kalama olin tu tu

nanpa wan: seli

o kama pona tawa seli mi.

ni li ma kasi nasa, anu seme? kasi suli li tawa e luka ona sama jan, li mu sama soweli. kon li tawa wawa lon sewi pimeja. ken la, kama sina li jo e mu nasa mute.
o kute ala e ona. toki ona li pana e pilin nasa.

linja telo pimeja mute li kama wan lon poka ni. pimeja ona en wawa ona en lete ona li suli. ken la, sina kama lon ni kepeken nasin ona.
o lon ala ona. wawa ona li ken weka e sina kepeken pali ala.

mun li ala. seli ni li suno taso. ona li pana e pilin pona lili, anu seme? ona li tawa musi kepeken len jelo loje ona li pana e pimeja musi tawa ma. suno lili li waso tan ona tawa pimeja. taso ken la, sina awen lukin e ona lon tenpo suli la, sina kama ken ala lukin e ante…

seli ni li pilin pi pilin pi ma kasi. wile pi kama sina li ona, anu seme? sina wile sona e ona. pona. o lon supa mi. mi toki tawa sina.

seli li kama lon kasi moli tan seme? n, olin seli li kama lon pilin jan tan seme? mi toki lon la, lon ma kasi ni la, ni tu li toki e sama. a, sina lukin wawa tawa mi. o awen. sona li kama.

olin seli li wile e ijo tu. ijo nanpa wan li ni: pilin suwi. ijo nanpa tu li ni: pakala.

sina sona pona e wile e wawa pi pilin suwi. ni li suno lili li waso tan ilo kiwen tawa kiwen kasi. insa kasi li jo kin e suno. kasi li moku e suno la, suno li kama lon insa kasi lon pimeja suli li ken lape taso. taso ona li awen wile kama wan sin tawa suno mama ona. kasi li moli la, suno li awen. ona li pilin pi sijelo kasi.

suno insa li lukin e suno waso la, ona li sona e sama ona. suno insa kasi li kama lape ala. ona li wile wawa luka e suno waso li tawa wawa ona. kasi moli li open lili tawa suno lili. pilin jan li kama tawa. sinpin jan li kama loje. kasi li kama seli.

taso, pilin suwi taso li ken ala awen e seli li ken ala suli e ona. seli li wile kama suli la, ona o pakala e kasi. ona o moku e kasi. ona o alasa e insa pimeja kasi, ona o kama lon ma ni lon kasi: kasi li sona ala e ona. sijelo kasi li pakala. seli li kama wawa.

ni li lon la, kon kasi li weka. seli taso li ale ona. seli li ken waso suli tawa sewi li suli mute a tawa suno waso lili nanpa wan. suno en kasi li kama wan lon sijelo kasi li moku e ona. ni ale la, kasi li kalama tan wawa, tan olin, tan monsuta.

lukin sina li jo e pilin monsuta. jasima seli li suli lon ona. mi pini ala. o weka ala.

ni ale li nasa, anu seme? suno ale li tan kasi taso, taso kasi li ken lawa e ala. seli li pana e seli e suwi e suno mute, taso esun la, ona li pakala li ala e sijelo kasi. seli li kasi? kasi li seli? jan ala li ken sona. taso suwi li pakala, kin pakala li suwi, kin —

o weka ala a! sina tawa seme? telo linja li moku a e sina. o kama sin —

a. pona. sona. sina jo e poki. o anpa e ona.

mi tu o toki. o lukin tawa seli. ona li suno taso lon ma kasi pimeja ni.

pilin sina li tawa wawa tan ona, anu seme? sina lukin la, sina ken ala lukin e ante. mi toki e ni: seli li ken taso kama seli tan pilin kasi, tan pilin jan. seli li lon la, pilin ijo li seli. ni la, sina pilin monsuta?

monsuta li tan seme? ken la, tan ni: seli li awen suli mute, kin sina ken ala pini e ona? ken la, suno lili ona li waso suli tawa kasi ante. kasi suli ante li kama seli. kasi ante kin en kasi ante kin en ma ale li kama seli. seli li ike li pana pilin monsuta tawa sijelo. taso suli la, suno en kon jaki ona li toki suli tawa ale: pilin seli li lon…

taso seli li suwi kin tawa sina, anu seme? sinpin sina li kama loje. — mi toki, o weka e poki sina. — luka sina li wile tawa musi sama ona. linja telo lon sijelo sina li pana wawa e telo tan ona. pilin sina li kalama tan wawa, tan olin, tan monsuta suwi nanpa wan tawa al —

o ala!

nanpa tu: telo

luka ona li poki e luka mi. mi pilin e seli ona, e sijelo ona, e suli ona lon poka mi.

o pini.

mi tu li lon supa lape. kon mi en kon ona li kama li tawa lon tenpo sama.

o pini.

luka wan ona li sike e mi. lawa mi li lon pilin ona. mi kute e mu ona. ona li kalama anpa li kalama lili sama telo suwi tan sewi.

mi toki sin e ni: o pini. jan nasa o.

anu la, n… mi lape. anu mi lon poka lape.

o pini a! sina sona e ike lon pini pi nasin ni.

ona li lon.

sina toki awen la, mi —

len li suwi lon mi. ale li pimeja. ona li luka

o ala a! mi luka

lili e sewi lawa mi.

wawa e sinpin ike sina. jan ike jan jaki jan anpa jan

jan poka o, sina pali pona, ona li toki tawa mi. kepeken kalama lili la, ona li weka li pini e lupa. ale li lape. ale li pona.

o lukin e pakala sina. sina jaki tawa mi.

mi toki taso.

awen la.  

taso la, ijo ni pi lawa mi li luka sina, anu seme?

…

anu seme?

ni li suli ala a!

sina li jan pi pilin wan taso, li jan wan lon pimeja lete. sina pana e seli pona tawa sina, anu seme? pilin sina la, luka sina li pana e seli sama ona?

mi wile e ala kepeken seli ona. o pina a. mi wile lape.

sina wile lape sama jan wan?

ike o tawa sina.

anu la, sina wile e ni: sina jan wan ala. ona li lon poka sina. seme li pona nanpa wan tawa sina: sinpin ona li tawa sinpin sina, anu sijelo pi sina tu li lukin tawa ma sama —

a! o ala!

pona, sijelo ona li sike e sijelo sina. luka ona li awen e sina, noka ona li lon noka sina, uta ona…

o pini. mi toki suwi tawa sina, o pini a. sina pini la, mi pana e ale tawa sina, mi pali e ale, taso…

sina wile wawa e pini mi tan seme?

ijo pi toki sina. mi wile suli ike e ona. mi wile suli e ona la, ni li pakala e mi. 

a, ni taso la, sina toki lon.

mi wile lape.

ni la, sina wile ala wile e ni: lon supa lape, lon poka sina la, ona li tawa sina. ni la,

mi sike e luka mi.

sina tawa sike. sinpin sina

mi luka e len sina. sinpin sina 

li tawa ona. sina luka e len ona. sina

li tawa mi. luka ante mi li

tawa sina e sijelo ona. sewi sinpin ona en sewi sinpin sina

tawa monsi mi li tawa wawa sinpin mi li kama wan

li kama wan. lukin sina li tawa ona, lukin ona li tawa sina,

e sijelo sina. o lukin e ike sina, o lukin e pakala sina, o

n! pakala a. kiwen uta sina li pakala e uta mi.

n.

telo loje lili li tan ni. sina o —

ni o pakala pona tawa sina. ni li pakala pona tawa mi.

sina pona ala tawa mi.

mi pona ala tawa jan ale pi wile ike. 

wile li sina taso. mi toki taso e ona.

n.

telo li tan lukin sina.

ni li lon la, seme?

mi toki taso.

n.

sina wile lape, anu seme?

n. ken.

jan li lape pona tan ni: jan ante li lon. ni li wile sina, anu seme?

…

anu seme?

lon. o toki. o kalama lili.

nanpa tu wan: kiwen

nasin pali pi sewi telo
ilo kalama sike
len kiwen pi sewi tomo
telo musi
pilin jan

li pana e

tawa
kalama
awen
suwi
wawa

li pakala

tan

tawa
kalama
awen
suwi
wawa

noka
tawa
lete
namako
suli

pi

mi olin  mi olin mi olin mi   olin mi olin mi olin   mi olin mi olin mi olin mi olin   mi olin mi   olin   
    mi olin mi olin     mi olin   mi olin mi  olin  mi olin     mi     olin  mi   olin  mi    olin mi  
    	olin  mi      olin mi olin       mi     olin mi    olin       mi   olin     mi olin       mi olin    mi    olin         mi olin                     mi    olin mi     olin mi olin                     mi      olin   
mi  olin			       olin  mi   

   e				  
           li

sina.

nanpa tu tu: sewi

kon li musi li tawa
tan suwi seli suno.
seme la, pilin sina
li ike a, jan o?

kasi o, sina mu pona.
lon, pilin mi li utala.
ale mi li wile ona;
mi ken ala ala.

suno ni li kipisi:
mute kasi li len ona.
jan seme sina li ni?
jan o pana sona.

kon wawa o, sina awen
toki suwi tawa kute.
mi o ala. mi o len
e olin seli mute.

kasi ni li kalama
tan musi pi tawa kon.
jan o, ijo seme a
li pana sina lon?

suno ni o, sina kama
suno laso suwi a:
lipu ni pi kasi mama
li mute e suno sina.

kin la, pipi lipu mute
li laso, li jelo laso
li kulupu ko kule
li tawa sike waso.

kin la, lon sewi sewi
ko walo suli li lon.
tawa wawa ona li
olin e wawa kon.

lipu kasi loje walo
sewi li pini pini;
li open e pilin suno
tawa pimeja sewi.

selo sewi li jelo;
loje li kule e kon.
anpa sewi li laso;
mun lili li kama lon.

ale ni li suwi a
tawa lukin, tawa sona.
pilin mi o lape. la,
ale li ken pona.

ma en kasi li lape.
mun li lon li mute a.
jan o, seme li wile
sina lon pimeja?

pimeja o len e mi.
pimeja o lon e ni:
olin mi o mun sin sewi
tawa lukin ona.

mun taso o kalama.
mun li wan lon mute la,
mu suli li ken pana e
pilin lili pona.

mi o ko sewi taso.
mi o kasi lon suno.
mi o pipi kule waso
pi wan ante sin.

suwi o tan ale tawa
pilin ona. olin wawa
o toki pi toki ala
e ni:
mi olin.