o moku pona

nanpa wan

jan Ewa li pilin e wile moku.

tenpo ni la, jan Ewa li pali lon tomo ona. ona li lukin e lipu kepeken ilo sona. lipu li suli. taso jan Ewa li lukin sona e nimi kepeken tenpo lili. taso tenpo ni la, ona li lukin e nimi, li lukin sin e nimi, la sona li kama ala. ona li kama pilin utala. tan seme la, nimi li pana ala e sona? lawa ona li kama pakala anu seme? taso ona li kama kute e kalama tan insa sijelo ona. a lon la, ona li wile moku taso.

jan Ewa li pini e ilo, li pilin insa. tenpo suno ni la, ona li moku lon tenpo tu. moku ni li lili anu seme? ala. mute pi moku ni li pona. jan Ewa li awen pilin insa, taso wile moku ona li nasa e pilin. ni la, ona li open e alasa moku.

jan Ewa li open e poki lete. moku mute li len e supa ale lon insa poki. moku seme li pona? moku seme li ken pini e wile moku? lipu kasi li pona tawa sijelo jan. ona li moku e ni la, ona li kama pilin pona.

jan Ewa li luka jo e lipu kasi tan poki. ona li kama jo kin e ilo, e supa pali, e poki moku. ona li pana e kasi lon supa pali, li ilo e ona. jan Ewa li pana e lipu lon poki moku, li pana kin e telo kili e telo ko. pini la, ona li kama jo e ilo moku, li toki:

“o moku pona!”

jan Ewa li open e moku. tenpo lili la, lipu kasi ale li weka. taso ona li awen pilin e wile moku. lawa ona li awen nasa, la ona li awen pilin insa. ona o seme a? ona li moku sin e moku pona, taso ni li weka ala e wile moku. ken suli la, ona li wile e moku ante. moku o pana e wawa tawa sijelo. ni li ken pona.

ni la, jan Ewa li luka jo e kili ma, li pana e ona lon supa pali, li ilo e ona. tan pali ilo la, kili ma li kama palisa lili mute. kama la, jan Ewa li open e seli, li pana e palisa kili, e telo ko kin lon poki seli. kili li kama seli pona la, jan Ewa li open e moku. taso pini la, wile moku li awen lon insa lawa ona.

sin la, jan Ewa li open e poki lete, li kama lukin e moku. seme li pona? ona li lukin e moku ale la, kala taso li pona.

taso jan olin Otela li wile e kala ni. ona li pini e pali la, ona li kama sin lon tomo. ni la, ona li wile seli e kala. tenpo suno pini la ona li toki e wile ni. jan Otela li wile pana e moku kala tawa jan olin. ni la, jan Ewa o moku ala e kala. ona li sona pona e ni.

jan Ewa li pini e lupa poki. taso uta ona li kama pilin telo. jan Ewa li open sin e lupa. jan Ewa li luka jo e kala tan poki, li pana e ona lon supa pali.

wile pi jan Ewa la, ona li moku e ijo lili taso. ona li open e seli, li tu e kala kepeken ilo. ona li luka awen e moku kala lili. taso nasa la, ona li pana ala e kala lon seli, li moku lete e ona. kala ni li awen lon uta ona la, jan Ewa li kama pilin pona. ona li uta e kala kepeken tenpo suli. taso pilin pona li weka lon tenpo.

tenpo ni la, insa sijelo pi jan Ewa li pilin pakala taso. ona li open sin e pali ilo, li awen moku e kala. kala ale li weka la, jan Ewa li open sin e poki lete. moku mute li awen lon insa. jan Ewa li moku e moku wan, e moku ante, li awen ni lon tenpo mute. jan Ewa li sona e ni: ona o moku ala e ijo ale. jan wan taso li ken ala moku e ale. taso wile ala la, ona li awen moku. ni la, moku ale li kama weka tan poki lete.

pini la, kili wan taso li awen lon insa poki. ona li sike, li kule loje pona. ale la, ona li moku lukin. taso sike jaki wan taso li lon selo ona.

jan Ewa li alasa lawa e pilin. taso ona li pilin lape. ona li supa e sijelo lon supa lape. ona li pini e oko la, ona li lukin e sitelen moku taso. pilin pi wile moku la, pilin lape li suli. tan ni la, jan Ewa li kama lape.

nanpa tu

“jan olin o.”

jan Otela li luka suwi e jan Ewa. “o kama tan lape.”

jan Ewa li open e oko. “jan olin o. mi pilin ike. sitelen lape mi li ike a.”

“sina wile toki e sitelen ni anu seme? mi kute.”

“sitelen lape la, mi pilin wawa e wile moku. lon la, mi pilin e wile moku. ni li tan anu seme. taso sitelen lape la, mi open e poki lete. mi moku e ale. mi moku e kala sina kin. taso pini la mi ken ala weka e pilin.”

jan Otela li toki ala, li luka e linja lawa pi jan olin ona. pini la, ona li toki:

“lon la, ijo ale li weka tan poki lete. kiwen sijelo pi kala mi li awen lon supa pali.”

“mi pakala. kala sina…”

“li suli ala. mi ken esun sin e kala. taso sina toki e ni anu seme: sina awen pilin e wile moku lon tenpo ni kin?”

“pilin. taso seme la mi awen wile moku? mi moku mute a.”

“jan ala li ken moku e mute sama ni. sina jan taso. sina toki e nasa.”

“mi pilin kin e nasa. pilin pi wile moku li awen wawa.”

jan Otela li pilin insa lon tenpo lili. “mi wile sona.”

“sona seme?”

“kili wan taso li awen lon poki lete. ni li tan seme?”

“jaki li lon selo ona.”

“taso sina ken weka e jaki kepeken ilo. sina moku ala e ona tan seme?”

“mi sona ala. suli ala anu seme?”

“o pilin insa.”

jan Ewa li kute e jan olin ona, li pilin insa. kalama sijelo li kama sin tan insa ona. taso ona li lawa e pilin, li kama sona e ijo pi tenpo pini.

“mi sona e tan.”

“pona! o toki.”

“mi jan lili la, mi en mama mi li tawa tomo esun. moku mute en kule mute li lon. mi kama lukin e kili loje sama kili awen. ona li loje pona, la mi wile luka e ona. mi ni la, mi pana e ona lon poki len mi.”

“sina pana ala e mani anu seme?”

“lon. mi esun ala e ona.”

“tenpo ni la, sina pilin wawa e wile moku anu seme?”

“ala. ken la mi kama jo e ona tan musi taso. mi en mama mi li kama sin lon tomo, la mi lukin e jaki pimeja lon selo ona. tan ni la, mi weka e ona. lon la mi moku ala e ona.”

tenpo lili la, ona tu li toki ala. jan Ewa li pilin anpa. tenpo weka la, pali ona li ike. ona li wile ala awen e sona ni. pini la, jan Otela li open sin e toki:

“sona.”

jan Ewa li kute sin e kalama sijelo ona. “sina sona e seme?”

“sina pilin wawa e wile moku la, mi sona e tan.”

“wawa! o toki.”

“tan li ni: wawa nasa.”

“seme? o toki ala e nasa.”

“o kute. sina pilin sama ala; taso wawa nasa li ken ante e pilin jan. kili pi tenpo weka li ike e sina kepeken wawa nasa.”

jan Ewa li kama pilin utala. kalama sijelo li suli tawa kute ona. pilin pakala li kama suli lon insa sijelo ona. “ni li ken ala.”

“o kute. sina jan taso. sina ken ala moku e ijo ale pi poki lete. ni li nasa anu seme?”

“nasa.”

“ni la, o toki ala e ni: sina o toki ala e nasa.”

jan Ewa li pini e oko. sijelo ona li awen pilin pakala. jan Otela li awen toki:

“mi wile pona e sina. mi wile pakala e wawa nasa ike. pali mi li nasin lawa. mi sona e ni: nasin lawa jan en nasin pi wawa nasa li sama mute a. tenpo open la, sina kama jo e kili. sina esun ala e ona. ni la, sina o pana pi esun ala e kili. sina o pana e ona tawa tomo esun pi tenpo open.”

jan Ewa li open e oko. pilin ona la, toki ni li nasa. ona li toki:

“seme la ni li nasin pona? kili pi tenpo open en kili pi tenpo ni li sama ala!”

“taso ona li sama mute. ona tu li jo e jaki sama.”

“tan seme la, mi ken ala pana e mani taso?”

“tenpo open la, sina jo ala e mani, anu seme?”

“lon.”

“tenpo ni la, mi jo e mani. mani li mute pona anu seme?”

“mute pona.”

“ni la, sina ken ala pana e mani. sina moku e ijo ale. taso sina moku ala e kili ni. pilin mi la, kili ni li suli. ona taso li ken pakala e wawa nasa.”

jan Ewa li awen pilin e wile moku. pilin lape li kama lili la, wile moku li kama wawa. ona o seme? jan Otela li toki e nasa. taso wile moku ni li nasa kin!

“ni la, mi o ni: mi kama jo e kili tan poki lete. mi tu o tawa tomo esun pi tenpo open. mi pana e kili la, ale li kama pona.”

nasin ni li pona ala pona? jan Ewa li sona ala. taso ona li sona pona e ni: jan Otela li olin e ona, li wile awen e ona. jan Ewa li kama tan supa lape, li tawa poki lete. sijelo li awen pilin pakala. ona li open e lupa. kili loje wan taso li awen lon insa. jaki li awen lon selo ona. ona li wawa nasa anu seme? lon la, jan Ewa li wile ala moku e ona. ni la ona li suli anu seme? ken. jan Ewa li luka jo e kili.

jan Otela li toki: “pona. tawa li open!”

nanpa tu wan

ma tomo li suli, la tawa li wile e tenpo. jan Otela li lawa e ilo tawa. jan Ewa li awen lon poka ona, li nasin e tawa kepeken sitelen ma pi ilo toki. pini la, jan olin tu li kama poka pi tomo esun pi tenpo open.

jan Ewa li toki: “ni li tomo.”

“seme? tomo esun Manilo anu seme?”

“tenpo open la, tomo ni li esun e moku. ona li esun ala e ilo tenpo Manilo.”

“ike a. jan mute li wile e ilo Manilo. taso pilin mi la, moku li suli. mi o seme?”

“sina toki e ni: mi wile pana e kili tawa tomo esun pi tenpo open.”

“ni li nasin.”

“nasin ni la, mi o tawa tomo Manilo. mi o pana e kili.”

“pona. mi alasa e ma pi tomo tawa. sina o tawa tomo esun.”

jan Otela li pini e tawa lon tenpo lili. jan Ewa li pana e ilo toki lon insa poki, la ona li weka tan tomo tawa.

lon insa tomo la, tomo esun li suno li suli. ilo tenpo mute li awen lon insa poki pi kule ala. jan Ewa li pilin insa e tomo esun pi tenpo open. moku mute li lon la, ona li pana e pilin pona tawa nena. tomo Manilo li ante li kule ala.

jan esun tu taso li pali lon tomo ni. jan esun wan li lukin suli e ilo sona. jan esun ante li kama poka.

“o kama pona tawa tomo Manilo.”

kalama uta ona li suwi. len ona li jo ala e jaki e pakala. kiwen namako li suno lon kute ona. jan esun li sewi e luka, la jan Ewa li kama lukin e ilo tenpo Manilo lon luka ona. ona li awen toki:

“kulupu Manilo li pali e ilo lon tenpo suli. ilo tenpo ale li pona mute a. taso ilo tenpo la, ante mute li lon kin. lukin la, nasin sina li nasin pi tenpo lon anu seme? tan ni la…”

ona li awen toki. taso jan Ewa li kute ala e kalama uta ona. pilin pakala li awen lon insa sijelo, li kama suli. lawa ona li pilin e wile moku taso.

“jan esun o.” jan Ewa li toki lon tenpo sama pi jan esun: “sina esun e kili anu seme.”

“o toki sin?”

jan Ewa li pana e luka lon insa poki, li kama jo e kili loje.

“kili.”

“sina wile e ilo tenpo pi kili lukin anu seme?”

“tenpo pini weka la, tomo ni li esun e kili. mi jan lili la, mi kama lon tomo ni lon tenpo mute. mi sona e ni: sina esun e ijo Manilo. taso kili la seme?”

jan esun li open e uta taso ona li toki ala. lukin la, ona li sona ala e ni: ona o toki e seme? pini la, ona li toki:

“kili la…”

namako la, jan tu li kama tan lupa tomo. len pimeja li len e sinpin ona. ona wan li nasin e ilo utala tawa sewi, li pana e kalama suli. kalama ni li pana e pilin pakala tawa kute pi jan Ewa.

“O KUTE! mi kama jo e ijo ale lon tomo ni. sina kute pona e mi la, mi pakala ala e sina.”

jan esun li kalama pi pilin ike. jan kama li tawa kepeken tenpo lili. ona wan li tawa jan esun pi ilo sona, li pana e poki len tawa ona.

“sina o pana e ilo lon poki ni.”

jan kama ante li kama lon poka pi jan esun ante.

“o kalama ala.”

jan esun li pini e kalama uta. jan kama li kama lukin e jan Ewa, li toki sin:

“o pana e poki.”

“mi jo ala e mani kasi.”

“suli ala. o pana.”

jan Ewa li pana e poki ona tawa jan kama. luka ante la, ona li awen jo e kili. jan kama li toki sin:

“sina luka e seme?”

“seme?” kalama suli li awen kalama lon insa lawa pi jan Ewa.

“ijo loje li lon luka sina.”

“a, kili.”

jan Ewa li luka awen e kili. ona li kama e ona lon poka sijelo, li len e ona tan lukin pi jan kama.

“o pana.”

“ona li kili taso.”

“suli ala. O PANA.”

“ona li jaki. ona li suli ala.”

jan kama li nasin e ilo utala tawa jan Ewa. “SINA WILE MOLI ANU SEME?”

“ALA. MI PANA. MI PANA.” jan Ewa li pana e kili tawa jan kama.

jan kama ante li toki: “o musi ala. o pali…”

namako la, kalama li kama tan weka. kalama li suli. kute la, ona li kama tan ilo tawa pi kulupu lawa.

jan kama li toki: “o tawa. o tawa!”

ona tu li jo e poki ona, li tawa wawa tan lupa tomo. jan esun li open sin e kalama uta . taso jan Ewa li kute ala. insa lawa ona la, wile moku li awen. ona li pilin insa e kili. kili li weka la, ona li ken seme? ona li awen pilin e wile moku ni lon tenpo ale anu seme? nasin pi wawa nasa la, kili ni taso li ken pona e ona. ona o seme?

tenpo lili la, jan Otela li kama, li luka awen e jan olin ona. “mi kute e ilo utala la, mi kama e kulupu lawa kepeken ilo toki. sina pona ala pona?”

“ijo ale mi li weka.”

“seme? a, poki sina li weka!”

“kili a. kili li weka a!” jan Ewa li pana e telo oko. sijelo ona li pilin pakala taso tan wile moku. lawa ona li pilin nasa. kili li weka, la nasin pona li weka kin.

“kili kin anu seme? taso mi pilin pona tan ni: sina moli ala. sijelo sina li pakala ala. mi ken esun e poki sin e ilo toki sin.”

“ilo toki!”

“seme?”

“jan utala li jo e ilo toki mi. kepeken ilo toki sina la, mi ken lukin e ilo mi lon sitelen ma anu seme? ni la, mi ken alasa e kili a!”

“nasin pona ala a! ona li jo e ilo utala. sina ni la, ona li pakala e sina.”

“esun! mi ken esun. ona li wile e mani taso. ona li kama jo e ilo Manilo tan ni: ona li ken esun e ilo tawa mani mute. jan olin o kute e mi. mi ken ala awen sama ni lon tenpo ale. mi jo e mani ale pi ma ale la, mi esun e ona tawa kili mi.”

“mi wile pona e sina. mi wile ala e ni: sina kama pakala. ni la, mi alasa e kili. taso o kute e mi: alasa mi li pona la, mi o kama e kulupu lawa. sina o toki ala tawa jan pi ilo utala. nasin li pona ala pona?”

“pona. sina pona.”

jan olin tu li luka awen e ona ante. ona li tawa weka tan tomo esun, li open sin e tawa.

nanpa pini

lon tomo tawa la, jan Ewa li lukin e sitelen ma kepeken ilo toki pi jan Otela. jan Otela li lawa e tawa lon poka. jan Ewa li lukin e sitelen pi ilo toki.

“o tawa sinpin! ona li weka ala!”

ilo li tawa wawa lon nasin. jan Ewa li lukin tan lupa la, ale kama li tawa kepeken tenpo lili. sijelo ona li awen pilin pakala. taso ona li pilin pona tan ni: jan olin ona li lawa pona e ilo.

jan Ewa li lukin sinpin e nasin supa palisa. lon sinpin la, suno nasin ale li laso. namako la, suno nanpa kama li kama jelo. jan Otela li wawa e tawa, la ilo li mu sama soweli suli. suno jelo li kama, li tawa.

jan Ewa li lukin sin e sitelen, li toki sin.

“ona li ante e tawa. nanpa kama la, o tawa poka.”

“poka seme?”

jan Ewa li sewi e luka. “poka ni!”

jan Otela li tawa e ilo lon poka. ante tawa li kepeken tenpo lili la, sijelo pi jan Ewa li tawa poka lon insa tomo tawa. jan Ewa li lukin sin e sitelen, li awen toki:

“a! ona li pini.”

“lon ma seme?”

“tomo Supa Esun.”

“ona li wile esun e moku anu supa anu seme?”

“mi sona ala. o awen tawa. ken la ona li open sin e tawa.”

taso sitelen ma li awen toki e ni: ilo toki li awen lon poka pi tomo Supa Esun. jan Otela li awen tawa e ilo. jan Ewa li lukin weka tan tomo tawa la, ona li kama lukin e ijo nasa. lon poka nasin la, jan pi kulupu lawa li kama poki e jan utala pi tomo esun Manilo. jan Ewa li kalama uta:

“seme a?”

jan Otela li lukin ala e ni, li toki. “sina lukin e seme?”

“kulupu lawa li poki e jan utala. ona li lon poka monsi.”

“ni la, seme? mi o awen ala awen tawa?”

“awen. sitelen ma li pana e sona pona. ilo toki mi li lon tomo Supa Esun.”

tomo Supa Esun li suli. taso lon poka la, ma pi tomo tawa li suli mute. jan olin tu li kama lon ma ni, la jan mute en ilo tawa mute li lon. jan Otela li pini e tawa. jan Ewa li lukin weka, li kama pilin pakala. wile moku li kama wawa lon insa lawa. kili li lon ala lon poka?

jan Otela li pini e tawa ilo. jan Ewa li awen lukin e sitelen ma. ona la, ilo toki li lon insa pi tomo tawa ante. jan Ewa li lukin sewi, li kama lukin e tomo tawa ni. ona li pimeja, li lili sama ni: jan tu taso li ken awen lon insa ona. lupa ona kin li pimeja.

jan olin tu li kama lon poka pi tomo tawa pimeja. jan Ewa li sewi e luka tu tawa oko, la ona li alasa lukin e insa tomo. pilin pona li kama lon insa lawa ona. poki ona li lon!

jan Otela li toki: “sina lukin e seme?”

“mi lukin e poki mi. tan seme la ona li awen lon ni?”

“ken la, jan utala li ante e ilo tawa. ni la, kulupu lawa li sona ala e ilo tomo ona.”

“sona. mi lukin ala e kili. ken la, ona li lon insa poki.”

“pona. mi o kama e kulupu lawa.”

taso jan Ewa li kute ala e toki ni. ona li pilin wawa e wile moku, e pakala sijelo, e nasa lawa. ona la, kili taso li ken pini e pilin pakala. ona la, wile wan taso li lon insa lawa. ona li kama jo e kiwen tan supa anpa, li tawa wawa e kiwen tawa lupa tomo.

tomo tawa li mu: “LI O LI O LI O LI O LI O LI O”

jan olin ona li kalama tan pilin nasa. “o ni ala!”

jan Ewa li tawa sin e kiwen kepeken wawa ale ona. lupa li pakala.

mu li awen. “KO KO KO KO KO KO”

jan Otela li awen toki. taso kute ala la, jan Ewa li pana e luka lon insa pi tomo tawa. ona li kama jo e poki, li open e ona. kili li lon insa! kili ni la, ale li ken kama pona. wile moku li kama pini. pakala sijelo en pakala lawa ale li weka! jan Ewa li kama e poki tan lupa.

“mi kama jo e kili pi wawa nasa!”

taso tenpo sama la, jan Otela li kute e kalama uta pi jan ante.

“o sewi e luka!”

mu ilo li awen. “E E E E E E E”

jan Ewa li sewi e luka, e poki ona kin. ona li lukin tawa kalama uta la, ona li kama lukin e jan pi kulupu lawa. jan Otela kin li sewi e luka.

“o weka e ale tan luka!”

jan Ewa li weka e poki. ona li tawa anpa tawa supa anpa.

“o anpa e sijelo lon supa!”

ilo li awen mu. “A MI A MI A MI A MI”

jan Ewa li supa e sijelo ona lon supa anpa. jan pi kulupu lawa li kama poka. lukin la, jan mute ante kin li kama poka li lukin e utala ni. jan lawa li poki e luka tu pi jan Ewa kepeken ilo poki.

“lukin la, sina o pona. tan seme la sina pakala e lawa?”

tenpo sama la, jan Otela li toki. “mi jan pi nasin lawa! mi sona e ken ale mi! o toki ala tawa ona, jan olin o!”

kalama li awen. “MU A MU A MU A MU A”

jan Ewa li toki ala, li lukin taso e kili. poki ona li tawa anpa, la kili li kama weka tan poki li tawa sike lon supa ma. ona li tawa wawa, li tawa weka, li pini e tawa lon noka pi kulupu jan. kalama uta ale en kalama ilo ale li kama ala lon insa lawa pi jan Ewa. ona li lukin taso e kili. jan lili li luka jo e ona tan supa anpa!

jan Ewa li alasa tawa e sijelo. taso jan lawa li poki pona e ona. jan lili li sewi e kili, li lukin suli e jaki lon selo ona. jan Ewa li kama pilin utala. kili ni li kili ona! jan ante o kama jo ala e ona! kili ni taso li ken pini e pilin moku ona. pilin lete li tawa wawa lon sijelo pi jan Ewa. jan lili ni li moku e kili la, seme li kama? wile moku li awen lon tenpo ale anu seme? jan lili li kama pilin wawa e wile moku anu seme?

pilin suli ale ni li nasa e lawa la, jan Ewa li pana e telo oko. ona li lukin e jan lili tan pilin anpa. sinpin pi jan lili li pana e pilin wan taso ni: wile moku. taso ona li lukin ala e kili. ona li lukin e jan Ewa! jan Ewa li lukin e ona kin, la ona tu li lukin e ona ante. tenpo sama la, jan Ewa li kama sona e ni: ona tu li pilin sama. jan Ewa la, wile moku li moku e pilin ale ante. pilin pakala taso li awen. jan lili li pilin e pakala sama anu seme?

jan Ewa li lukin e lukin ona, li toki: “o moku pona.”

jan lili li lukin tan jan Ewa tawa kili. ona li uta e kili, li open e moku. jan Ewa li awen lukin e moku ni tan telo oko. taso wile moku pi jan Ewa li kama pini. pilin pakala li pini. nasa lawa li pini. kalama ilo ale en kalama uta ale li open sin lon kute ona. taso jan Ewa la, ni ale li suli ala.