kili
tan jan Simiman
mute nimi: lili, LWAMMLLLW
o sona e ken ike lon lipu ni
- nimi ku li lon
tenpo weka la soweli lili li tawa lon ma kasi suli.
lon uta ona la kili kiwen li lon.
kepeken linja monsi suli la soweli li
ken ante pona e nasin tawa.
ala li ken pini e ona.
soweli li wile lon kasi tomo ona.
ni la noka lili ona li tawa wawa.
sewi kasi la lupa ona li lon.
taso tenpo la kasi li awen lon weka.
tenpo suli la soweli li alasa e kili
li kulupu e ona ale lon tomo.
ni la ona li ken moku lon tenpo lete kin.
lipu kasi li kama loje sama linja soweli
li pana e kili mute a.
ni la tenpo lete li lon poka.
ni la kulupu kili li nena suli.
tenpo lili taso la kasi tomo li kama lon poka.
soweli li tawa sewi lon kasi.
ona li ken lukin e tomo.
soweli li lon lupa.
ona li kute e kalama pi noka ona.
taso kalama ni li nasa
li kama sin tan insa tomo.
kin la ona li pilin wawa ala e kon kili.
kepeken tenpo la soweli li lukin lon insa tomo.
nena kili li weka a.
seme li lanpan e moku ale?
soweli li pilin e kon.
ni la kon lili jaki li awen lon.
ona li kon kijetesantakalu.
soweli li ike wawa pilin.
kili ala la ona li ken ala moku lon lete.
ona o kama sin e kili ale a.
taso kili ona li lon seme?
soweli li sona ala.
ni la ona li open e alasa.
lon anpa kasi la soweli li pilin nena e ma
li alasa e kon kijetesantakalu.
ni la nena li lawa e soweli lon nasin kon.
kon li tawa ma weka
li lon poka telo
li wawa lon kasi pimeja pi insa ala.
kon ante kin li lon kasi.
ona li kon kili.
kasi pimeja la kijetesantakalu li mu lon lape.
poka kasi la nena kili li lon.
soweli li wile jo e kili ale
li wile weka e ona
li wile pana e ona tawa tomo.
taso luka li lili la ona li ken ala ni.
tomo li lon weka la ona li ken ala ni
tenpo li lili la ona li ken ala ni
suno li tawa anpa.
pimeja li lon poka.
o sona e ni: kijetesantakalu li lape ala lon tenpo pimeja.
soweli o seme?
ona li sona.
soweli li pali e lupa lili lon ma.
kili wan li ken lon ona.
ni la soweli li len e lupa kepeken ma kepeken lipu.
ma poka la soweli li pali e lupa ante mute.
li pana e kili lon ni.
lupa ale la kili wan anu kili tu li ken lon.
pimeja li kama la nena kili li weka.
lukin la lupa li lon ala.
taso soweli li sona e ma ale pi lupa kili.
li tawa tomo.
ona li lape a pilin.
kijetesantakalu li kama lape ala.
ona li wile moku.
ni la ona o telo e kili sin.
taso kili li weka.
kijetesantakalu li wawa ike pilin.
nasin seme la kili li weka.
ken la soweli li weka sin e ona.
ni la kijetesantakalu li tawa tomo soweli.
“soweli o, sina lon ala lon?”
“lon. kin la mi lape”
“sina weka ala weka e kili mi?”
“weka ala.
o lukin e ni: kili ala li lon tomo mi.
kin la luka mi li lili.
mi kulupu e kili lon tenpo suli.
mi ken ala weka e kili lon tenpo lili.
pilin mi la jan li weka e kili sina
li awen e ale lon tomo ona.”
“ale li pona.
sina weka ala e kili mi.
o lape pona.”
tan ni ale la soweli li kulupu e kili ale lon ala lupa wan
li len e ona lon lupa lili mute.
ni la kijetesantakalu ala li ken lanpan e kili ale.
kijetesantakalu li lon tomo sina
li lon poki jaki la o sona e ni: ona li alasa e kili weka.