mi alasa e telo

mute nimi: lili, LTAMMMMLL

tan ijo Wen

olin en mi li tawa ma pi poka telo. suno li utala wawa e selo mi. tawa la mi pana e telo tan selo. mi lukin e kasi. kasi suli mute li luka e sewi laso. lipu ona li sama linja, li tawa lili lon kon.

olin en mi li tawa lon nasin noka. olin li toki: o lukin e tomo suwi a. mi lukin. tomo pi kule mute li selo e nasin. kule ona li sama selo pi kala kiwen li sama kasi kule. kule ona li pana e pilin suwi tawa mi. suno li awen utala.

tenpo lili li kama pini la mi tu li lon ma ko. suno li seli wawa e ko. olin li tawa wawa lon ko li pana wawa e noka ona tawa telo suli. mi tawa kepeken tenpo suli, li alasa pilin ala e seli ko.

mi tawa telo. lete ona li suwi, li pona e pakala ale mi. tenpo lili la lawa mi li kama awen, li kama kalama ala. mi awen, mi pilin e telo lon noka. ale li pona.

olin li toki: o kama!

mi tawa olin. telo li selo e luka mi, e sijelo mi. olin li mu lili lon poka mi—a! o lukin! kala a! kala lili li suno kiwen lon telo. mi pilin e sewi pi ma ale. mi en olin li pana e mu musi, uta li open a.

mi tawa olin li jo e ona kepeken luka. ni li wile e wawa ala, tan ni: telo li pana sewi e sijelo ona. olin li pana musi e telo tawa sinpin mi la, mi pilin uta e namako telo. olin li uta e sinpin mi. ona li toki: selo sinpin sina li namako a tawa uta. mi toki: ni li tan sina. olin li toki: ni li lon a.

tenpo telo li kama pini. mi en olin li tawa ko. mi tawa, mi alasa e kiwen kala. olin li pana lukin e kiwen jelo loje. ona li pona lukin a. a, kiwen kin li pona lukin. linja kule nasa li selo e ona. lupa ona li open; ijo ala li lon. mi pana e ona tawa poki.

suno li kama anpa la mi tawa tomo. olin li esun e suwi lete, li pana e ona tawa mi. tawa la mi moku li lukin e telo sewi. ona li kama kule, li sama suwi lete ni tawa lukin.

tomo mi la olin en mi li telo e sijelo mi lon poka li tawa supa lape. mi pana e kiwen kule tawa supa poka. mi supa e sijelo mi la, lukin mi li tawa kiwen. mi pini e lukin li lape.

insa pi tenpo pimeja la mi kama lape ala. lawa mi li nasa. mi pilin e kama ike lon sijelo mi. tan seme a? mi sona ala e tan.

mi sewi e mi tan supa lape. olin li awen lape. sijelo ona li tawa lili tan esun kon. tomo mi li pimeja. suno ala. taso—suno lili li lon. mi kama lukin e kiwen kule lili. ona li pana e suno nasa, e laso lete nasa…mi ken ala tawa. lukin mi li awen ike tawa kiwen ni. ike li selo e sijelo mi, telo li kama lon sinpin mi—taso mi lete. mi wile kalama tan monsuta, li wile toki tawa olin, “o tawa a!”—taso mi ken ala. mi awen lukin e kiwen.

tenpo suli la, tenpo pi suli ike la—ijo li kama tan lupa kiwen. pimeja la mi ken ala lukin pona e ona. taso, ona li kama.

open la ijo li lili. suno li tawa musi lon selo ona, sama suno selo pi telo suli. ijo li kule nasa—pimeja en loje and laso en walo li kama wan lon selo ona. lawa mi li pilin weka la, mi toki insa: ni li molusa lili taso, anu seme? ni li kala tan telo—anu seme?

ijo li kama suli. tenpo open la, ona li suli sama luka mi. kepeken tenpo lili la, ona li kama suli sama lawa mi, sama noka mi, sama ale mi. ijo li kama suli sama sinpin pi tomo mi. sijelo mi li tawa lili tan monsuta; insa mi li tawa nasa; kalama li lon lawa ale mi; mi ken ala pini e lukin mi. wile la mi o lukin ala a. mi wile pakala e lukin mi!

ijo li awen sama ni lon tenpo lili. oko li lon ala ona; taso mi pilin e oko ona lon sijelo ale mi. a—ijo li kama lili sin—lili sama sijelo ale mi. linja kule suno li tawa lon selo ona, li kama wan nasa….

oko li open. mi kute e toki lon lawa mi.

telo…mi wile e telo….

mi ken ala tawa.

…telo loje sina.

PINI