tomo suli li awen

ma pi weka mute la, ma tomo lili li lon.
tomo suli li lon insa ona.
tenpo pini la, tomo ni taso li lon.
ni li tomo nanpa wan.
jan ala li sona e jan mama ona.
jan mute li kama tan ma ale, li pali e tomo ante mute lon poka, li awen lon ma tomo.

tenpo suno wan la, jan pi insa utala li kama, li wile lawa e ma tomo.
jan ni li toki mute, li pana e sona lili, li toki utala kin.
ona li wile jan pi sona suli.
ona li pali e lipu pi sona tomo, li pana e lipu ni tawa jan ale.
lipu li sama lipu ante.
sona pi insa lipu li lili, li ike ala.
taso lipu li kepeken e nimi nasa la, jan li pilin e ni:
lipu li wawa sona.
insa lipu la, toki utala en toki ike li lon ala.
jan pi insa utala li wile e lukin pona pi jan mute.

tenpo li tawa la, jan pi insa utala li lawa e kulupu suli.
jan mute li kute e ona, li sona lili e insa utala ona.
jan pi insa utala li lon poka pi tomo suli, li toki e ni:
“tomo suli li ike a.
ona li wile e pakala pi ma sina.
ona li nasa ike.
o monsuta e ona.
lon la, ona li mama e ma mi.
taso tenpo ni la, ona li mama pi pakala sina.”

tenpo suno ale la, jan pi insa utala li kama, li sitelen e toki ona lon sinpin pi tomo suli, li toki tawa kulupu.
jan sin li kama lon ma tomo la, ona li kute e toki ike ni, li wile ala awen, li tawa weka kepeken tenpo lili.

sitelen ike li lili e wawa pi sinpin tomo.
jan mute li wile awen e tomo suli.
jan mute kin li pilin pona tan pakala, li wile lukin e anpa tomo.

tenpo suno wan la, kiwen li weka tan sinpin, li anpa lon lawa pi jan tawa.
jan pi insa utala li lukin e ni, li toki wawa.
“a!
o lukin!
sona mi li lon, li wawa.
tomo suli li utala e jan.
mi o pana e sona ni tawa jan pi ma ale.
taso mi jan pona la, mi wile ala pana e toki utala tawa jan ale.
jan li wile sona e ike ale pi tomo suli la, jan o toki tawa mi lon insa pi tomo mi.”

kiwen mute li anpa tan sinpin pi tomo suli.
taso jan pona li pona e sinpin la, sinpin li kama wawa sin.

jan mute li lukin ala e wawa sin, li awen kute e jan pi insa utala, li pilin ike tawa tomo suli.

tenpo suli li tawa la, sinpin ale pi tomo lili li anpa. jan ale li pona ala e tomo ona, li tawa ma tomo ante. jan mute li tawa la, jan pi insa utala li alasa kin e ma tomo sin.

tenpo lili kama la, tomo suli taso li awen. tenpo li weka e sitelen ike lon sinpin ona.

jan pi ma weka li kama lon poka pi tomo suli lon tenpo ni la, ona li sona ala e utala pi tenpo pini, e ike jan, e lili pi jan ike.
jan ale li sona taso e suli pi tomo nanpa wan.