utala linja

kon pi ma Sewiton li ike.

“o lukin a! lon sewi a! jan ni li pali e seme?”

insa pi ma tomo suli la ale li pali sama tenpo ale. kalama suli mute li tan tomo tawa mute, ale li tawa pali mani kepeken tenpo lili. taso, ona li kute e toki mu pi lukin sewi la, jan lili en jan mama en jan suli en jan mute li lukin tawa sewi,

tawa sewi pi tomo suli mani Akuson (tenpo poka la, jan lawa pi kulupu pali ona li unpa e jan lili li tawa poki pi jan ike), tawa sewi pi tomo suli Lamason (tenpo poka la, jan lawa pi kulupu pali ona li kepeken mani mute ona li tawa mun loje li kama sin ala), tawa sewi pi tomo suli Wana (tenpo poka la, jan olin pi jan lawa kulupu li toki suli e kama pakala telo lete seli pi ma ale li moli e ona sama), tawa sewi pi kon pimeja jaki, tawa sewi pi sewi ni

e linja lili wawa pimeja e jan pi len kule nasa.

linja li tu wan li wan e tomo suli tu wan sama selo pi sinpin tu wan. (tenpo poka la, jan lawa ma li pini e tomo sona ale li toki e ni: jan lili li wile ala sona e nanpa).

lon sewi a la jan pi ma anpa li ken ala lukin pona.

taso jan sewi li ken lukin e jan Pensamin Panana pi noka wawa pi kule mute. jan Pensamin li jo e linja lawa loje suli nasa e sike kiwen namako mute lon palisa luka ona. len suli wan pimeja li len e luka e sinpin sijelo e monsi sijelo e noka. sitelen sike lili mute pi kule mute li lon len pimeja: jelo wawa, en jelo loje, en loje walo, en laso kasi, en laso loje walo. sijelo pi jan Pensamin li suli tan sewi tawa anpa li lili mute a tan poka wan tawa poka ante. kon wawa li utala e ona la ona li ken tawa anpa kepeken tenpo lili.

taso, tenpo suno ni la kon ma li tawa wawa ala. lon sewi pi tomo tu wan pi suli nanpa wan lon ale pi ma Sewiton, lon lukin pi jan ale anpa, la jan Pensamin!

li lukin e ma ale anpa e walo ale sewi. jan Pensamin li ken ala lukin e mun loje, taso ona li sona e ni: jan ike li lon ni.

“jan sewi o!” la jan Pensamin Panana li toki kepeken kon ale ona. pilin ike. pakala, ona o moku e telo lon tenpo pini.

jan Pensamin li lon sewi a la jan sewi taso li ken kute e ona.

“sina pali seme a tawa ma mi Sewiton a! mi jan mije lili la pilin pona li lon. tenpo ni la pilin moli li taso! seme la sina weka e wile utala tan jan pi jo ala! jan mani li moku e ma e mani e mun. taso jan anpa li utala ala! ona li sama akesi linja pi sona ala!

lon la mi sona e ni: ona li utala ala tan seme. sina wile e pakala ale ni, li weka e ken utala ona!

jan sewi o, kepeken wawa ale la mi utala e sina! mi en sina o esun! o kama kute e mi!”

lon lukin pi jan Pensamin la kon jaki li tawa sike li selo sama leko, sama uta, sama nimi, sama pilin.

“sina kute e mi! jan sewi o! sina sona e nasin mi, a a! o sona e kama anpa sina!

nasin li ni! kepeken linja pi lili mute taso la mi tawa tan tomo Akuson tawa tomo Lamason tawa tomo Wana tawa open sin. kepeken ilo mi pi sike wan! tenpo sama la mi len e lukin mi kepeken ilo ni: ona li sitelen e ma ante! mi moli ala la, o tawa anpa e tomo tu wan lon tenpo ni!”

pini pi toki ona la jan Pensamin Panana li kama jo e ilo tawa pi sike wan lon luka wan e ma pi ilo ante lon luka ante. jan Pensamin li toki insa lili, li pana e ijo tu tawa supa anpa, li kama jo e sewi pi len ona pimeja kepeken luka tu, li tawa wawa pi poka ante e len li pakala wawa e ona. lon len ala, la sike tu ona pi anpa palisa li pilin e kon suwi pi sewi tomo.

jan sewi li lukin e jan Pensamin li sona e ni tan selo pi uta ona: jan Pensamin li pilin pona.

ilo pi ma ante li kama lon luka tu. luka li tawa sewi. luka li tawa anpa. ilo li kama lon lawa pi jan Pensamin li len e lukin ona.

ilo li open. lukin pi jan Pensamin en kute pi jan Pensamin li kama lukin e poka telo suwi. suno li kama tawa anpa lon ko loje jelo pi laso walo pimeja.

“jan Pensamin o?”

“a, jan Malowi.”

“sina pali seme? sona mi la sina o lon tomo pali lon tenpo ni.”

luka li kama lon anpa li alasa e ilo pi sike wan. “mi ken ala ken lon poka sina lon tenpo lili? mi pilin ike lon tenpo poka.”

“o kama lon poka mi. supa li lon. mi ken lukin e tawa anpa suno lon poka.”

monsi li kama lon supa monsi pi ilo tawa. noka li kama lon supa noka pi ilo tawa. jan Pensamin li awen ala li open e tawa li tawa sinpin tawa jan Malowi, tawa tomo Akuson.

“o toki tawa mi. sina pilin ike tan seme?”

“lon la mi wile sona e ni: seme la sina ken pilin ike ala.”

“sina sona. mi awen lon ma ni pi lon ala. mi wile ala lukin e sewi jaki pimeja pi kama pakala. mi wile lukin e suno loje pona ni. ona li pona lukin anu seme?”

…

“jan Pensamin o, sina lon ala lon?”

“mi lon. mi kama tawa sina.”

“sina toki insa e ijo mute. o kute ala e toki insa ike. o kute e mi. ma li ike mute, taso mi pilin pona tan ni: sina alasa e pona ale pi ma ike ni. mi kute e toki sina la mi pilin pona. sina toki e utala pi tenpo pini pi ma Awisi la mi pilin pona. sina toki e sona ale sina la mi pilin pona. mi sona e ni: sina pilin a e ni: pona li ken.”

…

“jan Pensamin o, sina lon ala lon?”

“jan Pensamin o!”

“sina o awen.”

telo sijelo mute li kama tawa anpa lon monsi sijelo li lon anpa luka. noka li weka tan supa li kama lon tomo Lamason. luka li alasa e linja nanpa tu.

“o toki tawa mi e ni: mama sina li awen ala awen lukin kama e kili tan kulupu kasi ona?”

tenpo sin la noka li kama lon supa noka. sike li tawa sinpin.

“sijelo ona li awen kama ike li awen kama wawa lili lon tenpo suno ale. lon la mama li majuna a. taso wawa li lon ona la ona li tawa weka tomo li kama lon poka kasi. ona li pana e telo lili tawa kasi– telo mute li ken ala tan ni, kulupu lawa ma li awen lili e mute telo pi jan ale. taso ona li pana e telo lili li poki olin e kasi kepeken luka ona. ona li pana e uta ona lon poka kasi li toki suwi pi kalama lili e ijo mute. mi lukin e ona tan lupa tomo la mi ken ala kute e ni: ona li toki e seme. sina jo e kasi lon monsi pi tomo sina la, sina kama toki seme tawa ona? ‘kasi o, sina kin o kama utala e jan lawa ike’… anu seme?”

…

“jan Pensamin o, sina lape anu seme!”

noka li kama lon tomo Wana. ko nasa jelo en mu nasa li kama tan uta.

“jan Pensamin o, mu nasa ni li seme? sina moku e telo nasa pi mute suli ike anu seme?”

“sina sona e ni, mi nasa e mi kepeken telo ala.”

“telo, anu ko– ale li sama tawa mi.”

luka pi ko jelo li alasa e linja nanpa tu wan.

“mama sina li toki tawa kasi la ni li nasa ala nasa ike tawa sina?”

“tenpo pini la mama li toki tawa sewi la ni li nasa tawa mi tan ni: sewi li lon ala. ona li kama toki tawa kasi la, n. kasi li ijo lon anu seme. ni la nasa li kama lili. ken la ona li wile e ni: kasi li sewi. taso kasi ale li kama moli. ale li sona e ni. mi ale li kama moli. ala li ken pini e ni.”

“ken la jan sewi li ke– A”

sike li weka tan linja. jan li kama tawa anpa. a, moli li kama. sama tenpo ale la, jan anpa li ken ala anpa e jan sewi. lon lukin ala la sijelo li tawa wawa nasa e luka li alasa e–

linja. luka ko jelo li kama jo e linja. luka li ken ala ken awen jo wawa?

lon anpa la ilo pi sike wan li tawa anpa wawa li lukin kama moli e jan lukin wan pi mani mute. jan pi mani mute li tawa poka. ona li moli ala.

lon sewi la luka li lukin tawa sinpin. taso wawa lili a. ko jaki jelo a.

“lon la sina nasa e sina! sina ken ala tawa sinpin tawa mi. o kama, mi o jo e sina, o jo e luka mi.”

“jan Malowi o, mi lon ma pi lon ala. sijelo sina li sitelen taso. sina ken ala jo e mi.”

“o toki ala e ni. o pilin e ni: sijelo mi li lon. o luka e luka mi.”

luka tu li tawa sinpin

li tawa sinpin

li tawa sinpin

li tawa sinpin
li tawa sinpin
li tawa sinpin
li tawa sewi.

jan Malowi li mu musi. **“o pilin a! sitelen li sama lon anu seme?”

noka pi jan Pensamin li kama sin lon tomo suli Akuson. monsi ona li kama supa lon supa poka pi jan Malowi.

ona tu li lukin e kama anpa suno li toki ala. jan Malowi li lukin e jan Pensamin. tenpo suli li kama li weka. jan Pensamin li lukin e jan Malowi.

jan Malowi li toki. “sina pilin ike la o sona: sina ken toki tawa mi.”

…

“sina pona. poka sina li pona mute tawa mi.”

“a, sina tawa lon tenpo ni anu seme?”

jan Pensamin li lukin sin e suno pi tawa anpa pi kama anpa ala. “mi ken lukin e suno ni pi tawa anpa lon ale pi tenpo kama. taso ona li kama ala lon anpa. ni li ike tawa mi.”

“sina wile e sewi pimeja, anu seme?”

jan Pensamin li lukin sin e jan Malowi e suwi ona. “ala. mi wile e kama ante.”

“tenpo pimeja li ike tawa mi. ma li lete. mi pilin monsuta.”

“mi sona. mi wile ala e pilin ike sina. mi o weka.”

jan Pensamin li weka e ilo pi ma ante tan lawa ona li lukin e sewi. jan Pensamin li tawa e noka ona li weka tan supa anpa li kama sewi sin e sijelo.

sewi li kama pimeja mute li kama kon mute. ona li ken pilin a kepeken nena ona e ni: telo li kama.

lon weka la mu sewi monsuta li lon.

“o utala linja e tomo tu wan ni, jan sewi o! mi moli ala la sina o kute e wile mi.

kepeken utala linja suno sina la o anpa a e tomo ni ike tu wan pi ma Sewiton. o kama tawa sinpin mi. o kama! mi awen.”