mi jan
mute nimi: suli, MMMMLTWAMMMW
tan jan Seko
o sona e ken ike lon lipu ni
- moku
- ma li kama jaki moli tan pali jan
- pilin ike tawa jan
- wan taso
- utala
- moli
mi soweli.
seme? mi soweli ala. mi jan. soweli li lon ala. jan li lon. seme?
seme li lon? lon li seme? soweli ala li seme? jan li seme?
mi wile soweli.
a. mi jan lon ni.
mi seme? mi soweli ala lon ni.
mi jan.
ijo li lon. ijo ni li toki.
mi jan. mi toki. sina jan. sina toki. jan li toki.
soweli li toki ala. ona li jan ala.
toki li seme? mi wile e ijo mute.
… mi wile moku.
toki li lon. toki ni li pana.
sina pana e moku. mi moku e ni. mi wile ala lon ni. jan li pana li toki.
sina toki e ni: “o moku! mi pana e moku mute tawa sina.” toki “tawa” li seme?
mi wile toki. toki li lon e ijo mute. mi wile e ijo mute.
toki li lon. toki ni li sona.
jan li toki. toki li pana e sona. sona li suli a. jan li sona li pana li toki.
mi soweli… ala. mi jan. mi sona ala…
… sona suli li lon ala. sona lili li lon.
mi wile sona. jan li seme? sona suli li seme? mi wile ala e moku lon ni. mi wile ala e lape lon ni. mi wile e sona.
toki sona li lon. toki ni li nimi.
toki lili mi li nimi. sona toki li lon nimi. mi toki e nimi.
nimi mute li lon. mi sona ala e nimi mute. mi wile sona.
mi wile sona e nimi “tawa.” ni li seme?
nimi li lon. ni li tawa li ma, li tan.
a! soweli li tawa. jan li tawa. ijo mute li tawa. sina tawa e moku… a, sina pana e moku tawa mi. mi wile e sona mute.
ijo mute li tawa lon ma mute. ma li lon. ni li ma. mi lon ma. moku li lon ma. jan li lon ma. ijo mute li lon ma.
kasi li lon ma mi. mi tan ma mi. sina tan ma jan. sina jan tan ma ni. mi jan tan soweli tawa ma jan…
a… ijo mute li lon. mi wile lape.
nimi li lon. ni li pona.
mi lape ala. sina toki. “sina pona ala pona?” mi toki. “pona li seme?”
sina toki e ijo mute. sina pana e sona lili. mi sona e ni:
mi wile moku. mi moku. mi pona tan ni.
mi wile lape. mi lape. mi pona tan ni.
mi wile toki. mi toki. mi pona tan ni.
pona li ijo suli. mi wile e pona. jan li wile e pona, li sona, li pana, li toki.
mi wile sona e pona. o toki e pona tawa mi.
nimi li lon. ni li sin.
mi lukin ala li kute ala e ijo mute. ijo mute ni li sin tawa mi.
sina sin. sina toki e nimi sin tawa mi.
sina toki. “jan li wile e sona sin.” mi jan ala jan?
mi soweli ala lon ni. mi jan sin. tan seme? mi sona ala.
sona mute li sin tawa mi. mi wile sona e ijo mute. ona li pona ala pona?
… mi sona ala. mi wile.
nimi sin li lon. ni li sama.
mi wile sona. mi jan ala jan? mi toki tawa sina. sina toki e ni: “sina jan. sina sama mi.” mi sona ala e nimi ni.
sina toki. “o kute: ni! li! mi! pi! nimi ni li kalama sama. ni en mi en li. sona en pona…” mi sona lili e ni.
sina toki. “ni la, mi en sina li sama. mi jan. sina jan. mi toki. sina toki. mi pona. sina pona!”
mi pona. seme? mi wile toki e nimi. mi sona ala e nimi ni. mi wile sona e ona.
mi wile sona e ijo mute a. mi wile sona e mi. sina wile e ni: mi jan.
nimi sin li lon. ni li len li luka.
sina pana e ijo tawa mi. ona li sama sijelo sin mi tawa lukin. ijo ni li len.
sina toki. “o len e sina! jan li wile ala lukin e sijelo pi len ala.”
mi toki. “tan seme?”
sina toki. “pilin jaki, anu seme? ni li nasin jan.” mi sona ala e toki ni.
sina toki. “kin la, len li ken seli e sijelo sina.”
mi wile e len. selo mi li lete. len li selo sin mi. linja lili li lon ona. ni li sama soweli li pona tawa mi.
len li lon sijelo lon noka mi. noka sinpin mi li luka. sona sin li lon.
nimi sin li lon. ni li kama.
sina toki. “o kama!” mi sona ala e nimi ni.
sina toki. “nimi kama en nimi tawa li sama lili. sina kama la, mi tu li tawa ma sin, li tawa ijo sin.”
sona sin ni li lili. mi wile e sona mute. sina sona mute. mi sama ala sama sina?
mi tawa ma sin. mi kama lon ma sin ni.
nimi sin li lon. ni li pali li tomo.
ijo suli a li lon ma sin ni. mi kama lon ona.
sina toki. “ijo suli ni li tomo. tomo mute li lon ma ni. jan li pali e ona.”
mi toki. “pali li seme?” sina toki. “jan li lon e ona tan ijo mute. ijo li suli la, pali ona li suli. ijo li lili la, pali ona li lili.”
tomo mute li lon ma ni. jan li pali mute. jan li pali li wile e pona li sona li pana li toki.
mi sona lili e toki sina. mi wile ala wile pali? toki mi li pona ala pona? sona mi li pona ala pona? mi sona ala.
mi tawa tomo. sina toki. “tomo ni li tomo sona. o kama sona e pona ale!” mi sona ala e nimi “ale”.
sina tawa lon tomo. “o kama insa!”
nimi sin li lon. ni li insa li sitelen.
mi kama lon insa tomo. mi lukin ala e kasi e sewi e kiwen e telo lon ni. selo tomo li len e ma suli tan lukin mi.
a! mi lukin e ijo! … ala. mi lukin e ijo lon sinpin tomo. ona li sama ijo mute. ona li ni ala.
sina toki. “ni li sitelen. jan li pali e ona.”
mi toki. “tan seme?”
sina toki e ijo mute. mi sona lili e toki sina. mi sona ala e ijo mute.
mi lukin e sitelen. kasi li lon. soweli li lon. waso li lon. pipi li lon. akesi li lon. kala li lon. jan li lon. ona mute li lon sitelen.
sitelen ni li pona tawa mi. tan seme? mi sona ala e nimi.
nimi sin li lon. ni li pilin li nasa li musi.
sina toki. “sina pilin seme?” mi sona ala e nimi ni.
sina toki. “pilin li toki lon insa sina. sina ken pilin pona, li ken pilin lete, li ken pilin nasa…”
mi toki. “nasa li seme?”
sina toki “a! o kute: sina soweli. taso, sina kama jan. sina sona ala sona e ijo mute?”
mi sona ala.
sina toki. “sina sona ala a! ijo ni li nasa tawa sina.”
nimi ni li suli tawa mi. mi lukin e ijo mute sin a, li sona ala e nimi ona. mi toki. “mi pilin nasa.”
sina toki. “seme li nasa?”
mi toki. “ijo mute, a a a. mi lukin e sitelen ni. toki insa mi… pilin mi? … li toki e ni: ni li pona. sitelen ni li nasa ala tawa mi. mi lukin e ijo mute lon ona. mi sona e ona.”
sina toki. “a, ona li kama e pilin suli lon sina. ona li sitelen musi. musi li pona tawa sina.”
musi. ni li nimi suli lon pilin mi. mi lukin e sitelen li pilin musi. ni li suli ala suli tawa jan? mi pilin e ni: ona li suli a.
nimi sin li lon. ni li kule.
lukin soweli li sona e suno e walo e pimeja. kule li suli ala.
jan li lukin e ijo mute a! ijo ni li kule. mi wile sona e ona.
mi lukin e sitelen musi. waso li lon sitelen ni. mi luka e ona li toki. “ni li seme?”
sina toki. “ni li waso. kule ona li loje.”
mi luka e telo li toki. “ni li seme?”
sina toki. “ni li telo. kule ona li laso.”
mi luka e sike lon sewi laso. “ni li seme?”
sina toki. “ni li suno. kule ona li jelo.”
mi toki. “mi wile sona e kule ale ni. ni li pona ala pona?” sina toki suli. “pona a! o ni.” mi pilin pona tan ni.
nimi sin li lon. ni li ilo li kepeken.
sina pana e palisa tawa mi. “ni li ilo musi. o kepeken!”
mi sona ala e ni. “mi o seme?”
sina toki. “sina kepeken la, sina kama pali e musi pi wile sina. o kepeken kule. o pana e ona kepeken ilo ni. sina pona!”
ilo li lon luka mi. mi lukin e ona. mi pana e ona tawa kule mute. mi pana e ilo kule tawa sinpin, tawa kiwen, tawa kasi. mi pali.
kule li lon tomo. sitelen mi li lon ma mute lon tomo. ni li pona ala pona? ni li musi ala musi?
sina toki. “jaki a! taso, sina kama sona. o musi kepeken ni!”
nimi sin li lon. ni li lipu li supa.
ijo walo lili li lon ijo suli. mi lukin e ona. sina toki. “o musi lon lipu! sina wile e lipu mute la mi ken pana e ona tawa supa ni.”
mi lili e tawa mi, li pona e tawa mi. mi sitelen lon ijo lili ni… a, lon lipu ni. mi sitelen e mi. mi soweli lon sitelen ni.
sina toki. “sina kama pona! o pali a. pali li pona e musi sina.”
sina musi lon poka mi. sina sitelen e ijo. mi sona ala e ijo ni.
sina toki. “a mi pakala!… a, sitelen mi li pona ala.”
mi sona ala. sitelen sina li pona tawa mi. ona li musi. mi musi ala. mi… kama musi.
mi toki. “pali sina li pona a.”
sina lukin e mi. mi lukin e uta sina. sina seme?
sina toki. “mi pilin pona tan toki sina. mi kama sona. sina pona.” a… mi kama sona e nimi. mi pilin pona tan ni.
nimi sin li lon. ni li jo li ken.
sina pana e sitelen musi mi tan supa. “o jo, ni li sitelen sina.” mi toki. “jo li seme?”
sina toki. “ijo li lon sina la, sina jo e ijo ni. sitelen sina li sitelen sina. ni la, sina jo e ona. len li lon sijelo sina. ni la, sina jo e len. mi lon poka sina li toki tawa sina. ni la, sina jo e mi. kin la, mi jo e sina.”
toki sina li suli. mi wile e sona mute. “mi jo ala jo e sona?”
sina toki. “jo! jo li suli. sina ken jo e ijo mute pi wile sina.”
nimi “ken” li seme? mi wile e sona.
sina toki. “o kute. sina jo e moku la, sina ken moku e ona. sina jo ala la, sina ken ala. sina jo e ilo la, sina ken kepeken ona. sina jo e sona la, sina ken kepeken ona!”
sona a. jan li ken li jo li musi li pali li wile e pona li sona li pana li toki.
jo li pona. mi wile jo. mi ken jo tan pali mute.
sina toki. “o kama! mi o tawa ma ante.”
mi wile e sona ni. mi kama.
nimi sin li lon. ni li nasin li ante.
mi tawa ma sin. mi lon kiwen suli. ona li sama linja.
sina toki. “ni li nasin. jan li pali e ona. ni la, jan mute li ken tawa ma ante kepeken tomo tawa.”
nasin ni li suli a! mi toki. “nasin li mute ala mute?”
sina toki. “mute a! kin la, jan li lon nasin pilin mute. ona li pilin ante tawa ijo ante.”
mi wile e sona. mi wile sona e nimi “ante”.
sina toki. “ijo li ante la, ona li kama ijo sin. taso, ante li ken ni: ijo tu li sama ala.”
a. nimi ni li nasa. mi wile e sona mute.
sina toki. “o sona e sitelen mi e sitelen sina! ona tu li ante. sina pali e ijo wan la, mi pali e ijo ante.
“sina ante. sina soweli. lon ni la, sina kama jan. ni li ante.”
ni li lon. mi ante tawa jan. sina sona ala sona e tan? mi kama sona e ijo mute a. ante mi li tan seme?
sina toki. “mi sona ala e tan. pilin mi la, mi ken ala sona lon ale. taso, mi wile e ni: sina jan la, sina o kama sona e ale. ni la, sina ken pilin pona.”
nimi sin li lon. ni li ale.
mi wile sona e nimi ‘ale.’ sina toki. “ale li ijo suli. nimi ‘mute’ li jo e ijo mute la, nimi ‘ale’ li jo e ijo mute mute mute a!”
nasa a. suli ni li ken ala ken? mi sona ala e ale. mi pilin ala e ale.
sina toki. “sina sona ala e ni la, o pona. mi en jan mute li lukin sona e ale. taso, mi pali mute la, mi ken ala jo e ale. ale li suli a. mi lili.”
sina toki ala. sina lukin tawa nasin. sina lukin tawa mi.
sina toki. “mi ken ala sona e ale. taso la, mi ken sona e ijo mute ante. ni li pona. ni la, ale li pona.”
seme? ale li pona. sina toki e ni. taso, (taso?) sina sona ala e ale. sina toki e ni tan seme?
mi lukin sona… sina jan. jan li sona, li jo, li musi, li wile e pona. a. sina wile e pona. pona li lon moku, li lon lape, li lon ijo mute. sina lukin e pona lon ale. ale li ijo mute a. sina lukin e pona lon ijo mute a…
sina toki e ni: nasin pilin li lon. sina pilin e ni: pona li lon ma mute a lon ijo mute a. ni li nasin ala nasin pilin? ni li…
pilin pona li lon. mi lukin e ni lon sina: sina pilin pona. mi kama sona. mi toki e ni:
“ale li pona.”
sina toki e ni: “pona a. sina kama jan pona. sina pona.” mi pilin pona tan ni.
nimi sin li lon. ni li kon li mu.
mi toki. “jan li ken sona e ale pona kepeken seme?”
sina toki. “sina kama sona e nimi. sina kama sona e kon ona.” mi sona ala e nimi ni.
sina toki. “kon li ijo lon sewi. mute la sina ken ala lukin e ona. taso, sina ken pilin e ona. sina moku e ona. ona li lon toki sina, li pana e sona tawa nimi. sina sona ala sona?”
mi sona ala. mi ken ala lukin e ona tan seme? seme li len e ona?
sina toki. “mi ale li ken ala lukin e ijo ale. ni la, mi ken nimi ‘kon’ e ijo ni.
“kin la, mi ale li ken ala toki e ijo ale. ni la, mi nimi ‘mu’ e ijo ni. ‘mu’ li nimi musi.”
kalama nasa li lon nimi ni. mi toki e nimi ni. mi mu.
sina toki. “sina soweli la, sina kalama la, mi toki e ni: kalama sina li mu. mi ken ala sona e mu sina. sina jan la, mi ken sona.”
mi ken kama sona mute e kon. mi mu lon ni. mu!
nimi sin li lon. ni li anu.
nasin li kama tu. sina toki. “mi tawa lon ni. sina wile lon nasin mi anu nasin ante?”
mi kama sona. “nimi anu li sin tawa mi. mi ken ala lon nasin tu ni. mi wile lon nasin wan. mi ken lon poka sina. mi ken lon nasin ante. ni li anu ala anu?”
sina toki. “sina kama sona mute a! ni li anu. sina wile la, sina ken tawa lon poka pi jan ante.”
mi toki. “sina tawa seme?” sina toki. “mi wile pali e ijo sin. mi ken ala pana e sona ale tawa sina. taso, jan ante li sona e ijo ante. o toki tawa ona. o kama sona suli lon taso.”
nimi “taso” li seme? pilin nasa li kama. pilin ni li seme?… mi wile sona e ni. mi wile toki tawa jan ante.
sina toki. “jan o tawa pona! mi tawa.” mi toki. “o tawa pona.” sina tawa lon nasin sina. sina kama lili lon lukin mi. mi ken ala lukin e sina lon ma ni.
mi lukin e nasin sin. mi kama sona suli. mi wile e ijo mute. mi o tawa.
nimi sin li lon. ni li taso.
mi taso. jan wan li lon. mi jan ni. mi lon nasin suli ni, li taso.
moku li lili. lape li lili. mi ken ala toki tawa jan ante. jan ante ala li lon. mi wile tawa lon nasin.
ni li pilin mi: nasin ni li tawa ale. mi ken ala ken lukin e jan ante? jan ante li lon ala lon?
mi wile tawa. mi wile toki.
mi taso.
nimi sin li lon. ni li pini li open.
mi lukin e jan ante mute a! ona li lon ma tomo suli. mi kama lon ma ni la, ona li toki tawa mi. “sina tan seme?”
mi toki. “mi tan ma kasi.”
ona li toki mute. “sina tawa lon nasin suli a! sina taso anu seme?”
mi toki kepeken pona lili. “a… mi taso.”
ona li toki mute a. “tawa sina li pini la, sina pilin pona ala pona?”
mi wile sona e nimi ni. “tawa mi li seme?”
ona li toki. “li pini! sina lon ma ni la, tawa sina li pini. sina pona ala pona?”
mi ken kama sona e ni. mi wile e sona mute e pali mute. taso, mi o ante. “mi pona. mi wile e moku e lape.”
ona li sona e wile mi. “o kama pona lon ma tomo mi! o open pona sin lon ni.”
ni li pilin mi: mi kama sin lon ijo la, mi open e ona. mi sona ala. taso, mi ken kama sona.
mi tawa lape. mi wile kama pona lon ma ni.
nimi sin li lon. ni li tenpo li mama.
pilin mi la, tenpo li ijo kon. mi ken ala lukin e ona. taso, mi ken pilin e ona. suno suli li kama sewi, li tawa anpa. mun suli en mun lili li sama. jan lili li kama suli. mi soweli la, mi lukin ala e ona. mi jan la, mi wile lukin e ijo ale tan tenpo.
mun suli li ante. ale ona li pimeja, li kama suno, li kama pimeja sin. ona li ni lon tenpo mute la, mi kama sona e ijo mute. mi kama sona e nasin sitelen. mi wile sitelen e pilin mi lon lipu la, mi kama jo e lipu ni. mi sitelen e nimi ni. sina lukin e toki mi. o toki a!
tenpo ni la, mi wile toki sin e open mi kepeken nimi sin mi. tenpo open la, mi soweli lon ma kasi. tan ijo nasa pi sona mi ala, mi kama jan. mi jan sin la, mi sona ala e ijo mute. taso, jan li toki tawa mi. ona li pana e moku e len tawa mi, li pana e sona pi ijo mute. tan ona la, mi wile kama sona e sona jan. pilin li kama lon mi. ale li pona.
ona li tawa lon nasin. mi wile kama e sona tan jan ante la, mi tawa lon nasin ante. mi kama lon ma tomo ni, mi lon ma ni lon tenpo ni. mi wile e moku e lape e pali. mi tawa tomo pi jan wile. ona li jo ala e moku mute, e pali mute. jan pi pana sona li lon la mi kama sona e ijo sin. mi jan la, mi wile jo e sona mute e ijo mute. mi o pali a!
jan pi ma ni li mama e mi. ona li pana e moku e sona tawa mi. lili la jan mama li sama soweli mama. ona li mama e jan lili. jan lili li kama suli la mama li lukin e ona li pilin pona. mi wile pilin e pilin pona pi jan mute. ni la, mi ken kama sona e lon jan.
… sina lukin e toki mi pi tenpo pini la, mi toki e nimi “sina”. tan li ni: mi wile toki tawa jan mama open mi. sina pana e sona mute tawa mi, li tawa ma ante, li toki ala tawa mi. sina lon seme? mi sona ala e ijo mute. sina sona e seme pi sona mi ala?
nimi sin li lon. ni li mani li esun.
mi pali mute lon tomo pali. ni la, mi kule e ilo kiwen palisa kepeken ko pimeja. seme la jan li wile e ilo ni? mi sona ala.
taso, mi ken kama jo e mani tan pali mi. mani ni li sike kiwen lili. ona li jo e lawa lon sinpin ona. nasa a. mi toki. “jan ni li seme?” jan li toki. “ona li jan lawa. ona li lawa e ma ni. ona li wile pona e ale lon ma ni.” mi kama sona.
mani li ijo pona tawa jan. sina jo e mani mute la, sina ken kama jo e ijo mute. ale li toki e ni: jan li ken ala kama jo e pona tan jan ante la, ona li wile ala pona tawa jan ante. ni la, jan li pana e ijo mani ona tawa ante, li kama jo e ijo pi wile ona. nimi ni li esun. jan li esun li ken li jo li musi li pali li wile e pona li sona li pana li toki.
pali mi li kama e mani lili tawa mi. ni la, mi wile esun e ijo pi wile mi. mi wile moku. tenpo ni la, mi esun e moku tan tomo esun. tomo esun ante li wile e ante. tomo wan li wile e mani mute. tomo ante li wile e mani lili. mi esun e moku tan tomo pi wile lili. taso, mi wile sona e moku pi tomo ante. ona li pona ala pona?
ale ni li sin tawa mi li nasa lili. taso, mi kama sona e ona. mi wile lon poka jan. mi wile jan. mi o jo e mani. mi o esun. ni li pona tawa mi.
nimi sin li lon. ni li poki li wawa.
tenpo li tawa. mi kama jo e mani lili mute. mi ken jo e ona kepeken esun ala. mi pana e ona tawa insa poki.
poki li ilo jo. ona li ken jo e ijo lon insa ona. sijelo pi poki mi li kiwen kon: mi ken lukin e insa ona. taso, mi ken ala jo e ijo lon insa ona. mi open e lupa ona la, mi ken jo. poki mute ante li lon, li ken kama tan pali ante. poki kon li poki mi. ona li jo e mani mi.
poki ante li lon. ona li tan kiwen kasi, li jo e len mi. supa poki len li jo e poki mani mi. jan li toki e ni tawa mi: mi lon poki kin. poki ni li suli, li jo e mi, e supa lape mi, e supa poki len mi. ijo li jo e insa e ijo lon insa ni la, ona li poki.
poki ante li lon tomo mi. ona li ilo sitelen. ona li pana e sitelen tawa e kalama tan insa ona a! ni li nasa a tawa mi. mi wile sona. “ona li ken ni tan seme?” jan li toki. “jan ni li lon tomo ante. sitelen ona li kama tan ilo kepeken wawa.”
mi kama sona tan jan. wawa li ijo suli tawa ijo ale. ona li ken tawa e tomo, li ken pana e suno lon ilo suno, li ken pana e sitelen lon ilo ni pi sitelen tawa. mi la, ona li sama moku: ijo li wile tawa anu pana anu ante la, ona li wile e wawa.
lukin wawa li ken ante. kon suli pimeja li lon sewi la, linja walo suno ona li ken wawa. suno suli jelo li pana e wawa kin. telo li ken pana e wawa. tenpo mute la, jan pi ma tomo ni li seli e kiwen pimeja. kon pimeja li kama lon sewi. ni li ken ala ken pimeja e sewi ale? …
toki insa nanpa 28 (mute luka tu wan)
nimi sin li lon. ni li nanpa.
jan li wile sona e ijo nanpa. ona li wile sona e ni: “nanpa mani pi ijo ni li seme?” li kama sona e ni: “nanpa mani ona li tu. o esun e sike mani tu.” nanpa li nasa a tawa mi. taso, mi ken kama sona tan jan ante.
nasin pi sona nanpa li lon. mi lukin sona e ona. “wan en wan li tu.” a. ijo wan en ijo ante li kama ijo tu. “tu en tu en wan li nanpa luka.” luka jan li jo e palisa pi mute ni. mi kama sona. “luka en luka en luka en luka li nanpa mute.” nasin nanpa ni la, nimi mute li nanpa. jan li wile sona e nanpa la, mi o kama sona e nanpa.
mi ken pali e ni kepeken ni: mi pana e nanpa tawa toki insa mi. tenpo kama la mi o sitelen e ni. o lukin! nanpa pi lipu ni li jo e nimi ale pi kama sona mi: mute luka tu wan (28). musi a.
toki insa nanpa 29 (mute luka tu tu)
nimi sin li lon. ni li kulupu li suwi.
ijo mute li lon ale. ijo mute li lon kulupu. kulupu li jo e ijo sama mute.
jan li kulupu e ijo mute. ni li pona tawa ona. ona li kulupu e ijo lon ma ale la, ona li ken pali e ijo sin. ijo li ken kiwen, li ken telo, li ken kon, li ken ko. ona li ken linja, li ken palisa, li ken lupa, li ken nena, li ken seli, li ken lete, li ken suno, li ken pimeja, li ken ante. mi kama sona e ijo mute li ken sona e nimi ona. ni li pona tawa mi.
mi soweli la, moku ale li “moku” tawa mi. jan la, ona li pana e nimi tawa moku mute ante. ona li moku e pan, e kili, e soweli, e kala, e waso, e telo, e akesi, e pipi. ni ale li lon “kulupu moku”. tenpo ale la, jan li wile moku e mute tan ona. kin la, moku ante li ken kulupu lon moku suli wan. ona li ken kama e pilin suwi. ni li pona tawa mi.
mi sona e kule. mi sona e jelo e laso e loje, e walo e pimeja. taso la, kule li ken kulupu li ken kama e kule sin. loje li ken walo. laso li ken loje. telo li anpa tan sewi la, suno li ken kama e sike pi kule mute lon sewi a. jan mute li kule mute. jan mute pi kulupu mi li jo e kule ma lon len ona. ona li jo e mani lili la, ona li jo e kule lili.
mi wile pali mute. mi wile e mani mute. mi wile esun e mute. ni la, mi ken kama jo e kule mute, e moku mute, e ante mute. ni li kama pona tawa mi.
toki insa nanpa 30 (mute luka luka)
nimi li lon. ni li sewi. ni li nimi sin ala tawa mi. tenpo la mi toki e ni. taso, jan li toki e sona pi ante lili tawa nimi ni. mi o toki e ante.
mi toki e sewi la, mi toki e sewi lon sewi ma. ona li jo e suno, e mun, e waso, e sike kule. mi kama jan la, mi lukin e sewi li pilin pona. ona li suwi. mi wile sitelen e ona. mi ken pali e musi tan ona.
jan pi kulupu mi li toki e sewi la, ona li toki e ijo wawa pona. lili la ijo ni li sama jan. taso, ijo ni li wawa li pana e pona tawa jan. mi ken ala lukin e sewi wawa ni. taso, jan li pilin pona tan ona, li toki e ijo pona tawa ona.
jan mi li lon nasin sewi. ona li pilin e kon tan sewi ona. mi sona e nimi kon. sina toki e ona tawa mi. mi ken ala lukin e kon. taso, mi ken pilin e ona. jan mi li toki e ni: kon li wawa kin tawa jan pi ma ni. kin la, sina pilin pona tan kon. ken la kon pi sona mi en kon pi sona jan li sama lili.
jan li wile kulupu. jan mi li lon kulupu sewi, li tawa tomo sewi, li toki e ijo sewi. ona li pilin pona li pilin wawa tan sewi. ona li toki e ni tawa mi: “o kama lon kulupu musi pi kulupu sewi mi!” mi kama la, mi ale li moku, li kalama e musi, li mu e pilin pona. mi pilin pona tan ni.
sona pi sewi jan li nasa tawa mi. mi ken ala lukin e ona, li ken ala kute e ona, li sona e lili pi nasin ona. taso, jan mi li ken pilin pona tan ona la, ale li pona tawa jan mi.
toki insa nanpa 31 (mute luka luka wan)
nimi sin li lon. ona li olin.
jan li wile kulupu. ona li wile e pilin pona olin. pilin ni li pilin wawa a. jan ante li pilin e ona lon tenpo ante. pilin mi la mi wile e olin kin.
jan mama li pilin e ni tawa jan lili ona. jan lili li moku tan mama ona, li kama sona tan mama ona, li kama toki tan mama ona. tenpo mute la, jan tu ni li sona suli e ona sama. pilin olin pi ona tu ni li kama suli. jan olin li pilin e pona mute. ni li suwi li pona tawa mi.
jan lili li kama suli la, ona li lukin tawa jan ante. ona li wile kama sona e jan ante, li wile lon poka ona. ona li ken toki, li ken sona, li ken musi, li ken ijo ante. tenpo mute li kama e pilin olin tawa jan ni kin. mi sona e jan ante, li olin e ona.
taso kin la, olin li ken suli a. jan li kama sona e jan ante, li wile lon poka sama lon tenpo ale la, ona li ken kama kulupu olin. jan olin li ken musi, li ken sona e ona sama, li ken pali mute, li ken unpa, li ken ijo ante. jan lili sin li ken kama tan unpa. ni la, sike olin li open sin.
tenpo mute la, mi lukin e jan olin. mi olin e olin. jan li olin li kulupu li esun li ken li jo li musi li pali li wile e pona li sona li pana li toki. ni li pona tawa mi.
… sina olin ala olin e mi?
toki insa nanpa 32 (mute luka luka tu)
nimi sin li lon. ni li awen.
tenpo mute la mi awen lon ma tomo ni. mi tawa ala ma ante. jan pi ma ni li pona tawa mi. mi kama jo e ijo mute, e mani mute, li kama sona e ijo mute a. mi pilin pona tan ni. taso, mi awen tan ni: mi wile toki tawa sina. sina seme? mi wile sona e pona sina.
mi wile e kama sina. sina ken lukin e ijo mi, li ken toki tawa jan pona mi, li ken pana e sona mute tawa mi. mi sona e mute. taso, mi sona e ale ala. mi wile sona e ale. tenpo pini la, sina toki e ni: jan li sona. mi sona e ale ala la, mi sona e seme? jan li wile. jan li jo. jan li wile jo. mi jan. mi wile, li jo, li ijo ante ale. seme li kama lon mi?
… taso, tenpo pini la, sina toki e ni: “mi ken ala sona e ale.” pilin mi la, sina wile toki e awen pona tawa mi. jan li ken ala ken sona e ale? tan toki pi jan ante la, mi ale li ken lukin sona. ni li pona tawa mi.
tenpo li tawa la, mi awen. sina ken kama. mi sona e ni. mi ken musi sin lon ma ni, li ken moku li ken lape li ken lukin tawa sewi pimeja. tenpo mute la mun li pimeja. taso, sewi li awen pona tawa mi.
toki insa nanpa 33 (mute luka luka tu wan)
nimi sin li lon. ni li weka.
weka li seme? weka li lon la, sina jo ala. jan sona li toki e ni. mi o toki e weka.
sina weka.
mi pilin pona ala tan ni.
toki insa nanpa 34 (mute luka luka tu tu)
nimi sin li lon. ni li ike.
IKE ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike ike IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE IKE A.
seme la mi sona ala e nimi ni? seme la sina pana ala e nimi ni?
ike li pona ala. pona li ike ala. nimi ni li suli. mi kute e ona tan jan ante. tenpo pini la mi sona lili e ona, li wile ala toki e ona. pilin mi la, ona li wile weka e pona tan ma.
tenpo ni taso la mi sona e nimi ike. ona li wawa a. ona li weka e suno tan lukin mi. ona li weka e kalama tan kute mi. ona li weka e pilin pona mi pi ijo mute. tan tenpo open mi la, ike li lon.
tenpo open mi la, mi kama jan. mi pilin nasa, li pilin ike. mi wile ala e ni. seme la mi jan? mi sona ala e jan. mi sona ala e ale pi sona ona. lawa mi li pilin ike tan sona mute. sijelo mi li pilin ike li wile e sijelo soweli mi. taso, mi kama jan, li wile sona e jan.
tenpo ante la, mi tu li lon nasin. nasin li kama tu. sina weka tan mi. mi pilin ike tan ni. mi sona ala e nimi ike lon tenpo ni. mi sitelen e lipu pini poka la, mi pilin ike kin. taso, sina pana ala e ona tawa mi.
tan seme? seme la sina pana ala a?
… sina wile ala e pilin ike mi, anu seme? sina wile awen e pona mi, anu seme? ni li nasa a. mi ken ala pilin ike la, mi sona ala sona e pona? jan mute pi ma tomo ni li pilin ike. mi wile ala pilin ike sama jan ni la, mi lukin ala e ona. mi toki ala tawa ona. wile ni mi li kama ala kama tan sina? mi wile olin e jan. mi wile sona e ale jan. ni li wile mi anu wile sina anu seme? sona ike li weka la, mi ken ala ken kama sona?
o sona e ni: mi sona e pilin ike e nimi ike. wile sina pi pona mi li weka. sina pilin ala pilin ike tan ni?
… seme kin li weka tan sona mi?
toki insa nanpa 35 (mute luka luka luka)
nimi sin li lon. ni li pakala.
ijo li pakala la, ike li lon ona. pali ona li ken pakala. pona ona li ken pakala. ni li ike tawa mi.
lon ma tomo nanpa wan mi la, tomo mute li pakala. tenpo ni la mi sona e nimi ni. ona li pakala tan seme? mi en sina li taso lon ma ni. jan ante li lon seme? lon tomo sona pi ma ni la, sina toki e ni lon musi sina: “a mi pakala!” musi sina li pakala ala. ona li pakala la, ona li pakala lili. pakala suli li lon ma suli.
mi lukin e jan lon ma tomo ni. ona li pakala e jan ante. ona li wile jo e mani tan ona. tenpo ni la, mi sona e nimi ni. sinpin pi jan ante li kama pakala tan ni. mi wile ala toki mute e ona, mi pilin ike tan ona. jan li pakala.
mi lukin e ilo pi sitelen tawa. ona li toki e ijo mute. mi kama sona e ni tan lukin mi: pakala suli li lon ma ante. ni li tan ma tomo ni anu seme? … mi pilin e ike suli.
ma kasi mi li kama pakala.
toki insa nanpa 36 (mute luka luka luka wan)
nimi sin li lon. ni li jaki.
jaki li seme? jaki li wile e telo. jaki li suwi ala. jaki li ken ike tawa mi.
jan poka mi li jo e sijelo jaki. mi jo e sijelo jaki. mi mute li jo ala e telo mute. ni li tan mani lili mi. weka telo li kama ike tawa mi. jan li toki tawa mi “a! sina jaki a!” ike li kama lon pilin mi. mi wile weka e jaki mi.
jaki li lon sewi, li lon ma kasi mi. tenpo ni la mi ken ala lukin e mun. kon pimeja pi kiwen pimeja seli li len e sewi pimeja, li pimeja e ale pi ma tomo. kon ni li jaki. mi moku e ona, taso, mi wile ala ni. kasi li ken ala kama lon kon ni. kon li pakala e ma kasi mi. wawa pi ma tomo ni li jaki. jan li jaki.
… sina toki e nimi jaki lon tenpo tu.
tenpo nanpa wan la, sina pana e len tawa mi, tan “pilin jaki, anu seme?” mi sona e nimi jaki lon tenpo ni la, toki sina li nasa tawa mi. seme la jan li wile lukin e sijelo pi len ala? ken la, ona li pilin sama kasi lon ma mi. ni li nasa mute a. jan li nasa a.
tenpo nanpa tu la… sina toki e seme? sitelen musi mi li jaki anu seme? mi jaki anu seme? sina wile ala toki e nimi ike tawa mi, taso, sina toki e nimi “jaki” lon tenpo tu. mi sona e ni: jaki li ken ike. musi mi li ken ike. mi sona ala, ni li tenpo nanpa wan mi. taso, sina toki tawa mi la…
mi o pilin ala e ike ni. sona pi nimi jaki li kama tan ni: mi jan. mi soweli la, jaki li lon. taso, mi pilin ike ala tawa ona. mi sona e ona lon tenpo ni, li ken lukin e ike pi kon jaki lon ma mi… nimi ni li jaki. jaki li jaki. mi pilin ike tawa sina tan ala.
mi awen pilin ike. ike li lon.
toki insa nanpa 37 (mute luka luka luka tu)
nimi li lon. ni li anpa.
tenpo suli la, mi sona e nimi anpa. mi wile toki e anpa ike.
ijo li anpa la, ona li tawa ma. mun en suno li anpa kepeken tenpo suli, li kama sewi sin lon tenpo kama poka. ni li ike ala. taso, mi ken ala lukin e ona. kon jaki li lon sewi, li len e mun e suno.
telo li ken anpa tan kon walo lon sewi. ni li ike ala. taso, kon pimeja jaki li lon la, telo anpa li jaki kin, li seli e selo. tenpo pi jaki ni la mi wile awen lon tomo.
ijo mute li anpa tan pakala. kasi pi ma mi li anpa tan seli. tomo suli li anpa tan pakala pi tawa ma. jan li anpa tan jan wawa ante.
jan li wile kama wawa la, ona li anpa e jan ante, li pakala e ona, li ike e ona. jan li lon anpa, li pona ala tawa jan wawa la, pakala suli li kama. mi pilin ike tan ni. mi wawa ala. jan li wile anpa e mi, anu seme?
toki insa nanpa 38 (mute luka luka luka tu wan)
nimi sin li lon. ni li alasa.
ijo li alasa la, ona li lukin. ona li wile e ijo, li wile kama jo e ona. ona li ken alasa e moku. ona li ken alasa e wawa. ona li ken alasa e ilo pakala.
mi soweli la, mi alasa e moku. wile mi pi tenpo pini ni li moku taso li lape taso. sina pana e sona pi nimi jo. ni la, mi wile alasa jo e ijo mute. jo li wawa. jan li jo.
mi taso lon nasin la, mi alasa moku. mi alasa lape. mi alasa e pini nasin. mi pilin ike lon ni, tan ni: nasin li suli. mi ken ala lukin e pini ona. moku li lili. lape li lili. sina weka. mi taso.
mi lukin e jan pi ma tomo ni. ona li alasa jo e mani, e pona, e ijo mute. mani li wawa e jan. jan li wile e mani. ni la, ona li ken alasa e jan ante, li ken pakala e ona, li ken kama jo e mani. jo li ijo suli. jo li wawa e nasin jan. ni la, ona li alasa. jan li alasa.
mi lukin e ilo pi sitelen tawa. mi kama sona e ni tan lukin mi: jan li jo ala e ijo la, ona li ken kama pali e ike. ona li ken pakala e jan ante, li kama jo tan jan ante. ona li ken pakala e kasi, e tomo. jan li ken pakala kepeken ilo pakala.
mi kule e ilo pakala ni lon pali mani mi. ona li anpa e jan ante. ni li ike tawa mi.
toki insa nanpa 39 (mute luka luka luka tu tu)
nimi sin li lon. ni li utala.
utala li pakala suli. utala li tenpo pakala. utala li pakala e tomo, e jan, e pona. utala li ike tawa mi.
mi kule e ilo utala lon pali mani mi. mani mi li tan utala. jan li pakala e jan ante kepeken ilo ni. mi lukin e jan utala lon ilo pi sitelen tawa. jan pi ma ni li utala e jan pi ma ante. jan lawa li jo e wawa utala. ona li alasa e wawa tan jan pi ma ante. jan li utala.
seme la jan li wile utala? ona li wile wawa e jan ante. kin la, jan li jo. jo li wawa. jan li wile jo e ijo tan jan ante. jan li anpa e jan ante la, jan anpa li ken ala utala, li ken ala jo. ni la, jan utala li ken pali e ilo pakala, e ilo alasa, e ilo utala. ona li toki esun ala tawa jan ante ni. jan pi ma mi la, jan ante li jan ike. nasin pilin en nasin sewi pi jan ante li ike. mi kama lon ma ni la, ona li pilin ala pilin e ni: mi jan ike?
… mi wile ala ike. ike li ike.
mi kama jan la, mi kama sona. sona li pona. sona mute ante li ike. mi kama sona e ijo ike mute. utala li ike. jaki kon li ike. anpa jan li ike. mani mi li ike. jo li kama e ike. mi wile ala sona e ike ale ni. mi wile ala jan. mi wile soweli. mi wile mu. mu li pona.
mi ken ala mu. mi jan. mi toki taso. mi sitelen taso. mi pali taso. mi olin taso. mi pilin taso. mi sona taso. sona ni li ike e mi. mi ken seme? mi wile ala e ike ni. mi wile ala jaki. mi wile ala pakala. mi wile ala utala. mi wile ala jo. olin li lon seme? suwi li lon seme? pona li lon seme?
sina lon seme? mi lon seme? jan li lon seme?
toki insa nanpa 40 (mute mute)
nimi sin li lon. ni li moli.
moli li seme? tenpo pi mi soweli la, mi sona. mi kama sona sin e nimi moli lon tenpo ni, tan jan ante, tan ilo pi sitelen tawa. moli li suli. moli li kama lon tenpo ale.
moli li pini e soweli, e jan, e ijo ante. ona li kama lape lon tenpo ale. ni li tan tenpo suli, li tan pilin jaki, li tan moku ala, li tan telo ala, li tan kon ala, li tan pakala, li tan alasa, li tan utala. moli li lon ale. moli li ken ala moli.
mi soweli la, mi wile ala moli. mi wile ala kama moku pi soweli suli. mi jan la, mi pilin sama. mi taso lon nasin la, mi wile alasa e moku, e lape. mi wile ala moli lon tenpo pini ni.
tenpo li tawa, li kama suli. jan lili li kama suli. jan suli li kama moli. mi lukin e moli pi jan suli lon kulupu mi. ona li pilin ike, li jo e wawa ala. tenpo moli ona li kama. jan sama ona li pilin ike tan moli ona. ona li toki e ni: “jan mi li pona lon tenpo ale pini. o lape pona lon tenpo ale kama.” mi pilin ike tan ni.
mi lukin e ilo pi sitelen tawa. mi lukin e ni: ilo utala mi li alasa e jan ante. ona li moli e jan ni. jan li moli e jan ante. utala li kama e moli. jan ante li ken pona lon tenpo mute. jan pi utala ni li moli taso. moli ni li ike tawa mi. mi pilin ike tan ni.
mi lukin mute. jan pi ma ni li moli. jan pi ma ante li moli. ona li kepeken ilo utala, li kepeken ilo pakala suli, li kepeken ilo moli ante. pali mi li kama e moli. mi pilin ike tan ni. mi sona e ni lon tenpo open la, mi o pali ni ala.
mi lukin mute. ilo li pana e sitelen pi jan mute. ona li anpa tan moli, li moli e jan ante. mi lukin la, mi kama pilin e ike mi pi suli nanpa wan.
mi lukin e sina.
sina moli.
toki insa nanpa 41 (mute mute wan)
tenpo li tawa. mi toki ala tawa sina. sina moli.
mi kama sona e ijo mute. lon open la, sina toki e ni: “sina pona. ale li pona.” tenpo suli la mi kama sona e toki ni, li pilin suli e ni. sina mama e mi. nasin mama sina li pona ala pona e mi? mi wile sona e pona jan. mi tawa ma sin, li kama sona e jan. tenpo mute li pini la, mi kama sona e ni: ike li lon kin. mi pilin ike tan weka sona ni pi tenpo open mi.
mi wile kama sona e ike lon open pi mi jan. sina toki ala e ni tawa mi la, mi sona ala e wile sina. mi kama pilin e ijo mute. mi kama pilin e ken mute pi wile sina.
ken nanpa wan li ni: sina wile sona e soweli. sina ante e mi tawa jan la, jan li ken lukin e mi li ken kama sona e pilin mi. mi toki li musi li pali ante la, mi ken pana e sona pi wile sina. mi lon jan ante la, mi ken pana e sona pi wile sina. mi taso lon alasa sona mi la, mi ken pana e sona pi wile sina. ni li lon la, mi wile ala e ni. o lukin ala e mi. mi wile e taso mi.
ken nanpa tu li ni: sina wile ike e mi. sona li ijo suli. sina toki e pona taso tawa mi, li pona ala e mi lon tenpo ike la, sina ken kama e pona nasa tan ni. pona pi jan wan li ken ike tawa jan ante. ken la, sina pana e sona suli tawa mi tan wile nasa sina. jan ike mute li lon. ken la, sina jan ike wan. kin la, mi lukin e sina lon utala suli ni. ni li lon la, pakala o tawa sina. o moli ike.
ken nanpa tu wan li ni: ale ni li tan pali sina ala. mi kama jan, sina lukin e mi, li wile pona e mi. mi ante tan ijo ante. tenpo pi ante mi la, sina kama. mi tu li wile sona e ale jan la, mi moku. mi pali. mi musi. mi toki. tan ijo nasa pi sona mi ala la, sona ike li ike tawa sina. ante la, sina sona ala e ike. ni la, sina ken ala toki e ona tawa mi. mi taso li wile sona e ona. ken la, ni li nasin pilin sina. nasin sina en nasin mi li ante.
ken seme ni li lon? mi sona ala. mi wile kama sona e ijo mute. mi wile e tenpo. ken la, tenpo li pona e pilin mi. mi wile sona e jan. mi wile pana e pona pi ken mi. mi wile lukin e ale. mi ken ala sona e ale, sina toki e ni. taso, mi wile alasa sona e ona. mi ken alasa.
toki insa nanpa 42 (mute mute tu)
tenpo suli li pini. mi lukin e ijo mute. mi o sitelen e ona. mi pini la, mi o awen e lipu ni lon tomo ni. jan lukin o, sina lukin e ni la, sina pona la, sina ken pana e ona tawa jan ante. mi o toki, mi o pana e sona mi tawa jan ante. mi jo e lipu sin, mi o toki e pilin sin mi lon ona.
utala pi ma tu ni li pini. jan mute li pilin pona tan ni: moli pi utala ni li pini. jan mute ante li pilin ike tan ni: jan ante ni li wile ala e utala lon tenpo open. mi ken sona e pilin tu ni. pilin li ken pona, li ken ike.
mi pilin mute lon tenpo suli ni. pilin pona, en pilin suwi, en pilin olin li kama, li pini. pilin ike, en pilin jaki, en pilin utala li kama, li pini. pilin li ijo wawa. pilin ale li suli, ona li wawa e pali jan. musi mute li kama tan pilin ni. sitelen musi, en kalama musi, en ilo musi. jan li toki e musi mute ona.
jan li toki e ni la, mi pilin pona. pilin mi li nasa lili tawa mi. jan wan li toki e pona tawa musi ni. jan ante li toki e ike. mi kama sona e ni: toki ale li pona tawa jan. jan li ken kama pona tan toki ale ni. mi pilin pona tan toki ike. kin la, mi pilin pona tan toki pona. pilin mi la, ante li ken kin. mi ken pilin ike tan ike, li ken pilin ike tan pona.
ijo musi li lon. jan la, pona en ike li ken utala, li ken lon poka lon pona. ken la, mi kama sona a e toki ni: “ale li pona.”
mi wile kama sona e ale pona jan la, mi wile tawa ma ante. mi lon ma tomo ni lon tenpo suli a. mi ken ala sona e ale jan lon ma wan taso. jan ante mute li lon ma suli. mi wile toki tawa jan ante. mi wile kama sona e jan, e ma, e toki, e nasin, e ijo ante mute.
ni la, mi tawa. mi o tawa ma sin ante. mi ken kama sona e ni ale, li ken alasa e pona pi jan ante. mi ken alasa pona e ma kasi mi, li ken alasa pini e kon jaki. mi ken pali e musi sin, li ken lukin e sewi pona. mi ken pana e sona tawa jan ante, li ken kama sona e mi kin. mi ken ijo mute. mi o weka, mi o tawa, mi o pona.
jan li ken pona, li ken ike. jan li ken pali e mute, li ken sona e mute. mi wile li olin li kulupu li esun li ken li jo li musi li pali li pona li sona li pana li toki. ni ale li pona tawa mi.
mi jan.