utala pi toki musi #MAM/#LLW/#LLW

open

jan mute pi ma pona pi ilo Siko li sitelen e toki musi mute. jan mute a li pana e pali ona! taso kepeken nasin seme la mi ken sona e ni: seme li pona nanpa wan?

jan Le li pali e ilo nanpa lon ilo Siko. kulupu li toki e pilin ona kepeken nanpa ni. nanpa suli li toki e pona mute. kin la, jan Sonja (mama pi toki pona) li toki e ni: musi seme li pona suli tawa ona. lipu li kepeken sitelen mun ★ la musi li pona mute tawa jan Sonja. mute mun li suli la musi li pona a.

utala li pini la mi pali e lipu. lipu la sina ken lukin e toki musi ale. lipu ni li pona mute tan ni: musi ni li kepeken toki pona taso. mi wile e lipu mute sama ni a!

ilo sina li ken kama jo e lipu kepeken nimi ni: utala musi

kulupu la, toki musi seme li pona?

#W lon ma tomo pi tenpo pini suli - jan Kapilu ★★★
#T ona li monsuta e jan - kule epiku Atawan en kala pona Tonyu
#TW kalama waso - jan Ki ★
#TT mu - soweli nata
#L lon linja telo - jan Sitowapu
#LW taso, waso mi li laso - jan Jensi
#LT telo li kama - jan Tanije
#LTW lon sina - jan Kasipona
#LTT laso tu - jan Ne ★★
#LL tenpo weka - akesi kon Nalasuni

musi ante ale

wawa - jan Ajon
toki ala - apeja Akesi
mi wile e awen - jan Alon
kiwen telo sewi - jan Anulu
utala - jan Ateneja
tenpo ala la - jan Asuta
wan taso - jan Atape
ike Kolona - jan Awi
lon pi tenpo - jan Eko
kala Lepijatan - jan Enta
ni li lipu - jan inwin
o moku e telo pimeja! - jan pi sona ala
awen - jan tu
mun lili - kala loje lili
lipu pi jan wawa en kala - jan Kawa
nasin pi pona sijelo - kili kala
wile open - jan Lenoka
telo wawa - jan Lulu
wile pi weka ala - jan Mali
sama oko en oko ante - jan Naso
kala nasa - jan Niko
soweli ali li tawa e kon sewi anu seme? - kapesi Pake
kule pi insa mi - jan Palo
mi tawa kon sewi - jan Pawato
lukin - jan Pitan
o toki pona - jan Piwan
nena kiwen mi - jan Pojeki
kama pi poki ala - jan Sasalin
musi mute - jan Seki
monsuta insa - jan Sami
o lukin e insa pi lawa mi - jan Sijo
alasa - jan Simu
kulupu pona pi mun weka - jan Sohuwa
nasin pona - jan Tumo

lon ma tomo pi tenpo pini suli

jan Kapilu

lon ma tomo pi tenpo pini suli,
la tomo ale li tan kiwen walo,
tan tenpo la tomo li anpa li pakala.

kasi mute li lawa e kulupu tomo,
insa pi ma ni la kasi pi kule ale li lon,
tan lupa pi kiwen walo la kasi lili li open.

sama kasi la pipi pi kule mute li lon,
ona li lon anpa kiwen li weka tan akesi,
waso suwi li jo e kule walo sama kiwen.

suno anpa la sewi li kama jelo li kama loje,
suno weka la mun li kama wawa,
pimeja li lon la kon li lete.

tenpo ni la jan ala li lon ma ni,
lon ma tomo pi jan ala,
la kalama pona li lon.

lon kiwen walo wan la toki ni li sitelen:
sama telo la ale li tawa,
o olin e tenpo ni, tenpo ante li lon ala.

ona li monsuta e jan

kule epiku Atawan en kala pona Tonyu

kalama waso

jan Ki

tenpo suno la waso li kalama
tan seme?

ona li moku.
ona li lape.
ona li unpa.
ona li moli.
kon li lon ala lon?
ona li sona ala
la ona li kalama li kalama li kalama.

mu

soweli nata

kon li mu li kama e lete
lete li mu tawa mi
tawa li tawa e kasi
waso li mu tawa ni
noka jan li mu tawa nasin
lipu kasi li mu tawa noka jan kin
soweli li wile e moku
pilin pona li kama tan pana jan sin

telo en kasi li mu tawa mama
li wan lon awen tan sewi
tenpo kama la pana li pini
la kule li kama lon seli
ale li awen lon suno
pona li kon pi ma ni
mi olin e mu pona ale
mu ale li olin e mi

lon linja telo

jan Sitowapu

ale li kama pona.
sewi laso li tawa.
mi lukin e sina la,
pilin ante a li kama.

mi awen la mi sona.
mi jo e pilin pona.
kule li mute la
mi sona ala.

ken la mi lape pona
lon linja telo.
ken la mi wan taso.

suwi suno li weka.
mi lukin e kule seme?
mi lukin ala lukin e
ni: pimeja li kama?

mi sona e pimeja lili.
mi sona ala e ni:
sina jo e wawa la
ike li insa.

ken la mi jo e pilin
lon linja telo.
ken la mi wan taso.

taso, waso mi li laso

jan Jensi

jan mute li jo e waso
waso ni li waso taso
waso jan li kule mute
taso, waso mi li laso

telo li kama

jan Tanije

telo li kama
tan sewi tan oko mi
tan ni: mi olin

lon sina

jan Kasipona

jan sama li tawa jan sona pona.
toki ona la, utala li kama tawa ma ni.
utala taso li ken pini e utala kama.
mi o utala lon poka pi jan sama mi.

taso, mi sona ala e nasin pona mi.
toki sina la, mi o moli e jan ala.
wile sina la, kon mi li tawa jan sewi.
sona ni la, mi wile ala utala.

tawa ni la, toki pi jan sona pona la,
sina o sitelen insa e ni:
jan ale li wile awen e ona.
jan li wile utala tan pilin ni.

sina li sijelo taso ala. sina li kulupu sina, li ma sina, li nasin sina,
li lon sina. sina ken sona e lon sina taso. tan ni la, o awen e sina.

laso tu

jan Ne

laso sewi
laso anpa

wan laso
lon tu

telo suli li pana sewi e luka.
sewi la ona li awen weka.

kon sewi li wile olin e telo.
wile la telo li ken ala.

taso ijo li lon. ijo li ken
wan e olin pakala awen.

sewi li lon e suno wawa.
telo li ken kama anpa ala.

telo anpa o!
suno o ken sewi e sina!

tenpo weka

akesi kon Nalasuni

kon ma li ike tan jan pi kon ike.
lawa li pakala tan lawa pakala.
suno li len. seli li lon.
sewi o kama. mi wile kon.

wawa

jan Ajon

ilo utala li wawa lili.
ilo sitelen li wawa mute.
luka li wawa mute mute.

toki ala

apeja Akesi

ali li powe a! ali li nasa li lon ma apeja a! ali li ike mute. kin, kon sewi en kon anpa li ike kin a!

sina lukin e ni la, jan ali li pakala. ma mi li kipisi tawa ma mute. kalama muse li pake.

mi lukin e soweli mi tan jasima mi. ni li lukin pona li lape. taso tenpo ni la, soweli mi li moli a! ali li ala. ali li powe li moli a! akesi en pipi pi tomo mi li ala. kin, telo ali sina li loje. telo sina li ala.

ali li ala mute! mi wile e pata wan taso. taso tenpo ni la, mi en pata mi li moli. ni li toki majuna. mi lanpan e lipu leko pi tenpo mute. mi lukin monsuta taso mi monsuta kin! mi utala e monsuta, taso mi utala taso e mi.

kin, jan sewi li moli. tenpo ali la jan sewi li moli. mi moli e ona. mi ken pilin e pona anu seme? mi ken pali ala pali musi tawa pilin pona? pata o, mi pilin e ike a! a! a!

o toki ala! ali li ala. o toki tawa nanpa luka luka kepeken mi.

wan, tu, tu wan… suno ali li kama tawa sina. suno ali li pini e ali. tu tu, luka, luka wan… o kama tawa tomo sina. o kama tawa jan sewi. luka tu, luka tu wan, luka tu tu… tenpo ni la sina li pona. tenpo ni la sina li tomo. luka luka….

mi wile e awen

jan Alon

mi wile e awen.
taso, ale li tawa.
jan li tawa.
tenpo li tawa.

mi wile sona e ijo sin mute.
taso, lawa mi li mute ike e ni.
tenpo sama la pilin mi mute.
mi sona ala e ni.

tenpo kama ale la mi toki pona.
ken la weka e pilin ike lon lawa mi.
ken la mi sona e ni: ante li pona.
ken la mi awen.

kiwen telo sewi

jan Anulu

telo insa la
kiwen walo lili li lon.
kulupu telo la kiwen ni li sewi
tan ni:
mama kulupu li pana e kon ma
tawa kiwen walo.

tenpo pini la
mama pi jan ale
li pali e kulupu ma.
kon ma li lawa sewi.

telo pakala kama la
ma kama lon ala.
ale li telo.

tenpo pi telo sin la
lawa ma li lon ala.
tenpo ni la
sona telo li lon tan ni:
jan ale ken pilin
e kiwen walo lili la
kon ma li lawa a.

utala

jan Ateneja

sina olin e utala.
taso sina sona ala:
utala li ike e sina.
tenpo ala la,
ala li pona.

tenpo ala la

jan Asuta

olin la, mi tu li jan weka ala.
sina sona e nasin. mi sona kin.
mi lape, li sitelen e awen suli
sina kama jo ala e ni tan mije ante
mi wile toki tawa sina e pilin mi
mi o pana sona e sina

tenpo ala la mi pana e sina
tenpo ala la mi anpa e sina
tenpo ala la mi tawa weka, li weka e sina
sina pilin ike ala tan mi
tawa pona la, mi toki ala e ni
tenpo ala la mi toki ike, li pakala sina

tenpo suli la mi tu li jan pona
insa sina li pakala, taso sina pilin lili, li toki ala
mi tu li sona e lon a
mi tu li sona e musi, li wile musi e ona

sina wile sona e pilin mi la,
o toki ala e ni: sina ken ala lukin.

tenpo ala la mi pana e sina
tenpo ala la mi anpa e sina
tenpo ala la mi tawa weka, li weka e sina
sina pilin ike ala tan mi
tawa pona la, mi toki ala e ni
tenpo ala la mi toki ike, li pakala sina.

wan taso

jan Atape

mi wan taso.
ni li ijo ike
li ijo pona.
ijo pona li ni:
mi ken pali e ale.
taso mi wan taso
la mi ken ala toki
tawa jan ante.

ike Kolona

jan Awi

ike Kolona li pona ala.
taso mi ali ken pini e ni.
jan ali li weka e sama la,
jan ali li weka e ike ni.

lon pi tenpo

jan Eko

toki weka ale li kalama lon ike.
ijo wan li kama la ni li tawa pini,
tenpo wan kama la kasi kule kin,
en lukin pi ma pona li kama lon ala.

taso toki weka li ike ale ala.
ijo wan li tawa la ni li kama pini,
jan li moku wan e kon li pana wan e kon la,
tawa kon pi toki ni en tenpo li sama.

ale li kama lon li awen ale ala,
tan ni la tenpo li kama ala moli.

kala Lepijatan

jan Enta

ijo li alasa lon anpa telo mute pimeja.
mi lukin e kiwen walo mute pi uta ona.

kiwen monsi en selo kala
li tawa nasa lon anpa mi
la lipu suli kon en kon utala
li tawa nasa lon sewi mi.

kala ike ni li lukin e mi lili taso
la telo sijelo mi li lete sama telo laso.

ona li kama la mi kalama ala.
uta ona li open la lon mi li pini.
ona li moku la mi moku la
kala Lepijatan li pilin pona suli.

ni li lipu

jan inwin

ni li lipu pi
musi pi musi toki
pi toki pona

o moku e telo pimeja!

jan pi sona ala

o moku e telo pimeja!
ona li seli.
ona li pana e wawa tawa sina.
ona li pimeja e kiwen uta sina.
ale li kama pona.

awen

jan tu

ken la pilin li awen tan weka ala mi
ken la mi awen tan pilin mi
ona li sona ala sona e ni: mi awen ala lili, taso mi weka ala kin?
mi o pilin ala pilin ike tan awen mi lon tomo ni - tomo pi awen pilin mi?

mun lili

kala loje lili

mun lili li suno lon laso pimeja.
mi lukin e ona lon tenpo ni.
mi toki e sina. kin ona li kute.
ni li pilin pona e mi.

mun lili li suwi lon tenpo mun ni a.
kin kala li lon telo linja ni.
mi toki. mi pilin. kin mi kama wile:
mi li pilin pona e ni.

lipu pi jan wawa en kala

jan Kawa

tenpo pini la, ali li lon ala.
taso la jan wawa li lon.
jan wawa li pali e kala.
jan wawa li kon e kon.
kala li pali lape e mi, e ali, e sina.
ali li sin a.

jan wawa li jo e lape. jan wawa li pali e ona.
ona li pali e ali.
jan wawa li toki e ni tawa ali: “ona li pona.”
jan wawa li toki tawa kala pali:
“sina pona. mi wile ijo wan taso…”
kala li toki:
“mi pali e ali. sina wile e seme, anu waso?”
jan wawa li jo e poki:
poki pi lukin ala.
jan wawa li toki e ni: “mi wile pana e ni tawa kala.”
kala li toki e ni: “ni li seme? mi ken lukin ala e ni.”
jan wawa li toki e ni: “ni li poki pi lukin ala. ona li jo e jan. mi wile e ni… o jo e poki mi.”

kala li toki e ni: “ona li pona ala pona? sina wile ala wile pana e ni tawa mi?”
jan wawa li toki e ni: “ona li pona… li ike. tenpo kama la ona li lawa e ali, tan ni: sina o wile esun e pona ali.”

kala li toki e ni “mi wile e pilin lawa” tawa jan wawa.
kala li tawa li pilin lawa.

tenpo pini la kala li weka, tan ni: tenpo ni la kala li lon ni.
kala li toki e ni tawa jan wawa: “esun sina li mani mute, tan ni: jan li pona tawa mi.”

jan wawa li toki e ni: “ona li pona.” tenpo ni la kala li jo e poki jan.
kala li open e poki jan.
jan ni li jan pi nanpa wan.
kala li pali e jan pi nanpa tu. jan ni tu li jo e jan lili.
jan lili li jo e jan lili.
tenpo ni la jan li lawa e ali.

ni li pini.

nasin pi pona sijelo

kili kala

o tawa ma!

wile open

jan Lenoka

nasin pini la
ale mi li lon ala.
mi toki e ni:
mi taso li
ken nasin
e ale mi.

wile mi li open
li ijo ale ken
li kute e lawa mi.
mi lawa e pali mi.
sewi en
mun li lawa ala.
tu ni en
mi li sama ala.

nasin pini li lon ala.
taso mi ken ala
lawa e tenpo kama.
tenpo kama li open mute.
(ale o, sina o kute.)
mi lawa ala
e tenpo kama.
taso
mi ken lawa
e pilin mi ona.
pilin mi la
ale li pona.

telo wawa

jan Lulu

pilin mi li
awen ala lon
poki, li telo.

ma pona ni la
kalama utala li
kama tawa mi.
kon lete li wawa.
taso mi wawa mute.

wile pi weka ala

jan Mali

sona mi li suli ala. taso mi wile sona
e sina.
sinpin loje li toki ala. taso sike mi li sike
e sina.
wile ni li seme? ken la mi pakala.
sina weka la, mi lon pimeja…
ala!
sona mi li suli ala. taso pilin ni suli
li tawa tan uta:
sina lon poka la
ale mi li pona. o!
o…

sama oko en oko ante

jan Naso

ken la ale li utala ala lon utala:
kasi kule li lon kon wawa,
pipi-waso kiwen,
jan lili li lon
suli pi nena seli.

lukin o: kasi lili li kiwen lili, suno
li telo, telo suli kin
li poki kasi pi kasi seli.
kasi suli li pini la,
tomo waso li open.

sama sina en mi li wan (sina-mi-
wan). sama selo walo pi telo
en telo kin li tawa pi telo suli.
sama oko en oko ante
li palin e lukin wan.

kala nasa

jan Niko

ale li sama linja nasa,
ona li wan taso, ale li lon ona
sina awen lon ona
li ken ala weka

soweli en jan li sama selo
li sama pipi, li moku tan selo
ni la, sina awen lon ona
li ken ala weka

soweli en jan li sama kala
kala li moku tawa jan en soweli
ona li wile ala moku
taso ona li ken ala weka

taso, kala nasa li wile ala
ni la, ona li moku ala tawa jan
jan ale o sama kala nasa
ni la, jan li ken weka

soweli ali li tawa e kon sewi anu seme?

kapesi Pake

tenpo pini la mi olin e soweli lili suwi pi noka po mi. ona li pona mute tawa mi. taso tenpo suno ni la, ona li moli.

jan sewi o, soweli mi li lon kon sewi? soweli ali li tawa e kon sewi anu seme? a, mi sona ala taso mi sona e ni: tenpo ali la mi olin e ona.

kule pi insa mi

jan Palo

jelo sama tempo pi seli kama,
suno seli, kon pi kasi kule.
tempo la mi pilin sama ni.

laso sama kon lete,
telo tawa pi nena suli, jan lili musi.
tempo la mi pilin sama ni.

walo pimeja sama wawa lili,
ma tomo ni, kalama pi tomo tawa.
tempo la mi pilin sama ni.

pimeja sama lupa,
tempo pini ala, tempo kama ala.
tempo la mi pilin sama ni.

mi tawa kon sewi

jan Pawato

ni li kasi. ona lukin sewi e mun. mun sewi li tenpo pimeja.
ona wile li ona palisa tawa sewi e mun suno.
ona sona li tawa sewi ala. ona pilin ala e kon sewi.
tan sewi e pipi suno li waso e anpa. ona lukin e ni pana suno.
ona sona li ona pilin ala e kon sewi.
ale ona sitelen lape li weka sama li suno mun lon telo suli.
ona li wile e ni, taso sona ona la ni li lon ala. ni ijo li pona lukin ken olin e kasi.

lukin

jan Pitan

mi lukin e sewi
sewi lukin e mi
sama oko a!

o toki pona

jan Piwan

jan pona mi o
o toki pona
kepeken wile pona sina.
tenpo pona la o toki pona
li pana e pona tawa mi.
tempo ike kin la o toki pona
li pona e ike sina.
tenpo ali la o toki pona
li lukin li pilin li sona e ali
kepeken nasin pi pona mute.

nena kiwen mi

jan Pojeki

sina weka tawa mi
ni la nena kiwen li
tomo mi lon kon suli.
oko mi o, o pini
pana e telo ni, a!
nasa seme li sina?

kama pi poki ala

jan Sasalin

ike lon pilin mi o,
sina sama ko telo.
alasa la mi kama
lon oko pi laso ma.
loje sin li len e mi.
luka mi li akesi.
sewi la mi toki e
sina, e ali, e mi ante.

musi mute

jan Seki

mi musi, musi li pona
musi, en musi, en musi
tenpo ali la musi, mu mi
ike tawa mi, ni li. Poka

musi li pona ala
musi li ala pona

musi li pona tawa mi
musi li ike tawa mi
musi li pini tawa mi

tenpo ni la, mi musi ala
tenpo ni la, pilin mi li ike
tenpo ni la, mi toki lon musi
tenpo ni la, mi lukin, mi nasa

mi sona ala, pini tan seme
mi wile pini, mi ken ala
mi pini ala, luka mi li lete
suno mi li pini, tenpo mi li anpa.

monsuta insa

jan Sami

monsuta li lon
insa pi jan ale

jan ale li wile wawa
tan nasin mani
sina jo e mani mute
la sina suli

mani li lon
la jan mute li anpa
li ken ala kama wawa

nasin mani li pakala
jan ale li sama taso
jan mute li ken ala moku
kon moli li awen lon ma ale

monsuta li mani
tenpo pi mani ala la
pona taso li lon
insa pi jan ale

o lukin e insa pi lawa mi

jan Sijo

o lukin e insa pi lawa mi
sina ken la.
o lukin e pilin mi
e pilin pona mi
e pilin ike mi.
o lukin e ma suli lon insa pi lawa mi,
e kasi suli laso
e soweli lili pimeja.
sewi en supa noka li walo lon insa pi lawa mi
taso, ni li ijo pona lili.
tenpo pini lili la, sina lukin e insa pi lawa mi.
tenpo ni la, mi wile pali e ijo sama a.
tawa pona.

alasa

jan Simu

jan mije li tawa alasa e waso,
soweli li kama lon poka li mu.
jan li kama anpa telo sama kiwen,
soweli li moku e kala tan ni.

jan mije li kama li telo e kiwen,
soweli li tawa e waso tan ni.
jan li moku lon anpa alasa kala,
soweli li kama poka sama mu.

jan kala li anpa e moku tan poka,
soweli li alasa mije e ni.
jan li kama waso li lon sama telo,
soweli li tawa mu kiwen kama.

kulupu pona pi mun weka

jan Sohuwa

anpa e mun loje.
mun weka li sama kule e telo nasa loje.

soweli pona li moku e moku mi.
taso, mi lukin e ni:

kule mun li tawa e pimeja. sina toki e a!
mi lukin e uta pona sina.

mi jo tawa e kon la mi pilin e ni:
mun weka en soweli pona en sina en mi wan e ali.

nasin pona

jan Tumo

ante li awen
lon tenpo ale.
ni li nasin
pi ijo ale.