likujo

mute nimi: lili, LTAMMMLLTT

tan jan Peton

o toki tawa mi, kon musi o
pana tawa insa mi e kalama.
kalama li kama wawa sama waso
laso pimeja la ona li
kama sewi tan pilin mi li
lukin tawa sewi e kon mi
tawa sina, kon musi wawa o.

mi wile kalama e jan.
mi wile pana mu tan uta mi
e sona e pilin e insa e wile.
jan li mu sama kon wawa.
kon li kama e telo lete
e wawa suli e pakala
tan insa pilin jaki jan.

olin li open e pilin jan
tawa ijo pi ona ala la
ijo olin li ken kama
lon insa pilin open jan.
olin li sama seli lon mi.
seli li lili, taso wawa
ona li moku e sijelo ale.

wawa li kama tan ale
tawa insa mi sama telo
li kama anpa tan sewi
sama telo suwi,
sama telo pi suwi mute.
wile mi li moku e telo wawa
la mi wile wawa. wawa en ken
en telo suli ale o tawa mi.

lape li suwi tawa jan
li pona e sijelo ona
e nasa pi lawa ike ona
sama kasi. kasi li lape
lon anpa ma lon tenpo lete
li pana e lipu sin lon tenpo pona.
lape li pini la ale li kama sin.

moli li pini ala.
jan li kama sin tan lape,
taso moli li pini ala.
moli li sama soweli alasa
li moku e mi ale,
e sijelo mi ale.
sijelo ale li moku soweli lon pini.

unpa li ijo ante tawa ale.
ona li ken wile li ken pona.
ona li ken weka li ken ike.
ona li sama wile moku lon ni:
ona tu li kama anu kama ala
tan insa pilin jan, tan wile pilin,
li kama ala tan lawa sona jan.

sona kin li ijo tu ante.
sijelo jan li sona pilin,
taso lawa jan li sona toki.
kasi li moku e suno kepeken lipu ona,
kepeken lipu laso mute ona.
sama la sona jan li ilo:
kepeken ona la mi moku e ale.

nasa li open e lukin jan
tawa kule ale, tawa kon ale.
nasa li musi lon monsi lawa
li kama e jan tawa ma mute.
ona li sama suno pi tawa sewi.
suno li suno e ma ale,
taso ma li sona ala e suno.

toki li wan e jan lon kulupu.
sijelo li mu, luka li sitelen.
toki la jan li kulupu e nimi
li pana e ona wan lon poka pi ona ante.
ni li sama kasi lili mute pi kule suwi
lon ma kasi open. jan li alasa
e ona pona li kulupu musi e ona.

jan li lukin e ijo suwi la
ona li wile olin e ona.
suwi li sama soweli lili
li len lon tenpo mute,
taso sina awen li tawa ala la
ona li tawa sina li pana
e sinpin ona lon luka sina.

monsuta li suli lon insa jan.
ona li sama lupa lon pilin,
sama lupa open lon pilin.
telo loje li tawa insa lupa
li weka ala tan ona.
lupa li lete e sijelo ale
li kama suli li kama suli li kama suli.

musi li moku tawa kon jan.
musi la jan li ken toki open
e pilin pi kon ona, e pilin len lon kon ona.
sina moli ala la o musi pona.
o awen musi lon tenpo moli sina.
sijelo sina li tan ko li tawa ko,
taso tenpo musi li pini ala.

lipu li sijelo pi sona jan.
jan li sitelen lon selo ona
li pana e sona tawa sijelo ona
la sijelo li awen e sona jan
tawa jan pi tenpo kama.
sona li awen lon sijelo,
li lipu lon tenpo kama ale.

jan o mama e ona sama.
sina mama ala e sina la
seme li mama e sina?
mama sina li moli lon tenpo,
taso sina awen wile e mama
sama kon sama telo sama moku.
ona li weka la ala li lon sina.

utala li moli tawa pilin jan
li moku e insa ale.
mi utala e sina la
sina utala e mi la
mi tu li kama lili la
utala taso li kama suli.
taso utala ala la mi seme?

wawa en pona li ante.
taso olin li lon ona tu.
mi olin e jan.
taso ona li pona ala tawa mi.
ona li suli li wawa li mute
li toki li pali li ken
ijo mute mute a.

weka li lon ale.
ale li kama weka lon tenpo.
weka li sama pini.
pini li pini ala
li open taso.
taso weka li kama e wile.
mi wile wile e sina
la mi weka e sina.

mi pini.