mi wile e sona sin

mute nimi: suli lili, MLWAMMMW

mi moku

— kon pakala li kama la jan Kasa o awen pona!

mama mi li wile e pona mi la mi o weka e poki jaki tan tomo pi mi tu. pimeja pi walo lili li len e suno. telo li kama ala tan sewi lon tenpo ni. taso kon wawa li lon. kasi suli li tawa mute. lukin la jan ala li lon ma tomo. kasi li laso mute. kasi kule mute li lon. taso lete li lon kin.

kon li kalama wawa. mi tawa noka wawa tawa nasin pi ma tomo. mi pana e poki jaki lon poka nasin. sama waso ike la palisa kasi li tawa kon lon poka pi lawa mi. mi o tawa tomo kepeken tenpo lili!

mi lon tomo la mi pini e sinpin lupa tomo kepeken wawa. mi utala e kon. ale li pona.

kalama kon li wawa li ike tawa mi. mi open e ilo pi kalama musi. mi alasa lili. kalama musi pona pi pilin lape li kama. ona li pona mute tawa kute mi. mi sona mute e ona. mi sona e kalama musi ale. mi wile e ni: kalama musi sin li lon. taso jan ala li ken pali e kalama sin. jan ala li ken pali e ijo sin. sin li kama tan jan mun taso.

jan mun li sama ala sama jan ma? mi sona ala. jan ma en jan mun li kulupu ala. tenpo la jan mun li toki tawa jan ma. taso suno wawa li selo e jan mun la jan ma li ken ala lukin e ona.

— jan Kasa o! sina wile moku anu seme?

mama mi li toki lon tomo moku, li pali e moku seli. nena mi li pilin e kon pona. ko kasi seli a. tenpo pini lili la mi sona ala e pilin moku mi. tenpo ni la mi pilin e ni: mi ken moku e moku mute. insa mi li kalama, li wile e moku lon tenpo ni. mi tawa tomo moku.

— wile a. sina wile ala wile e ni: mi kin li pali e moku?

poka uta pi mama mi li tawa sewi.

— pali li pini. o pana e supa lili sina lon supa moku.

mi pana e supa mi e ilo moku mi, e ilo moku pi mama mi. mama mi li pana e poki moku seli lon supa moku, li pana e moku tawa mi tu kepeken palisa poki suli.

moku li pona. tenpo mute la mi pali moku tawa mama mi. mi la ni li suli: mi pona tawa kulupu mama mi.

lukin pi mama mi li nasa. mi pilin e ni: toki suli li lon insa pi lawa ona.

— mama o! sina pilin seme?

mama mi li kon uta wawa.

— tenpo pi open suno la mi tawa poki lipu lon sinpin pi tomo mi. lipu nasa li lon.

— lipu li toki e seme?

— mi sona ala. mi open ala e ona. nimi sina li lon sinpin ona.

tan insa pi len ona la mama mi li pana e lipu tawa mi. kule ona li nasa li ante lon tenpo ale.

— mama mi o… lipu ni li kama tan jan mun a!

lawa pi mama mi li tawa anpa.

— jan lili mi o… mi pilin ike lili. jan mun li pana e lipu lon tenpo pi mute ala. ona li pana la ona li pana e sona sin.

— pona a. ni li pona … anu seme?

— tenpo la jan pi sona sin li weka. ken la ona li awen lon ma pi jan mun.

pilin ike pi mama mi li pakala ala e wile mi. mi open e lipu. toki lili taso li lon:

“tenpo pimeja ni li kama la o awen lon poka pi tomo sina. ilo tawa li kama. mi jan mun pi pana sona suli.”

kalama ala li lon. mi lukin e lupa tomo mi. kasi suli pi poka tomo li tawa ala. kon wawa li moli. sewi li awen walo pimeja. taso laso lili li lon.

ma li sama lape la kon wawa li lon insa mi. jan mun li wile pana e sona sin tawa mi a. ni li nasa, li nasa mute, li nasa mute pona. wawa a. ken la ona li pana e sona sin pi pali moku. ken la ona li pana e sona sin pi pona sijelo. kepeken ni la mi ken pona e jan pi sijelo pakala.

mama mi li toki ala. ona li toki la mi kute ala. toki mute li lon insa pi lawa mi. mi wile e ni taso: sona sin li ante ala e olin pi mi tu. mi wile awen pona e mama mi.

mi pini moku. mi telo e supa moku e ilo moku ale.

jan pona mi li kama

kalama luka li kama tan lupa tomo. mi tawa. mi open e lupa. jan Neli li lon. ona li jan pona. mi en ona li lili la mi tawa tomo sona sama.

— toki, jan Kasa o! kon wawa li pakala lili e kasi suli mi. sina la ale li pona anu seme?

— pona a. jan mun li wile pana e sona sin tawa mi!

mi luka e lipu tawa jan Neli. oko pi jan pona mi li kama suli.

— wawa nasa a! jan ala pi ma tomo mi li jo e lipu sama, e sona sin. pona li kama tawa sina.

ni li pona. ni li lon. pilin ike pi mama mi li nasa ike. mi weka tan lupa tomo.

— o kama insa! mama mi o, jan Neli li lon, li awen lon tomo mi.

mi tu li tawa tomo mi, li lon supa lape mi. supa monsi li lon tomo mi. taso ona li sama kiwen, li pana e pilin ike. supa lape mi li pona tawa monsi.

jan Neli li musi kepeken luka ona. ijo li pana e pilin ike tawa ona.

— jan Neli o. sina pilin seme?

ona li pana e kon nena pi wawa lili.

— mi pilin monsuta lili tan ni: sina kama jan suli tan sona sin la, sina tawa lon poka pi jan mute ante. mi wile ala e ni: mi ken ala toki tawa sina. tenpo musi pi mi tu en tenpo toki pi mi tu li suli tawa mi. sina jan pona mi. mi wile e ni: ala li ante. taso ante li kama.

tenpo lili la mi toki ala. mi kin li wile ala e pakala pi tenpo mi. sona sin li ken ala ken pakala e pona?

tenpo lili li pini la mi toki e ni:

— ken la jan mun li pana e sona lili taso tawa mi. ken la ona li pana e sona pi kalama musi sin taso.

— sona pi kalama musi li suli a. kalama musi en tawa musi li suli tawa mi, tawa sina, tawa jan mute.

— lon. sona seme li lili?

— sona pi nasin utala sin li lili tawa mi.

utala li ike tawa mi tu. taso mi sona e ni: jan mun li pana e sona pi ilo utala sin, li pana e sona pi nasin utala sin la, jan mute li wile e ni. mi jo e sona ni la jan utala li wile toki mute tawa mi, li wile sona e ale, li wile alasa e sona len lon insa pi lawa mi. ni la toki ona li pini lon tenpo ala.

mi wile ala e sona pi suli mute. mi wile e sona pona. sona sin mi o pana e pilin pona tawa jan mute. taso sona ni o ante ala e ma ale. sona ni o pakala ala e nasin mi.

mi toki e ni:

— jan mun li pana ala e sona lili.

— ni la sona sin seme li utala ala e kulupu pi mi tu? ken la jan mun o pana e sona pi nasin nanpa sin a!

— a a a. nanpa li pona. sina wile ante e nasin nanpa tan seme?

jan Neli li luka e lawa ona, li toki e ni:

— mi sona ala. nanpa li lili. mi mute li kepeken nanpa pi suli mute la mi mute li ken pali e ijo pi suli pona.

— nasa a. jan li ken pali e ijo mute kepeken nasin nanpa pi tenpo ni. nanpa li lili ala. ona li suli, li mute. jan li wile ala e nasin nanpa sin.

— sina ken lawa e jan mun la sina pana e sona sin seme tawa sina?

— n… toki sina li nasa pona. sona moku sin li ken pona. ni la mi ken pali e moku sin tawa mama mi, tawa sina kin. anu la sona pi nimi sin li ken pona kin.

— a a a. nasin nanpa sin li ike tawa sina la nimi sin li pona tan seme?

— tenpo mute la mi pilin nasa. taso mi sona ala e ni: mi pilin seme? pilin ike mute li lon, li sama ala.

poka uta pi jan Neli li tawa anpa. ona li pilin ike anu seme? ona li toki e ni tawa mi:

— pilin pona mute li lon, li sama ala. sina wile e nimi sin pi pilin ike la sina pilin ike lon tenpo mute. ni la mi pilin ike lili kin.

— tenpo ni la mi pilin pona. o pilin pona kin. mi pilin ike lon tenpo lili taso. mi pilin pona la mi o toki ala. tenpo pona la mi lon taso. jan li ken lukin e pilin pona mi lon sinpin mi, lon oko mi, lon nasin pi tawa mi. taso mi pilin ike la mi wile toki e pilin mi tawa jan ante. ni la ona li sona e mi, li ken pona e lawa e pilin mi. nimi sin li ken ni.

— sina pilin ike la o kama tawa mi. mi wile pona e pilin sina lon tenpo ale.

— mi sona. sina jan pona pi pona mute. mi sona ala e wile pi jan mun. taso mi sona e ni: mi wile awen lon poka sina.

poki uta pi jan Neli li tawa sewi.

tenpo pimeja li lon

pimeja li lon. mi lon poka pi tomo mi. tenpo suno la mi en jan Neli li toki mute li musi mute. jan pona mi li tawa tomo ona la mi telo pona e sijelo mi. mi alasa e len pi pona suli. mi jo e poki lili. taso ijo pi mute ala li lon insa ona. moku lete li lon. telo kili li lon kin. pana sona pi jan mun li wile ala e tenpo suli. tawa li wile ala e tenpo suli.

mi lukin e nasin pi ma tomo e ma kasi e sewi kin. taso mi lukin ala e ilo tawa pi jan mun. jan pi sona sin li toki lili e tawa ona. mi sona e ni taso: tawa ona li pana e pilin nasa. ken la jan pi sona sin li jo ala e nimi pona tawa toki pona. ken la jan mun li pana e nimi sin tawa mi. ni la mi ken pana e sona ale pi tawa mi.

kalama lili li lon. kalama ni li sama kon wawa pi open tenpo suno ni. taso ona li lili mute, li wawa ala. linja suli li pimeja e pimeja. taso ona li tawa nasa. ona li tawa sama akesi linja. taso ona li lon sewi.

linja selo mi ale li kama palisa lili. taso mi pilin ike ala. mi pilin e ni: wawa suli li kama. ilo pi jan mun li kama a!

ijo ni li ilo tawa ala. kepeken kalama lili la akesi suli li tawa ma. oko ona li sama seli li lukin e mi. ona li jan mun anu seme?

akesi suli li awen lukin e mi, li toki e ni:

— sina jan Kasa anu seme?

— mi jan Kasa. sina seme?

— mi akesi Ywuwojiti.

akesi NKuwe… LSuwa.. PToweja… mi ken ala toki e nimi ni. uta mi li ken ala kalama e kalama ni. nimi ona li sama kalama pi ilo wawa nasa. taso mi wile ala pana e pilin ike tawa akesi ni. kin la mi wile ala pana e wile utala tawa ona.

— mi pakala, akesi suli o. mi ken ala toki e nimi sina.

— ale li pona, jan lili o. tenpo pi sona sin li kama. sina wile ala wile e sona sin pi jan mun?

— mi wile.

— pona. seme li lon poki sina, li lon len sina?

mi luka e len mi. mi jo ala e ijo mute lon poki len mi.

— mi jo e ilo pi lupa tomo mi, e sike luka, e moku suwi, e telo kili taso.

— sina jo ala jo e ilo utala?

— ala. utala li ike tawa mi.

— pona. taso ilo pi lupa tomo en sike luka li sama kiwen li ken ilo utala, li ken pakala lili e sijelo. o pana e ona lon ma.

mi ni ala la mi ken ala tawa jan mun. mi wile e sona sin la mi kute e akesi suli. mi weka e sike e ilo lupa mi. mi wile e ni: ijo ni li awen lon ma, li weka ala lon tenpo pi kama mi sin. mi toki e ni:

— tenpo seme la mi kama lon tomo ni?

— mi sona ala. jan mute li kama jo e sona sin kepeken tenpo lili. ona li tawa li kama lon tenpo pimeja wan. jan ante li kama ala tawa tomo ona.

— jan ante ni li seme? ona li kama ala tan seme? ona li awen lon seme?

akesi suli li toki ala li lukin wawa e mi. ken la ona li sona ala. ken la ona li wile ala toki. jan pi mute ala li awen weka. ale li pona.

tenpo ala la mi sona e ni: akesi suli li lon, li ken toki, li ken tawa sewi. jan ala li toki e lon ona, li lukin e ona. ken la akesi suli ni li wan. ken la akesi suli ante li lon ala.

mi toki e pilin mi tawa akesi pimeja:

— akesi sama sina li lon ala lon? sina mama ala mama? sina toki tawa kulupu mama sina anu seme?

— mi wan. mi mama ala. akesi ala li mama mi. mi pilin e ni: jan mun li mama e mi.

sona ni li nasa pona. ni li sona sin. taso mi wile e sona sin ante e sona sin mute.

selo akesi li lukin pimeja mute. mi ken ala lukin e len, e poki, e tomo. linja ala li lon sijelo akesi.

mi toki e ni tawa akesi suli nasa:

— mi supa ala supa lon monsi sina?

— a a a. sina wile ni tan seme?

— tawa la, mi lukin ala e nasin ante. sina jo ala e poki e luka. mi lon monsi sina ala la sina tawa e mi kepeken nasin seme?

— ma pi jan mun li lon sewi, li mun ante. sina lon monsi mi la sina ken ala kon. tawa la sina lon uta mi.

mi pilin nasa ike lili. mi o tawa lon insa pi akesi suli anu seme? mi tawa ala la mi lukin ala e jan mun e sona sin. insa akesi li jo ala jo e kon pona?

— jan ale pi sona sin li kama ala kama lon insa pi uta sina?

— sina wile sona e ijo mute. sina jan pi wile sona a. jan mun li wile e sina la mi sona e tan. lon la jan ale pi sona sin li kama. tenpo li kama lili. o kama.

akesi suli li open suli e uta ona. mi wile e sin la mi o tawa. mi lukin e uta. mi lukin e ijo mi lon ma. mi lukin e tomo mi. uta pi akesi suli li monsuta lili. taso mi tawa.

akesi li pini e uta ona. ale li pimeja la mi ken ala lukin. mi wile e sona mute. taso monsuta li kama suli.

mi toki e ni kin:

— sina moku ala moku? sina moku e seme?

insa uta la toki pi akesi suli li wawa:

— a a a. mi moku e jan.