utala nanpa

mute nimi: lili suli, LLWAMMLTT

tan nasa utala

jan pi ma ni li ken utala kepeken nanpa. lukin la nanpa li sama ni: 0 1 2 3 4 5 6 7 8 9. jan li kama e nanpa tan kon li tawa e ona lon kon tawa jan ante li pakala suli e jan. sijelo pi nanpa ni li kiwen pakala la ona li ilo moli pi suli mute. taso, nanpa ni li kulupu ala la ona li pakala ala e sijelo jan. nanpa li kulupu sama ni: 123 456 789. nanpa li suli la nanpa li ken ilo moli.

jan pi mute suli pi ma ni li ken ala kama e nanpa suli. ona li ken kama e suli 25 e suli sama taso. taso a, mun Kekan San li sona e kama suli. sina toki e ijo ike pi mun Kekan San la sina moli a. mun Kekan San li lawa e ma ni. ale ante li pilin pakala tan ona. taso, ale ante li ken ala pakala e mun Kekan San li pona e ma.

jan lili en mama ona li lon tomo ona. mama li toki e ni: “a, mi wile moku, taso, tenpo poka la mun Kekan San li kama jo ike e pan ale mi. mi wile ala e ni, taso, ona li wawa a la mi ken ala anpa e ona.”

jan lili li toki e ni: “mi wile anpa e ona! mi ken ni kepeken nasin seme?”

mama li toki e ni: “sina ken ala, sina wawa ala. o moli ala, lili pona mi o.”

jan lili li kama e nanpa 4 li pana e ona lon supa pi mama ona. “a, taso, mi wawa lon nanpa. sina sona e ni. mi kama e moku tan wile moku sina lon tenpo mute.” mama ona li moku lili e nanpa 4. “ken la tenpo la mi kama wawa a li moli e mun.”

“ken.”

tenpo mun mute mute li kama weka. jan lili li kama lili ala. ona li kama e nanpa 4 mute li toki e ni tawa mama ona: “mi wile tawa tan wile pi moli mun.”

“a, mi ken ala ala e tawa sina la mi o toki e ijo suli tawa sina. jan tu wan pi sona nanpa li lon. o kepeken e lipu ni o toki tawa ona o kama sona la sina ken moli e mun.”

jan lili li ni li kama lon tomo pi jan nanpa wan pi sona nanpa. tomo ona li jo e sitelen Y lon sewi ona.

“a, mi sona e wile sina kepeken sinpin sina taso. sina wile moli e mun.” jan sona li toki kepeken kalama musi. “mi sona mute e anu.”

“nimi anu, anu seme?”

“ken la sina lukin e sitelen ona lon tomo mi. mi ken anu e nanpa. ni li wawa mute la o kute. o lukin e nanpa ni.” jan sona li kama e 1 e 2. “mi ken anu e ona sama ni. o pilin e ni: sina jo e len lawa loje wan e len lawa laso tu. sina ken kepeken len lawa wan taso. ale la ken sina li nanpa seme?”

“n, ken nanpa wan li ni: mi kepeken len lawa loje. ken nanpa tu en ken nanpa tu wan li ni: mi kepeken len lawa laso. ale la ken mi li tu wan.”

“a, ken la sina kama sona e anu. 1 anu 2 li…” jan sona li tawa nasa e luka ona. “3 a!” tenpo pi kalama ni la 1 en 2 li kama wan li kama 3.

jan sona li awen toki e anu tawa jan lili la jan lili li kama sona anu li tawa tomo sin. tomo ni li jo e sitelen + lon sewi ona.

“a, mi sona e wile sina kepeken sinpin sina taso. sina wile moli e-”

“jan sona o, sina sama a jan sona ante.”

“a, mi tu wan li tan mama wan taso.”

jan lili li awen pilin nasa. taso, ona li kute e jan sona nanpa tu.

“mi sona mute e en. n- e nimi en. mi ken en e nanpa. o lukin e ni:” ona li kama e 2 e 3. “o pilin e ni: sina jo e len sijelo tu e len noka tu wan. sina o kepeken len sijelo wan taso o kepeken len noka wan taso. ale la ken sina li nanpa seme?”

“a, lon ni la, ken mute li lon. ken tu en ken tu wan li lon li luka ala e ona. ale la… ken tu tu tu, anu seme?”

jan sona li tawa nasa e luka ona la 2 en 3 li kama wan li kama 6. “sina sona pona a e en!”

jan sona li awen toki e en tawa jan lili la jan lili li kama sona en li tawa tomo sin. wile tawa la jan sona nanpa tu wan li awen. tomo ona li jo e sitelen ^.

“a, mi sona e wile sina kepeken sinpin sina tas-”

“a, sina ale li nasa a!” a, taso, sinpin pi jan lili li kama loje. ona li wile e sona li wile ala toki pakala.

“sina wile sona e nanpa la o sona e ni: nanpa li nasa la mi ale li nasa. ante la, mi sona mute e tawa. mi ken tawa e nanpa.”

“n, taso, sitelen pi tomo sina li jo ala e noka lon anpa.”

“o pilin ala e ni. pona la, o pilin e ni: sina jo e len tu wan. sina jo e poki tu tu. sina o tawa e len sina tawa poki. ale la ken pi nanpa seme?”

“n… n… nanpa ni li suli. ken nanpa wan la tu tu. ken nanpa tu la tu tu. ken nanpa tu wan la tu tu. tu tu en tu tu en tu tu la…” jan lili li kama e 4 e 4 e 4 li pilin e mama ona tan ni. jan lili li tawa e luka ona kepeken nasin pi jan pi sona en la 4 en 4 en 4 li kama 4 16 li kama 64.

“a, pona, taso, o lukin e ni:” jan sona li kama e 3 e 4 li tawa nasa wawa la 3 en 4 li kama wan li kama 64. “lon la, sina wile moli e mun la sina wile e nanpa suli moli la ni li pona a.”

“sina wawa sama ni la sina moli ala e mun tan seme?”

“a, mi ken ala awen e mi lon utala. mi ken pakala e jan ante, taso, jan ante li ken pakala e mi. pona la, sina ken pakala ken pakala ala, a a.”

“a!” jan lili li kama pilin pona a li kama pona lukin lon sinpin ona. “mi kama sona e nasin utala a!”

mun Kekan San li awen lon tomo suli ona. “a, wawa li pona.” ona li toki tawa ona sama. taso, ona li kama lukin e jan nasa. ona li jan lili a!

“mi moli e sina.”

“a a a! a a a!” mun Kekan San li mu mute. “a a a a a a! sina moli e mi a! a a a a a!” mun Kekan San li mu wawa li ken ala mu ala. ona li luka wawa e supa ona. “o utala ala e mi. mi wawa.” moku pi jan ale pi ma ni li lon ale pi tomo ona. sin la jan lili li kama sona e tan ona.

“mi moli e sina.”

mun Kekan San li toki ala li kama e nanpa 1 e nanpa 0 la 1 en 0 li kama wan li kama 10 la ona li kama e nanpa 0 la 10 en 0 li kama wan li kama 100 la 1000 la 10000 la 100000 la mun Kekan San li pana e ona tawa jan lili.

jan lili li kepeken nasin utala ona. open la ona li tawa nasa e luka ona la 100000 li kama 10^6. jan lili li tawa e ^ tawa mun Kekan San. ante la, ona li tawa sin e luka ona la 10 6 li kama 2+5 2+3. jan lili li tawa sama e + tawa mun. pini la ona li tawa nasa e luka ona la 2 5 2 3 li kama 1Y1 1Y1Y1Y1Y1 1Y1 1Y1Y1. jan lili li tawa e Y ale a tawa mun! jan lili li pilin e 1 mute lon selo ona. jan lili li toki e ni: “i i i, ni li kama e mu musi tan mi.”

taso, ^ en + en Y li pakala mute e mun Kekan San. ona li mu e ni: “aaaaaa!” ona li moli. pona a.

pini la jan pi ma ni li pilin pona lon tenpo ale kama.