li wile awen pona tawa jan ale ante. o utala kepeken sona pona.

jan Ka li kama tan mama la, ona li toki e ni: ona li mije. taso, tenpo mute la jan Ka li wile meli. ona li pilin e ijo ante tan wile pi jan mije lon poka ona. ona li pilin ike tan ni la, ona li kama meli. tenpo ni la, ona li pilin pona a tan ante meli ni. jan Ka li tonsi.

jan Lu li jan kalama wawa. kalama uta ona li suli. kalama pi ilo kalama ona li suli kin. jan San en ona li lon kulupu pi kalama musi. kalama ni la, ona li ken toki e pilin pona ona, e pilin ike ona, e pilin olin ona. jan li kute la, kalama li ijo suli tawa nasin jan.

tenpo la, jan Lu li wile lili e kalama. ona li wile kute, li wile kama sona tan jan ante. ni la, ona li moku e telo kasi lon poka pi jan Ta. telo ni li lape e sijelo la, jan Lu li kama sona e nasin pi jan Ta, e ken kute. kute li suli e sona.

nimi “meli” en nimi “mije” li nasa tawa jan Lu. nimi ni li kama tan jan la, jan Lu li pilin e ni: “mi ken ala ken pana e ijo sin tawa pilin ni?” ona li ona, li toki e ni tawa jan ante: o sina, o kule, o kama ijo sin! jan Lu li pilin pona tawa sin ona. jan Lu li tonsi.

jan Te li lukin e waso, e pipi, e soweli. sijelo pi ijo mute ni li ante mute, li nasa pona tawa ona. pali pi ijo ale ni li pona kin. ona li moku e seme? ona li mu seme? tenpo mute la jan Te li pana e sona pi soweli ona tawa jan Ki. lukin li alasa, sina ken kama sona e ijo mute tan lukin taso.

jan Te li lili la, ona li kama jo e soweli suwi ni tan jan San. jan Te li mama e soweli la li ona li kama sona e wile soweli. ona li wile e moku, e lape, e tomo. soweli li wile e ni ale tawa pona la, jan Te li kama sona e ni: jan li sama. sina jo e ijo ale pi wile sina la, sina pona. o mute suli ike ala, o mute lili ike ala.

nimi “meli” en nimi “mije” li pona tawa jan Te. taso, ona li wile ala ni wan taso, ona li wile e ijo mute. jan Te li wile suli e sona insa ona la, ona li wile sona e nimi pona ale tawa ona. ona li meli, li mije, li ijo ante mute kin. jan Te li tonsi.

jan San li mama e kili. jan Ka en ona li lon kulupu pi mama kili la, ona li kama sona e nasin mama pona. kili li wile e telo, e ma pona, e suno mute. kili suli anu kili lili la, jan San li olin li mama pona. kili li suwi, li pana e pona tawa sijelo tawa pilin.

kin la, jan San li mama e jan Te. ona tu li jan sama. mama suli ona li weka la, jan San li pali tawa mama pi jan sama pona ona. tenpo ike la ona li wile lape. taso, olin ni li suli li pini e pilin ike lon tenpo ale. kili anu jan la, mama li wile e pali suli mute.

pilin insa pi jan San li ken ante. tenpo wan la, ona li wile mije. tenpo ante la, ona li wile meli. pilin ni li ken ante sama len lon sijelo ona. ona li wile ala ijo wan taso, ona li wile ijo mute lon tenpo. ken ante li pona a tawa ona. jan San li tonsi.

jan Ki li olin ala e toki, e jan. toki en jan li pana e pilin ike lili tawa ona la, ona li wile wan taso lon tenpo mute. taso, soweli li pona tawa ona. jan Te li weka tan tomo la, jan Ki li mama e soweli ona. ona li kama jo e mani pona tan ni, li ken musi lon poka soweli. soweli li suwi e pilin.

jan Ki li pilin pona tawa kasi kin. ona li tawa lon ma kasi la, ona li lukin e kasi mute. ona li sitelen e selo pi kasi suli lon lipu, li lukin e kili ona, li jo e lipu kasi mute pi kule ale. jan Je li wile e sona ni la, jan Ki li pana. kasi suli li toki e wawa ma.

nimi “meli” en nimi “mije” li ike tawa jan Ki. jan li pali e nimi ni, li wile pali e poki kepeken nimi ni. jan Ki li wile ala lon poki. pilin ona la, jan li wile ala e nimi ni lon tenpo ni. jan li jan, li wile ala e poki ni. jan li ken pona lon jan taso. jan Ki li tonsi.

jan Ta li kama lon kulupu ni tan ma ante. kiwen li pona tawa ona la, ona li alasa e kiwen suwi lon ma pi poka telo. ona li olin suwi e jan Je. tan olin ni la, jan Je li kama olin e kiwen kin. kiwen li awen lon tenpo suli la, ona li wawa a.

jan Ta li pali e musi ilo, li toki e ijo musi mute kepeken ona. jan Ka li musi e ona li kama sona e pakala lili ona la, jan Ta li pona e ona. pali musi li wawa e sona pi jan Ta, e ken kute ona. musi li ken toki e pilin, e utala, e olin.

ma open pi jan Ta la, “meli” en “mije” li tu taso ala. ijo ante li lon, li toki e kon pi jan Ta. jan pi ma ante li toki ala e toki pi ma open ni la, jan Ta li toki e ni lon tenpo open: “mi meli”. taso, ona li kama sona e toki ni la, ona li kama sona e nimi pona tawa ijo ante ni. jan Ta li tonsi.

jan Je li lukin e lipu mute. lipu li jo e sona mute, li pana e musi wawa. tenpo la, jan Je li ken tawa tomo lipu, li esun e lipu mute, li lukin e ona lon tenpo lili. lipu li ken pali e ma nasa wawa tawa pilin.

jan Je li jan olin. ona li olin suwi e jan Ta, li tawa tomo lipu lon poka ona. taso, jan Je li jo e olin suli, li pilin e ni: ona li ken pana e olin tawa jan mute ante. jan Ta li pilin pona tawa wile ona la, jan Je li alasa e olin sin. ken la ona li toki olin tawa jan Lu. olin li wile e toki, e kute, e sona.

tenpo suli la, jan Je li pilin e ni: ona li mije. taso, ona li toki tawa jan ante mute, li kama sona e ijo tan lipu la, ona li pilin ante lili. ken la ona li ante? ona li sona pona ala, li wile alasa e pilin ona. tenpo ni la, ona li wile e nimi tawa pilin ni la, ona li kama jo. jan Je li tonsi.