Nasi

mi weka tan kipisi tomo mi, li open e lupa tawa tomo suli. ale tomo li walo. jan mute li lon. supa suli li lon, li jo e moku e ilo lon sewi ona. supa li sike lukin. jan mute li moku li kepeken lon supa. jan mute li toki tawa ilo. ona li wile sona e sona sin, e pilin jan, e ni: ma li seme lukin lon tenpo suno ni?

"suno pona tawa sina. sina wile tawa seme?"
"o tawa tomo pali."
"pona. mi tawa tomo pali nanpa luka tu tu pi kulupu Nokasi e sina. ni li kepeken mani luka. esun la o pana e luka sina ta-"

mi pana e luka mi tawa ilo pilin, sama tenpo ale. ni li sin ala tawa mi. ona li awen toki e ni lon tenpo ale la ni li ike tawa mi.

ilo li toki e mani awen, li tawa e mi, sama tenpo ale. mi open kepeken ilo ni.. nn.. lon tenpo sike.. luka tu pini? la mi pilin monsuta tan ona (ona li tawa e mi lon kon, ma ala li lon anpa). taso tenpo ni la mi kama pilin ala tan ona.

mi lukin e weka (taso, weka suli ala) la mi lukin e sitelen mute. sitelen li sama mun lon sewi, taso sewi ni li sewi ala, li lon poka mi. sitelen li suno wawa li kule mute li jo e toki. tenpo suno pi sama ni la, kulupu esun mute li wile pana e toki ona lon sitelen. taso mi wile ala lukin e ona. ona ale li toki e ijo ike. mi alasa e nasin lon ilo mi la mi ken weka e sitelen taso ona li lon ala ilo mi.

"tenpo seme li awen?"
"tenpo ilo luka tu li awen. sina wile lili e tenpo ni la o kepeken misikeke tenpo. esun la o-"
"wile ala."

misikeke tenpo li nasa a. mi alasa moku ala e ona, taso tenpo la mi ni. mi moku la ona li pana e pilin nasa lon lawa mi, sama pilin lape, taso nasa pi suli tawa ni.

ijo ale li ante mute ala. tenpo suno ni li sama ona pini. ni la tenpo li lili pilin. ona li sama misikeke tenpo taso kepeken ala misikeke. n, pilin mi la, misikeke tenpo li pali kepeken nasin ni...

"tenpo ni la sina lon tomo pali nanpa luka tu tu pi kulupu Nokasi. o pali pona!"

mi weka tan ilo tawa, li kama tawa ilo ante. ilo tawa li tawa ma ante.

"o kama pona, jan Sepe o."

lupa li open. mi lukin e jan pali mute. ona ale li jo e len sama- A! PAKALA. ni li weka tan lawa mi: mi o len e len pali! pakalaaaaaaaaaa pona la ilo tawa li weka suli ala. mi kalama wawa: "ILO TAWA O!". ilo li kama sin tawa mi. mi tawa lon ona.

"o tawa tomo mi."
"pona. mi tawa tomo pi jan Sepe e sina. ni li kepeken mani luka. esun la-"
"pona. mani awen sina li tu ale mute luka."

mi pana e kon tan uta mi. mi pilin ike.

"sina kama lon tomo pi jan Sepe lon tenpo ilo luka tu wan. sina wile lili e tenpo ni la o kepeken misi-"
"wile. ala."

tenpo li tawa. jan lawa pali mi li kama wile sona e ni tan mi: tan seme la mi kepeken tenpo mute tawa ni: mi kama lon tomo pali.

mi kama sin lon tomo mi, li toki tawa ilo la ona li pana e len pali tawa mi. sin la, mi tawa tomo pali. ilo li lukin sin e mi, li open sin e lupa. mi lukin e jan ante ale. ona ale li pali. mi o tawa kipisi tomo mi.

mi pini e pali pi tenpo suno ni. pali ni li ike a tawa mi. ona li kepeken wawa mute li pana e mani lili... mi tawa tomo mi...

"o tawa tomo mi."
"pona. mi tawa tomo pi jan Sepe e sina. ni li kepeken mani luka. es-"
"pona. mani awen sina li tu ale mute mute."

mi weka tan ilo, li kama lon tomo mi. mi tawa supa lape. mi pilin lape tan pali.

"seme li sin?"
"ike la, ilo li pakala lon tenpo ni. o alasa sin lon tenpo kama."

seme a? ilo li kama ala pakala lon tenpo suli a! ni li nasa a. mi alasa sin.

"seme li sin?"
"ike la, ilo li pakala lon tenpo ni. o alasa sin lon tenpo kama."

..nn.. mi o kepeken nasin pi ilo ala. mi luka e ilo la ilo toki o kama.

"o kama pona tawa ilo toki. sina lukin ala e toki pi jan tu wan. sina wile ala wile lukin?"
"wile."

..a, lon, ni li pali ala. mi luka e nena wile.

toki li kama lon ilo.

...seme?

jan Nu li seme?

"o pana e toki ante."

...

"...o... pana e toki ante."

...seme aaaaa. tenpo ni la mi sona e ijo ala. jan ni li SEME. ona li sona e nimi mi e nanpa len mi kepeken SEME. tan seme la ona li wile toki tawa mi?? nasin seme la jan pona mi li sona e ona?? mi o tawa ala tawa?? kin la ona li toki e ijo nasa a... ona li tan ala ma Nasi?? ni ale li pini lon tenpo weka a. jan ale li tan ma Nasi. ma Nasi li wan e kulupu jan ale.

nn, ike seme li ken kama. mi tawa tomo pi wile ona. taso kulupu Epesi li seme? mi kute ala e nimi ni lon tenpo.

"ilo tawa o... o tawa tomo pali pi kulupu lawa."
"pona. mi tawa tomo pali pi kulupu lawa e sina. ni li kepeken mani ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale"

seme a. n, pakala ilo li lon anu seme. ni la mi tawa noka. tenpo mute ala la mi ni.

la mi open tawa noka.

mi sona ala e ni: tomo ni li lon ma seme? mi o kama sona tan jan.

"o! sina o!"

ona li lukin ala e mi...

"sina o! sina sona ala sona e nasin tawa tomo pali pi kulupu lawa?"
"n, seme, nn o kepeken ilo tawa."
"ilo tawa li pakala, mi sona ala e tan."
"pakala seme? ilo li ken ala pakala."
"ona li ni a. sina sona ala sona e nasin? mi ken tawa noka."
"nn o tawa sinpin mute, la o tawa poka, la o tawa sinpin sin."
"pona."

mi open tawa sinpin. lon poka la, supa ala li lon. kon taso li lon. jan li tawa lon ona la ona li kama anpa li moli. ni li monsuta lili. ilo tawa mute li lon, ona ale li pali pona, li pakala ala.

"moku pona sin li lon poka sina! o moku lon tenpo ni a!"
"ala"

toki mani li ike a. ilo li pana e ona lon tenpo mute.

"o weka e jaki tan lawa sina kepeken jan misikeke lawa!"
"ala"
"pilin ike tan pali? o tawa lon ma kasi lon tenpo esun wan! mani wile li mani mute ale taso!"
"ala"
"misikeke sin ni li pana e pilin nasa pona!"
"ala"
"sina tawa noka mute tan seme? jan misikeke li toki e ni: tawa noka mute lon tenpo suno li ken ike e sijelo!"
"ala"

ilo li sona e ni: mi tawa noka. toki o ni: "ilo li sona ala e seme?"

tenpo lili li tawa la mi wile alasa sin kepeken ilo tawa. mi toki tawa ilo pi lon poka mi.

"o tawa tomo pali pi kulupu lawa."
"pona. mi tawa tomo pali pi kulupu lawa e sina. ni li kepeken mani ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale ale"

..pakala, ona li awen pakala. taso seme la jan ante ale li alasa kepeken ilo la ona li pona? a! o lukin! jan ante li tawa lon ilo! ni li nasa aaaaaa.

mi awen tawa. ni li kepeken tenpo suli... ken la jan ni li nasa taso. ken la ni li musi, tan jan pona mi. taso jan pona mi li sona e nanpa len mi kepeken nasin seme? ni li ken ala musi. jan ni li wawa. mi o toki tawa ona. ken la ona li sona e ijo.

jan lon ilo tawa li pini e tawa ilo li toki e ni tawa mi:

"o! sina pali e seme! sina tawa noka tan seme?"
"ilo tawa li pakala."
"pakala seme? ilo li ken ala pakala. o lukin, mi kepeken ona!"

mi awen tawa. mi pilin lape. mi pilin moku li pilin nasa li wile lape-

"sina tawa lon tenpo suli! sina wile lape anu seme? o kama lon tomo lape!"
"ala."

nasa.

a, mi lon poka! mi ken lukin e tomo pali lon weka! sitelen suno suli li lon ona: "TOMO PALI PI KULUPU LAWA PI MA NASI". pona, mi lon tomo wile. mi tawa lon insa tomo. ona li walo mute a. mi awen jo e len pali, la jan li pilin e ni: mi wile toki e ijo esun. ni la, ona li tawa e mi tawa jan esun.

"ala a, mi wile kepeken ilo tawa sina, ni li ale-, a, ala, mi.. lon a! esun! o tawa e mi!"
"ilo tawa? ilo tawa ala li lon. sina toki e seme?"
"mi nasa. mi moku ala lon tenpo suli, a a. ilo tawa li lon selo tomo! tan seme la mi wile e ilo tawa lon ni, a a."

jan li tawa e mi. jan Nu li toki e ni tawa mi: jan ala o lukin e mi lon tenpo ni: mi kepeken ilo tawa. taso tenpo ni la ona li pilin nasa tan mi, li kama lukin wawa e mi lon tenpo ale.

ona li tawa mute e mi la mi kama lon poka pi jan esun. jan esun li mani lukin, li wawa lukin, li pona ale lukin. len ona li pimeja pimeja. sijelo ona li suli sama soweli. mi pilin monsuta lili. ona li open toki:

"toki, toki a! pona suli a!"
"s-seme-"
"sina wile sona e sona pi ilo Nasi sin anu seme! o sona: ni li pona suli! ona li ken pali e ijo mute, ona li wile e wawa lili!"

ona li kama e sitelen lon sinpin tomo.

"o lukin! ni li ilo! lukin la ona li sama ilo sina, taso ken ona li suli! jan ilo mute mute li pali lon ona! sinpin ilo ona li ken suli tawa suli pi ilo sina. ni la, sitelen tawa en sitelen ante mute li ken lon ona li ken suli tawa suli pi tenpo lon. ni li pona tawa jan, li pona tawa mani kin. sitelen li suli la lukin jan li suli. lukin jan li suli la mani pana li suli. a a a a a!"
"mi-"
"mi sona! sina wile sona e mani wile. kepeken mani tu tu mute ale wan ale la kulupu mi li ken pali e ilo sama ni, li pana e ona tawa jan mute!"
"ale wan.. ale?"
"mani wile li suli a, taso o sona e ni: mani sina li kama suli kin! a a a a a-"

ilo toki ona li mu. ona li kama toki uta tawa jan ante kepeken ilo.

"toki. o awen lili, mi toki e ilo tawa jan Epa. s-seme? ni li jan Epa al- ... sona... sona."
"..."
"sina. sina SEME."
"mi... jan Sepe."
"..."

mi toki e ni la ona li tawa wawa tawa mi. ona li jo wawa e luka mi, la mi ken ala tawa e ona.

"SEME A! SINA PALI E SEME?"
"NI LI WILE PI JAN LAWA. SINA JO E KEN PI TOKI ALA. TOKI ALE SINA LI KEN KEPEKEN TAWA UTALA SINA."
"MI- MI PALI E SEME??"

seme a li KAMA?? jan Nu li kama pakala e mi! jan pona mi li toki lon! mi o kute ala a e toki ona. tenpo kama la mi lon tomo awen a!

"mi.. mi wile ala lon tomo awen. pona la o pana ala e mi tawa tomo awen. mi jan pona! mi wile ala e pakala!"
"o toki e ni tawa jan lawa."

jan esun li pana e mi tawa selo pi kipisi tomo ona. ona li toki e ni tawa jan pali: "ni li jan Sepe, jan lawa li toki e ni: o pana e ona lon tomo awen."

jan pali li kama jo e mi kepeken luka wawa ona, li kama jo e ilo mi. ona li luka e ijo lon ilo - mi ken ala lukin pona e ona - taso ona li ni la ilo mi li kama pali ala. sinpin ona li weka, mi ken ala lukin e ona, li ken ala toki tawa ona. jan pali li tawa e mi lon ilo tawa pi kulupu lawa. sama ilo ni: jan Nu li toki e ni tawa mi: o kepeken ona.

mi toki mute ala. mi pilin nasa suli. tenpo suno pini la ale li pona. seme li kama a? jan Nu li kama toki tawa mi tan seme a??

mi ale li kama lon tomo awen. lupa mute mute a li lon. ona li luka e ijo lon ilo mi, la lupa wan li open.

"o tawa tomo awen sina."
"...mi tawa."
"pona."
"...taso, sina pali e ni tan seme? lawa seme la mi pakala lon ona?"
"..."
"..."

mi tawa tomo awen la, ona li pini e suno. ale li pimeja. ilo mi li kama pali, li pana e suno lili, taso mi ken ala luka e ona, li ken ala toki tawa ona. ilo la, sitelen ni taso li lon: "JAN IKE #273".

tenpo suli li tawa. mi lape, li weka lape. mi sona ala e ni: tenpo li suno anu pimeja. mi pilin ike suli, li wile kama sama tenpo ale. lon tomo mi, li pali lon tenpo, li moku lon tenpo. la, ni li kama: ilo mi li pana e mu! ni li sin a! mi lukin e ona la ona li toki e ni: "jan Nu li wile toki uta tawa sina".

SEME. A. ALA. MI WILE ALA TOKI TAWA SINA. O WEKA TAN MI.

...taso mi toki tawa ona.

"JAN NU O SINA SEME E MI-"
"O PINI E UTA SINA! jan li kama kute e sina! o kute. mi ken weka e sina tan tomo awen."
"tan seme la mi LON tomo awen??"
"tan ni: jan lawa li sona e ni: sina toki tawa mi."
"mi toki ala tawa sina! SINA toki tawa mi a!"
"suli ala. tenpo ni la, mi open e lupa. o tawa kepeken tenpo lili, taso o kalama ala."
"...pona... o ni..."

ona li musi ala a! lupa li open. mi weka tan kipisi mi, li tawa wawa a, li kama lon monsi pi sinpin tomo. mi sona ala e ni: nasin seme la mi ken weka tan tomo ni.

"mi tawa. ni la seme?"
"sina lukin ala lukin e nena 'OPEN'. o luka e ni."
"PONA! lupa li open! mi ken lukin e ma!"
"o tawa kepeken tenpo lili. mi awen wile toki tawa sina. taso tenpo ni la o nasa ala, o len e sina. jan ala o lukin e sina lon tomo pali pi kulupu lawa."
"sina wile toki tawa mi?? mi wile ala toki tawa sina. mi weka tan sina a!"
"mi ken pana sin e sina lon tomo awen."
"... nasin seme la sina ken lawa e tomo awen?"
"suli ala. o pali e toki mi. jan mute li lape la o tawa sin tomo pali. o tawa lon anpa tomo la ilo tawa li lon. o toki tawa ona kepeken kalama lili. jan ala o kute e sina. o tawa tomo pali nanpa tu pi kulupu Epesi kepeken ona."
"...pona, jan Nu o. sina nasa."
"a a, mi sona. jan ale li toki sama ni."
"jan... ale? sina pali ala pali e ni tawa jan ante?"
"pali, a."
"... sina... seme?"
"mi toki e ni tawa sina lon tomo pi kulupu Epesi."

mi open weka tan lape, taso mi awen wile lape sin. lukin la, jan mute ala li lon. la, ni li tenpo pimeja anu seme. mi tawa tomo pali pi kulupu lawa. ona li lon poka a pi tomo awen. jan wan taso li lon. mi tawa sama pipi, la ona li ken ala lukin e mi. ni li pana e pilin pi MONSUTA SULI A. mi tawa... lili... kepeken tenpo suli... A, ONA LI LUKIN E MI. mi tawa wawa. mi tawa WAWA A! mi tawa lon anpa, sama toki pi jan Nu. mi kama lon ilo tawa. jan pali li toki.

"O PINI! SINA PALI E SEME! ILO NI LI ILO PI JAN PALI TASO. O WEKA LON TENPO NI, ANU LA MI AWEN E SINA LON TOMO AWEN."
"ILO O TAWA TOMO PALI NANPA TU PI KULUPU EPESI."
"SEME? KULUPU NI LI SE-"

"ALA. O PINI. O PINI TAWA. MI TOKI TAWA JAN LAWA SULI."
"a a, mi ken ala kute e sina! ilo li tawa wawa!"

...nasa. seme la jan pali kin li sona ala e ni: kulupu Epesi li seme. ni li nasa suli. mi sona e ijo ala a.

"ni li kepeken tenpo ilo suli tu tu. o moku e misikeke tenpo!"

...s-seme? kepeken... mani ala? tenpo ale la misikeke tenpo li kepeken mani mute a! nn, mi ken ala moku ala e ni, ona li mani ala a!

mi moku e mis

ikeke te

npo

la.. a.. ilo li pini tawa. misikeke ni li wawa a! ante la mi moku e misikeke tenpo la ona li wawa ala sama ni!

a, ni li kulupu Epesi, anu seme! mi... mi lukin ala e ijo sama ni lon tenpo-

"a, toki! sina jan sin anu seme?"
"mi... lon, a, mi jan sin."
"nimi sina li seme? mi jan Kasu!"
"mi... nimi... nimi mi?"
"a a, seme a! sina moku e misikeke tenpo wawa lon tenpo nanpa wan, anu seme? a a a, mi sona e pilin. o kama lon insa. sina ken kepeken supa lape mi."
"supa... supa lape... lape... tenpo li seme?"
"tenpo ilo nanpa luka a!"
"a, pakala. tenpo suno li lon poka."
"ni li suli ala. jan lon kulupu ni li lape lon tenpo wile. taso, suli la, sina pini e pali sina pi tenpo esun. pona la o lape pona, la tenpo suno kama la mi tu li tawa jan lawa, li sona e pali wile pi tenpo esun ni!"
"nn... pona. sina pona."

mi tawa lon insa tomo. mi ken ala pilin. misikeke tenpo en lape ike en pilin monsuta li nasa e mi. jan Kasu li tawa supa lape ona e mi. jan ante li lukin e mi tu, li toki.

"a, jan sin? ni li nasa. jan sin li kama lon tenpo mute ala a! ona li nasa ala nasa tan misikeke tenpo?"
"nasa a."
"a a, o pilin ike ala. sina moku mute la ona li kama pona tawa sina."

mi kama lon kipisi tomo pi jan Kasu. nasa la, ona li pilin lape, lon tenpo ilo nanpa luka a! tan seme la ona li lape ala lon tenpo ni? ante la, ona li pini e suno.

"mi kama lape. o lape kin, lon supa ni! o weka ala tan kipisi tomo. mi wile ala e ni: sina tawa lon tomo ni lon poka ala mi."
"...pona. mi ken ni. o lape pona."

taso lon la mi wile ala lape. jan seme li ken lape lon ijo ni? tenpo pini la mi lon tomo awen! tenpo ni la mi lon tomo pali pi kulupu nasa! mi awen sona ala e ni: kulupu ni li seme li pali e seme. ilo mi li mu wawa. "jan Nu li wile toki uta tawa sina". mi luka e ona kepeken tenpo lili la ona li pini. mi alasa kalama lili a.

"jan Nu o! mi lon kipisi tomo pi jan ante! ona li lape. nimi ona li jan Kasu, sina sona ala sona e ona?"
"sona ala. kepeken tenpo lili la, o weka tan kipisi tomo."
"sina lon seme?"
"mi lon sewi. o tawa noka."
"pona. mi kama."

mi tawa kepeken tenpo suli, li pana e kalama lili kepeken noka, la jan Kasu li weka lape ala. mi kama lon poka lupa la ona li open. tenpo pini la mi ken ala lukin pona, taso tenpo ni la mi sona e ni: ale tomo li pimeja walo. kipisi tomo mute li lon, li lon poka. lupa pi kipisi ale li walo suno. mi tawa monsi tomo la sike leko li lon. mi tawa lon ona la mi kama lon sewi. mi tawa la, jan ante li lukin e mi.

"a, sina tawa seme? jan ala li lon sewi. kipisi tomo ale li jo e ijo ala."
"a.. pona.. mi jan sin. mi.. mi lukin taso.. e ale tomo, ni li ale."
"a a, o lukin pona! o kama pona tawa kulupu!"

mi lon sewi la mi lukin e jan ante. ni li jan Nu anu seme a! ona li pana e luka ona tawa mi!

"jan Sepe o! o kama!"
"jan... jan Nu o?"
"lon, ni li mi."
"..."
"o kama lon insa."

mi kama lon insa pi kipisi tomo. jan ante li toki e ni: jan ala li lon sewi, taso lukin la ona li toki ike.

"jan Nu o, sina pali lon kulupu ni, anu seme?"
"ala."
"sina seme a? sina wile e seme tan mi, li kama e mi tawa ni tan seme? tomo ni li weka suli tan tomo mi! sina sona e ijo mute mi kepeken seme? sina jan ike anu seme? sina kama moli e mi anu seme???"
"jan Sepe o. o pilin monsuta ala. mi pona taso e sina. o pana e ilo sina tawa mi."

mi pilin monsuta, taso mi pana e ilo mi tawa ona. ona li pana e palisa suli tawa sinpin ilo, la ilo li pana e kalama pakala lili, li pini. sinpin ona li weka.

"seme? sina seme e ilo mi?"
"mi pini e ona. o pilin monsuta ala, ona li pali e ni lon tomo awen kin."
"sina... pini e ona? sina sona e ni anu seme: sina ken luka e nena 'PINI' la ona li pini kin."
"a a, ala, ni li pini ala e ona. ni li pana e pilin ni taso: ona li pini. taso jan lawa li awen ken kute e sina kepeken ona."
"ni la, jan lawa li kute ala lon tenpo ni?"
"kute ala."
"ni li... pona. tenpo mute ala la jan lawa li kute ala e ale mi."
"mi sona. tan ni la mi toki tawa sina. mi lukin e sina, lon tenpo mute. mi tan ala ma Nasi. mi tan ma Nulan. mi sona e ni: sina kute ala e nimi 'ma Nulan' lon tenpo. ona li sama ala ma sina. ona la ale ma li tomo ala. kasi mute li lon. ilo li wile ala lon tenpo ale. jan lawa li lukin ala e sina lon tenpo ale."
"..."
"mi sona e ni: ni li pona tawa sina. sina sona e ike pi jan lawa. tan ni la mi toki tawa sina. jan mute ala li sona e ike pi jan lawa, li pali e wile ona taso. sama soweli. sina sona e ni."
"...mi sona e ni."
"..."
"taso... sina 'lukin' e mi kepeken nasin seme?"
"jan lawa li ken lukin e sina lon tenpo ale, la, mi kin li ken. mi jan ilo li pakala e ilo pi kulupu lawa. la mi ken lukin e jan ale, sama ken ona."
"...a... kepeken nasin ni la sina weka e mi tan tomo awen anu seme?"
"lon a."
"...kulupu ni li seme? kulupu Epesi li seme? mi kepeken ilo tawa pi kulupu lawa la jan pali wan li kute e wile tawa mi, li toki e ni: ona li sona ala e kulupu Epesi."
"jan pi mute lili a li sona e kulupu Epesi. ona li nimi len pi kulupu lawa. ni la ona li pali lon ijo len. sama utala..."
"...tan seme la sina toki ala tawa mi lon tomo ante? tan seme la mi tawa kepeken ilo tawa pi kulupu lawa li tawa tomo awen??"
"tan ni: mi wile weka e sina tan ma Nasi."
"sina wile SEME e mi?"
"sina ken weka tan ma Nasi, tan lukin ale pi jan lawa, tan mani lili, tan owe ale ni."
"sina toki e seme? jan Owe li seme?"
"a a a, nimi ni li lon ala ma sina anu seme."
"sina wile WEKA e mi tan ma Nasi?? ni li ken ala a!"
"ni li ken. mi sona e ni: sina wile e ni."
"la mi tawa ma Nulan, anu seme?"
"tawa a."
"...mi... mi sona ala..."
"mi sona, ni li suli li kepeken ala wawa lili. ante la, sina ken ala weka lon tenpo ni. mi kama e sina tawa tomo ni tan ni: ona la lupa tawa selo pi ma Nasi li lon. taso sina ken ala kepeken ona kepeken ala lipu wawa. jan pali ale li jo e lipu pali, lipu li toki e ni: sina wawa ala wawa sama ni: sina ken weka tan ma Nasi. ona li toki e ijo ante kin. lipu sina li kama wawa kepeken pali mute. ken la, sina o pali lon tenpo esun wan anu tu."
"...pali... lon tenpo esun? taso, pali ante mi la seme?"
"ni li suli ala a! tenpo kama lili la sina weka ale tan ona. kin la, o pilin pona. jan pali lon tomo ni li kama jo e mani mute a. sama ni: ona li ken esun e ijo ale."
"...nn. jan Nu o, pona la toki sina o lon. ni li ken ike suli tawa mi."
"o pilin awen. ike ala li kama tawa sina lon tenpo ni: mi lon poka sina."
"taso, mi tawa ma Nulan la.. tomo mi li seme? pali mi li seme? ale mi la seme?"
"ale li pona. ma Nulan li ken pana e tomo tawa sina."
"...tawa... mi? tan seme?"
"lon a! ma Nulan li pona sama ni."
"...ni li... ni li ken ala a! ...ni la, pali o open..."
"pona. o weka tan tomo ni. sina wile toki tawa mi la o kepeken ilo. tenpo suno kama la jan li pana e lipu pali tawa sina la ilo sina o lukin e ona, o kama kepeken linluwi pi kulupu Epesi. ni la, jan lon selo tomo - en jan lawa - li ken ala lukin e sina."
"pona. o awen pona."

toki ni li suli li nasa tawa mi. taso mi jo ala e ken ante. toki ona li lon la ni li pona. ma Nulan a, nasa. pilin mi li kama monsuta suli ala. mi ken lape. mi o tawa sin kipisi tomo pi jan Kasu.

jan Kasu li weka lape e mi. lukin la, ona kin li open weka tan lape. mi sona ala e tenpo.

"jan... sina... o, tenpo pali!"
"nn, tenpo mute ala la mi weka lape tan ala ilo.."
"a a.. tenpo suno ni li suli. jan ale li kama sona e pali pi tenpo esun. kin la, sina o kama jo e lipu pali. jan pali ale li jo e lipu pali."
"pona... mi pilin moku, tomo moku poka li lon ala lon"
"a a, tomo moku poka? sina tawa ala tomo ante. ale li lon tomo ni. kulupu Epesi li pali e moku pona a. o kama!"

ona li tawa weka pi kipisi tomo ona. mi tawa lon poka ona. mi en ona li kepeken ilo tawa.

"o tawa tomo moku!"
"pona. mi tawa tomo moku e sina."
"A, ilo tawa ni li tawa kepeken tenpo lili a!"
"a a, o awen e sina... a, pona, ni li tomo moku. o kama!"

taso mi alasa kama lon tomo moku la mi ken ala. ilo li mu tawa mi, kin.

"LIPU PALI LI WILE"
"..."
"LIPU PALI LI WILE"
"a, lon a... sina ken ala kama, sina jo ala e lipu pali. ni la o awen lon selo. mi kama e moku tawa sina. sina wile e moku seme?"
"...a, mi... mi sona al-"
"o awen taso. mi kama e moku pona tawa sina."

ona li kama sin, li jo e moku tu lon luka ona. ona li toki e ni tawa mi: mi tu o lon supa. ona li alasa e supa li tawa e mi.

"o jo e moku sina. ...nn, o toki, sina kama lon kulupu Epesi kepeken nasin seme?"
"...a, nn, mi... mi... ona li..."
"..."
"ona li... toki tawa mi."
"ona li toki tawa sina?"
"l-lon a! kulupu li toki tawa mi, li toki e ni: mi wile e ni: sina kama pali lon ni."
"taso ni li nasa suli a! jan ante ala li kama kepeken nasin ni..."
"a, nasa... nasin sina li seme?"
"tenpo pini la mi pali lon kulupu lawa pi ma Nasi la ona li wawa e mi."
"a, l-lon a! mi... sama! mi kin li pali lon kulupu lawa pi ma Nasi lon tenpo pini..."
"a, sina pali seme lon ona?"
"a, mi... nn, ike la mi sona ala... ni li lon tenpo weka a!"
"...tenpo, weka? taso sina kama sin lon tenpo suno pini!"
"a, lon, a... mi... mi pakala... lawa mi li ike taso..."
"..."
"..."
"...mi awen sona ala e nimi sina, kin."
"a, nimi.. mi... mi jan Sepe."
"pona. ...o awen lili. tenpo pini la jan pi nimi sama li lon tomo awen..."
"s-seme? sina sona e ni kepeken nasin seme??"
"mi ken lukin e sona pi tomo awen, ni li lon lipu pali mi..."
"a, ni li nasa! ken la nimi ona li sama nimi mi a!"
"..."

ona li lukin wawa e mi. oko ona li sama palisa utala, li kipisi e mi la ona li lukin e insa mi.

"nasa. ante la! o kama pona tawa kulupu Epesi, jan Sepe o!"
"...sina pona."
"moku li pona ala pona tawa sina?"
"pona... pona mute a. sina pona."
"o moku la sina ken kama jo e lipu pali! mi kama lon poka sina."

mi pini moku la mi tu li tawa sin lon ilo tawa.

"o tawa tomo pi jan sin."
"pona. mi tawa tomo pi jan sin e sina."
"AAA mi o awen e mi tan ilo nasa ni! ona li tawa wawa a."
"ona li kama pona tawa sina lon tenpo, a a."

mi tu li kama lon selo pi tomo pi jan sin. mi pilin monsuta. ken la ona li sona e ni: mi jan pali lon ala. ken la ona li kama sin e mi lon tomo awen. mi wile ala kama sin lon tomo awen... ala ala ala mi pilin ike MI PIL-

"ilo o pana e lipu e len tawa jan sin Sepe."

...a. ni li ale...

lipu en len li kama tan ilo. len li pona mute lukin li mani lukin, li pimeja walo. mi kama jo e ona. lipu la ni li lon:

"a, sina pona... tenpo ni la seme?"
"o tawa jan lawa! mi tu o sona e ni: pali seme li wile. o kama lon ilo! ilo o tawa jan lawa."
"pona. mi tawa jan lawa Kensi e sina."
"pona... taso, pali li... sama seme?"
"...jan li toki ala e ni tawa sina?"
"...nn, a-ala a..."
"nasa... n, o awen taso. jan lawa li toki e ale tawa sina. sina jan sin la, ken suli la pali li sama ni: sina lukin e toki jan li pana e toki ike tawa jan lawa."
"a... seme a-"
"a! o lukin, ni li tomo pi jan lawa! o kama!"

jan mute li lon linja jan. ona li tawa lon monsi linja. sinpin linja la tomo pi jan lawa li lon. jan li tawa lon insa, la ona li awen lili la ona li weka tan poka ante. mi pilin monsuta a. ilo li sona ala e lon ala mi la ken suli la jan lawa li sona! seme li kama a! ni ale li tan jan Nu aa. tan seme la mi kute e toki ona...

mi awen mute. tenpo li tawa. jan kin li tawa. tenpo ni la mi o tawa insa tomo.

"toki a! jan sin anu seme?"
"l-lon a.. mi jan sin."
"ni la... o lon supa, mi toki e nasin pali tawa sina. o pana e lipu sina tawa mi."
"...pona. o jo."
"a, sin nanpa wan. pona. jan Sepe? o kama pona, mi jan Kensi. sina sin la mi pana e pali lili tawa sina: sina o lukin e toki pi ilo toki lon ma Nasi. toki li ike la, sina pana e ona."
"s-seme? mi... lukin e toki? e toki pi jan ante?"
"ni a."
"..pi ilo toki.."
"seme a li lon sina? ni li toki mi. sina lukin e toki pi ilo toki pi ma Nasi. o lukin, ni li nasin: toki li ike la, sina luka e nena ni, la toki li kama tawa jan pali wawa."
"ike... sama.. sama seme?"
"nn, o nasa ala. sama ni: 'lawa li ike, jan lawa li ike'. kin la jan li toki e kulupu Epesi la ni li suli, o ken ala e ni."
"la mi... pana e ni tawa... jan pali... la seme li kama?"
"o pilin ala tan ni, jan pali ante li kama pona e ni."
"taso... ni li... ni li ike tawa jan.. anu seme. lukin mi tawa toki ale ona... anu.. seme.."
"..."
"..."
"o musi ala a a. ni li pilin sina la sina kama pali lon kulupu ni tan seme. o pali pona a o weka tan tomo! jan ante li wile sona e pali! mi wile lukin e ni: sina pana ala pana e toki lon pini pi tenpo esun."
"...p-pona... sina... pona..."
"sina pali ala la mi ken pakala e ale sina. o pona."

ona li luka e ijo lon ilo mi. mi kama ken kepeken nasin sin: "lawa pi ilo toki". lon la, mi wile ala kepeken ni. ni li ike suli! mi wile ala kama jan ni: tenpo pini la mi wile weka tan ona a! taso mi pali ala la ike suli li ken kama... anu seme... mi o toki tawa jan Nu.

mi ante e ilo mi tawa linluwi pi kulupu Epesi, kepeken nanpa lon lipu. mi pana e wile pi toki uta tawa jan Nu...

"jan Sepe o, seme li kama. sina kepeken ala kepeken linluwi pi kulupu Epesi?"
"kepeken... jan Nu o... ni li SEME a? sina toki e ni: lukin ale pi jan lawa li ike.. taso sina ni: MI kama jan lukin ike??"
"jan lawa li toki ala toki e ni: ni li pali sina."
"toki..."
"la o pali e ona. lon tenpo lili taso. tenpo kama la sina weka tan ni, li pali ala e pali ike ni."
"taso ni li ike tawa jan! mi wile ala lukin e toki len jan!"
"o pali taso. jan ante ale li pali. sina pali ala la sina kama e ike suli tawa sina."
"..."

mi kama jan ike mi.

tenpo suno sin li lon. mi lukin e ilo mi. mi wile ala luka e ona. mi sona e ike pi lon ona. sitelen "lawa pi ilo toki" li awen lon lawa mi. ni li ken ala lon. ni li ken ala li KEN ALA A. mi sona e ni: jan lawa li lukin e ale. taso mi kama jan lawa ni??

...ken la mi ken lukin lili...

mi luka e nena, kepeken wile, taso kepeken wile ala lon tenpo sama.

"o kama pona tawa kulupu Epesi tawa lawa pi ilo toki. sina kepeken ala nasin ilo ni lon tenpo pini. sina wile ala wile sona e nasin kepeken?"
"..wile."
"pona."

sitelen mute en nena mute li kama lon. ona li kule mute.

"sina wile open e pali pi tenpo suno la o luka e nena 'PALI'. sina wile pini e pali pi tenpo suno la o luka e nena 'PINI'. mute pali pi tenpo esun li sitelen lon leko ni. sina luka e nena 'PALI' la toki jan li open kama lon sinpin ilo, sama ni:"

"sina wile lukin e toki poka, la o luka e nena 'POKA', la toki poka li kama:"

"toki li ike la o luka e nena 'IKE'. toki li pona la o luka e nena 'AWEN', la sina ken awen pali. pona la sina sona e nasin kepeken pi ilo ni. wile sona ante la o toki tawa jan lawa sina. o pali pona!"

ni li kepeken wawa ala a... mi awen wile sona e ni: seme li kama lon tenpo ni: mi luka e nena 'IKE'. seme li kama tawa jan toki? pakala suli li kama ala kama tawa ona? mi tan pi pakala ni anu seme?? ona li ken ala ken moli?? tenpo wan la mi pilin e ni: ken la mi ken toki e ike ala taso, li toki e ni: toki jan ale li pona. taso mi sona e ni: mi jan sin la ken suli la jan lawa li lukin e pali mi... mi wile e ni taso: toki pi 'ike' ona li lon ala.

mi open pali. mi awen luka e nena 'AWEN' lon tenpo suli. toki mute li lon a. ni li toki pi ale ma. mi lukin e jan mute. mi sona ala e ni: jan ale ni li sona ala sona e ni: jan mute li lukin e toki ona, li awen tawa toki wan taso pi ike lawa, la ale ona li ken kama pakala...

mi awen luka e nena. tenpo ale la mi luka la mi wile ala a e ni: toki kama li 'ike' la mi o toki e ike ona.

mi pini e pali. pona la, tenpo suno ni la, toki ale li pona tawa lawa. nasa la, pali ni li kepeken wawa lili a, taso jan Nu li toki e ni: jan li kama jo e mani mute tan pali ni...

tenpo ni ale la mi lon selo tomo. taso mi wile lape la mi o tawa tomo. a, mi lukin e jan Kasu!

"jan Kasu o!"
"jan Sepe o, sina seme?"
"mi pona, mi pini pali. mi wile lape, taso kipisi tomo mi li lon seme?"
"a, o kama!"

mi tawa lon poka ona. ona li tawa insa tomo.

"kulupu Epesi li kama jo ala e jan sin lon tenpo suli, la, nn, mi sona pona ala e nasin... a, sina lukin ala lukin e kipisi tomo ni?"

ona li pana e luka ona tawa kipisi tomo wan. ona li lon monsi tomo.

"jan ala li lon ona, la o pana e lipu pali sina tawa lupa tomo la ona li kama kipisi tomo sina." "a, pona, sina pona."

mi tawa monsi tomo, li lukin e lupa. mi kama jo e lipu mi tan len mi, li pana e ona tawa ilo pilin lon lupa. lupa li pana e kalama, li toki e ni:

"jan Sepe o kama pona tawa kulupu Epesi. sina wile ala wile jo e kipisi tomo ni?"
"wile."
"pona. ni li kama kipisi tomo sina. sina ken open e lupa kepeken lipu pali sina."

mi pana sin e lipu mi tawa lupa la ona li open. mi tawa lon insa. kipisi tomo ni li sama kipisi tomo pi jan Kasu. tenpo ni la mi o lape. mi pana e lipu mi e ilo mi lon supa, li weka e len pali li pana e ona lon poka mi. mi pilin lape mute a.

tenpo suno sin, pali sin...

mi weka tan supa lape. jan Kasu li open e lupa mi.

"o moku e mani!"

...seme? mi weka tan kipisi tomo, li lukin e tomo e sinpin tomo e lupa ante. mi kama jo e ilo mi. ona li toki e ni:

seme a? mi pilin nasa. taso ante la mi o pali. mi luka e nena pi lawa pi ilo toki, li awen lukin e toki.

la jan pi wawa lukin li kama tawa mi. ona li wile toki tawa mi.

"a, jan Sepe, toki a!"
"..toki.."
"mi wile mute toki tawa sina, jan pona o!"
"seme?"
"mi wile pana e ni tawa sina. o moku e ni. ona li misikeke pona. misikeke ni li pona e ken pali pi jan pali."
"a.. sina.. pona.. mi ken pali kepeken ala ni."
"ala, sina o moku e ona. ni li wile tan jan ale pi kulupu Epesi."
"...pona..."

mi lukin e misikeke ona la misikeke li pana e pilin ike tawa mi. taso, mi moku e ona la

ona l

i pana e pil

in nasa taw

a mi, a, seme li l

on??

"sina pa

li e seme tawa

mi??"
"a, a, jan nasa o... sina pilin ala pilin e ni: mi sona ala e sina? sina kama lon tomo pali pi kulupu lawa pi ma Nasi, li alasa pakala e ale. sina kama lon kulupu ni kepeken ni! mi sona kin e toki sina tawa jan Nu. sina pilin ala pilin e ni: mi moli ala e sina lon tenpo ni? a a a a"
"a- ala- po

na la o ni ala!

sina PONA O N

I ALA O NI ALA M

I KAMA PALI E WILE AL

E SINA TASO O NI ALA. KI

N LA SINA SEME E

MI? TENPO LI NASA PIL

IN TAN SEME??"
"a a a, misikeke ni li misikeke lape. sina kama lape lon tenpo kama. sina kama lape ale..."

ALA. ALA ALA ALA ALA A

la- a...la... a... ala... a... s... seme...

...ni... ni li... ni li sitelen lape taso...

...a... ni li... pona...

mi weka tan supa lape. jan Kasu li open e lupa mi.

"jan Sepe o! sina seme?"
"mi... mi pona..."
"kute la sina pona ala..."
"...mi weka tan sitelen lape ike, ni li ale..."
"a a, sona."
"..."
"tenpo ni la, kulupu Epesi li seme tawa sina?"
"ona li... pona, pona a... pali li... pona."
"pona a! mi sona e ni lon tenpo open: pali ni li kama pona tawa sina."
"..."
"ante la, o pona!"

mi o open pali sin. mi lukin e ilo mi, li wile sona e ni: mi lon ala lon sitelen lape...

...lon ala, anu seme.

ante la, sama tenpo ale la mi o pa-"jan Nu li wile toki uta tawa sina"

a, seme!

"toki."
"toki, jan Sepe o. sina seme?"
"..mi pona. mi kama open pali."
"pona la, pali o pona mute ala tawa sina, a a. tenpo kama lili la sina ken pini."
"..lon.. a. mi awen pilin nasa tawa ni ale."
"mi sona, mi sona. jan ale li sama ni. taso jan ale li lukin e ma Nulan la ona li wile ala sona e ni: ma Nasi li lon. a a a."
"...jan Nu o... tan seme la sina ni? tan seme la sina wile weka e mi tan ma ni?"
"a.. tan ni taso: ona li ma ike. ma Nulan li pona. kin la ni li suli tawa pali mi. ma Nulan li wile jo e jan pona sama sina."
"ni la... sina pali lon lawa pi ma Nulan?"
"mi ni."
"sona.."
"ante la, o pali pona! pini pi tenpo esun la jan lawa li pana e mani tawa sina. ona li mute mute, sama ni: sina ken moku e ona. a a a!"
"SEME"
"mi... mi musi taso. o toki tawa mi lon tenpo esun kama tu. ni la mi ken kama sona e ni: lipu sina li kama ala kama wawa. o awen pona."
"pona... sina kin."

tenpo esun tu...

mi pali mute. mi pali mute mute a. kulupu Epesi li kama pona... pona lili.. tawa mi. mi awen sona e ni: pali ni li ike. li ike e jan a! mi toki e ike pi toki wan anu tu... mi pilin monsuta tan ni. taso ale o pona. mi kama wawa 'sin nanpa tu', ni li namako. toki pi jan Nu li lon: pali ni li pana e mani mute a...

mi wile sona e ni: seme li kama tawa pali mi pi tenpo pini... tawa jan pona mi... mi toki ala tawa ona lon tenpo mute. mi ken ala toki tawa ona. ilo mi li ken ala e ni. wile ona la jan ala pi kulupu Epesi li ken toki tawa jan pi lon ala kulupu Epesi... anu ijo sama ni... la jan ante li sona ala e kulupu.

mi o awen... tenpo esun kama la mi ken toki tawa jan Nu.

mi weka lape. tenpo suno ni li suli. mi kama ala kama weka tan ma ni? tenpo ni la mi kama sona e ni: toki ale pi jan Nu li lon ala lon.

mi weka tan kipisi tomo mi, li kama jo e moku e telo. mi moku, li lukin e ilo mi. mi pini la, mi o toki tawa jan Nu.

"jan Nu o! o toki e pona! seme li lon!"
"jan Sepe... o toki e ni: lipu sina la wawa seme li lon?"
"nn... ona li toki e... 'meso'."
"PONA A! tenpo ni la sina ken weka tan ma Nasi!"
"ni li lon ala lon a!"
"taso, sina awen wile kama e ken tan lawa. jan pi mute lili a li tawa li weka tan ma Nasi. tenpo mute la ni li tan utala. ni la sina o tawa lawa o toki e ni: sina wile weka tan ma Nasi tan pali utala."
"nn, taso, ona li sona e ni anu seme: mi pali utala ala."
"nn, o toki e ni: jan pona sina li pali utala la ona li wile e pona sina."
"..pona, mi ken ni. ...jan Nu o... mi wile sona e ni: lawa pi ma ni li wawa a. seme la ona li sona ala e ni: mi jan pali lon ala?"
"a a, jan ala li pilin e ni: jan li ken kama lon kulupu Epesi kepeken ala wile pi jan lawa."
"a.. taso.. mi weka tan tomo awen la ona li alasa ala alasa e mi?"
"ona li ken ala a! lawa la jan pi mute lili lili li ken tawa kulupu Epesi."
"sona. mi o tawa lawa seme la mi ken kama e ken?"
"o toki e ni tawa ilo tawa: 'o tawa tomo utala'. la o tawa insa o toki tawa jan."
"pona. sina pona.."

mi tawa ilo tawa. mi pilin monsuta lili. taso, tenpo ale la mi pilin monsuta, la ijo ike ala li kama. ni li pona.

"o tawa tomo utala."
"pona. mi tawa tomo utala e sina. ni li kepeken tenpo ilo suli wan. o moku e misikeke tenpo!"

sin la, mi moku e misik

eke tenpo.. a, pona. ni li tomo utala a! ona li pimeja pimeja...

mi weka tan ilo tawa la ni li kepeken wawa. misikeke tenpo li nasa e mi. taso ona li nasa suli ala, tan ni: tenpo pini la mi moku e ona wawa kin. mi kama lon poka lupa la ilo li toki e ni: mi o pana e lipu pali mi lon ilo pilin. mi pana e ona la ona li open. mi tawa insa tomo, li lukin e ni: kipisi tomo mute li lon poka. lon monsi la jan mute li toki. mi o toki tawa ona...

"a, toki..."
"a, sina jan seme?"
"mi... mi jan sin. mi jan Sepe."
"jan sin a? nasaa. sina wile e seme?"
"a, mi.. mi wile toki tawa lawa. mi wile kama jo e ken la mi ken weka tan ma ni.. ma Nasi."
"nn... tan seme?"
"a, mi- mi.. pali.. pali utala."
"ni li sona a a. sina lon tomo utala. taso pali li seme?"

pakala pakala PAKALA

"n. nn, mi.. ona li.. mi kama.. lukin.. e ijo. jan pona mi li wile e ni."
"jan pona sina li seme?"
"ona... ona li.. jan.. jan Sa! sina sona ala sona e jan Sa?"
"seme..."
"taso.. o toki e ni: lawa li lon seme?"
"o tawa lon sewi. kipisi nanpa tu wan."
"a.. sina pona.."

mi weka tan ona kepeken tenpo lili a. mi tawa lon sewi. kipisi tomo mute li lon. ni ale li sama tomo pali pi tenpo ale! mi lukin... a... nanpa tu wan li lon ni! lupa li open. mi o tawa...

"a, toki, jan..."
"mi jan Usami. o lon supa. nn... mi lukin ala e sina lon tenpo pini."
"l-lon.. mi, mi jan Sepe. mi jan sin... taso sin mute ala, a a, mi pali lon tenpo esun mute.."
"jan sin... nn... sina wile e seme?"
"a, mi wile weka tan ma Nasi tan.. pali utala."
"pali utala a.. pali seme?"
"mi.. lukin e.. e ma-"
"o pana e lipu pali sina."
"pona, o jo."
"nn.. jan Sepe.. wawa meso.. nn.. pona."

ona li luka e ijo lon ilo ona, la lipu mi li kama suno lukin.

"pona, ken li pana."
"a.. a sina pona."

mi weka tan-

"O AWEN!"
"..a.. s-seme.. seme a..."
"sina lon selo la o pali e sitelen kepeken ilo. mi wile lukin e selo pi ma Nasi. mi lukin ala lon tenpo. a a a."
"a... pona... mi... ken ni..."

a... pona... ni la mi kama sona e ni: selo pi ma Nasi la ijo li lon a... jan lawa li toki e ni. mi o weka tan tomo ni, o toki sin tawa jan Nu.

"o tawa tomo pali nanpa tu."
"pona. mi tawa tomo pali nanpa tu e sina. ni li kepeken tenpo ilo suli wan. o moku e misikeke tenpo!"

pona, mi kama lon tomo pali.. mi o toki tawa jan Nu..

"toki, jan Nu o! mi kama e ken.."
"pona! ni li tenpo pi suli nanpa wan! sina ken weka ale tan ma ni!"
"...jan Nu o, mi pilin monsuta..."
"..mi sona. ijo ni li monsuta a! taso mi lon poka sina."
"tenpo ni la seme?"
"tenpo ni la o kepeken ilo tawa o tawa ma Nulan a! ona li lukin e lipu sina."
"..pona..."
"taso o sona: ona li kepeken tenpo mute a. o misikeke tenpo pona!"

mi weka suli ala tan ilo tawa la mi kama sin lon ona sama.

"ilo tawa.. ilo tawa o tawa.. ma.. ma Nulan."

kipisi wan mi li toki e ni: ni li kama ala pali. ilo li tawa ala, li sona ala e toki sina.

kipisi ante li toki e ni: ni li kama ante e ale sina. sina kama weka tan pakala ale, tan ma ike, tan lawa ike.

kipisi ante li toki e ni: jan lawa li pali e ni ale tawa ni: ona li sona e ike sina, la ona li pana e sina lon tomo awen.

...

"o pana e lipu sina lon ilo pilDATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED

DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED DATA CORRUPTED

mi lukin e anpa mi la kon walo li lon. mi ken ala lukin e ma tan kon. mi pilin e pilin wawa. mi sona ala toki e ona. ale li kon walo. ilo tawa mi en mi taso li lon. mi lukin e ma pimeja lon weka.

mi... mi kama lon ni kepeken nasin seme? ..a.. a! ma Nulan! jan Nu! ona li lon seme?? mi lon seme?? ma Nulan li lon seme?? a.. ni li ma Nulan anu seme??

mi alasa weka tan supa ilo, taso, mi ken ala. noka mi li pakala anu seme? mi alasa.. tawa e ona.. taso ona li tawa ala! pakala, mi alasa kepeken wawa... a, pona..

jan Nu li toki e ni: ilo li kepeken tenpo mute.. tenpo ale la ilo li toki e tenpo tawa, taso ona li weka tan lawa mi... tenpo li seme a? ilo o.. ...SEME. SEME A. NI LI SEME? NI LI MUSI SEME? A, NI LI MA MOLI ANU SEME? JAN SEWI? SINA LON SEME?

SEME LA MI MOLI ALA?? TENPO ESUN TU WAN LI TAWA? JAN NU O SINA LON SEME?

...

...taso, ni li ma Nulan a...

...

mi awen tawa tenpo ni: ilo li pini tawa. mi pilin nasa suli li ken tawa e sijelo mi kepeken wawa mute taso. mi lukin e kon lon anpa, li pilin monsuta lili. mi lukin e ma Nulan, li wile sona e ni: seme li lon ona.

mi kama nasa suli ala la mi sona e ni: tenpo esun tu wan li tawa ala; ilo li pakala taso. kepeken wawa la, mi weka tan ilo tawa. mi tawa lon ma pimeja. noka mi li pilin e kiwen lili mute. kon wawa li lon. mi lukin e poka, jan ala li lon. mi lukin ala e ijo sama ni lon tenpo. nasin tawa li lon ala, kiwen ni taso. kiwen mute a li lon. tan open, tawa pini pi lukin mi la ale li kiwen lili pimeja lon poka ale. monsi mi taso la kon walo li lon. mi lukin mute e ma, li pilin e anpa kepeken luka mi. mi lukin sin e poka li alasa e jan. jan ala li lon. ma ni li kama monsuta lili pilin.. mi open tawa noka. noka mi li nasa pilin li pali pona ala, taso mi tawa. kon walo li kama lon weka. mi ken lukin e ma taso lon poka ale. lon weka la, mi lukin e jan.

A, JAN NU!

"JAN NU O! JAN NU O!"

mi tawa ona.

"JAN NU O!"
"A, JAN SEPE?"
"NI LI MI!"

ona li tawa mi, kin.

"jan Nu o seme li lon? tan seme la ilo mi li toki e tenpo pakala? tan seme la misikeke tenpo ni li pakala a e sijelo mi? ni li ma Nulan ala ma Nulan?? jan ale li lon seme? tan seme la ale li kiwen?? o pana e sona a!"
"jan Sepe, ni li tenpo pona ala tawa wile sona. o kama."
"mi kama ala. o pana e sona tawa mi. sina kama e mi tawa ma kiwen tan seme?? sina toki pakala a! ma Nulan li lon ala!"
"MI TOKI E NI: O KAMA."

ona li kama jo e mi kepeken wawa luka. ona li tawa e mi lon tomo. mi lukin e monsi mi la ma li kama pakala seli suli li kama lupa.

"SEME A?"
"ni li ilo utala pi pakala wawa. ma Nulan en ma Nasi li utala. tan ni la ni ale li kiwen. pona la sina moli ala."
"..."

mi lukin e selo kepeken lupa tomo. ilo utala ante li kama li pali e lupa suli lon ma.

"..tan.. tan seme?"
"tan ijo."
"..."
"kin la, ilo sina li toki ala e tenpo pakala. tenpo suno mute tu li tawa. sijelo sina li pakala tan ni: sina awen lon ma wan lon tenpo mute li tawa ala."
"...mi... mi moli ala moli?"
"jan Sepe o, sina moli ala. misikeke tenpo li lape wawa e sina. sama soweli ma, ona li ken lape lon tenpo mun mute li moku ala li tawa ala li pali ala."
"...mi... lape... lon tenpo suno mute tu..."
"lon."
"jan Nu o-"
"jan Sepe. sina kama sona e ale lon tenpo kama lili. tenpo ni la o kama lon poka mi."
"..."

jan Nu li tawa lon kipisi tomo anpa. ona li lon anpa ma. ona la ilo tawa li lon. mi en jan Nu li kama lon ilo tawa. ona li toki tawa ilo:

"o tawa ma suli."
"pona. mi tawa ma suli e sina. ni li kepeken tenpo ilo lili luka luka tu."

kepeken tenpo a.. kulupu Epesi la mi moku e misikeke tenpo lon tenpo ale..

"mi sona e ni: sina lukin e ilo utala lon tenpo nanpa wan sina la ni li ken ike lili, a a a."
"a.. a a.."
"ma Nulan li kama pona tawa sina."
"pona la ni... taso.. misikeke tenpo li lon ala anu seme.."
"ona li lon.. ona li ike tawa sijelo la ilo li toki ala e ni: 'o moku e misikeke tenpo'."
"taso ni li kama e mani tawa ona.."
"a a, jan Sepe o, ni li ma Nulan. lawa li wile ala e mani taso. ona li wile e pona jan."
"..a a, ni li ken ala lon.."

mi awen. tenpo esun mute la mi awen ala. kulupu Epesi la ale li kepeken tenpo lili.

"a, jan Sepe o!"
"seme?"
"o sona e ni kin: ma Nulan la toki mute li lon! toki pona taso ala!"
"toki... mute? jan li olin e uta ona anu seme?"
"a a, sina sona ala. toki, toki ante, sama toki Inli, toki Mewika, toki Epanja... taso ale li pona, jan mute a li sona e toki pona."
"toki.. Inli? mi pilin e ni: jan ala li toki Inli, ona ale li moli lon tenpo pini!"
"ni li lon ala a! toki pi lon ala tan ma Nasi..."
"a a a... tan seme a?"
"nn?"
"tan seme la ona li toki e ni? seme li pona lon ni?"
"open la, jan li sona e ni: toki ante li lon. ni la ona li kama toki e toki ante. ni la ona li ken toki tawa jan pi ma ante, li kama sona e 'sona ike'.. a a a."
"ni li nasa mute..."

"a, o lukin! ni li ma Nulan suli!"
"a..."

mi lukin e ijo sin nasa a! jan mute mute li lon. telo mute li tawa. sewi li laso ilo. suno li wawa. mi ken lukin e ona, taso ona li pakala e oko mi... ma la kasi mute pi kule ale li lon! jan mute li tawa noka.. ma mi la sina ken ala lukin e ni a...

"sina pilin seme?"
"...ma ni li pona..."
"a a a, o kama. sina o pilin e pona pi moku pi ma Nulan!"

mi en ona li tawa tomo moku suli. mi wile toki e nimi ona, taso, mi sona ala... ona li nimi pi toki ante nasa...

mi tu li tawa insa, li kama lon supa moku. jan li kama li toki kepeken toki nasa, la jan Nu li toki tawa ona:

"a a, toki! ni jan pona mi, Sepe. ona sona e toki pona taso. ona tan Nasi."
"a a, Nu o musi ala.."
"mi musi ala! ona tan Nasi, mi kama e ona.."
"seme a?? SINA TAN NASI??"

toki pona ona li... nasa lili...

"mi.. lon.. mi tan ma Nasi. toki."
"ni ken ala a! tan Nasi??"

jan ante li kama lukin e mi ale...

"ona sama seme? lon ala lon la jan pi Nasi li ken ala kepeken linluwi?"
"..seme? ala a. linluwi li wile lon tenpo ale tawa pali ale... taso linluwi la sina ken ala lukin e sona pi ike tawa lawa."
"nasa a! sina awen lon Nasi lon tenpo seme?"
"..tenpo.. ale a.. mi-"
"a, jan ni li tan Nasi?"
"l-lon.. mi tan.. 'Nasi'."
"ona seme??"
"sina seme lon Nasi?? sina kama kepeken seme?"
"jan tan Nasi??"
"mi-"
"that guy's from Nasi?? sina tan Nasi??"
"ona tan Nasi!!" "Dude I don't know toki pona but don't fall for it. Get out of here." "mi ken ala ken pali e sitelen ilo lon poka sina?"
"JAN ALE O! lon! mi tan ma Nasi! ni li suli ala!"

mi lukin e jan Nu, li toki tawa ona.

"a a, jan Nu o, jan sina li musi a."
"a a a, mi sona. mi kama e jan tan ma Nasi lon tenpo pi mute lili... jan ale li wile lukin e jan pi ma Nasi.. a a a a. ona li olin e sina."
"nasa..."
"ante la, o awen. mi kama esun e moku."
"la sina wile e.. one large pizza, two lemonades, anything else?"
"that's it thanks!"
"...seme?"

nasa... nasa a...

"jan Sepe o! moku li kama! o moku e telo ni! ona li pona a!"
"a.. ni li seme?"
"ni li telo kili! ni li lon ala lon ma Nasi??"
"lon ala... a ni li pona suli a!"
"anu seme!"

mi tu li moku e moku pona!

"a, jan Sepe o..."
"seme?"
"moku pi ma Nulan en moku pi.. kulupu pi tenpo pini.. la seme li pona nanpa wan?"
"a a... ona tu li pona mute... mi sona ala."
"pfft did you just compare our food with Epesi's?"
"they probably spike it with some shit"
"seme?"
"a a, o moku pona. kate don't talk about epesi in public you know this is like. top secret government shit"
"my baddd I forgot"
"..."

mi tu li pini moku, li kama weka.

"mani seme li wile?"
"dude are you kidding you just came back from Nasi mi wile ala e mani tan sina."
"noo come on how much?"
"no actually you just passed out for like a month in an ilo tawa. this one's on me."
"..okay thanks!!"

mi tu li weka tan tomo moku, li tawa lon nasin tawa... mi awen pilin nasa suli. mi lon ma nasa! jan li toki e toki nasa li pali e ijo nasa li... li pona...

"...jan Nu o..."
"seme?"
"mi open sona e sina... tawa tenpo ni... la ijo ale li.. 'weka tan ma Nasi'. mi kama sona pona ala e sina! ni la o toki! sina seme?"
"mi jan Nu!"
"a a, mi sona. taso sina seme?"
"..."
"..."
"...kala li pona tawa mi..."
"kala?"
"lon... mi olin e ni: mi kama e kala tan telo kepeken palisa."
"kala... tan telo.. a.. ma Nasi la jan li ken ala ni..."
"A, NI LI LON! mi weka sona! ni la mi pana e sona tawa sina! ni li pona a tawa sina!"
"a a, pona. pilin mi la ni li musi. mi ken ala pali e ijo mute lon ma Nasi, anu seme... mi pilin pona tan tenpo kama ni: mi ken pali e ona..."
"ni li lon a! ma Nasi li pakala e ijo mute kepeken nasin lawa ike ona.. telo li kama jaki mute sama ni: kala li moli!"
"lon a... ni li ike..."
"ike a... sina pilin ala pilin e ni lon tenpo: sina wile utala e ona.."
"utala..? a, mi sona ala. nn, seme la jan li toki pona kepeken nasin nasa lon ma ni?"
"a, nasa ala, ante taso. ma ante la jan li toki kepeken nasin ante. ale li pona. ante ni li ken kama suli mute la nasin toki tu li kama toki ante tu. ni li kama lon ni: toki Inli en toki Mewika li kama ante mute la ona li kama toki tu. jan pi toki Inli li ken ala sona e toki Mewika."
"ni li nasa... la... nasin pi ma Nulan la nimi 'ma' li lon ala anu seme? 'jan tan Nasi' a a a..."
"a a a, ona li lon. taso nimi ijo la sina wile ala pana e nimi lon monsi. sina ken toki e 'Nasi' taso. sina ken toki e ni: mi Nu."
"a.. a a, ni li musi tawa mi... a a, Nu o..."
"a a a, seme a?"
"sina toki tawa meli ni.. lon tomo moku.. la mi kute e nimi 'Epesi'... meli ni li sona ala sona e kulupu Epesi?"
"a, sona.. ona li jan pona mi. la mi toki e ijo pi pali mi tawa ona. taso jan ante ala li sona."
"a.. ni li.. ken pakala lili anu seme.."
"ken... ken a... ona li jan pona mi la.. pona la ale li pona."
"mi wile ala e ni: lawa pi ma Nasi li 'moli tan tan sijelo' e jan pona sina... a a"
"A A A O PINI E UTA SINA."
"nimi ona li seme?"
"kate"
"seme"
"a a a. sina ken toki e.. jan Ke."
"pona, a a. sina kama sona e jan Ke lon seme?"
"aa.. nnn... tenpo pini suli la... mi en ona li kama sona lon tomo sona sama. ni la mi open sona e ona. ona li kama pali lon tomo moku ni la mi tawa ona lon tenpo ale..."
"pona a... tomo sona pi sona seme?"
"..."
"..."
"sona kala"
"A A A, kala li pona mute tawa sina.."
"a a a, ona li pona..."
"...tenpo ni la seme?"
"sina pilin lape ala lape?"
"a.. lape..."
"mi kin... tenpo suno kama la sina ken kama e tomo tan lawa... tenpo suno ni la sina ken lape lon tomo mi."
"a, sina pona. ...ni li sama kulupu Epesi..."
"a?"
"mi kama lon open la jan wan... nn.. jan Kasu.. li toki e ni tawa mi: 'tenpo suno kama la sina o kama e lipu pali la sina kama jo e kipisi tomo, taso tenpo ni la o lape lon kipisi mi'."
"a..."

mi tawa tomo pi jan Nu, kepeken ilo tawa. taso ilo tawa ni li ante. ona li suli mute li jo e jan mute lon insa ona. jan Nu li toki e ni: ilo tawa ni en ilo tawa pi tenpo ale la, ilo ni li pona suli tawa kasi. ni li pona tawa mi. ona li toki e ni kin: jan li pali e ilo tawa ni lon tenpo pini a. ni li nasa tawa mi.

mi tawa insa tomo. sin la, mi lukin ala e ijo sama ni lon tenpo. sinpin tomo en supa tomo li tan kasi. lupa lukin li lon. kule mute li lon! tomo li suli mute.

"sina pilin seme tawa tomo?"
"ni li.. nasa.. pona."
"a a. tomo pi ma Nasi li moli kon e jan, anu seme."
"moli.."
"o kama o lukin e kipisi tomo lape!"
"kipisi.. tomo lape.. pona.."

mi tu li tawa lon kipisi tomo lape ona. ona li suli a.

"a, wawa!"

mi lukin e poka. ale li pona lukin.

"...sina toki e ni: ma Nulan li pana e tomo tawa mi. ona li sama ni anu seme?"
"sama!"
"ni li nasa pona a.. ma ni li pona."
"ona li pona a! ante la.. mi ken pana lukin e ale tomo lon tenpo kama. tenpo ni la mi wile lape.."
"mi kin a.. mi awen pilin... pakala a.. a a"
"aa, mi sona. mi kin."
"sina.. kin.. sina kin li kama lon ma Nulan kepeken nasin seme? tenpo pini la sina lon ma Nasi..."
"mi kin li kepeken ilo tawa a. taso mi kepeken mute la pilin nasa li kama lili."
"pona.."
"a, tenpo lap-"
"taso.."
"..."
"taso.. sina kepeken ilo tawa la... mi pali lon tenpo esun tu tan seme? mi ken ala ken kama lon poka sina?"
"ken ala. ilo li lukin e sijelo jan lon ilo, li kama weka e sina."
"..a.. mi sona."
"ni la, tenpo lape ala tenpo lape, a a a."
"tenpo lape, a a. o lape pona."
"sina kin."

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

mi weka lape. palisa suno li kama lon oko mi. ona li pana e pilin pona tawa mi. jan Nu li lon poka mi ala. mi lukin e poka la mi lukin ala e ona.

mi weka tan supa lape, li tawa lili e sijelo mi. ni li kepeken wawa lili tawa tenpo pini pi nasa misikeke.

mi weka tan kipisi tomo, li lukin e ni: jan Nu li pana e moku lon supa.

"o kama moku!"
"a.. sina kama e moku a?"
"kama. pali mi la, mi jo e tomo e moku kin kepeken mani ala!"
"seme aa... nasa!"

mi tu li pini moku la, mi pana e wile sona.

"jan Nu o... sina toki e ni: ma Nulan li pana e tomo tawa mi. mi ken ni kepeken nasin seme?"
"a, o awen lili taso. tenpo ni la sina ken lon tomo mi. tenpo esun kama la sina ken kama jo e tomo."
"...ni li wile ala wile sina? mi wile ala pakala e sina tan ni: mi lon tomo."
"a a, sina pakala e ala. ale li pona. tenpo mute la mi lon tomo pali."
"..pona.. ni li wile sina la.."

ni li nasa lili pilin tawa mi.. taso ale li pona.

"a, tenpo ni la mi o tawa pali. o awen pona! sina wile moku la telo en moku li lon ilo lete."
"pona. o pali pona. sina pona."

jan Nu li weka la mi taso li lon tomo. mi tawa lili lon tomo, li lukin e kipisi tomo ale. mi tawa sin lon kipisi tomo lape, li lukin e poka. lipu mute li lon supa lipu.

"a, lipu lon ni li ken musi."

mi lukin e lipu ale, li alasa e lipu pona. mi lukin e lipu mute pi nasin lawa, e lipu musi mute, e lipu moku. mi kama jo e lipu musi wan pi toki pona. nimi ona li 'jan usawi'. lipu li lili. mi tawa, li kama lon poka pi lupa lukin tomo. mi lukin e selo tomo, li lukin e waso lon sewi, e soweli lon nasin tawa.

mi lukin e lipu lon luka mi. mi open e ona, li lukin e toki lon insa. mi pini kepeken tenpo lili. mi kama jo e lipu ante tan supa lipu. nimi ona li 'ni li nasin'. lipu ni li suli tawa lipu ante. mi kama lon supa, li open e lipu ni. mi lukin e ale pi lipu ni kepeken tenpo. tenpo mute ala la mi lukin e lipu pi ilo ala. taso lukin ni li pona tawa mi. kin la, tenpo mute ala la mi ken pini e ale lipu lon lukin wan. taso tenpo ni la mi jo ala e pali, la mi jo e tenpo mute.

mi pini lukin e lipu. tenpo ni la mi o seme? mi sona ala...

tenpo ilo mute li tawa. suno li weka tan sewi. mi wile pali e ij- a! lupa li open! jan Nu li kama sin!

"jan Nu o! toki!"
"toki."
"sina seme?"
"mi pona. sina pali e seme lon tenpo ni ale? a a."
"a, mi lukin e lipu."
"..seme? lipu seme?"
"kipisi tomo lape la mi lukin e ijo tan supa lipu sina."
"SEME? SINA LUKIN E SEME?"

mi pilin monsuta lili tan ni: jan Nu li toki utala e mi. tenpo ale la.. lukin la.. jan Nu li pilin pona.

"..mi lukin e.. lipu 'jan usawi'.. e lipu 'ni li nasin'."
"a... pona..."

jan Nu li pana e kon tan uta ona. mi pilin nasa lili...

"..ante la.. mi jo e moku!"
"a, pona."

mi tu li open moku.

"..mi wile sona e ijo lili.."
"o pana e wile sona sina!"
"ma Nulan li open lon tenpo seme?"
"tenpo sike ale ale pini. jan Jon Sosaja li open e ma sin tawa ni: ijo ale o pona e jan. jan li pona nanpa wan lon ma."
"wile pona a.."
"wile pona a.. jan Jon li wile e ni: jan ale li utala tawa pona jan."
"jan lawa pi ma Nulan li seme?"
"jan Pesiten Taje!"
"a.. ona li pona anu seme?"
"pona a!"
"pona.."

mi pini moku. mun li kama lon sewi. mi wile lape, li kama lon supa lape.

"o lape pona, jan Nu o!"
"sina pona. o ni kin."

tenpo suno mute li tawa. tenpo mute la mi awen taso lon tomo li pali e ijo ala. tenpo pini la ni li ken ala lon tenpo. ni li nasa lili tawa mi. jan Nu li kama tan pali.

"o kama pona."
"sina pona."

mi tu li moku.

"pali li seme tawa sina?"
"pona. ona li tawa pona pi ma Nulan la ona li pona."
"a.. taso pali sina li seme? sina seme lon lawa pi ma Nulan?"
"mi lawa e kulupu utala li pali lon ona. ni li awen e ma Nulan tan utala. tan ni la mi kama e sina, kin."
"a.. kulupu utala a.."
"lon a.. kulupu utala pona."
"..sina toki e ni: tenpo kama la mi kama jo e tomo. ni li kepeken nasin seme?"
"o pilin monsuta ala tan ni. mi pana e sona lon tenpo pona."
"..pona.."
"..."
"kin la.. mi wile sona e ni: nasin seme la mi ken kepeken linluwi lon ilo?"
"a, ike la.. tenpo ni la o ni ala. ilo li pana e sona lukin tawa lawa pi ma Nasi la ona li sona e ni: sina weka tan ma Nasi. ni li ike tawa sina anu seme?"
"a.."
"tenpo kama la mi ken weka e ni. taso tenpo ni ala."

mi tu li pini moku. tenpo lili li tawa la mi lape.

mi weka lape la mi lukin e ni: jan Nu li lon poka li sitelen lon lipu. ona li lukin e mi la ona li weka e lipu.

"a, suno pona, jan Sepe o!"
"sina pona."
"mi tawa tomo moku. o kama! mi wile toki e ijo."

mi telo e mi, li len e len ma, li tawa lon poka pi jan Nu. mi tu li tawa tomo moku pi tenpo pini.

"a, Nu! en sina.. Sepe, anu seme? o kama po-"
"private room please"
"oh okay.."
"and just get us whatever"
"okay then.. surprise you huh?"
"i dont care just get something"

jan Ke li tawa e mi tu tawa tomo ante. mi toki tawa jan Nu:

"seme li lon?"
"o awen."

jan Ke li open e lupa la mi tu li tawa insa. jan Nu li pini e lupa.

"seme? mi sona ala e ni: tomo moku ni li jo e tomo ni. tomo ni li seme?"
"tomo pi jan tu taso. tan ni: sina pilin pona li lukin ala e jan ante nasa! sama tenpo pini.."
"a.. ale li pona.. mi ken lon poka jan.. a a."
"ni li pona nanpa wan."
"..pona.."

mi pilin nasa lili. jan Nu li toki ala, li awen. tenpo lili li tawa la jan Ke li open e lupa.

"two i dont care just get somethings for you :p"
"make sure nobody comes in here."
"okay. Nu what's going on?"
"leave."
"chilllll okay i'll leave."

jan Ke li kama e moku e telo. jan Nu li pini wawa e lupa. mi sona ala e toki, taso kute la, jan Nu li toki utala lili, taso ni li ken ala lon. ante la ona li pilin pona lon tenpo ni, li kama toki tawa mi:

"jan Sepe o lukin! moku pona a.. mi kama e ona tan sina!"
"..sina.. sina pona! wile mi la ni li pali suli ala tawa sina-"
"suli ala a! sina wile e ijo la, mi ken pali e ona. mi ken pali e ale tawa sina."
"jan Nu o.. ni li.. nasa. sina toki nasa tan seme?"
"mi toki e ni taso: sina jan pona mi. sina pona tawa mi."
"..pona.. sina kin.."
"o moku!"
"mi moku, a a."

mi tu li moku lili, la jan Nu li awen lukin e ilo ona.

"la..."
"seme?"
"jan Sepe o, sina toki e ni: sina wile e tomo."
"..ni li lon.."
"tawa ni la ijo lili wan li wile, la lawa li pana e tomo pi wile ale sina."
"..pona.."
"wile taso la, sina kama lon kulupu utala pi ma Nulan."
"..."
"..."
"SEME"
"ni taso a! sina utala tawa pona ma, li kama e pona tawa jan ale!"
"sina musi, musi ike anu seme."
"mi musi ala."
"mi wile ala lon kulupu utala! sina nasa ala nasa??"
"..."
"..."
"tan seme? tan seme la sina wile ala?"
"mi wile ala utala. mi wile e ni: jan ala li utala."
"taso ni li ken ala. tenpo ale la jan li utala. ni li nasin jan. utala sina li pini e utala ike pi jan ante. sina utala tawa pona."
"ni li lon ala a! sina pilin e seme? sina nasa. o pini toki tawa mi!"

jan Nu li luka e ijo lon ilo ona.

"..jan Sepe o.."
"seme."
"mi jan pona sina.. sina jan pona mi.. la.. mi ken wile e pona lili tan sina, anu seme?"
"..'pona lili' ni li ken ala ni: mi kama lon KULUPU UTALA."
"..jan Sepe o.."

jan Nu li open pilin ike suli. kute la telo li kama tan oko ona, taso mi lukin ala e telo.

"sina sona e ni: mi kama e sina tan ma Nasi tan pali mi."
"mi sona.."
"pali mi la.. mi o kama e jan lon kulupu utala. mi ken ala ni e sina la.. mi kama weka tan pali.. mi kama tomo ala.. mi kama mani ala.."
"tan seme la sina toki ala e ni tan open?? mi awen kama ala lon kulupu utala sina a!"
"jan Sepe o.. seme la sina ni e mi.."
"..jan Nu o.."
"..."
"..."

jan Nu li lukin e anpa, e ilo ona. ona li luka sin e ijo. ona li kama jo e kon. ona li lukin e mi, taso tenpo ni la ona li pilin ike ala, li pilin utala.

"jan Sepe o. mi wile ala pali e ni."
"..pali e seme"
"sina kama e ni tawa sina. ni li tan sina."
"seme li tan mi??"
"sina kama pali lon kulupu utala. lon tenpo pimeja ni. sina ni ala la sina kama tomo ala. mi weka e sina tan tomo mi. sina kama lon nasin tawa. sina sona ala e toki Inli la sina ken ala kama jo e pali mani. sina kama moli."
"SEME?? JAN NU O??"
"kin la, tenpo suno tu wan kama la sina kama ala tawa mi, li toki ala e ni: sina wile lon kulupu utala, la mi pana sin e sina tawa ma Nasi. lon ma Nasi la.. ona li kama moli e sina, tan ni: sina alasa weka tan ma Nasi."
"JAN NU?? SEME LI KAMA?? SEME LI KAMA TAWA 'SINA JAN PONA MI'??"
"jan pona ale li wile e ijo tan jan pona ona.. taso sina pona ala e mi."
"NI LI LON ALA! SINA TOKI NASA!"
"sina. pakala. sina lon ma nasa, lon poka pi jan nasa, ona li toki e toki nasa. sina ken ala pali e ijo! kepeken ala mi la, sina kama moli!"
"...mi... ..mi-"
"mi pana e ALE tawa sina. mi kama e sina tan lawa pi ike nanpa wan, la sina ken ala pali e wile mi?"
"..."
"sina pali e wile mi la, ale li kama pona. mi ken pilin e ni: ni li kama ala lon tenpo. ale sina li kama pona. sina kama wawa, li jo e mani ale, li jo e tomo pona. jan li lukin e sina la ona li pana e luka ona lon lawa ona. taso sina ni ala la... nasin li ken.. ante lili."
"sina monsuta jan. SINA MONSUTA JAN."
"🎶 mi monsuta.. e si-"
"o pini."
"na la.. o weka 🎶"
"O PINI. LON LA MI NI! MI WEKA! O AWEN IKE!"
"o jo."

jan Nu li pana e lipu tawa mi.

mi weka tan tomo moku kepeken tenpo lili. mi lukin ala e monsi mi. mi tawa wawa li weka tan poka tomo.

mi lukin e nasin tawa. jan mute li tawa noka. mi pana e kon tan uta mi. mi pilin monsuta suli. mi sona ala e pali. mi pakala. mi pakala suli. mi pakala suli a. mi ken pali e seme? awen la toki ale pi jan Nu li nasa e mi.

mi.. mi sona ala. tenpo pini lili la jan Nu li jan pona, li wile e pona taso tawa mi. taso tenpo ni la ona li kama monsuta tan seme? ..ken la ona li monsuta ala... ken la toki ona li lon. ken la mi o pali lon kulupu utala.

mi jo ala e ken ante. mi ni ala la ona li pana e mi tawa ma Nasi. ma Nasi la mi sona e ni: mi kama moli.

suno li tawa, li kama weka. mun li lon sewi. mi pilin lape ala, taso mi o lape. mi alasa e supa li kama lon ona. mi alasa lape. oko mi li open wawa.

oko mi li open kepeken tenpo ala. mi lukin e poka. suno li open kama tan anpa. jan pi mute lili li tawa lon nasin tawa. mi lukin sin e lipu lon luka mi. mi wile e moku, e telo.

lon lipu la toki ni li sitelen:

mi weka tan supa, li toki tawa jan:

"toki a, sina sona ala sona e ni: tomo ni li lon seme?"
"o lukin.. sina lukin e tomo ni? o tawa ona la o tawa poka o awen tawa. ni la sina ken alasa e tomo ni."
"pona.. sina pona.."

mi open tawa lon nasin. tenpo ale la noka mi li pilin e ma la ona li wile pini tawa. lawa mi la ijo ale li utala. toki lawa wan li toki e ni: mi o weka tan jan Nu. ona ante li toki e ni: jan Nu li pali e pali ona taso, li wile ala ike. taso ona li toki ike tan ni taso: sina kama lon kulupu lawa la ona li ken awen e pali mani ona. ona ante li toki e ni: ale li kama pona lon tenpo ni: sina pali e wile pi jan Nu taso.

mi tawa mute, li moku ala, li wawa ala. tenpo mute li tawa. mi wile kama sama tenpo pini. mi wile kama sama tenpo pi ma Nasi.

mi lukin e tomo pi jan Nu. luka mi en noka mi en ale sijelo mi li tawa wawa. mi kalama lon lupa kepeken luka, taso mi wile insa e ni: mi pakala e lupa.

"a, jan Sepe!"
"...mi wile pali lon kulupu utala."
"ni li pona! ni li jan Sepe pi sona mi!"
"..."
"o awen lili, mi o len e len pali.."

ona li pini e lupa.

ona li open sin e lupa li weka tan tomo.

"pona.. o kama lon poka mi. tomo utala li lon poka!"

ona li tawa. mi tawa lon poka ona. sinpin ona la ona li pilin pona. mi tu li kama lon poka pi tomo suli a. ona li pana e luka ona lon ilo pilin la lupa li open. mi tu li tawa lon insa. jan mute li lon insa, li lukin e mi tu.

jan Nu li pana e luka ona la ilo pi tawa sewi li open. mi tu li tawa insa. ona li luka e nena '3' la ilo li tawa sewi mute. ona li pini tawa, la lupa li open. mi tu li weka tan ilo li tawa kipisi tomo ante. mi sona ala e ni: jan Nu li tawa seme e mi.

jan Nu li pana e luka ona la lupa tomo li open. lon insa la jan wan li lon. len ona li laso ilo li mani lukin. ona tu li open toki.

"toki a!"
"toki! ni Sepe. mi kama e ona tan Nasi. ona kama pali lon kulupu utala. mi jo e pali ante, sina tu o toki."

jan Nu li weka tan tomo, la mi en jan ni taso li lon.

"toki, Sepe! pali sina li pona a tawa Nulan. o lon supa!"
"..."
"o lon supa a!"
"pona.."

mi kama lon supa. awen la lawa mi li ken ala sona e ni: seme li kama.

"sina wile pali lon kulupu utala?"
"..wi- wile..."
"tan seme la sina pilin ike? o pona! tenpo ni la. mi pana e ken tawa sina. sina o anu e ken pi wile sina."
"sina ken... jan misikeke, li ken jan ilo.. jan pi tomo tawa utala.. jan pi waso utala.. sina sona ala sona pali e ijo tan ni?"
"...mi sona ala..."
"a... ni la sina o jan utala."
"j-jan utala?"
"tan seme la sina pilin monsuta? sina wile ala la sina kama lon ni tan seme?"
"..ala.. ala, mi wile."
"ni la mi wile e sona lili taso.."
"..."
"nn, nimi? ni Sepe, mi sona e ni... suli tenpo?"
"..tenpo.. tenpo seme?"
"suli tenpo! tenpo pi mute seme la sina lon?"
"a.. mute tu.."
"pona.. sina awen lon Nulan lon tenpo seme?"
"...tenpo... tenpo esun wan.."
"tenpo esun wan a? sina kama lon tenpo esun pini la sina wile pali lon kulupu utala? ni nasa. nasin pi tenpo ale la ni ken ala, taso, Nu toki e ni la sina ken."
"..."
"nn.. sina toki e toki seme?"
"toki.. toki pona taso.."
"nn.. tomo sina li lon seme?"
"a.. mi jo ala e tomo. jan Nu li toki e ni: mi pali lon kulupu utala la mi kama jo e tomo."
"aa.. sona. ni nasin pi tenpo pini, tenpo ni la Nulan pana ala e tomo tan kulupu utala. taso... Nu toki e ni la mi ken ni. pona. ni sona wile ale! o pana e ilo sina."

mi pana e ilo mi tawa ona la ona li lukin e ilo mi e ilo ona.

"mi alasa e sona pi wawa sijelo.. awen lili.."
"..sona.. pi wawa sijelo?"
"a. pona. jaki sijelo suli ala lon tenpo mun luka wan.. oko sina li pona.."
"sina lukin e seme a?"
"noka wawa.. luka wawa.. pona. o awen lili."

ona li weka li kepeken lupa lon monsi ona. lon insa la ona li toki tawa jan, li luka e nena mute lon ilo suli. ilo li kama pana e len pali. len pali la nanpa suli li lon. ona li kama sin tan lupa li pana e ilo mi e len tawa mi.

"o jo e ilo sina, o jo e len pali. kin la, mi pana e sitelen luka sina lon ilo, la sina ken open e ilo kepeken luka sina."
"sina.. sina pona. mi o seme lon tenpo ni?"
"sina sin la, tomo sina li lon insa pi tomo suli ni. o tawa supa nanpa tu, tomo jan li lon ona. o open e tomo kepeken luka sina. tenpo suno ale la o lon tomo pi kama wawa. ni open lon tenpo ilo nanpa luka tu wan li pini lon tenpo luka luka luka tu. o pali pona."
"..sina pona.."

mi weka tan lupa li kama kepeken ilo pi tawa sewi. mi pana e luka mi lon ilo pilin la ilo li kama. mi tawa insa li luka e nena '2'. ilo li pini tawa la mi weka tan ona li lukin e tomo. kipisi tomo mute li lon. ona li sama lili kulupu Epesi. taso supa en sinpin li walo. lupa ale li laso ilo.

mi tawa lon lupa ale li alasa pana e luka mi lon ona. kepeken tenpo suli la, mi alasa e tomo mi. mi pana e luka lon ona la lupa li open. mi tawa lon insa tomo.

mi alasa lili e pilin mi, taso ona li wawa. mi kama lon supa lape. lawa mi li awen alasa sona e ale.

mi kama.. moli e jan? lon la.. ma Nasi la.. mi pilin e ni: pali mi li ike. taso ni ale li ante e pilin mi. mi wile e pali pi ma Nasi.

lon la, tenpo ni li pona ala tawa toki ni. tenpo li lon poka pi tenpo ilo nanpa luka tu wan la mi o alasa e moku, o tawa pi kama wawa. mi len e len pali, li weka tan tomo mi li alasa e ni: nasin seme la mi ken kama jo e moku.

mi kepeken ilo pi tawa sewi li tawa supa nanpa wan. ona la mi lukin e ni: jan mute li moku. mi lukin e ni kin: jan li pana e luka ona lon ilo la ilo li pana e moku. mi kin li alasa ni, la moku li kama.

moku ni li pona a. ken suli la, tan ni: mi moku ala lon tenpo mute a. mi kama lon supa li moku wawa e moku kepeken tenpo lili. tenpo ni la mi o tawa tomo pi kama wawa, taso mi sona ala e ni: ni li lon seme? mi toki tawa jan wan.

"toki a."
"toki"
"mi sin.. li wile tawa tomo pi kama wawa. sina sona ala sona e nasin?"
"o tawa anpa ma. supa nanpa weka tu."
"a.. sina pona."

mi tawa supa nanpa weka tu. mi weka tan ilo la, mi lukin e ni: jan ala li lon. taso leko suli li lon. lon supa pi sewi leko la ilo pilin li lon.

mi pana e luka mi lon ona la sinpin tomo li kama lupa li open, supa tomo li open tawa, sama ilo tawa. ni li monsuta e mi a!

"o kama pona, Sepe o. mi tawa tomo pi kama wawa nanpa wan."

ilo li open tawa poka sinpin. tenpo li tawa la mi lukin e ma lon weka. jan li lon ma li tawa lon linja jan.

"276, you're late. Get in line."
"s-seme?"
"O TAWA LON LINJA."
"p-pona. mi ni.."

tomo pi kama wawa la jan li toki wawa mute tawa kulupu jan la mi ale o pali. mi awen tawa tenpo ni: mi ken weka tan ni. tenpo li awen tawa la jan ale o pona kiwen o awen pona.

tenpo pi kama wawa li pini. mi tawa tomo mi. sijelo mi li pakala a. lawa mi kin. ilo tawa wan li tawa e ale pi kulupu jan tawa supa nanpa weka tu. ona la mi tawa supa nanpa tu li tawa tomo mi. mi open e lupa, li lukin e insa. mi pana e kon tan uta mi. suno li awen lon sewi, taso mi wile lape. mi pana e lawa mi lon supa lape la

mi weka lape. supa lape li pana e kalama wawa. mi lukin e ilo mi la tenpo li tenpo ilo nanpa luka tu. mi weka tan supa lape la kalama li pini. mi telo e mi la mi tawa tomo moku li moku. mi wile kama lon tenpo pona, la jan lawa utala li pakala ala e mi. mi tawa supa nanpa weka tu li luka e ilo la ona li tawa. tenpo ni la mi lukin e jan pi mute lili taso.

tenpo li kama tenpo ilo nanpa luka tu wan la kama wawa li open. jan ale li pali wawa. mi ale li tawa wawa li sike li palisa li leko li supa li toki ala. kama wawa li pini la mi wile a lape.

mi tawa tomo mi. mi wile toki e ni: mi pilin nasa. taso tenpo ni la lawa mi li ken ala pilin e ijo. mi kama lon supa.

a, mi kute e kalama tan lupa. jan Nu li open e ona.

"..."
"a, Sepe o!"
"'Sepe'? sina kama toki pona Nulan tawa mi anu seme.."
"a a, ni o kama pona tawa sina."
"sina wile e seme. mi wile lape. pona la o weka."
"pona, mi weka. mi wile sona e ni taso: sina seme."
"o weka lon tenpo ni."
"o awen pona."

jan Nu li weka la lupa li pini. mi tawa supa lape li lape.

tenpo esun mute li tawa. tenpo esun nanpa wan la mi wile moli a. tenpo esun kama li pona lili tawa tenpo esun pini. sijelo mi li kama ken awen lili tan pakala. lawa mi kin. sama tenpo ale la, mi kama e moku tan tomo moku li tawa tomo pi kama wawa.

"jan utala ale o! tenpo suno ni la sina kama sona e nasin kepeken pi ilo utala. o kama jo e ilo utala tan ma."

a, ni li sin. mi kama jo e ilo tan anpa mi.

"o lukin e sike ni. ilo utala sina li ken tawa ona. o lukin e sinpin ilo. ona jo e sitelen. sina luka e sike lon sinpin la ilo kama lukin e sike. ilo lukin e ijo wile la o luka e nena! o open!"

mi lukin e ilo mi li pali e toki pi jan lawa. mi luka e sike la ilo mi li kama tawa. mi luka e nena la ilo li pana e kalama wawa li pakala e sike. lon la, tenpo pini la mi pilin ala e ni: ni li kepeken wawa lili sama ni..

mi ale li kepeken ilo utala lon tenpo suli la jan lawa li toki e ni:

"pona. tenpo ni la sina o kama sona e ni kin: nasin seme la sina kepeken ilo pakala. ni kepeken wawa lili a. anpa sina la ona lon. o kama jo e ona. sina luka e nena la ona open toki e tenpo. tenpo ilo lili tu wan li tawa la ona pakala e ma! wile la o pakala e leko ni ale kepeken ilo pakala. o open!"

mi kama jo e ilo pakala tan anpa mi. mi luka e nena li pana wawa e ilo tawa leko. ilo li pakala e leko kepeken tenpo lili. ni li wawa a.

kama wawa li pini. tenpo suno ni la mi pilin lape suli ala. mi tawa tomo mi, li open pilin lili... ken la jan Nu li toki lon. ken la ni li pona. ken la ni li pona e ja-