waso lili li lon insa pi tomo waso

tenpo wan la waso lili li lon insa pi tomo waso. tomo li lili li lon insa pi tomo jan. sinpin pi tomo waso li palisa kiwen mute. taso kon li lon insa pi palisa kiwen. ni la waso lili li ken lukin e tomo jan tan tomo waso.

tomo jan la ijo mute li lon. taso tomo waso la ijo li mute ala. waso lili li lon anpa palisa. palisa ni li tan kasi suli li pona tawa pilin pi noka waso. anpa pi tomo waso li ko jelo. ko kin li pona tawa pilin pi noka waso. poki tu li lon tomo waso. jan li pana e moku tawa poki wan li pana e telo tawa poki ante. moku en telo li pona tawa uta waso.

waso lili li lukin e jan lon insa pi tomo jan lon tenpo mute. taso jan li lukin e waso lili lon tenpo pi mute ala. tenpo mute la jan li lon ala anu lukin e ijo nasa. ijo nasa li ken pana e kalama mute e kule mute. ijo nasa li ike ala tawa waso li pona ala tawa waso.

tomo jan la tomo kala li lon. kala mute li lon tomo kala. waso lili li pilin e ni: kala li sama waso lili. anpa pi tomo kala li ko jelo. jan li pana e moku. taso jan li lukin e kala lon tenpo pi mute ala. kala li ken ala weka tan tomo kala. waso lili li ken ala weka tan tomo waso. moku kala li pona ala pona tawa uta kala? ko jelo li pona ala pona tawa pilin pi noka kala? waso lili li sona ala.

soweli ante li lon tomo jan. tenpo mute la soweli li lukin e kala e waso lili. ken la waso en kala li pona tawa soweli. soweli li pona tawa waso lili tan ni: soweli li lukin e waso lili. taso tenpo la soweli li ike tawa waso lili. tenpo la waso lili li pilin e ni: soweli li wile moku. waso lili en kala li pona ala pona tawa uta soweli? waso lili li sona ala. taso waso lili li pilin ike tan ni.

tenpo suno mute la waso lili li mu. mu li pona mute tawa waso lili. waso lili li sona ala e ni: waso lili li mu tan seme? taso waso lili li pilin pona tan mu. ni la waso lili li mu.

mu li pona ala pona tawa kala? waso lili li sona ala. mu li pona ala pona tawa soweli? ni kin la waso lili li sona ala. taso waso lili li pilin e ni: ken la mu li pona tawa jan tan ni: mu li sama kalama pi ijo nasa. waso lili li pilin e ni: kalama pi ijo nasa li pona tawa jan. mu li pona tawa jan la ken la jan li wile lukin e waso lili lon tenpo mute.

tomo jan li lon insa pi tomo suli. waso lili li ken lukin e tomo suli kepeken lupa. lupa ni li lon sinpin wan pi tomo jan. waso lili li sona lili e tomo suli. waso lili li sona e ni taso: tomo suli li ante e kule ona. tenpo suno la kule pi tomo suli li ken laso. tenpo ante la kule pi tomo suli li pimeja. tenpo suno la suno wan suli li lon tomo suli. tenpo pimeja la suno lili mute li lon tomo suli.

tenpo la waso ante li tawa lon tomo suli. waso lili li pilin pona tan ni. waso lili li wile sona e ni: moku en telo li pona ala pona tawa waso ante? jan en kala en soweli li lon ala lon tomo suli? waso lili li sona ala e ni. taso waso lili li sona wawa e ni: waso ante li mu. waso ante li mu tan seme? waso lili li sona ala. taso waso lili li pilin pona mute tan mu pi waso ante.

tenpo suno wan la jan ante li kama. jan ante li lon tomo jan lon tenpo mute. ken la jan ante li pona tawa jan wan. jan ante li lukin e kala lon tenpo mute. kin la jan ante li lukin e waso lili lon tenpo mute. waso lili li pilin pona mute tan ni. waso lili li mu mute tan ni. ken suli la waso lili li pona mute a tawa jan ante!

jan ante li kama li pana e waso lili ante tawa tomo waso. waso lili li open e mu la waso lili ante kin li mu. jan en jan ante li lukin e waso lili tu lon tenpo mute li kute e mu pi waso lili tu lon tenpo mute. waso lili li pilin pona mute mute mute a!

waso lili li sona lili. taso waso lili li sona e ni: jan en jan ante en kala en soweli en waso lili ante li pona tawa waso lili. jan ante li kama la ale pi waso lili li kama pona mute. waso lili li pilin pona.

pini