kijetesantakalu en ma kasi

lipu ni la jan li pali e sitelen kepeken luka ona ala; ona li nasin e ijo lon ma lon li sitelen e ijo lon kepeken ilo sitelen lukin.

lipu #1:

• leko #1: sitelen kijetesantakalu pi len ko li suwi lukin li lon weka tomo. ona li open e luka ona li toki e ni: “a, tenpo suno sin!”
• leko #2: kijetesantakalu li toki: “mi pilin pona mute!”
• leko #3: kijetesantakalu: “mi wile kama tawa ma kasi”
• leko #4: kasi mute li lon. kasi suli laso wan li jo e sike kule mute. kijetesantakalu: “a kule mute. a pona mute.”

lipu #2:

• leko #1: ma kasi la kijetesantakalu li kama lon poki telo lili. sitelen kiwen pi kala laso li lon insa, kin la kiwen mute en kasi kala li lon insa. kijetesantakalu li toki: “toki, kala o.” kala li toki: “toki, kijetesantakalu o. sina wile ala wile moku e telo?”
• leko #2: kijetesantakalu li toki: “mi wile. pona a.” kala li toki: “mi olin e telo lete.”
• leko #3: kijetesantakalu li kama lon poka pi sitelen waso. sitelen waso li tan kiwen pimeja pi loje lili li lipu sinpin. monsi pi ona tu palisa pi kasi suli li lon: soko jelo lili li lon ona. kijetesantakalu li toki; “toki, waso o.” waso li toki: “toki, kijetesantakalu o.”
• leko #4: kijetesantakalu: “mi wile moku e sike kiwen. o pana e ni tawa mi.”

lipu #3:

• leko #1: waso: “mi wile ala pali e sike kiwen. sina o weka!”
• leko #2: kijetesantakalu li toki: “a mi weka”, li weka wawa li tawa sewi pi kasi suli. lukin la ona li kasi sama tan ni: soko jelo li lon sitelen kin.

lipu #4:

• leko #1: kasi suwi mute li lon selo suli palisa kiwen sike. kasi li nasin ni: kulupu pi linja laso mute li tawa lon ale pi selo suli la pini linja la kasi walo jelo suwi li lon. kijetesantakalu li lon sewi, lon selo suli kiwen. kijetesantakalu li toki: “kasi kule! a pona.”
• leko #2: nena kijetesantakalu li lon poka pi kasi walo suwi wan. kijetesantakalu li toki: “kon li suwi. ni li olin mute.”

lipu #5:

• leko #1: kijetesantakalu li kama lon poka pi sitelen kiwen sin. sitelen ni li soweli pi monsuta lili lukin: palisa lili mute utala li lon ale pi monsi ona sike. soweli pi monsuta lili li toki: “toki, kijetesantakalu o!” kijetesantakalu li toki: “a sina soweli monsuta!”
• leko #2: soweli li toki: “mi monsuta ala. mi ike ala. o lukin!” kijetesantakalu li toki: “mi lukin! a sina soweli pona. sina pona mute.”
• leko #3: kijetesantakalu li kama lon kiwen sitelen sin. sitelen li soweli ni: tenpo mute la, jan li awen e soweli ni lon insa tomo; soweli ni li wile mute e poka jan li kute pona e jan li ken pilin wawa e ijo kepeken nena. sitelen ni la sijelo soweli li suli, sama palisa. kijetesantakalu li toki: “toki!”
• leko #4: soweli li toki e ni: “kama pona!” kijetesantakalu li toki: “sina soweli suwi.”

lipu #6:

• leko #1: kijetesantakalu li lukin e kiwen walo nasa. kijetesantakalu li toki: “ni li seme?”
• leko #2: kijetesantakalu li kama lukin e ale pi kiwen walo. kiwen walo li sitelen e jan ni: ona li lape. lukin tu ona li pini. kijetesantakalu: “a jan pi lili mute! toki!”
• leko #3: kijetesantakalu: “toki! sina lape ala lape?”
• leko #4: kijetesantkalu li kama lon poka pi kute jan li toki: “mu, mu, mu.”

lipu #7:

• leko #1: kijetesantakalu li lukin sin e jan li toki: “jan lili li lon selo kiwen! a!”
• leko #2: kijetesantakalu li open sin e tawa ona. “mi weka.”
• leko #3: kijetesantakalu li awen lon palisa sewi pi kasi suli. monsi la, sina ken lukin e tomo waso lili pi kasi suli. kijetesantakalu li toki: “tenpo ni la mi lukin mute mute e ijo pi ma kasi!. mi wile lape!”
• leko #4: kijetesantakalu li open e luka ona li lukin e sina li toki: “tawa pona!”