ilo toki

tan jan Peton

mute nimi: lili, LAMT

tenpo pini suli la, ilo ni li kama lon:

jan li ken toki kepeken ona.

ona li ante e toki pi jan ale

tawa nasin toki pi jan ante ale.

ona la jan ale

li ken toki kulupu,

li ken kulupu toki.

toki ale jan li ken wan lon ilo.

sona pi jan ale li ken wan tan ilo.

tenpo open ilo la pona mute li lon

tawa jan ale

tan toki

tan sona.

ni li pona a tawa jan:

ilo li ken

e sona

e toki

e pona.

tenpo li tawa la

ilo li awen ken e toki jan.

tenpo pi ilo ala

li weka

li weka

li weka.

sona kin pi tenpo ni li weka.

jan li ken toki kepeken ilo la

ona li pilin e ni:

toki ale o kepeken ilo.

lon la jan li awen toki ante,

taso ilo la,

toki ale li kama wan

lon pilin jan,

lon sona jan.

mama li toki tawa jan lili ona

kepeken uta ala,

kepeken kalama ala,

kepeken sijelo ala,

kepeken ilo taso.

jan lili li kute e mama ona

kepeken kute ala,

kepeken lukin ala,

kepeken pilin ala,

kepeken ilo taso.

ale li toki kepeken ilo taso la jan ale

li kama toki lon nasin ona,

li sona ala e toki pi jan ante,

li sona e toki ona taso.

ilo li ken e toki ale.

nasin toki pi jan ale li ante.

jan ale li toki lon nasin ona taso.

taso jan li sona ala e ante ni

tan pali awen ilo.

ilo li awen ken

e toki jan

e sona jan.

jan ale li toki kepeken ilo taso la

ona li ken ala toki kepeken ilo ala:

nasin toki pi jan ale li ante mute.

ilo li pakala.

pakala ilo la jan

li ken ala toki tawa jan ante

li ken ala kama sona e nasin ilo.

jan li wile pona e ilo

li ken ala

tan sona ala

tan toki ala.

ilo li moli,

la jan li ken ala sona e toki pi jan ante;

la mama li ken ala toki tawa jan lili ona;

la jan ale o toki uta sin.

taso toki pi jan ale li ante.

jan ale la toki pi jan ante ale li nasa.

ilo li lon la jan li sona ala e ni:

jan ale li toki ante.

taso ilo li weka la,

sona ni li kama: toki pi jan ale li ante.

sona ni li weka: jan ante li toki e seme.

ilo ala la

ken toki li weka;

ken sona li weka.

jan li ken ala toki

li ken lukin taso

li ken pilin taso.

jan li kama lon poka

li lukin

li pilin.

mama li ken ala toki tawa jan lili ona,

taso ona li olin e ona

li pilin e ona.

jan lili li ken ala sona e wile pi mama ona,

taso ona li sona e olin ona,

li olin e ona.

jan ale li toki ala,

taso ona li pilin e jan ante

ona li kama sona sin e jan ante.

sona pilin la,

pona li kama sin.

toki li wile ala tawa sona ni.