utala pi lipu musi li open a!

pali seme li wile?

o pali e lipu musi sin o pana e ona tawa mi lon tenpo wile.

lipu musi mi o seme?

suli la nasin tu li lon!

• nasin nanpa wan li lipu musi lili
• nasin nanpa tu li lipu musi suli

sama la
lipu o musi o kepeken toki pona taso o kepeken toki nimi taso.

ante la
lipu lili la mute nimi li wile lili tawa TWA/tu wan ale (ale ale ale).
lipu suli la mute nimi li wile suli tawa LA/luka ale (ale ale ale ale ale).

sina o pana e pali sina taso. o pana ala e pali pi jan ante. lipu suli la sina ken pali kulupu e lipu lon poka pi jan ante.

mi o toki seme lon lipu musi?

o toki e ijo pona pi wile sina! o toki e ma nasa mun pi lon ala, e kijetesantakalu pi wawa seli, e tomo lipu pi sona ale e ijo sin wawa musi tan lawa sina tan pilin sina! taso o ike ala. o sewi ala e nasin ike. o toki wawa ala e unpa e pakala sijelo. kin la, o musi. lipu sina o pona ala tawa lipu Wikipesija. o pana sona taso ala. o toki wawa ala e nasin nanpa sin pi toki pona.

lipu sin o ijo sin pi toki pona o ante toki ala tan lipu pi toki mama ante

o lukin e utala ni pi tenpo pini: utala pi lipu suli pi toki lili. pali sina o sama.

tenpo seme la mi wile pana e pali?

tenpo mun kama nanpa tu. lon sike #MAML/mute ale mute lukawan lon tenpo mun #LT/luka tu lon tenpo suno #LLL/luka luka luka.

mi wile pana e pali lon seme?

o pana e lipu sina tawa mi (jan Lakuse) kepeken ilo Siko (@raacz106) anu kepeken ilo lipu (tokipona.sasalin@gmail.com).

sona pi wile pana

o pana e sona. o pana

• e nimi sina pi toki pona
• e nimi sina pi ilo Siko (sina jo ala e ni la ale li pona)
• e nimi pi pali sina
• e sona ni: lipu sina li tawa utala pi lipu suli anu utala pi lipu lili
• e toki ni: pana pi lipu sina li kepeken nasin lawa CC-BY-SA 4.0

nasin toki li ken sama ni:

“toki a, jan Lakuse o. mi jan Kulase. nimi mi pi ilo Siko li @kulase. nimi pi lipu mi li ‘jan pona mi.’ ona li tawa utala pi lipu lili. pana pi lipu mi li kepeken nasin lawa cc-by-sa 4.0!”

(ni li nasin mi taso. nasin mute toki li ken pona)

utala li seme?

pana pali li pini la ale li kama lukin e lipu ale li kama toki e pilin ona. mi kama sona e ni: lipu suli seme en lipu lili seme li pona nanpa wan tawa kulupu?

ni la, o pana ala e pali sina tawa jan mute o toki ala e insa pi pali sina tawa jan mute. tenpo lukin la ale o sona ala e ni: jan seme li pali e ijo seme.

tenpo lukin li pini la sina ken toki e ale!

mi wile sona e ijo ante seme?

sina pana e lipu tawa mi la, sina ken e ni: nasin CC-BY-SA-4.0 li lawa e esun pi pali sina. ni li ike tawa sina la o pana ala!

sina pana e pali li kama wile ante e ona la sina ken pana sin e ona tawa mi!

utala pi lipu suli la sina ken pana e lipu mute! utala pi lipu musi lili la o pana e toki wan taso.

o sona e ni: mi kama awen e lipu sina lon ilo ni la jan ale li ken lukin e ona. ni li ike tawa sina la o pana ala!

mi wile e ni: ilo sona toki li pali e lipu mi

sina o pali e lipu sina. taso sina wile pona e pali sina kepeken ilo sona toki la mi wile sona e ni: tan seme la sina wile kepeken ilo sona toki?

ken la sina pilin e ni: ken sina pi toki pona li lili. ni la o toki tawa mi. mi ken alasa e pakala toki pi lipu sina. o kepeken ala ilo. ilo li sona pona ala e toki pona lon tenpo ni.

ken la sina pilin e ni: ken sina pi pali musi li lili. sina wile suli e ken musi sina kepeken ilo toki sona. o sona: sina ken a toki tawa mi. taso ken la sina wile ala ni. mi ken sona e pilin. ike a!

sina kepeken ilo sona toki lon pali sina la o toki a e ni. o len ala e sona ni. jan mute li pilin nasa tan pali ilo ni li wile ala lukin e lipu pi pali ilo. ni la, o toki e ni: sina kepeken ilo. mi pana e lipu sina la mi pana e toki ni kin tawa jan lukin.

tenpo sike pini nanpa tu la jan wan li pali kepeken ilo Sasipisi e lipu tawa suli soweli. lipu li musi.

mi wile kepeken sitelen pi nimi ala lon pali mi

o toki tawa mi e wile sina. mi ken ala e sitelen mute. wile mi la sitelen kule li namako. toki nimi o suli nanpa wan.

ken pali mi li wawa mute ala. sina ken pana e pona seme tawa mi?

ken sina li lili la mi (pi jan Lakuse) li ken pana e pona kepeken nasin tu wan.

#W) ken sina pi toki pona li lili la o sona e ni: mi ken lukin e lipu sina. mi lukin la ken toki e ni: nasin sina pi toki pona li pona ala pona. mi ken toki e pakala sona e pakala nasin.

#T) ken la ken sina pali li lili lon nasin ni: a! sina wile pali, taso sina weka e pali lon tenpo mute. sina weka e sona ni: pali li lon. sina weka e sona ni: sina wile pali e lipu. mi ken pana e pona ni: mi toki e wile pali lon tenpo mute tawa sina. sina wile e pona ni la o toki tawa mi!

#TW) ken la ken sina pi musi lipu li lili. ken la sina ken toki pona wawa li wile pali e lipu. taso sina sona ala a e ni: lipu o toki e seme. sina wile la mi en sina li ken toki e ijo musi ken a!