ilo ike

mi tu li kama wan lon tenpo sike pini nanpa luka luka wan. tenpo pini la, sina suwi lukin a. taso, jan ale lon ma ale la, sona sina li wawa namako. sina lon tomo pali sina la, sina kama sona e sona sin, li pali e ijo sin, li sitelen e lipu pi sina taso e lipu pi pana sona kin. sina jan pi sona suli.

lon tenpo sike nanpa wan, mi tu li kama lon tomo sin. ni li tomo pi mi tu, li tomo mi. mi tu li pali e tomo pali, li pana e ilo tawa ona, li esun e ilo nanpa wawa tawa pali sina. pali mi li lon tomo sona la, mi wile ala e tomo pali suli lon tomo mi. lon monsi tomo la, mi pali e ma kasi. kasi namako en kasi kili en kasi lipu li lon ona. tomo mi li pona mute tawa mi tu.

lon tenpo sike nanpa tu, mi tu li kama jo e soweli. tenpo suno pimeja la, ona li lon insa pi lupa telo lon poka nasin pi tomo tawa. telo li kama tan sewi la, ona li pilin monsuta suli. ken la, ona li pilin e ni: ona li soweli lili taso, li ken ala lon ma suli sama ni. mi kama insa e ona. sijelo ona li ike tan kipisi, tan pipi, tan moku ala. sina kama jo e ona, li pini e kipisi, li telo e ona kepeken telo pi moli pipi. kin la, mi tawa tomo esun soweli, li kama jo e moku soweli. tenpo suno kama la, soweli li pilin pona. mi tu li pana e nimi Peni tawa ona, tan linja loje ona. taso, pilin mi la, mi tu li lawa ala e soweli Peni. ona kama li weka lon pilin ona. pona la, tomo pi mi tu li tomo ona.

lon tenpo sike nanpa luka luka la, soweli li kama lon insa ala. soweli suwi pi tawa weka li ken utala, li ken kama ike. ni li pana e pilin ike tawa mi tu. sina toki e ni: tenpo sina pi jan lili la, sina jo ala e soweli. tan ni la, sina la, ni li tenpo nanpa wan pi pilin ike tan moli soweli. mi lon poka sina lon tenpo ale ni. sina pilin ike.

tenpo sike kama la, sina lon tomo pali sina lon tenpo ale. mi tawa e moku tawa sina, li kama jo e moku pi tenpo suno pini. tenpo mute la, sina moku ala e ona. selo sina li walo, lukin sina li pimeja. mi toki e ni tawa sina: “o tawa insa, o lon poka mi.” taso, sina kama ala.

tenpo suno wan la, mi lon supa. suno li kama tan lupa. sina moku ala moku? sina lape ala lape? mi sona ala e ni. taso, sina kama lon insa pi tomo lape, li toki e ni: “mi alasa e soweli Peni la, ona li lon tomo pali!” toki ni li pakala e lawa mi. mi awen, li toki e ni: “soweli Peni anu seme? ona li weka lon tenpo sike pini. soweli ni li ken soweli ante.” sina toki wawa e ni: “mi sona e ni: ni li soweli Peni.” pilin pi moli olin li ken pana e ike tawa lawa ale. tan ni la, mi toki ala e ni. mi en sina li tawa tomo pali la, mi toki e ni: “soweli li lon ni ala.” tomo pali li jo e ilo pali, li jo e supa mute, taso, ona li jo e soweli ala. ilo nanpa li lon la, ona li pana e suno lon sinpin.

sina pana lukin e lipu ilo tawa mi. nimi li lon supa. mi sona ala e ona tan ni: mi tawa sewi lon lipu, lipu ni li sama lipu pi pini ala. sina toki tawa ilo lon tenpo ilo mute, lon tenpo suno mute, lon tenpo mun mute anu seme? lon sewi pi lipu ni la, mi lukin e ni: sina toki e ni tawa ilo: sina pilin ike tan moli soweli, taso, sina ken ala toki e ni tawa jan olin sina, tawa mi. sina toki tawa ilo. ilo li pana e sona pi pona lawa. mi tawa anpa. tenpo kama la, ona li toki sama soweli Peni. ona li pana e nimi ‘mama’ tawa sina. ni li ilo. sina toki tawa ilo li toki tawa mi ala. tenpo sike pini la, mi alasa toki tawa sina. sina toki tawa ilo. tenpo ni la, mi toki e ni tawa sina: mi wile toki tawa sina sin. ni li pona ala. mi lon poka sina. jan pona li lon poka sina. taso, sina toki ala tawa mi, li toki e ni tawa ilo: mi o seme?

mi tu li kama kipisi lon tenpo sike nanpa luka luka wan. sama tenpo ale la, sina suwi lukin, sona sina li wawa kin. tenpo pi mute ala la, mi lukin e toki sina lon lipu pi len ilo. lukin mi la, tenpo ni la, sina pali ala, sina lon poka pi jan pona sina ala. sina kute e mi ala. mi wile kama jo e sina, li wile tawa sewi e sina. sewi tan telo suli pi ilo ike. mi pana e toki tawa sina: “toki.” mi wile kama sona e pilin sina kin, taso sina pana ala e toki. kama la, mi ken ala lukin e lipu sina. telo li kama tan lukin mi. mi pilin e pilin pi moli olin tan olin pi mi tu.