kasi utala pi ma Tokono

mute nimi: suli lili, MTAMLLTT

ike la, mi awen lon tomo misikeke. awen la, kasi kule walo li lon poka pi supa lape misikeke mi. ale ante li walo li laso lon tomo ni. kule walo li ike tawa mi. kon li sama ala tawa kon utala - kon pi tomo ni li ike ala, li pona ala, li suwi ala li ma ala. taso ma Tokono la, kon li kon pi ma telo lon tenpo ale. pona la, mi lon ala ma Tokono. ike la, mi weka tan jan utala pona mi. mi ken ala awen e ona. ona li awen ala e mi.

tomo misikeke ni la, mi jo ala e jan pona. mi sona ala e ni: jan Temomo li lon seme? n. tenpo lili li suli lon tomo ni. taso ken la, sijelo mi li kama pakala ala la, mi ken tawa tomo mi, li kama jan utala ala.

tenpo li tawa. jan misikeke li kama. ona li pana e moku tawa mi. ona li toki e ni: “jan Muki o, o moku pona. sina wile ala wile e ijo ante?”

mi toki e ni: “a, sina pona. mi wile toki kepeken ilo toki, mi ken ala ken ni?”

jan misikeke li toki e ni: “sina ken…” ona li tawa ilo toki. “sina wile toki tawa jan seme?”

mi open e uta mi. mi wile toki tawa jan Temomo, taso mi wile ala kin… mi pilin monsuta lili. mi o toki ala tawa jan Temomo. mi pana e nanpa toki pi jan Kamina. ona li jan pona mi. mi kama sona e ona lon tenpo pi utala ala.

mi tawa utala la, ona li awen lon ma mi. ona li kama jo e mani mute, e pali pona… mi utala la, kulupu utala li pana e mani mute. taso utala li pini la, mi jo ala e pali.

jan misikeke li kama, ona li jo e ilo toki lon luka. ilo toki li mu wawa. jan misikeke li pana e ona tawa mi, taso mu li awen, li awen, li awen…

ilo toki li toki, taso kalama ona li kalama pi jan Kamina ala. “jan Kamina li ken ala toki lon tenpo ni. o toki tawa ona lon tenpo kama.”

a, ike. ken la, tenpo li pimeja lon ma pi jan Kamina.

mi pana e ilo toki tawa jan misikeke. poka pi uta ona li kama anpa lili. ona li toki e ni: “ona li ken ala toki anu seme?”

mi toki e ni: “ken ala.”

“sina wile ala wile e ijo ante?”

mi kama jo e ilo moku. “ala.” jan misikeke li tawa weka. mi moku pona.

tenpo pini mute la, utala pi ma Tokono li open la, mi wile kama jan utala. mi kama sona e nasin utala, li kama lon kulupu utala. ni la, ona li tawa e mi tawa ma Tokono kepeken tomo tawa waso. mi kama lon ma tomo pi jan utala mute. kasi mute li lon ma ni.

tan ma tomo ni pi jan utala la, tomo tawa li tawa e mi. tawa ni li kepeken tenpo suno wan, taso tenpo suno ni li sama tenpo suno tu wan tawa mi. pini pi tawa ni la, mi kama lon kulupu utala mi. tomo tawa kiwen utala mute li lon.

mi jan utala, taso mi utala kepeken tomo tawa kiwen. tomo tawa ni li suli, li ken ala tawa kepeken tenpo lili, li wile e jan tu tu. mi pana e poki pakala tawa ilo utala, ni la jan ante li ken kepeken ilo utala pi suli mute lon tomo tawa kiwen.

suli la, ilo utala pi nanpa lili taso li ken pakala e tomo ni. kiwen pi tomo tawa li awen e mi.

jan li lawa e mi tawa tomo tawa kiwen sin mi. mi kama lukin e jan ante pi tomo tawa kiwen mi. ona li musi kepeken lipu mute. jan Temomo li lukin tawa mi, li toki e ni: “a! sina jan utala Muki, anu seme? o kama pona!”

mi kama pona, li musi kepeken lipu mute lon poka pi jan pona sin.

lon pini pi tenpo suno mi nanpa wan la, tomo tawa kiwen ale li pini e tawa. jan utala mute li moku. jan Temomo li toki tawa mi. “utala pi ma Tokono li pini la, sina pali e seme?”

mi toki e ni: “n, ken suli la mi tawa tomo sona. sina seme?”

“a, mi tawa tomo sona kin, lon pini pi utala ni.”

“sina tawa tomo sona la sina kama sona e seme?”

“a, mi sona ala e wile mi, ken la, mi kama sona e nasin ilo. jan olin mi li kama sona e nasin ni, la utala li pini la ona li ken pona e sona mi. sina kama sona e seme?”

“mi wile kama sona e nasin pi kulupu lawa. mi kama tawa utala tan ni: tomo sona li wile e mani mute.”

“a, mi sama. mi wile ala pana e mani pi mute mute, taso mi ken pali e seme ante?” ona li open e seli pi moku utala. moku ni li pona ala tawa mi, taso mi ale li jo ala e ijo ante. mi toki lili tawa jan Kamina kepeken ilo toki, taso ona li lape. kon nasa li kama tan seli. mi lukin tawa sewi. kon walo mute li len e sewi. kule walo li pona tawa mi.

jan Temomo li pini seli e moku. jan utala ale pi tomo tawa ona li kama jo e poki moku. mi en ona li toki mute li moku. tenpo suli li kama lili.

tenpo suno wan la, jan lawa pi tomo tawa kiwen mute li toki e ni: “jan utala ale o! ike suli li kama! jan ike li weka e tomo tawa mi pi poki suli!” jan utala ale li mu pi pilin ike. “ni la, mi jo ala e moku sin, e telo sin, e telo tawa sin, e poki pakala sin.” mi mute li jo ala e ijo ale ni la, mi mute li kama moli kepeken tenpo LILI. pilin monsuta suli li kama tawa jan utala mute. jan lawa li toki e ni: “TASO! tomo tawa waso li kama. pona la, ona li pana e moku e telo, e ijo ante. ike la, ona li ken ala pana e ijo mute. ni ale la, o moku ala e moku mute e telo mute. o kepeken ala e poki pakala. o kepeken ala e telo tawa mute. sina ale li pali e ni ale la, sina ale li awen.”

tenpo suno nanpa wan pi telo ala la, ijo sin ala li kama. tenpo mute la, jan utala ale li tawa. suno li kama anpa la, tawa li pini la, mi en jan Temomo li toki lon insa pi tomo tawa kiwen. jan ante tu li lon tomo len, lon ma kasi.

“pilin sina la, tenpo seme la mi ale li kama jo sin e tomo tawa pi poki suli?”

ona li lukin tawa ante, li toki e ni: “ken suli la, tenpo suli ala.” ona li lukin e mi. “a, o pilin monsuta ala. ijo sama li kama lon tenpo pini.”

suno li suno lili e sinpin ona. ona li pilin pona lili. mi ken ala lukin e ante mute. “a? tenpo pini la, sina kama jo e ijo sin lon tenpo seme?”

“tomo tawa waso li kama kepeken tenpo lili, n, kepeken tenpo suno wan. taso tomo tawa li kama kepeken tenpo suno luka wan.”

“tenpo suno luka wan?”

“tenpo suli ala. kin la, tomo tawa waso li pana e ijo mute.”

mi toki e ni lon insa pi lawa mi: jan ike li ken moli e tomo tawa waso. taso tenpo pini la, jan Temomo li awen kepeken ijo lili, la mi ken kin, anu seme? mi toki e ni: “pilin sina la mi ale li awen?”

“mi ale li awen mute.” ona li lukin sewi. “a, o lukin e ni.”

mi tawa lupa pi tomo tawa kiwen, li lukin e sewi. suno mute li lon, li suno mute. sewi lon ma kasi li ante mute tan ma tomo, tenpo pini la mi ken ala lukin e ijo sama. mi toki lili e ni: “wa…”

open pi tenpo suno nanpa tu la, jan Temomo li kama lukin e kasi kule walo. kasi kule ni li mute ala lon ma Tokono. ona li kama jo e kasi kule tu tu, li pana e ona tawa jan utala pi tomo tawa ona. ona li pana tawa mi la mi pana e kasi tawa poki telo mi. kule walo li pona tawa mi.

ni li pini la, tomo tawa waso tu li kama. ona li tawa suli lon sewi, li pana e poki pi ijo mute tawa ma anpa. ike la, jan lawa pi tomo tawa waso li toki e ni kepeken ilo toki majuna: “jan ike pi ma Tokono li moli e tomo tawa waso wan!” awen la jan utala ale li ken moku, taso ona li ken moku e lili taso. mi mute li awen jo e telo tawa lili. ijo li ante ala.

open pi tenpo suno nanpa tu wan la, kasi suli li len e suno loje. kon nasa li lon ma Tokono. suli la kon ni li sama kon pi ma telo. lili la kon ni li sama tawa kon pi soweli moli.

waso li mu. mi wile moku e telo, jan ale li wile moku e telo. taso jan ala li moku e telo. kon lon sewi li walo taso. lukin la, telo li kama ala lon tenpo suno ni. kasi kule walo tan jan Temomo li sama lukin ni: ken la, ona li kama moli lili. lipu kasi ona li walo ala. kon ona li kama suwi ala.

pini moku la, mi mute li tawa. suno li kama sewi.

tenpo pi moku nanpa tu li kama la, ike kin li kama. jan ale li kute e kalama pi suli suli. taso jan ala li sona e ni: kalama ni li tan seme? tenpo lili li tawa la, jan ale li sona. tomo tawa kiwen wan li kama moli mute. kalama li tan ilo utala pi moli pi tomo tawa kiwen.

jan ale li toki suli tawa jan lawa: “ilo utala suli li lon seme?!?!” monsuta li lon. monsuta li lon pilin pi jan utala ale. tomo tawa kiwen ale li tawa, li alasa e ni: ilo utala li lon seme? taso, awen la, telo tawa li mute ala. awen la, ilo utala li moli e tomo tawa kiwen. sina lon ma Tokono, lon tenpo ni, la sina ken kama moli lon tenpo ale.

toki mute li kama tan ilo toki majuna. jan Temomo li toki lili tawa ona. ona li lukin tawa ma kasi. mi ken ala lukin e sinpin ona. kalama sin mute pi ilo utala suli li awen kama. tenpo lili li kama tenpo suli. mi pilin monsuta tan lili pi telo tawa. mi wile moku e telo, taso mi awen tawa.

tomo tawa kiwen pi nanpa lili li kepeken e telo tawa ale ona. ni la, ona li ken ala tawa, la ilo utala pi moli kiwen li ken moli e ona kepeken tenpo lili.

mi kute e kalama wan pi ilo utala la, jan Temomo li lukin ante. sinpin ona li walo mute. ona li open e uta, taso nimi li ala. ona li lukin e seme? seme li kama lon lawa ona?

poki pakala li pana e pakala tawa tomo tawa kiwen pi jan Temomo. tomo tawa kiwen li kama kiwen taso, li ken ala tawa. pakala li kama lon insa pi tomo tawa, li seli li weka li kipisi e selo pi jan ale.

pilin pakala li kama tawa sijelo mi. pilin li suli nanpa wan. mi mu sama ni: soweli li kama moli.

mi lukin tawa jan Temomo. selo ona li jo e pakala mute. ona li mu wawa sama mi.

mi lukin tawa kasi kule pi jan Temomo, tawa poki telo mi. kiwen lili li pakala suli e poki telo. poki telo li lon sinpin ona la, telo ale en kasi kule li lon anpa. kasi kule li moli mute.

mi lukin sin tawa jan Temomo. sinpin ona li lon supa anpa. telo loje li kama tan lawa ona. ona li tawa ala. ona li awen.

telo li kama tan lukin. pilin pakala li kama suli suli. telo loje li kama tan pakala lon selo mi. tenpo suli li kama lili. mi pakala, mi pakala mute.

pakala ni li lape e mi.

mi kama lape ala lon supa lape misikeke, lon weka mute tan ma Tokono. kasi kule lon poka pi tomo lape li walo. kule walo li ike tawa mi.

tenpo ni la, mi lukin tawa luka mi. pakala lili mute li lon selo. ona li pana e pilin pakala lili. mi awen wile toki tawa jan pona mi. jan Temomo anu jan Kamina. taso mi lon ala ma Tokono. mi lon ala ma pi jan Kamina.

jan Temomo, li… awen lon, anu seme? ona li moli ala, sama mi, anu seme?

moku nanpa tu li kama la, jan misikeke li kama kin. mi toki e ni: “j-jan Temomo, ona li moli ala moli…?”

jan misikeke li tawa kama sona e ni. mi wile lon ante.

ona li kama lon sin. ike sin li lon sinpin ona. ona li toki. kasi kule moli li lon poka pi supa lape misikeke mi.